1. Wanem taim bai olgeta Kristen God i makim i stap pinis long heven?

 PLANTI yia i go pinis, lain bilong Jehova i tingting olsem, ‘Wanem taim bai Jehova i kisim laspela bilong ol Kristen em i makim i go antap long heven?’ Bipo yumi bin tingting olsem ating sampela Kristen God i bin makim bai stap yet long Paradais long graun inap sampela haptaim bihain long pait bilong Armagedon. Tasol long Wastaua bilong Julai 15, 2013, yumi kisim save olsem olgeta Kristen God i bin makim em ol i stap yet long graun, God bai kisim ol i go long heven paslain long pait bilong Armagedon i kirap.—Mat. 24:31.

2. Wanem askim inap kamap, na bai yumi stori long wanem samting long dispela atikol?

² Wanpela askim inap kamap olsem: Wanem samting bai kamap long “ol arapela sipsip” bilong Krais em ol i givim bel yet long mekim wok bilong Jehova long graun long taim bilong “traipela hevi tru”? (Jon 10:16; Mat. 24:21) Sampela long nau inap wari olsem i no gat man bai stap bilong helpim ol taim God i kisim olgeta Kristen em i makim i go pinis long heven. Yumi ken skelim tupela stori bilong Baibel we i mekim na ol inap kisim kain tingting olsem. Na bai yumi stori long ol risen na yumi no ken wari.

WANEM SAMTING I NO INAP KAMAP?

3-4. Sampela inap kisim wanem tingting, na bilong wanem?

³ Sampela inap kisim tingting olsem ol narapela sipsip bai lusim tok i tru taim ol brata long lain Gavening Bodi em God i bin makim ol, ol i no stap moa bilong stiaim ol. Ating sampela stori bilong Baibel i mekim na ol i kisim kain pret tingting olsem. Yumi ken stori long tupela eksampel. Fes em stori bilong Hetpris Jehoiada. Em i wanpela gutpela wokman bilong God. Em na meri bilong em Jehosabiat i lukautim wanpela liklik boi, nem bilong em Joas, na ol i helpim em long kamap wanpela gutpela king i stap gut long God. Taim lapun Jehoiada i stap laip, Joas i bihainim  ol stretpela pasin. Tasol bihain long Jehoiada i dai, Joas i kirap long mekim ol pasin nogut. Em i putim yau long tok bilong ol hetman nogut na em i lusim Jehova.—2 Sto. 24:​2, 15-19.

⁴ Namba 2 eksampel em stori bilong ol Kristen bihain long taim bilong ol aposel. Aposel Jon em laspela aposel i bin stap laip yet, em i stap olsem gutpela helpim bilong planti Kristen na em i helpim ol long sanap strong na mekim yet wok bilong Jehova. (3 Jon 4) Wankain olsem ol narapela gutpela aposel bilong Jisas, inap sampela haptaim Jon i bin wok strong long daunim pasin apostet we i laik i go bikpela long dispela taim. (1 Jon 2:18; Lukim stadi nout long 2 Tes. 2:7 long Inglis Baibel.) Tasol bihain long Jon i dai, pasin apostet i go bikpela tru. Inap planti yia bihain, pasin apostet i bin bagarapim tru kongrigesen Kristen.

5. Dispela tupela stori bilong Baibel i no ken givim wanem tingting long yumi?

⁵ Yu ting dispela tupela stori bilong Baibel i makim olsem wankain samting bai painim ol arapela sipsip bilong Krais taim God i kisim olgeta Kristen em i makim i go pinis long heven? Long dispela taim, yu ting olgeta Kristen long graun bai lusim trening ol i kisim olsem Joas i bin mekim o bihainim pasin apostet olsem ol Kristen i bin mekim bihain long taim bilong ol aposel? Bekim bilong dispela tupela askim em, nogat tru! Yumi ken save tru olsem taim God i kisim olgeta Kristen em i anointim i go long heven, bai i gat ol man bilong lukautim lain arapela sipsip na ol bai stap gut long ai bilong God. Wai na yumi ken save tru olsem dispela samting bai kamap?

I NO GAT WANPELA SAMTING BAI BAGARAPIM LOTU I TRU

6. Bai yumi skelim wanem tripela haptaim?

⁶ Wai na yumi ken bilip tru olsem i no gat wanpela samting bai bagarapim lotu i tru, maski i gat taim nogut tru klostu nau bai kamap? Yumi bilip olsem bikos long ol stretpela save yumi kisim long Baibel long haptaim nau yumi stap long en. Dispela haptaim nau em i no wankain long taim bilong lain Israel bilong bipo na haptaim bilong ol Kristen bihain long ol aposel i dai pinis. Yumi ken skelim gut dispela 3-pela haptaim: (1) Taim bilong lain Israel bilong bipo, (2) haptaim bihain long ol aposel i dai pinis, na (3) taim bilong yumi, em “taim bilong stretim bek olgeta samting.”—Apo. 3:21.

