Mi lap, long wanem, pren bilong mi i no luk olsem wanpela lotuman. Mi askim em olsem: “Yu gat wanem save long Baibel?” Em i no hariap long bekim askim bilong mi. Bihain, em i tokim mi olsem mama bilong em i wanpela Witnes Bilong Jehova na em i lainim sampela samting long em. Mi laik save moa, olsem na mi tokim em long stori moa long mi.

Mipela i stori long nait olgeta. Pren bilong mi i tokim mi olsem Baibel i tok Satan em i hetman bilong dispela graun. (Jon 14:30) Ating yu bin save long dispela tok long laip olgeta bilong yu, tasol em nupela save long mi. Mi bin harim olsem wanpela gutpela God i bosim graun. Tasol mi pilim olsem dispela i no stret taim mi skelim ol samting long sindaun bilong yumi ol man. Mi gat 26 krismas, tasol mi lukim planti samting nogut i kamap na dispela i mekim mi bel hevi.

Papa bilong mi em i wanpela pailot long United States Air Force. So taim mi liklik, mi save olsem bai i gat nuklia woa; ol ami i redi tasol long tromoi nuklia bom. Woa long Vietnam i kamap taim mi stap long kolis long Kalifonia. So mi joinim ol sumatin long protes. Ol polis i ronim mipela na mipela i ranawe na ol tiages i wokim mipela sotwin na i bagarapim ai bilong mipela. Em taim bilong bikpela hevi na pasin bikhet. Ol man i kilim i dai ol bikman bilong gavman, na i gat ol protes na ol pait. Ol man i kamapim kain kain tingting long hau long stretim hevi. Em wanpela taim bilong konfius tru.

Long 1970, mi kisim wanpela wok long not kos bilong Alaska na mi kisim planti mani. Bihain mi go long London, mi baim wanpela motobaik, na draiv i go long hap saut na mi no tingim tu ples mi laik go long en. Sampela mun bihain, mi go kamap long Afrika. Namel long rot, mi bungim sampela lain em ol tu i gat laik long i go long narapela hap—ol i laik ranawe na kamap fri long ol hevi bilong ol.

Ol samting mi lukim na harim i mekim na nau mi pilim olsem tok Baibel i mekim olsem wanpela spirit nogut i kontrolim dispela graun i stret olgeta.  Tasol sapos God i no kontrolim dispela graun, orait em i mekim wanem stap? Mi laik save.

Long ol mun bihain, mi kisim bekim bilong dispela askim. Na inap sampela haptaim bihain, mi tu i kisim save long planti manmeri em ol i soim olsem ol i stap gut long wanpela trupela God tasol, maski ol i gat kain kain sindaun.

Taim mi go bek long London, mi bungim mama bilong pren bilong mi na em i givim mi wanpela Baibel. Bihain, taim mi go long Amsterdam, long Netelan, wanpela Witnes i lukim mi ritim dispela Baibel aninit long wanpela strit-lait, na em i helpim mi long kisim sampela save moa. Bihain mi go long Dublin, long Aialan, na mi lukim brens ofis bilong ol Witnes Bilong Jehova. Mi nok long fran dua. Long dispela hap, mi bungim Arthur Matthews, em wanpela gutpela brata. Mi askim long stadi long Baibel, na em i orait long mekim stadi long mi.

Mi givim bel tru long stadi bilong mi, na mi ritim ol buk na ol magasin em ol Witnes i wokim. Na mi ritim Baibel tu. Mi amamas tru! Long ol miting bilong kongrigesen, mi lukim olsem ol pikinini tu i save long ol bekim bilong ol askim em ol man i gat save i bin tingting planti long en inap planti handret yia, olsem: ‘Wai na i gat pasin nogut? God em i husat? Wanem samting i kamap taim man i dai?’ Mi bung wantaim ol Witnes. Em isi long mi mekim olsem bikos mi no save long wanpela man long dispela kantri. Ol i helpim mi long laikim Jehova na mekim laik bilong em.

