1. Taim wanpela i tok em i fogivim yu, wai na i hatwok long kliagut long mining bilong dispela tok?

 “MI FOGIVIM YU.” Ating ol dispela tok i mekim isi tru bel bilong yu, na moa yet sapos yu save olsem yu mekim wanpela tok o pasin i mekim narapela i bel hevi tru! Tasol wanem mining tru bilong dispela tok “mi fogivim yu”? Olsem wanem? Dispela man o meri em yu mekim em i bel hevi, tok bilong em i makim olsem yutupela i stap gutpela pren yet? O tok bilong em i makim olsem em i no laik toktok moa long dispela samting na yutupela i no stap moa olsem gutpela pren? Tru, taim wanpela i tok em i fogivim yu, dispela inap makim narapela narapela samting.

 2. Baibel i stori olsem wanem long pasin bilong Jehova long lusim rong? (Lukim tu futnot.)

² Taim Jehova i fogivim yumi ol sinman, dispela i no wankain long hau yumi ol man i save fogivim narapela narapela. I no gat wanpela man inap bihainim stret pasin bilong Jehova long lusim rong. Man bilong raitim song i tok olsem long Jehova: “Tru tumas, yu save lusim tru tru ol sin bilong ol manmeri, olsem na mipela i mas rispektim yu.” a (Sng. 130:​4, NWT-E) Yes, taim Jehova i lusim sin bilong ol man, em i lusim olgeta. Em i soim klia pasin bilong lusim rong i makim wanem. Sampela taim, ol man i raitim Baibel i bin yusim wanpela tok Hibru i makim pasin bilong Jehova long lusim rong, na i no gat wanpela taim ol i yusim dispela tok bilong stori long pasin bilong ol man long lusim rong.

 3. Olsem wanem pasin bilong Jehova long lusim rong i no wankain long pasin bilong ol man long lusim rong? (Aisaia 55:​6, 7)

³ Taim Jehova i fogivim wanpela man, em i tekewe sin bilong em na pinisim olgeta. Jehova i mekim samting bilong stretim bek pasin  pren bilong tupela. Tru tumas, Jehova i save lusim olgeta ol rong bilong yumi na em i save mekim olsem long olgeta taim.—Ritim Aisaia 55:​6, 7.

 4. Long wanem rot Jehova i helpim yumi long kliagut long pasin bilong lusim rong i makim wanem?

⁴ Sapos pasin bilong Jehova long lusim rong i no wankain long pasin bilong yumi ol sinman long lusim rong, orait hau yumi ken kliagut long dispela pasin i makim wanem? Jehova i helpim yumi long rot bilong yusim ol naispela tok piksa i stori long pasin bilong em long lusim rong. Yumi bai skelim sampela bilong ol dispela tok piksa long dispela atikol. Ol bai soim klia hau Jehova i save rausim ol sin bilong yumi, na long wankain taim em i stretim bek gutpela pasin pren yumi gat wantaim em we i bin bagarap taim yumi mekim sin. Taim yumi skelim ol dispela tok piksa, dispela bai strongim pasin bilong yumi long tenkyu tru long gutpela Papa bilong yumi husat i save lusim ol rong bilong yumi long planti rot.

JEHOVA I SAVE RAUSIM OL SIN BILONG YUMI I GO

 5. Yumi save pilim olsem wanem taim Jehova i lusim ol rong bilong yumi?

⁵ Planti taim Baibel i stori long ol sin bilong yumi i olsem kago i hevi tru we i save daunim yumi. King Devit i stori long ol sin em i bin mekim na em i tok: “Ol rong bilong mi i daunim mi stret. Ol i olsem kago i hevi tru, na i hevi tumas long mi karim.” (Sng. 38:4) Tasol Jehova i save lusim rong bilong ol man em ol i tanim bel. (Sng. 25:18; 32:5) Long tok Hibru ol i tanim dispela tok “lusim” olsem “apim i go” o “karim i go.” Yumi ken tok ol sin bilong yumi i olsem kago i hevi tru em yumi karim long solda bilong yumi, tasol Jehova i olsem wanpela strongpela man husat i apim ol dispela kago na em i karim i go.

