Maski i olsem, Jehova i laik bai yumi stap isi na wetim em long mekim ol samting long taim stret em i makim. Wai na em i laik bai yumi mekim olsem? Wanem samting i ken helpim yumi long stap amamas taim yumi wet i stap?

WAI NA JEHOVA I LAIK BAI YUMI WET I STAP?

Baibel i tok: “Jehova i stap isi na wet i stap bilong soim pasin helpim long yupela, na em bai kirap long soim marimari long yupela. Long wanem, Jehova, em God bilong mekim stretpela kot. Ol manmeri husat i save wet long em, ol i ken amamas.” (Ais. 30:18) Aisaia i bin raitim ol dispela tok i go long ol Juda, em lain i gat strongpela het. (Ais. 30:1) Tasol i gat sampela manmeri namel long ol Juda em ol i stap gut long God, na ol dispela tok i helpim ol long bilip na wet i stap. Ol dispela wankain tok i helpim tu ol gutpela wokman bilong Jehova long nau long bilip na wet i stap.

Jehova i stap isi na wet i stap, olsem na yumi tu i mas mekim olsem. Em i makim pinis taim stret bilong pinisim olgeta pasin nogut, na em i wetim dispela de na dispela aua long kamap bilong mekim olsem. (Mat. 24:36) Long dispela taim, olgeta bai save olsem ol dispela tok Satan i bin sutim long Jehova na ol man i lotuim Em, em ol tok giaman. Bihain Jehova bai bagarapim na pinisim Satan na olgeta lain i stap long sait bilong em, tasol Em bai “marimari long [yumi].”

Long nau yet, Jehova i no inap pinisim ol hevi bilong yumi, tasol em i helpim yumi long save tru olsem yumi ken stap amamas taim yumi wet i stap. Olsem tok bilong Aisaia i kamapim, yumi ken stap amamas long nau taim yumi bilip na wet long gutpela samting i kamap. (Ais. 30:18) a Hau yumi ken kisim dispela kain pasin bilong amamas? I gat 4-pela rot bilong mekim olsem.

ROT BILONG STAP AMAMAS TAIM YUMI WET I STAP

Tingim ol gutpela samting i kamap. Long laip olgeta bilong King Devit, em i lukim ol man i mekim ol pasin i nogut tru. (Sng. 37:35) Tasol em i tok: “Yu mas pasim maus long ai bilong Jehova na stap isi na wetim em i helpim yu. Na yu no ken wari long man i mekim ol kain kain samting em i tingting long en.” (Sng. 37:7) Devit i bihainim edvais bilong em yet long  rot bilong tingim ol tok promis Jehova i mekim bilong kisim bek em. Na tu, em i tingim olgeta blesing em i bin kisim long Jehova. (Sng. 40:5) Olsem Devit, sapos yumi tingim ol gutpela samting i kamap long laip bilong yumi na yumi no larim ol hevi i daunim yumi, em bai isi moa long yumi wet i stap long Jehova.

Mekim ol samting bilong preisim Jehova. Man bilong raitim Buk Song 71, ating em Devit, em i tok long Jehova olsem: “Oltaim mi bai wet long yu i helpim mi; bai mi preisim yu moa yet.” (Sng. 71:14) Long wanem rot em i preisim Jehova? Em i tokim ol narapela long Jehova na em i singim ol song bilong preisim Em. (Sng. 71:​16, 23) Olsem Devit, yumi tu i ken stap amamas taim yumi wet long Jehova. Yumi preisim em taim yumi autim tok, toktok wantaim ol narapela, na singim ol singsing bilong lotu bilong yumi. Long neks taim yu singim wanpela Kingdom song, traim long tingim gut ol tok bilong en na olsem wanem ol dispela tok i mekim yu amamas.

Kisim strong long ol bratasista Kristen. Taim Devit i bungim ol hevi, em i tok long Jehova olsem: “Mi bai soim olsem mi bilip tru long nem bilong yu, long ai bilong ol manmeri i stap gut long yu.” (Sng. 52:9) Yumi tu i ken kisim strong long ol wanbilip bilong yumi taim yumi bung wantaim ol long ol miting na long wok autim tok, na tu, long ol bung bilong amamas yumi mekim.—Rom 1:​11, 12.

Strongim pasin bilong yu long bilip na wet. Buk Song 62:5 i tok: “Bai mi stap isi na wetim God wanpela tasol long wanem, mi bilip na wet long em tasol.” Long nau, em i bikpela samting long yumi mas i gat pasin bilong bilip strong na wet i stap, moa yet sapos pinis bilong dispela haptaim nogut yumi stap long en i no kamap long taim yumi ting long en. Yumi mas bilip tru olsem ol tok promis bilong Jehova bai kamap tru, maski yumi mas wet longpela taim long lukim truim bilong ol. Yumi ken strongim pasin bilong yumi long bilip na wet long rot bilong stadi long Tok Bilong God—olsem stadi long ol tok profet bilong en, olsem wanem ol tok bilong ol man i raitim Baibel i wanbel wantaim, na ol tok Jehova i mekim bilong kamapim klia em i wanem kain God. (Sng. 1:​2, 3) Na tu, oltaim yumi mas “beten long strong bilong holi spirit” long strongim pasin pren bilong yumi wantaim Jehova, na wet long lukim em i truim tok promis bilong em long givim laip oltaim long yumi.—Jut 20, 21.

Olsem King Devit, yu ken bilip tru olsem Jehova i save lukluk long ol manmeri i wet long Em na Em i save mekim gutpela pasin laikim long ol. (Sng. 33:​18, 22) Wok yet long stap isi na wet long Jehova long rot bilong putim tingting long ol gutpela samting i kamap long laip bilong yu, preisim em, kisim strong long ol wanbilip Witnes, na wok yet long strongim pasin bilong yu long bilip na wet.