1-2. (a) Wai na planti man long nau i pilim hatwok long trastim ol man i gat namba? (b) Yumi bai skelim wanem ol samting long dispela atikol?

 LONG nau planti man i pilim hatwok long trastim ol man i gat namba. Ol i luksave olsem ol man i gat namba long sait bilong lo na politik, ol i save mekim wansait pasin long ol maniman na ol man i gat pawa na ol i no mekim pasin fea long ol rabisman. Em risen na Baibel i tok: “Man i bin bosim man na i bringim hevi tasol long em.” (Ekl. 8:9) Na tu, sampela bikman bilong lotu i mekim ol pasin nogut na dispela i mekim ol manmeri i bel hevi, olsem na sampela man i lusim pasin bilong trastim God. Em as na taim wanpela man i orait long yumi stadi wantaim em long Baibel, yumi mas wok hat tru long helpim em long strongim pasin bilong em long trastim Jehova na trastim ol man em i makim long i go pas long yumi.

² Em tru olsem ol Baibel sumatin i mas lain long trastim Jehova na oganaisesen bilong em. Tasol yumi ol Kristen husat i bin stap insait long tok i tru inap planti yia, yumi no ken lusim tingting olsem oltaim wei bilong Jehova long mekim ol samting em i nambawan tru. Sampela taim ol samting i kamap inap traim pasin bilong yumi long trastim wei bilong Jehova long mekim ol samting. Long dispela atikol, yumi bai stori long 3-pela samting we inap traim bilip bilong yumi: (1) taim yumi ritim sampela stori bilong Baibel, (2) taim yumi kisim daireksen i kam long oganaisesen bilong Jehova, na (3) taim yumi bungim ol hevi long bihain.

3. Hau na sampela stori bilong Baibel inap traim pasin bilong yumi long trastim Jehova?

 ³ Taim yumi ritim Baibel, ating yumi bai gat ol askim long pasin Jehova i mekim long sampela manmeri na sampela disisen em i  bin mekim. Olsem, long Buk Namba, yumi ritim stori long Jehova i tok long ol i mas kilim i dai wanpela man Israel bikos em i bin bungim paiawut long de Sabat. Long Buk 2 Samuel, yumi kisim save olsem planti handret yia bihain, Jehova i lusim sin bilong King Devit maski em i bin mekim pasin adaltri na kilim narapela man i dai. (Nam. 15:32, 35; 2 Sml. 12:9, 13) Yumi inap ting olsem, ‘Wai na Jehova i fogivim Devit maski em i kilim i dai man na mekim pasin adaltri, tasol em i tokim lain Israel long kilim i dai dispela man husat i no mekim bikpela rong?’ Bilong kisim bekim bilong dispela askim, yumi bai stori long 3-pela samting yumi mas tingim taim yumi ritim Baibel.

4. Hau na Stat 18:20, 21 na Lo 10:17 i strongim pasin bilong yumi long trastim ol disisen bilong Jehova?

⁴ Sampela taim Baibel i no kamapim olgeta infomesen bilong wanpela stori. Olsem, yumi save olsem Devit i bel hevi nogut tru na em i tanim bel long ol pasin nogut em i bin mekim. (Sng. 51:2-4) Tasol dispela man Israel husat i brukim lo bilong Sabat, em i wanem kain man tru? Em i sori tru long pasin em i bin mekim? Em i brukim ol lo bilong Jehova long pastaim? Em i bin sakim ol tok lukaut bilong Jehova long pastaim? Baibel i no stori long dispela samting. Tasol yumi ken save tru olsem: “Oltaim [Jehova] i save mekim pasin i fea.” (Lo 32:4) Em i save long olgeta samting i bin kamap na dispela i stiaim ol disisen bilong em. Em i no larim tok bilong ol man, wansait pasin, o ol narapela samting i stiaim disisen bilong em—em ol samting i save stiaim yumi ol man long holim tingting i no stret. (Ritim Stat 18:20, 21; Lo 10:17.) Taim yumi wok long kisim planti save moa long Jehova na ol lo bilong em, yumi bai strongim moa yet pasin bilong yumi long trastim ol disisen bilong em. Maski wanpela stori bilong Baibel i mekim na yumi gat sampela askim em yumi no inap save long bekim bilong en long dispela taim, yumi save gut tru long God bilong yumi olsem em “i save bihainim stretpela pasin long olgeta samting em i mekim.”​—Sng. 145:17.