Long 1972, mi kisim baptais. Bihain long wanpela yia, mi kirap long mekim wok painia na mi joinim wanpela liklik kongrigesen long Newry, long Noten Aialan. Mi rentim wanpela liklik haus ol i wokim long ston long wanpela maunten sait. I gat ol bulmakau long fil i stap klostu, na mi save prektisim tok bilong mi fran long ol. I luk olsem ol i putim gut yau taim ol i kaikai gras. Ol i no inap givim tok kaunsel, tasol ol i helpim mi long lain long lukluk long odiens taim mi mekim tok. Long 1974, ol i makim mi long mekim wok olsem spesel painia, na Nigel Pitt i kamap poroman bilong mi, mitupela i stap olsem gutpela pren inap longpela taim tru.

Wanpela bikpela hevi (“The Troubles”) i kamap long Noten Aialan long dispela taim. Sampela man i kolim hap Not olsem “ples bilong bom na bulet.” Long olgeta hap i gat ol pait i save kamap long strit, ol man i sutim gan, na pasin bilong bomim kar, na ol snaipa i save hait na sutim man. Planti taim i gat ol hevi long sait bilong wok politik na lotu. Tasol lotu Protestan na Katolik i luksave olsem  ol Witnes i no save insait long sapotim wok politik, olsem na mipela i stap fri long autim tok. Planti taim, ol man bilong haus i save long wanem taim na long wanem hap pait bai kamap, na ol i save toksave long mipela so mipela i ken abrusim hevi.

Maski i olsem, i gat ol taim nogut. Wanpela taim, Denis Carrigan, em tu i wanpela painia, mitupela i autim tok long wanpela taun i stap klostu, long dispela hap i no gat ol Witnes, na wanpela taim tasol mipela i bin go long dispela hap. Wanpela meri i sutim tok long mitupela olsem mipela ol soldia bilong Briten na mipela i hait na mekim wok, ating em i tok olsem bikos toktok bilong mitupela i no krai olsem lain Airis. Tok em i sutim long mitupela i pretim mipela. Sapos yu mekim pasin pren wantaim ol soldia, ol inap kilim yu i dai o sutim yu long skru bilong lek. Ples i kol nogut tru taim mitupela i sanap ausait na wetim bas i stap, na mipela i lukim wanpela kar i kam stop long restron we dispela meri i bin sanap na sutim tok long mitupela. Em i kam ausait na toktok long 2-pela man insait long kar, na em i poinim pinga i kam long mitupela. Bihain, dispela 2-pela man i draivim kar i kam long mitupela na ol i givim sampela askim long mipela long sediul bilong bas. Taim bas i kam kamap, ol i toktok long draiva. Mitupela i no inap harim wanem tok ol i mekim. I no gat ol narapela pasindia, olsem na mitupela i save olsem ol i stretim rot long paitim mipela ausait long dispela taun. Tasol dispela samting i no kamap. Taim mi go daun long bas, mi askim draiva olsem: “Ol dispela man i mekim ol askim long mitupela, a?” Em i tok: “Mi save yupela i no ol soldia bilong Briten, yupela ol Witnes Bilong Jehova, so mi tokim ol. Yupela i no ken wari. Yupela i seif.”

Long 1976, long wanpela distrik kibung a long Dublin, mi bungim Pauline Lomax, em wanpela spesel painia, em i stap long Inglan na em i kam visitim dispela hap. Em i wanpela strongpela bilipmeri, na em i gat pasin daun na em i gutpela sista. Em wantaim brata bilong em Ray, ol i save long tok i tru long laip olgeta bilong ol. Bihain long wanpela yia, mitupela Pauline i marit na mitupela i mekim spesel painia long Ballymena, long Noten Aialan.

