Papa na Mama em tupela strongpela Katolik. Tasol taim ol i kisim save long Baibel olsem nem God em Jehova, ol i kamap ol Witnes Bilong Jehova na givim bel tru long dispela lotu. Papa i stop long kavim ol imis bilong Jisas. Em i yusim save bilong em olsem kapenta long stretim graun plua bilong haus bilong mipela na mekim i kamap fes Haus Kingdom long San Juan del Monte, wanpela sabeb long Manila, em biktaun bilong Filipins.

Taim mi bon long 1952, papamama i givim bel tru long skulim mi long Jehova wankain olsem ol i mekim long 4-pela bikpela brata na 3-pela bikpela susa bilong mi. Taim mi kamap bikpela, Papa i kirapim mi long ritim wanpela sapta bilong Baibel long olgeta de, na em i stadi wantaim mi long planti narapela tiokratik pablikesen. Sampela taim, papamama bilong mi i save singautim ol wasman raun na ol brata brens i salim i kam long stap long haus bilong mipela. Olsem wanpela famili, mipela i kisim bikpela amamas na nupela strong long ol ekspiriens ol dispela brata i serim wantaim mipela, na dispela i kirapim mipela olgeta long putim wok autim tok i stap nambawan samting long laip bilong mipela.

Papamama i gat strongpela bilip na mi tu bihainim pasin bilong ol long bilip strong long Jehova. Bihain long mama bilong mi i dai long wanpela sik, mitupela Papa i kirap long mekim wok painia oltaim long 1971. Tasol long 1973, taim mi gat 20 krismas, papa bilong mi i dai. Taim papa na mama wantaim i dai, dispela i mekim na mi pilim olsem laip i no gat as na mi pilim wanpis. Tasol bilip em Baibel i helpim yumi long kisim, “em i stap strong na i no inap surik liklik” na dispela i stap olsem anka na em i helpim bel na tingting bilong mi na helpim mi long pas gut wantaim God. (Hib. 6:19) Bihain liklik long Papa i dai, mi orait long kisim asainmen bilong mekim wok spesel painia long wanpela ailan i stap longwe em Ailan Coron, em wanpela ailan bilong Palawan Provins.

Mi gat 21 krismas taim mi go kamap long Coron. Mi wanpela siti boi, so mi kirap nogut olsem  dispela ailan i no gat pawa, i no gat ol wara i ron long paip samting, na tu, i no gat planti kar o motobaik samting. I no gat planti brata long dispela hap, so mi no gat painia poroman na sampela taim mi yet i save autim tok. Long fes mun, mi misim tru famili na ol pren bilong mi. Long nait, mi save lukluk i go antap long ol sta long skai na mi save krai. Mi save pilim olsem mi laik lusim asainmen bilong mi na go bek long ples.

Long ol dispela taim mi stap wanpis, mi save kamapim olgeta bel na tingting bilong mi long Jehova. Mi save tingim gen ol gutpela tok bilong strongim mi em mi bin ritim long Baibel na ol pablikesen bilong yumi. Planti taim mi save tingim tok bilong Buk Song 19:14. Mi luksave olsem Jehova bai stap olsem “Bikpela Ston bilong mi na Man Bilong Baim Bek mi” sapos mi tingim tingim long bel ol samting i amamasim em, olsem ol wok bilong em na ol pasin bilong em. Wanpela Wastaua i gat dispela het tok olsem “You Are Never Alone” a i bin helpim mi tru. Mi ritim planti taim. I olsem mi stap mi yet wantaim Jehova long ol dispela taim, na dispela i opim rot long mi inap beten, stadi, na tingim tingim long bel ol tok mi lainim.

Mi go kamap long Coron na i no longtaim bihain ol i makim mi olsem elda. Mi wanpela elda tasol so mi mekim olgeta miting bilong wik olsem, Skul Tiokratik Bilong Autim Tok, Miting Bilong Wok, Buk Stadi Bilong Kongrigesen, na Wastaua Stadi. Na tu, long olgeta wik mi save mekim pablik tok. Ol dispela samting i mekim mi bisi na i no gat taim long mi pilim wanpis!