5. Olsem wanem sin i mekim na sampela taim yumi no mekim pasin fea? (Lukim tu blok “ Sin i Mekim na Yumi No Holim Stretpela Tingting Long Pasin Fea.”)

⁵ Sin i mekim na yumi no save mekim pasin fea oltaim. God i wokim yumi i kamap olsem em yet, olsem na yumi laik tru long lukim ol man i mekim pasin fea long ol narapela. (Stt. 1:26) Tasol yumi gat sin, so yumi no inap long skelim gut olgeta samting, maski yumi ting olsem yumi  save long olgeta samting i bin kamap. Tingim eksampel bilong Jona, em i belhat nogut tru taim Jehova i mekim disisen long sori long ol manmeri bilong Ninive. (Jna. 3:10–4:1) Tasol gutpela samting i bin kamap. Winim 120,000 lain Ninive i bin tanim bel na God i no kilim ol i dai! Maski Jona i no bin skelim gut ol samting, Jehova i skelim gut olgeta samting na mekim pasin fea long lain Ninive.

6. Wai na i no gat wok long Jehova i tokim yumi long risen bilong ol disisen bilong em?

⁶ I no gat wok long Jehova i tokim yumi long risen bilong ol disisen bilong em. Em tru olsem Jehova i bin larim sampela wokman bilong em long pastaim long kamapim tingting bilong ol long ol disisen em i bin mekim o ol disisen em i laik mekim. (Stt. 18:25; Jna. 4:2, 3) Na sampela taim, em i tokim ol long risen bilong disisen bilong em. (Jna. 4:10, 11) Maski i olsem, i no gat wok long Jehova i tokim yumi long risen bilong ol disisen em i mekim. Em i Krieta bilong yumi, so i no gat nid long em i kisim tok orait long yumi paslain o bihain long em i mekim wanpela disisen.​—Ais. 40:13, 14; 55:9.

7. Wanem samting inap givim hatwok long yumi, na bilong wanem?

⁷ Yumi olgeta i wanbel olsem oltaim Jehova i save mekim ol samting i stret. Tasol samting i hatwok long yumi em olsem, yumi bai trastim ol man em Jehova i makim long i go pas long yumi o nogat? Ating yumi inap kisim tupela tingting olsem ol dispela man i gat namba long mekim wok insait long oganaisesen bilong Jehova, ol i no bihainim daireksen ol i kisim long Jehova, ol i bihainim tingting bilong ol yet. Ating sampela man long taim bilong ol man i raitim Baibel, ol i bin holim kain tingting olsem. Tingim ol eksampel yumi bin stori long en long  paragraf 3. Wanpela wanblut bilong man Israel husat i bin brukim lo bilong Sabat, ating em inap ting olsem tru tru Moses i kisim tingting bilong Jehova long dispela samting paslain long ol i kilim wanblut bilong em i dai? Uria bilong lain Hit, em meri bilong em i bin mekim pasin adaltri wantaim Devit, ating wanpela pren bilong em inap ting olsem Devit i yusim namba bilong em olsem king long abrusim panismen i stret long em i kisim. Jehova i trastim ol man em i makim long i go pas long mekim ol wok insait long oganaisesen na long kongrigesen. So sapos yumi no trastim ol dispela man, yumi soim olsem yumi no trastim Jehova.