Long dispela taim, mitupela i mekim wok sekit, na sapotim ol bratasista long Belfast, Londonderry, na ol narapela ples nogut. Mipela i pilim tru pasin bilong ol bratasista em ol i bin lusim ol bilip bilong lotu, pasin bilong daunim ol narapela lain, na heitim narapela we i pas strong tru long bel bilong ol. Ol i mekim olsem bilong lotuim Jehova. Tru tumas, em i blesim ol na lukautim ol!

Mi stap long Aialan inap 10-pela yia. Na long 1981, ol i singautim mipela long i go long namba 72 klas bilong Skul Gileat. Bihain long mipela i grediuet, mipela i kisim asainmen long i go long Siera Leon, long Wes Afrika.

Mipela i stap long wanpela haus misineri wantaim 11-pela manmeri. Mipela i yusim wanpela kitsen, 3-pela toilet, 2-pela ples bilong was was, wanpela telefon, wanpela masin bilong wasim klos, na wanpela masin bilong draim klos. Planti taim pawa i save blakaut na em i save kamap wantu tasol. Ol rat i pulap long rup bilong haus, na ol kobra i save raun aninit long beismen.

Maski ples slip bilong mipela i no gutpela tumas, mipela i enjoim wok autim tok. Ol manmeri i rispektim Baibel na ol i save putim gut yau. Planti manmeri i stadi long Baibel na ol i kisim tok i tru. Ol asples i save kolim mi olsem “Mista Robert.” Na ol i save kolim Pauline olsem “Misis Robert.” Bihain, mi lusim bikpela haptaim long wok long brens ofis,  olsem na mi no autim tok tumas, na ol manmeri i kirap long kolim Pauline olsem “Misis Pauline.” Na ol i kolim mi olsem “Mista Pauline.” Pauline i laikim dispela!

Planti bratasista i stap rabis, tasol Jehova i save lukautim ol long ol samting ol i nidim, sampela taim em i mekim olsem long ol narakain wei. (Mat. 6:33) Wanpela taim wanpela sista i gat liklik mani bilong baim kaikai bilong em yet na ol pikinini bilong em long dispela de, tasol em i givim dispela mani long wanpela brata husat i sik na em i no gat mani long baim marasin bilong sik malaria. Bihain long dispela de, wanpela meri i kam long dispela sista na peim em long stailim gras bilong em. Planti taim kain samting i save kamap.

Mipela i stap long Siera Leon inap 9-pela yia. Bihain ol i salim mipela i go long Betel long Naijiria. Nau mipela i stap long wanpela bikpela brens ofis. Mi mekim wankain wok em mi bin mekim long Siera Leon, tasol Pauline i kisim narapela wok na em i hatwok moa long em. Pastaim, em i save lusim 130 aua long olgeta mun long wok autim tok, na em i gat ol gutpela Baibel stadi. Tasol nau, em i wok long ples bilong samapim ol klos, em i save samapim ol klos i bruk. Sampela haptaim i lus long em i save gut long dispela wok, tasol em i luksave olsem ol narapela i amamas tru long wok em i mekim, na em i putim tingting long painim ol rot bilong strongim ol wanwok long Betel.

Kalsa bilong Naijiria em i nupela samting long mipela, na i gat planti samting em mipela i mas lainim. Wanpela taim, wanpela brata i kam long ofis bilong mi long tokim mi long wanpela sista em ol i singautim em long kam wok long Betel. Taim mi laik sekanim han bilong dispela sista, em i brukim skru i go daun long lek bilong mi. Mi kirap nogut! Hariap tru mi tingim 2-pela skripsa: Aposel 10:25, 26 na Revelesen 19:10. Mi tingting, ‘Mi tokim em long no ken mekim olsem o?’ Long wankain taim, mi tingim olsem em i bin kisim singaut bilong kam wok long Betel, olsem na em i save long tok Baibel i skulim yumi long en.