Gutpela samting i kamap long wok autim tok bilong mi long Coron, sampela Baibel stadi bilong mi i kisim baptais. Tasol i gat sampela hatwok tu. Sampela taim mi save wokabaut inap hap de olgeta long go kamap long teritori, na mi no save long wanem hap bai mi slip taim mi go kamap. Planti liklik ailan i insait tu long teritori bilong kongrigesen. Planti taim mi save ron long ol bot i gat moto antap long ol solwara i raf bilong i go kamap long ol dispela ailan, maski mi no save long swim! Long olgeta dispela hatwok, Jehova i bin lukautim mi na givim mi ol samting mi nidim. Bihain mi luksave olsem Jehova i wok long redim mi long ol bikpela hatwok mi bai bungim long neks asainmen bilong mi.

Long 1978, ol i salim mi i go long Papua Niugini, em kantri i stap long hap not bilong Australia. Papua Niugini em kantri i gat planti maunten na sais bilong en i wankain olsem kantri Spen. Populesen bilong en em inap 3 milion na mi kirap nogut long save olsem ol i save mekim winim 800 tokples. Gutpela samting em olsem planti manmeri inap mekim tok Melanesian Pidgin, em ol i save kolim olsem Tok Pisin.

Ol i asainim mi go long wanpela Inglis kongrigesen long biktaun Port Moresby bilong stap long en inap sotpela taim. Tasol bihain mi muv i go long wanpela Tok Pisin kongrigesen na mi kisim skul long mekim Tok Pisin. Mi yusim ol tok mi lainim long Tok Pisin skul long mekim wok autim tok. Dispela i helpim mi long lain hariap long mekim dispela tokples. I no longtaim, mi mekim wanpela pablik tok long Tok Pisin. Tingim samting mi kirap nogut long en, mi no winim yet wanpela yia long Papua Niugini na ol i makim mi long mekim wok wasman sekit na ol i salim mi i go long ol Tok Pisin kongrigesen i stap long ol bikpela provins bilong en.

Ol kongrigesen i stap longwe longwe, olsem na mi mas oganaisim ol kibung sekit na travel planti taim. Pastaim mi pilim wanpis tru long dispela ples we mi no save gut tumas long en bikos em nupela kantri,  nupela tokples, na tu, ol nupela kastam. Mi no inap travel long wanpela kongrigesen i go long narapela kongrigesen long rot bilong kar bikos i gat ol bikpela maunten na ples i nogut. So mi mas raun long balus klostu olgeta wik. Sampela taim, mi wanpela pasindia tasol long ol liklik balus em klostu ol i bagarap. Mi save pret tru long raun long ol dispela balus wankain olsem mi save pret long raun long bot!

I no olgeta man i gat ol telefon, so mi save raitim pas i go long ol kongrigesen. Planti taim mi save go kamap paslain long ol pas bilong mi i go kamap, na mi save askim raun bilong painim ol pablisa. Tasol taim mi painim pinis ol bratasista, ol i save welkamim mi na tingim mi tru na mi save amamas olsem mi bin hatwok long painim ol. Mi luksave olsem Jehova i sapotim mi long planti rot, na pasin pren bilong mi wantaim em i kamap strong moa.

Long fes miting bilong mi long wanpela ailan long nambis, nem bilong en Bougainville, tupela marit i smail wantaim na i kam long mi na askim olsem, “Yu tingim yet mitupela?” Mi tingim mi bin autim tok long dispela tupela marit long taim mi kam festaim long Port Moresby. Mi bin kirap stadi wantaim ol long Baibel paslain long mi givim ol long wanpela brata. Tupela wantaim i baptais pinis! Em wanpela bilong planti blesing mi bin kisim taim mi go mekim wok long Papua Niugini inap 3-pela yia.

Paslain long mi lusim Coron long 1978, mi save long Adel em wanpela sista husat i gat gutpela pasin na em i save tingim tru ol narapela. Em i mekim wok painia oltaim taim em i mekim bikpela long tupela pikinini bilong em, em Samuel na Shirley. Long wankain taim, em i wok long lukautim lapun mama bilong em. Long Me 1981, mi go bek long Filipins na maritim Adel. Bihain long mitupela i marit, mitupela wantaim i mekim wok painia oltaim na lukautim famili wantaim.