 6. Jehova i save rausim ol sin bilong yumi i go longwe tru olsem wanem?

⁶ I gat narapela tok piksa i soim klia olsem wanem Jehova i rausim ol sin bilong yumi i go longwe tru. Buk Song 103:12 i tok: “Hap bilong san kamap i stap longwe tru long hap bilong san i go daun, olsem tasol em i save rausim ol sin bilong yumi i go longwe tru long yumi.” Hap is i stap longwe tru long hap wes. Dispela tupela poin i no save bung. Yumi ken tok, i olsem Jehova i save rausim ol sin bilong yumi i go longwe tru na yumi no inap lukim moa. Dispela em naispela tok piksa i soim klia olsem wanem Jehova i save lusim olgeta ol rong bilong yumi.

 7. Baibel i tok Jehova i save mekim wanem long ol sin bilong yumi? (Maika 7:​18, 19)

⁷ Em tru olsem Jehova i save rausim ol sin bilong yumi i go longwe tru long yumi, tasol yu ting em i holim yet i stap ol dispela sin? Nogat tru. King Hesekia i tok olsem long Jehova: “Yu bin tromoi olgeta sin bilong mi i go long baksait bilong yu.” O olsem futnot i tok, “yu rausim olgeta sin bilong mi long ai bilong yu.” (Ais. 38:​9, 17; ftn.) Dispela tok piksa i soim klia olsem Jehova i save kisim ol sin bilong ol man i tanim bel na em i tromoi i go na em i no stap moa long ai bilong em. Yumi inap tanim dispela tok tu olsem: “Yu rausim [ol sin bilong mi] i go na i olsem mi no bin mekim.” Baibel i stori moa long dispela poin long narapela tok piksa i stap long Maika 7:​18, 19. (Ritim.) Ol dispela ves i tok i olsem Jehova i tromoi olgeta sin bilong yumi i go daun tru long solwara. Long bipo, i no gat wanpela man inap kisim bek wanpela samting ol i tromoi i go daun tru long solwara.

 8. Yumi kisim skul pinis long wanem ol samting?

⁸ Ol dispela tok piksa i skulim yumi olsem Jehova i save lusim olgeta ol rong bilong yumi, so i no gat wok long bel i kotim yumi yet long ol rong yumi bin mekim. Olsem Devit i bin tok: “Ol man em ol i bin brukim ol lo na God i fogivim ol na i karamapim sin bilong ol, ol i ken amamas. Man em Jehova i no save tingim ol sin bilong em, em i ken amamas.” (Rom 4:​6-8) Tru tumas, Jehova i gat pasin bilong lusim rong olgeta!

 JEHOVA I SAVE WASIM OL SIN BILONG YUMI

 9. Jehova i mekim wanem tok piksa bilong soim olsem em i save lusim rong olgeta?

⁹ Jehova i stori tu long ol narapela tok piksa bilong helpim yumi long pilim tru olsem wanem pe bilong baim bek man i opim rot long em inap lusim rong bilong ol man i tanim bel. Baibel i mekim tok piksa olsem Jehova i save wasim ol sin bilong ol manmeri. Long dispela rot ol sinman inap kamap klin gen. (Sng. 51:7; Ais. 4:4; Jer. 33:8) Jehova yet i stori long samting i kamap taim em i mekim olsem, em i tok: “Maski ol sin bilong yupela i olsem retpela kala, ol bai kamap waitpela olsem sno; maski ol i retpela olsem retpela laplap, ol bai kamap olsem waitpela wul.” (Ais. 1:18) I hatwok tru long rausim wanpela retpela mak i stap long klos. Tasol long rot bilong dispela tok piksa, Jehova i soim olsem em inap wasim na rausim ol sin bilong yumi na yumi kamap klin gen, i olsem dispela retpela mak long waitpela klos i no stap moa.

10. Jehova i mekim wanem narapela tok piksa bilong soim bikpela pasin helpim em i mekim taim em i lusim ol rong bilong yumi?

¹⁰ Olsem yumi bin stori long atikol i go pinis, ol sin bilong yumi i olsem ol “dinau.” (Mat. 6:​12, ftn.; Luk 11:4) So long olgeta taim yumi mekim sin long Jehova, i olsem dinau bilong yumi i wok long i go antap moa. Yumi gat bikpela dinau tru long em! Tasol taim Jehova i lusim ol rong bilong yumi, i olsem em i lusim dispela dinau em yumi mas bekim. Na em i no save askim askim yumi long bekim dispela dinau, nogat. Dispela em naispela tok piksa we i kamapim klia bikpela bel isi tru yumi pilim taim Jehova i lusim ol rong bilong yumi!