8. Wanem samting i wankain long tok i stap long Aposel 16:4, 5 na hau ol kongrigesen i mekim wok long nau?

⁸ Long nau, Jehova i stiaim oganaisesen bilong em long graun long rot bilong “gutpela wokboi i gat savetingting.” (Mat. 24:45) Wankain olsem lain gavening bodi long taim bilong ol aposel, dispela wokboi i lukautim lain bilong God long graun olgeta na ol i givim daireksen long ol elda long ol kongrigesen. (Ritim Aposel 16:4, 5.) Na ol elda i bihainim ol dispela daireksen insait long ol kongrigesen. Yumi soim olsem yumi trastim wei bilong Jehova long mekim ol samting taim yumi bihainim daireksen yumi kisim long oganaisesen na ol elda.

9. Wanem samting inap mekim na yumi pilim hatwok long sapotim disisen bilong ol elda, na bilong wanem?

⁹ Sampela taim yumi inap pilim hatwok long sapotim disisen bilong ol elda. Olsem, long ol yia i go pinis, ol senis i bin kamap long planti kongrigesen na ol sekit. Sampela taim, ol elda i askim ol pablisa long joinim narapela kongrigesen bikos ol i luksave olsem i gat planti spes long sampela Haus Kingdom. Sapos ol i askim yumi long joinim wanpela nupela kongrigesen, yumi inap pilim hatwok long lusim ol pren na ol wanfamili bilong yumi. Yu ting Jehova i save toktok stret long ol elda na tokim ol long wanem kongrigesen em ol wan wan pablisa i ken go long en? Nogat. Dispela inap mekim na yumi pilim hatwok long bihainim daireksen yumi kisim long  ol elda. Tasol Jehova i trastim ol elda long mekim ol kain disisen olsem, na yumi tu i mas trastim ol. *

10. Olsem Hibru 13:17 i kamapim, wai na yumi mas bihainim tok bilong ol elda?

¹⁰ Wai na yumi mas bihainim tok bilong ol elda na sapotim ol disisen bilong ol, maski ol disisen ol i mekim i no wankain long samting yumi tingting long en? Bikos taim yumi mekim olsem, yumi strongim pasin wanbel namel long lain manmeri bilong God. (Efe. 4:2, 3) Ol kongrigesen i stap strong taim olgeta insait long kongrigesen i mekim pasin daun na bihainim ol disisen em lain elda i kamapim. (Ritim Hibru 13:17.) Na bikpela samting moa, yumi soim Jehova olsem yumi trastim em taim yumi bihainim tok bilong ol man em i trastim na makim bilong lukautim yumi.​—Apo. 20:28.

11. Wanem samting inap helpim yumi long strongim pasin bilong yumi long trastim daireksen yumi kisim long ol elda?

¹¹ Yumi ken strongim pasin bilong yumi long trastim daireksen yumi kisim long ol elda taim yumi tingim olsem ol i save beten long holi spirit i ken stiaim ol taim ol i mekim ol disisen bilong kongrigesen. Na tu, ol i save skelim gut olgeta stiatok bilong Baibel i stret long samting ol i toktok long en, na ol i skelim tu ol gaidlain em oganaisesen bilong Jehova i kamapim. Ol i laik tru long amamasim Jehova na lukautim gut ol manmeri bilong God. Ol dispela bilipman i save olsem God bai skelim ol long pasin ol i mekim long ol sipsip bilong em. (1 Pita 5:2, 3) Tingim dispela: Long nau ol man i no stap wanbel bikos long skin kala, lotu, na wok politik, tasol lain bilong Jehova i stap wanbel long lotuim dispela wanpela trupela God. Dispela samting i kamap bikos Jehova i blesim oganaisesen bilong em!