Maski mipela i gat ol pikinini, long 1983, ol i makim mi long mekim wok spesel painia na ol i salim mi go long Ailan Linapacan, long Palawan Provins. Mipela famili olgeta i muv i go long dispela ples i stap longwe na i no gat wanpela Witnes i stap long dispela hap. Mama bilong Adel i dai wanpela yia bihain. Tasol mipela i bisi tru long mekim wok autim tok na dispela i helpim mipela long karim hevi bilong mama i dai. Mipela i gat planti Baibel stadi em ol i wok long kamap strong long bilip long Linapacan, olsem na mipela i nidim wanpela liklik Haus Kingdom. So mipela yet i kirap long wokim wanpela Haus Kingdom. Tripela yia bihain long mipela i go kamap, mipela i amamas tru long lukim 110 manmeri i kam long Memorial, na planti bilong ol i winim mak na kisim baptais bihain long mipela i lusim dispela hap.

Long 1986, ol i salim mi go long ailan bilong Culion, i gat planti lepraman i stap long en. Bihain long dispela, ol i makim Adel tu long mekim wok spesel painia. Pastaim mipela i pret tru long autim tok long ol manmeri em sik lepra i bin bagarapim tru ol hap bilong bodi bilong ol. Tasol ol pablisa long dispela hap i tokim mipela olsem ol manmeri i gat sik lepra ol i kisim pinis tritmen na sik bilong ol i no inap kalap long ol narapela. Sampela bilong ol dispela manmeri i gat sik lepra i kam long ol miting long haus bilong wanpela sista. I no longtaim, mipela i pilim isi moa long autim tok long ol dispela manmeri em ol i pilim olsem God na ol manmeri i sakim ol, na mipela i amamas long helpim ol long bilip na wetim ol gutpela samting em Baibel i tok promis long em  bai kamap bihain. Mipela i amamas long lukim ol dispela manmeri em ol i gat bikpela sik i amamas long kisim save olsem wanpela taim God bai pinisim olgeta sik na hevi bilong ol na ol bai i gat gutpela helt.—Luk 5:​12, 13.

Ol pikinini bilong mipela i pilim olsem wanem long laip long Culion? Mitupela Adel i singautim tupela yangpela sista long Coron long joinim mipela na bai ol pikinini bilong mipela i gat ol gutpela poroman. Samuel, Shirley na dispela tupela sista i amamas tru long mekim wok autim tok na ol i stadi wantaim planti pikinini na mitupela Adel i save stadi wantaim ol papamama bilong ol dispela pikinini. Wanpela taim mipela i stadi wantaim 11-pela famili olgeta. I no longtaim, mipela i mekim planti Baibel stadi em ol i wok long winim mak, olsem na mipela i mas i gat nupela kongrigesen!

Pastaim mi wanpela elda tasol long dispela hap. So brens ofis i askim mi long mekim olgeta miting bilong wik wantaim 8-pela pablisa i stap long Culion, na tu, long mekim olgeta miting bilong wik tu wantaim 9-pela pablisa i stap long wanpela viles ol i kolim Marily, em yu mas ron inap 3-pela aua long bot bilong i go kamap long en. Bihain long mipela famili i pinis miting long hap, mipela i save wokabaut long wanpela ples i gat planti maunten inap planti aua bilong mekim ol Baibel stadi long wanpela viles ol i kolim Halsey.

Bihain mipela i lukim olsem planti manmeri tru long Marily na Halsey i kam insait long tok i tru, olsem na mipela i wokim Haus Kingdom long dispela tupela hap. Wankain olsem samting i kamap long Linapacan, ol bratasista na ol man i gat laik long save long tok i tru, ol i givim ol material na helpim wok bilong sanapim Haus Kingdom. Inap 200 manmeri i ken sindaun insait long Haus Kingdom long Marily, na tu, ol i ken mekim i go bikpela na dispela i opim rot long mipela i mekim ol kibung long hap.