11. Wanem insait bilong tok Baibel i mekim olsem ol sin bilong yumi i “tekewe”? (Aposel 3:19)

¹¹ Jehova i no save lusim tasol ol dinau o ol sin bilong yumi, nogat, em i save tekewe tu ol dispela sin. (Ritim Aposel 3:19.) Yumi ken tok piksa olsem wanpela man i kisim pen na em i droim lain antap long amaun bilong mani em yu mas bekim. Maski i olsem, yu inap lukim yet ol dispela namba long pepa. Tasol taim wanpela i tekewe samting, dispela em i narapela kain. Bilong kliagut long dispela tok piksa, tingim olsem ol man long bipo i no save yusim strongpela ing long rait long pepa. Olsem na wanpela inap kisim spans i gat wara long en na klinim o rausim ol rait long pepa. So taim ol i “tekewe” wanpela dinau, dispela i makim olsem dinau i pinis olgeta na i no stap moa. Ol man i no inap lukim moa rait long pepa. I olsem dispela dinau i no bin stap long pastaim. Yumi amamas tru long save olsem Jehova i no save lusim tasol ol sin bilong yumi, em i save tekewe tu ol dispela sin na ol i pinis olgeta!—Sng. 51:9.

12. Yumi kisim wanem skul long tok piksa bilong bikpela klaut?

¹² Jehova i yusim wankain tok piksa bilong soim olsem wanem em i tekewe o rausim ol sin bilong yumi. Em i tok: “Mi bai rausim ol rong bilong yu na i olsem klaut i haitim ol na rausim ol sin bilong yu na i olsem bikpela klaut i haitim ol.” (Ais. 44:22) Taim Jehova i fogivim yumi, i olsem em i yusim bikpela klaut long haitim ol sin bilong yumi na bai yumi no lukim moa na Em tu i no lukim moa.

13. Taim Jehova i lusim ol rong bilong yumi, yumi save pilim olsem wanem?

¹³ Yumi kisim wanem skul long ol dispela tok piksa? Taim Jehova i lusim ol rong bilong yumi, i no gat wok moa long bel i kotim yumi long laip olgeta bilong yumi. Long rot bilong blut bilong Jisas Krais, Jehova i lusim olgeta ol sin o ol dinau bilong yumi. Em i pinisim olgeta ol rekod bilong dispela dinau yumi gat na i olsem yumi no bin gat dinau long pastaim. Dispela i kamapim klia pasin bilong Jehova long fogivim yumi taim yumi tanim bel long ol sin yumi bin mekim.

 JEHOVA I SAVE STRETIM BEK GUTPELA PASIN PREN YUMI GAT WANTAIM EM

14. Wai na yumi ken trastim tru pasin bilong Jehova long lusim ol rong bilong yumi? (Lukim tu ol piksa.)

¹⁴ Taim Jehova i lusim ol rong bilong yumi, dispela i opim rot long yumi inap kamap pren bilong em gen. Na tu, em i helpim yumi long abrusim pasin bilong larim bel i kotim yumi oltaim. Yumi no ken pret olsem Jehova i belhat yet long yumi na em i wok long painim rot bilong panisim yumi, nogat. Em i no inap tru long mekim olsem. Taim Jehova i tok em i lusim ol rong bilong yumi, wai na yumi ken trastim tru em? Long wanem, Jehova i tokim profet Jeremaia olsem: “Bai mi fogivim ol long ol pasin nogut ol i mekim, na bai mi no tingim moa ol sin bilong ol.” (Jer. 31:34) Pol i kolim ol dispela wankain tok taim em i tok olsem: “Bai mi no tingim moa ol sin bilong ol.” (Hib. 8:12) Tasol dispela tok i makim wanem samting stret?