7. Long taim bilong lain Israel bilong bipo, wai na ol man i stap gut long God ol i no bel hevi taim lain Israel olgeta na ol king bilong ol i mekim ol pasin nogut?

⁷ Taim bilong lain Israel bilong bipo. Paslain liklik long Moses i dai, em i tokim lain Israel: “Mi save gut olsem taim mi dai pinis, yupela bai mekim ol pasin nogut tru na lusim rot em nau mi tokim yupela long bihainim.” (Lo 31:29) Moses i givim tok lukaut tu long lain Israel olsem sapos ol i bikhet long God, orait God bai larim ol birua i kam kisim ol i go olsem ol kalabusman. (Lo 28:​35, 36) Yu ting ol dispela tok i kamap tru? Yes. Inap planti handret yia, planti king i mekim ol pasin nogut na ol i pulim lain bilong God i go lotuim ol giaman god. Dispela i mekim na Jehova i givim baksait long lain bilong em, na em i pinisim lain king long lain Israel. (Ese. 21:​25-27) Tasol ol Israel i stap gut long God, ol i strongim bel taim ol i lukim olsem tok bilong God i kamap tru.—Ais. 55:​10, 11.

8. Yu ting yumi mas kirap nogut long pasin apostet i bagarapim kongrigesen Kristen bihain long taim bilong ol aposel? Stori long dispela.

⁸ Haptaim bihain long ol aposel i dai pinis. Yu ting yumi mas kirap nogut long pasin apostet i bagarapim kongrigesen Kristen bihain long taim bilong ol aposel? Nogat tru. Jisas i bin tok profet olsem pasin apostet bai go bikpela tru. (Mat. 7:​21-23; 13:​24-30, 36-43) Aposel Pol, Pita, na Jon i bin lukim truim bilong dispela tok profet bilong Jisas taim pasin apostet i kirap long go bikpela tru long taim bilong ol.  (2 Tes. 2:​3, 7; 2 Pita 2:1; 1 Jon 2:18) Haptaim bihain long ol aposel i dai pinis, pasin apostet i bin bagarapim tru kongrigesen Kristen. Ol apostet Kristen i kamap na ol i stap olsem bikpela hap bilong Bikpela Babilon, em mama tru bilong olgeta lotu giaman. Dispela samting tu i truim tok profet bilong Baibel.

9. Olsem wanem taim nau yumi stap long en i no wankain long taim bilong lain Israel bilong bipo na haptaim bilong ol Kristen bihain long ol aposel i dai pinis?

⁹ “Taim bilong stretim bek olgeta samting.” Taim nau yumi stap long en i no wankain long taim bilong lain Israel bilong bipo na haptaim we pasin apostet i go bikpela tru bihain long ol aposel i dai pinis. Wanem dispela haptaim nau yumi stap long en? Pastaim yumi inap kolim dispela haptaim bilong nau olsem “taim bilong las de” bilong ol pasin nogut bilong nau. (2 Tim. 3:1) Tasol Baibel i soim olsem wanpela longpela haptaim i kirap long dispela wankain taim. Dispela haptaim bai i go yet inap long Kingdom Bilong Mesaia i stretim bek olgeta samting na mekim ol man i kamap gutpela olgeta na mekim graun i kamap Paradais. Baibel i kolim dispela haptaim olsem “taim bilong stretim bek olgeta samting.” (Apo. 3:21) Dispela haptaim i kirap long yia 1914. God i stretim bek wanem samting? God i putim Jisas i stap King long heven. So wanpela taim gen Jehova i putim wanpela king bilong makim Em, em man i kamap long lain bilong King Devit. Tasol Jehova i no stretim bek dispela wok king tasol, em i stretim bek sampela samting moa. Bihain tasol long dispela, Jehova i kirap long stretim bek lotu i tru! (Ais. 2:​2-4; Ese. 11:​17-20) Yu ting wanpela samting bai bagarapim gen lotu i tru?

10. (a) Baibel i mekim wanem tok profet long lotu i tru long taim bilong yumi? (Aisaia 54:17) (b) Wai na ol kain tok profet olsem i ken mekim gut bel bilong yumi?