12. Ol elda i mas skelim wanem ol samting bilong save sapos tru tru wanpela Kristen i tanim bel o nogat?

¹² Jehova i trastim ol elda, olsem na em i givim bikpela wok long ol long helpim kongrigesen long i stap klin. Sapos wanpela Kristen i mekim bikpela rong, Jehova i laik bai ol elda i skelim sapos dispela Kristen i ken stap yet insait long kongrigesen o nogat. Ol elda i mas mekim sampela wok painimaut; ol i mas painimaut tu olsem dispela Kristen i bel hevi tru long pasin em i mekim o nogat. Ating em i tok em i tanim bel, tasol tru tru em i heitim pasin em i bin mekim? Em i tingting strong long no ken mekim gen dispela pasin? Sapos ol poroman nogut i bin kirapim em long mekim dispela pasin, em i redi long lusim ol dispela poroman? Ol elda i save beten long Jehova na skelim olgeta samting i kamap, na ol i skelim tu tok bilong Baibel na tingting dispela Kristen i gat long pasin em i bin mekim. Bihain, ol bai mekim disisen long dispela Kristen bai stap yet insait long kongrigesen o nogat. Sampela taim, ol i mas rausim dispela Kristen long kongrigesen.​—1 Kor. 5:11-13.

13. Yumi inap tingting planti long wanem samting sapos wanpela pren o wanblut i raus long kongrigesen?

¹³ Wanem samting inap mekim na dispela i traim pasin bilong yumi long trastim ol elda? Sapos Kristen husat i raus em i no wanpela gutpela pren o wanblut bilong yumi, ating yumi bai redi long ekseptim disisen bilong ol elda. Tasol olsem wanem sapos dispela Kristen em wanpela gutpela pren bilong yumi? Yumi inap tingting planti olsem ating ol elda i no bin skelim gut olgeta samting, o yumi inap ting olsem ol i no bihainim pasin bilong Jehova long skelim ol samting na mekim disisen. Wanem samting inap helpim yumi long holim stretpela tingting long disisen ol elda i mekim?

14. Wanem samting i ken helpim yumi sapos yumi tingting planti long disisen bilong ol elda long rausim wanpela long kongrigesen?

¹⁴ Yumi mas tingim olsem pasin bilong rausim man long kongrigesen em arensmen Jehova i  kamapim, na dispela arensmen i helpim kongrigesen na inap helpim tu man i bin mekim rong. Sapos Kristen i mekim bikpela rong na em i no tanim bel na em i stap yet insait long kongrigesen, em inap kirapim ol narapela long mekim ol pasin em ol Kristen i no ken mekim. (Gal. 5:9) Na tu, ating em i no inap luksave olsem em i bin mekim bikpela rong, na em i no inap traim long senisim tingting na pasin bilong em na bai Jehova i ken orait long em. (Ekl. 8:11) Yumi ken bilip tru olsem taim ol elda i skelim sapos wanpela Kristen i mas raus long kongrigesen o nogat, ol i tingim dispela olsem wanpela bikpela samting tru. Wankain olsem ol hetman bilong lain Israel bilong bipo, ol elda i luksave olsem ol “i no mekim wok jas bilong man, nogat, [ol] i mekim wok bilong Jehova.”​—2 Sto. 19:6, 7.

15. Wai na yumi mas trastim daireksen i kam long Jehova long nau winim olgeta narapela taim bipo?

¹⁵ Pinis bilong haptaim nogut nau yumi stap long en i wok long kam klostu tru, olsem na yumi mas trastim wei bilong Jehova long mekim ol samting winim olgeta narapela taim bipo. Wai? Long taim bilong traipela hevi tru, yumi inap kisim ol instraksen em yumi pilim olsem i no stret, i no inap helpim yumi, o i no gat as bilong en. Em tru olsem Jehova i no inap toktok stret long yumi. Ating em bai yusim ol man em i makim long i go pas long yumi long givim daireksen long yumi. Long kain taim olsem, yumi mas sakim pasin bilong holim tupela tingting olsem, ‘Tru tru dispela daireksen i kam long Jehova o ol brata i go pas long mekim wok i bihainim tingting bilong ol yet?’ Long dispela taim bihain, yu bai trastim Jehova na oganaisesen bilong em? Tingting yu gat long nau long daireksen yu kisim long ol brata bai helpim yu long bekim dispela askim. Sapos yu trastim daireksen yumi kisim long nau, yu bai mekim olsem tu long taim bilong traipela hevi tru.​—Luk 16:10.