Long 1993, ol pikinini bilong mipela i kamap bikpela pinis, so mitupela Adel i kirap mekim wok sekit long Filipins. Na long yia 2000, mi go long Ministerial Trening Skul bilong lain long mekim wok tisa long dispela skul. Mi pilim olsem mi no gat save inap long mekim dispela wok, tasol oltaim Adel i save strongim mi. Em i save kirapim mi long tingim gen olsem Jehova inap givim mi strong bilong mekim gut dispela nupela asainmen. (Fili. 4:13) Adel inap mekim dispela  tok bikos long ekspiriens bilong em, maski em i gat sik em i save mekim yet asainmen bilong em.

Long 2006 taim mi mekim wok tisa, dokta i painimaut olsem Adel i gat sik pakinson. Mipela i kirap nogut tru! Taim mi tok long mipela bai lusim ol asainmen bilong mipela bilong lukautim em, Adel i tok: “Plis painim wanpela dokta bilong helpim mi long sik bilong mi, na mi save Jehova bai helpim yumi long mekim yet asainmen bilong yumi.” Inap 6-pela yia bihain long dispela, Adel i wok yet long mekim wok bilong Jehova na em i no save komplein long sik bilong em. Taim em i no inap wokabaut moa, em i save sindaun long wilsia bilong em na autim tok. Taim em i hatwok long toktok, em i save bekim wanpela o tupela tok tasol long ol miting. Oltaim Adel i save kisim ol mesis i kam long ol bratasista em ol i tok tenkyu long em long gutpela pasin bilong em long sanap strong i go inap long em i dai long 2013. Mi bin lusim winim 30 yia long mekim wok bilong Jehova wantaim gutpela poroman bilong mi, Adel, husat i stap gut long Jehova, so taim em i dai, mi krai sori na mi pilim wanpis gen, na ol dispela samting mi pilim i daunim mi tru.

Adel i laik bai mi mekim yet asainmen bilong mi, olsem na mi mekim olsem. Mi bisi yet long mekim wok bilong Jehova na dispela i helpim mi long karim hevi bilong pilim olsem mi stap wanpis. Long 2014 i go 2017, ol i makim mi long visitim ol kongrigesen i save mekim tokples Tagalok long ol kantri we gavman i bin tambuim wok bilong yumi. Bihain long dispela, mi visitim ol kongrigesen i save mekim tokples Tagalok long Taiwan, Amerika, na Kanada. Long 2019, mi stap tisa bilong Skul Bilong Ol Kingdom Evanselis i kamap long tok Inglis long India na Tailan. Mi kisim bikpela amamas tru long mekim ol dispela asainmen. Taim mi givim bel tru long mekim ol wok bilong Jehova, dispela i save mekim mi amamas tru.

Long olgeta nupela asainmen bilong mi, mi save laikim tru ol bratasista mi bungim, so i hatwok long lusim ol. Long ol kain taim olsem, mi lain long trastim tru Jehova. Mi bin ekspiriensim olsem oltaim Jehova i save sapotim mi, na dispela i helpim mi long amamas long wanem ol senis i kamap long mi. Nau mi stap olsem wanpela spesel painia long Filipins. Mi amamas long nupela kongrigesen bilong mi em ol i stap olsem famili bilong mi na ol i save sapotim mi. Mi amamas tu long lukim Samuel na Shirley i stap gut long Jehova wankain olsem mama bilong ol.—3 Jon 4.

Tru tumas, mi bin karim planti bikpela hevi long laip bilong mi, na tu, mi bin lukim gutpela meri bilong mi i karim hevi bilong wanpela sik na em i dai long en. Na tu, mi redi long mekim ol senis taim ol samting long sindaun bilong mi i senis. Tasol mi lukim olsem Jehova “i no stap longwe long yumi olgeta wan wan.” (Apo. 17:27) Han bilong Jehova “i no sot” long sapotim na strongim ol wokman bilong em, maski ol i stap long ol teritori we i longwe tru. (Ais. 59:1) Jehova em Bikpela Ston bilong mi, em i bin stap wantaim mi long laip olgeta bilong mi na mi tenkyu tru long em. I no gat wanpela taim mi bin stap wanpis.