¹⁰ Ritim Aisaia 54:17. Tingim dispela tok profet: “I no gat wanpela samting bilong pait em ol i wokim bilong pait long yu inap bagarapim yu.” Ol dispela tok profet i kamap tru long nau. Na i gat narapela tok bilong mekim gut bel bilong yumi na i stret long taim bilong yumi tu, em i tok: “Jehova bai skulim ol pikinini man bilong yu, na ol pikinini man bilong yu bai stap bel isi tru. Long stretpela pasin bilong mi, bai mi mekim yu i kamap strong. . . . Bai yu no inap pret long wanpela samting na i no gat wanpela samting bai pretim yu, long wanem, pret i no inap kam klostu long yu.” (Ais. 54:​13, 14) Satan “em god bilong dispela graun,” em i no gat strong long stopim wok bilong Jehova em ol manmeri bilong em i mekim bilong skulim ol narapela. (2 Kor. 4:4) God i stretim pinis lotu i tru, na i no gat wanpela samting bai bagarapim em gen. Em bilong stap inap oltaim oltaim. I no gat wanpela  samting bilong pait em ol i wokim bilong pait long yumi inap bagarapim yumi!

WANEM SAMTING BAI KAMAP?

11. Wanem samting i ken strongim bilip bilong yumi olsem God i no inap givim baksait long bikpela lain manmeri taim em i kisim ol Kristen em i makim i go pinis long heven?

¹¹ Wanem samting bai kamap taim God i kisim ol Kristen em i makim i go pinis long heven? Tingim, Jisas em i Wasman bilong yumi. Em i het bilong kongrigesen Kristen. Jisas i tok: “Yupela i gat wanpela Lida tasol, em Krais.” (Mat. 23:10) Jisas i stap King long heven na oltaim em bai mekim gut wok bilong em. Krais bai mekim wok bos, olsem na ol disaipel bilong em long graun i no ken pret long wanpela samting. Yumi no save long olgeta liklik infomesen long hau Krais bai lidim ol manmeri bilong em long dispela taim. Olsem na yumi ken skelim sampela stori bilong Baibel bilong mekim gut bel bilong yumi.

12. Olsem wanem Jehova i lukautim ol manmeri bilong em (a) bihain long Moses i dai? (b) bihain long Elaija i kisim narapela asainmen? (Lukim tu piksa.)

¹² Paslain long lain Israel i go insait long Graun Bilong Promis, Moses i dai. Wanem samting i kamap long lain bilong God? Yu ting Moses i dai na ol i no gat man moa bilong stiaim ol? Nogat. Taim ol i stap gut long Jehova, em i lukautim ol. Paslain long Moses i dai, Jehova i tokim em long makim Josua long lidim ol manmeri. Moses i bin trenim Josua inap planti yia. (Kis. 33:11; Lo 34:9) Na i gat ol narapela man i mekim tu wok bilong lidim ol manmeri, olsem i gat ol hetman i bosim 1,000, bosim 100, bosim 50, na bosim 10-pela. (Lo 1:15) God i lukautim gut ol manmeri bilong em. Wankain samting i bin kamap long taim bilong Elaija. Em i go pas long lidim lain Israel long mekim lotu i tru inap planti yia. Tasol taim i kamap na Jehova i kisim em na putim em long hap saut bilong Juda bilong mekim wok. (2 Kin. 2:1; 2 Sto. 21:12) Yu ting Jehova i givim baksait long ol manmeri i stap gut long em long 10-pela traib bilong Israel? Nogat. Elaija i bin trenim Elisa inap planti yia. Na tu, i gat “ol pikinini man bilong ol profet,” em ol i bin oganaisim ol na trenim ol. (2 Kin. 2:​7, ftn.) So i gat planti gutpela wokman bilong God i stap bilong lidim ol manmeri bilong em. Jehova i wok long inapim ol samting em i tingting pinis long mekim na em i lukautim gut ol wokman bilong em.

13. Olsem wanem tok bilong Hibru 13:5b i ken mekim gut bel bilong yumi? (Lukim tu piksa.)

¹³ Bihain long yumi skelim pinis ol dispela stori, yu ting wanem samting bai kamap taim God i kisim laspela bilong ol Kristen em i makim i go long heven? Yumi no gat wok long tingting  planti. Baibel i kamapim klia wanpela bikpela tok i tru, olsem: Jehova i no inap tru long givim baksait long ol manmeri bilong em long graun. (Ritim Hibru 13:5b.) Wankain olsem Moses na Elaija, liklik hap lain bilong ol Kristen God i bin makim em ol i lidim ol manmeri bilong God long nau, ol i luksave olsem em i bikpela samting long ol i mas trenim ol narapela. Inap planti yia, ol brata long lain Gavening Bodi i bin trenim ol man bilong ol arapela sipsip long lidim ol manmeri bilong God. Olsem, ol i oganaisim planti skul bilong trenim ol elda, ol wasman raun, ol Brens Komiti memba, ol ovasia long Betel, na ol narapela. Lain Gavening Bodi i bin trenim ol man long mekim wok olsem helpim bilong ol komiti bilong Gavening Bodi. Ol brata i stap olsem helpim, nau ol i mekim ol bikpela wok insait long kongrigesen. Ol i redi gut long mekim yet wok bilong lukautim ol sipsip bilong Krais.