16. Klostu nau wanem samting bai kamap na dispela inap traim pasin bilong yumi long trastim kot bilong Jehova?

¹⁶ Yumi mas skelim tu tingting yumi bai holim long kot Jehova bai mekim long pinis bilong haptaim nogut bilong nau. Long nau, yumi hop olsem planti man em ol i no lotuim Jehova i mas kam insait long tok i tru, dispela i makim tu ol wanfamili bilong yumi. Tasol long taim bilong Armagedon, long rot bilong Jisas, Jehova bai mekim laspela kot long samting bai painim ol manmeri. (Mat. 25:31-33; 2 Tes. 1:7-9) Yumi no inap makim husat lain Jehova bai marimari long ol na husat lain em i no inap marimari long ol. (Mat. 25:34, 41, 46) Yumi bai trastim kot bilong Jehova o yumi bai stop long mekim wok bilong em bikos yumi no wanbel long ol disisen bilong em? I klia tru olsem yumi mas strongim pasin bilong yumi long trastim Jehova long nau na  dispela bai helpim yumi long trastim em tru long bihain.

17. Wanem ol gutpela samting bai kamap long pinis bilong haptaim nogut bilong nau taim Jehova i mekim kot?

¹⁷ Piksaim long tingting yumi bai pilim olsem wanem long nupela taim God bai kamapim taim yumi lukim ol gutpela samting i kamap long kot bilong Jehova. Lotu giaman, ol bikpela bisnis i gat gridi pasin, na lain politik em ol i daunim ol man na kamapim planti hevi long bipo yet na i kam inap long nau, olgeta dispela lain bai pinis olgeta. Ol hevi bilong helt, hevi bilong kamap lapun, na dai bilong ol lain em yumi laikim tru, olgeta dispela samting tu bai i no stap moa. Satan na ol dimon bai kalabus inap wan tausen yia. Ol hevi i kamap long pasin bikhet bilong ol bai pinis olgeta. (Rev. 20:2, 3) Long dispela taim bihain, yumi bai amamas tru olsem yumi trastim wei bilong Jehova long mekim ol samting!

18. Yumi inap kisim wanem ol skul long eksampel bilong lain Israel olsem i stap long Namba 11:4-6 na 21:5?

¹⁸ Olsem wanem? Taim yumi stap long nupela taim God bai kamapim, yumi bai bungim sampela hatwok we inap traim pasin bilong yumi long trastim wei bilong Jehova long mekim ol samting? Tingim samting i bin kamap bihain tasol long lain Israel i lusim wok sleiv long Isip. Sampela bilong ol i stat long komplein bikos ol i tingim bek ol naispela kaikai ol i kisim long Isip, na ol i no amamas long mana em kaikai Jehova i givim long ol. (Ritim Namba 11:4-6; 21:5.) Yumi bai holim kain tingting olsem bihain long traipela hevi tru i pinis? Yumi no save long hamas wok yumi bai mekim bilong stretim bek ol samting i bagarap long graun na mekim graun i kamap ples Paradais. Ating bai i gat planti wok long mekim na pastaim dispela inap kamapim sampela hatwok long yumi. Long dispela taim, bai yumi komplein long ol samting Jehova i givim long yumi? Wanpela samting yumi ken bilip tru long en em olsem: Sapos yumi amamas na tenkyu long Jehova long ol samting em i givim long yumi long nau, yumi bai mekim olsem moa yet long bihain.

19. Bai yu stori olsem wanem long ol bikpela poin bilong dispela atikol?

¹⁹ Oltaim wei bilong Jehova long mekim ol samting i stret. Yumi mas bilip tru long dispela samting. Na tu, yumi mas trastim ol man em Jehova i makim ol bilong karimaut ol instraksen bilong em. Oltaim yumi mas tingim tok Jehova i mekim long rot bilong profet Aisaia, em i tok: “Yupela bai kamap strong sapos yupela i stap isi na trastim mi.”​—Ais. 30:15.