Mi sem tru long dispela haptaim olgeta mipela i toktok, na bihain mi mekim sampela wok painimaut. Mi painimaut olsem dispela sista i bihainim wanpela kastam bilong ples em long dispela taim ol i wok yet long bihainim long sampela hap bilong kantri. Ol man tu i save brukim skru olsem. Em wanpela rot bilong soim rispek. Dispela i no makim olsem ol i lotuim wanpela man, nogat. I gat ol kain  stori olsem long Baibel. (1 Sml. 24:8) Mi amamas olsem mi no bin mekim wanpela tok we inap semim sista bilong mi.

Mipela i bungim planti bratasista bilong Naijiria em ol i sanap strong long bilip inap planti yia. Tingim stori bilong Isaiah Adagbona. b Em i bin kisim save long tok i tru taim em i yangpela man, tasol bihain em i kisim sik lepra. Na ol i salim em i go long wanpela hap bilong ol man i gat sik lepra, em i wanpela Witnes tasol long dispela hap. Maski i gat pasin birua, em i helpim winim 30 lepraman long kisim save long tok i tru na wanpela kongrigesen i kamap long dispela hap.

Long 1996, mipela i kisim asainmen long i go bek long Kenya brens. Dispela em festaim bilong mi long go bek long dispela kantri kirap long taim mi bin go long hap, olsem mi stori long kirap bilong atikol. Mipela i stap long Betel. Ol visita i save kam long Betel, na tu, ol monki ol i kolim vervet, ol i save kam visitim mipela. Ol i save stilim ol prut long ol sista. Wanpela taim, wanpela sista long Betel i lusim windo bilong em i op i stap. Taim em i kam bek, em i lukim wanpela lain monki i kaikai ol kaikai i stap long rum bilong em. Em i singaut na ran i go ausait long dua. Ol monki i singaut na kalap i go daun long windo.

Mitupela Pauline i joinim wanpela kongrigesen i mekim tokples Swahili. Bihain liklik, ol i makim mi long lukautim Buk Stadi Bilong Kongrigesen (nau ol i kolim olsem Kongrigesen Baibel Stadi). Maski i olsem, mi no kliagut tumas long mekim dispela tokples. Mi save stadi gut long dispela buk paslain long miting, olsem na mi inap ritim gut ol askim. Tasol sapos bekim bilong ol bratasista i no wankain liklik long ol tok i stap long paragraf, mi no inap kliagut long bekim bilong ol. Em narapela kain! Mi sori long ol bratasista. Mi pilim tru pasin bilong ol long daunim ol yet na redi long bihainim dispela senis na ol i no les kwik.

Mipela i stap long Kenya inap sampela mun. Bihain long 1997, mipela i kisim singaut bilong i go long Betel long Brooklyn, New York. Nau mipela i stap long kantri we i gat gutpela sindaun, tasol i gat ol hevi bilong en. (Prov. 30:8, 9) Maski i olsem, ol bratasista long dispela kantri i gat strongpela bilip. Ol i yusim taim bilong ol na ol samting ol i gat long sapotim wok bilong oganaisesen bilong Jehova, na ol i no mekim olsem bilong kamap maniman.

Long ol yia i go pinis, mipela i lukim bilip bilong ol wanlain Witnes bilong mipela em ol i gat kain kain sindaun. Long Aialan, mipela i lukim ol bratasista i holimpas bilip, maski i gat pait insait long kantri. Long Afrika, ol bratasista i holimpas bilip, maski i gat hevi bilong stap rabis na stap wanpis. Long Amerika, ol i holimpas bilip, maski ol i gat gutpela sindaun. Jehova i amamas tru taim em i lukluk i kam daun na lukim lain bilong em i soim olsem ol i laikim em maski ol i gat kain kain sindaun!

Ol yia “i go hariap tru.” (Jop 7:6) Nau mipela i wok wantaim ol narapela long wol hetkota long Warwick, New York, na mipela i amamas long wok wantaim ol lain em ol i laikim tru narapela narapela. Mipela i amamas long mekim samting mipela inap mekim bilong sapotim King bilong yumi, Jisas Krais, em klostu nau em bai blesim planti manmeri em ol i stap gut long em.​—Mat. 25:34.