14. Wanem bikpela poin em dispela atikol i laik kamapim?

¹⁴ Bikpela poin em dispela atikol i laik kamapim em olsem: Taim God i kisim laspela bilong ol Kristen em i makim i go long heven klostu long pinis bilong traipela hevi tru, lain bilong God hia long graun bai wok yet long mekim lotu i tru. Yumi amamas olsem lain bilong God bai wok yet long lotuim em bikos long wok bos bilong lida bilong yumi Jisas Krais. Long dispela taim lain Gok Bilong Magok, em olgeta kantri i bung wantaim bai kam pait long yumi. (Ese. 38:​18-20) Tasol ol i no inap winim dispela pait, na ol i no inap pasim lain bilong Jehova long wok yet long lotuim em. God bai kisim bek lain bilong em! Long wanpela visen, aposel Jon i lukim “bikpela lain manmeri” bilong lain arapela sipsip bilong Krais. Jon i harim wanpela nek i tok olsem “bikpela lain manmeri” ol i “winim dispela traipela hevi tru.” (Rev. 7:​9, 14) Yes, Jehova bai lukautim ol na ol bai stap seif!

15-16. Olsem Revelesen 17:14 i kamapim, ol Kristen God i bin makim bai mekim wanem long pait bilong Armagedon, na wai na dispela i ken strongim yumi?

¹⁵ Sampela bai tingting: ‘Olsem wanem long ol Kristen God i bin makim? Ol bai mekim wanem taim ol i go long heven?’ Baibel i bekim stret dispela askim. Em i kamapim klia olsem ol gavman bilong dispela graun bai “pait wantaim Pikinini Sipsip.” Tru tumas, ol bai lus long pait. Baibel i tok: “Pikinini Sipsip . . . bai daunim ol.” Na husat  bai helpim Jisas? Ves i bekim dispela askim. Em ol manmeri “God i bin singautim,” na “makim ol na ol i stap gut long em.” (Ritim Revelesen 17:14.) Husat ol dispela manmeri? Em ol Kristen God i bin makim na ol i kirap bek pinis! So taim God i kisim laspela bilong ol Kristen em i makim i go long heven klostu long pinis bilong traipela hevi tru, wanpela fes asainmen bilong ol em long mekim pait. Em narakain asainmen tru, a? Sampela Kristen God i bin makim, paslain long ol i kamap Witnes Bilong Jehova, ol i man bilong pait. Sampela i bin insait long ol ami bilong dispela graun. Tasol bihain ol i kamap ol Kristen tru na ol i lain long stap bel isi. (Gal. 5:22; 2 Tes. 3:16) Ol i lusim olgeta kain pasin bilong pait. Tasol taim ol i go long heven, ol bai wok bung wantaim Krais na ol ensel holi bilong em na ol bai mekim laspela pait long ol birua bilong God.

¹⁶ Tingim dispela! Long graun, sampela bilong ol Kristen God i makim, ol i lapun na ol i no gat strong. Tasol taim ol i kirap bek na kisim laip long heven, ol bai kamap ol strongpela spirit i no inap dai gen, na ol bai wok bung wantaim King Bilong Pait, Jisas Krais, long mekim pait. Bihain long pait bilong Armagedon i pinis, ol bai wok wantaim Jisas long helpim ol manmeri long kamap gutpela olgeta. I klia tru olsem ol bai mekim bikpela wok bilong helpim ol bratasista bilong ol long graun taim ol i stap long heven, winim ol samting ol i ken mekim taim ol i stap long graun olsem ol man i no gutpela olgeta!

17. Hau na yumi ken save olsem olgeta wokman bilong God bai stap seif long pait bilong Armagedon?

¹⁷ Yu bilong lain arapela sipsip? Sapos olsem, yu mas mekim wanem taim bikpela pait bilong Armagedon i kirap? Samting yu mas mekim em: Trastim Jehova na bihainim daireksen em i givim. Hau yu ken mekim olsem? Baibel i tok: “Go insait long ol rum bilong yupela i stap insait tru, na pasim ol dua bilong yupela. Haitim yupela yet inap sotpela taim tasol inap long belhat bilong God i pinis.” (Ais. 26:20) Olgeta gutpela wokman bilong God long heven na long graun bai stap seif long dispela taim. Olsem aposel Pol, yumi bilip tru olsem “ol gavman, ol samting nau i stap, ol samting bai kamap bihain, . . . i no inap tekewe yumi long pasin laikim bilong God.” (Rom 8:​38, 39) Oltaim tingim: Jehova i laikim yu na em i no inap tru long givim baksait long yu!