15. Taim Jehova i tok em i no inap tingim moa ol sin bilong yumi, dispela i makim wanem?

¹⁵ Long Baibel, i no olgeta taim dispela tok “tingim” i makim olsem wanpela i tingim wanpela samting o em i wok long tingting long dispela samting, nogat. Dispela tok inap makim olsem wanpela i mekim samting. Man nogut i hangamap long diwai pos klostu long Jisas i tok: “Jisas, tingim mi taim yu kamap King.” (Luk 23:​42, 43) Em i askim Jisas long mekim samting bilong helpim em long bihain. Bekim bilong Jisas i soim olsem em bai kirapim bek dispela man nogut. So taim Jehova i tok olsem em i no inap tingim moa ol sin bilong yumi, tok bilong em i makim olsem em i no inap panisim yumi long bihain long ol dispela sin yumi bin mekim.

16. Baibel i stori olsem wanem long pasin bilong i stap fri em yumi kisim taim God i fogivim yumi?

¹⁶ Baibel i stori long narapela tok piksa bilong helpim yumi long kliagut long pasin bilong i stap fri em yumi kisim taim God i fogivim yumi. Yumi gat sin na oltaim yumi save tingting long mekim ol pasin i no stret, olsem na yumi stap “wokboi bilong sin.” Tasol long rot bilong bikpela pasin helpim bilong Jehova long lusim ol rong bilong yumi, yumi olsem wokboi em ol “i no stap kalabus moa long sin.” (Rom 6:17, 18; Rev. 1:5) Tru  tumas, pasin bilong Jehova long lusim ol rong bilong yumi i mekim yumi amamas tru, wankain olsem wokboi i amamas tru long lusim kalabus na i stap fri.

17. Taim Jehova i lusim ol rong bilong yumi, hau dispela i mekim yumi kamap orait gen? (Aisaia 53:5)

¹⁷ Ritim Aisaia 53:5. Long laspela tok piksa yumi bai skelim, Baibel i tok yumi wankain olsem ol man i gat wanpela sik nogut we inap kilim ol i dai. Tasol pe bilong baim bek man em Jehova i bin givim long rot bilong Pikinini bilong em i opim rot long yumi inap kamap orait gen. (1 Pita 2:24) Pe bilong baim bek man i opim rot long yumi inap stretim bek pasin pren bilong yumi wantaim Jehova we i bin bagarap taim yumi mekim sin—sin i olsem wanpela sik nogut. Taim wanpela man i kamap orait gen long wanpela bikpela sik, em i save amamas tru. Olsem tasol, taim Jehova i fogivim yumi, nau yumi kamap orait gen long sait bilong bilip na yumi stap pren bilong em gen na dispela i mekim yumi amamas tru.

PASIN BILONG JEHOVA LONG LUSIM RONG I HELPIM YUMI

18. Yumi kisim wanem skul long ol tok piksa bilong Baibel we i stori long pasin bilong Jehova long lusim rong? (Lukim tu blok “Hau Jehova i Save Lusim Ol Rong Bilong Yumi.”)

¹⁸ Yumi kisim wanem skul long ol tok piksa bilong Baibel we i stori long pasin bilong Jehova long lusim rong? Taim Jehova i fogivim yumi, em i lusim olgeta ol sin bilong yumi na em i no inap tingim moa. Dispela i opim rot long yumi inap i gat gutpela pasin pren wantaim Papa bilong yumi long heven. Na long wankain taim, yumi tingim olsem pasin bilong lusim rong em i wanpela presen. Yumi ol sinman i kisim dispela presen long rot bilong pasin laikim na bikpela pasin helpim bilong Jehova. I no olsem yumi mekim samting na Jehova i givim yumi dispela presen, nogat.—Rom 3:24.

19. (a) Yumi ken amamas tru long wanem samting? (Rom 4:8) (b) Yumi bai stori long wanem samting long neks atikol?

¹⁹ Ritim Rom 4:8. Yumi olgeta wan wan i ken amamas tru olsem Jehova em i God bilong “lusim ol sin bilong ol manmeri”! (Sng. 130:4) Tasol sapos yumi laik bai Jehova i lusim ol rong bilong yumi, i gat wanpela bikpela samting yumi mas mekim. Jisas i tok: “Sapos yupela i no fogivim ol rong ol man i mekim, orait Papa bilong yupela bai i no fogivim ol rong bilong yupela.” (Mat. 6:​14, 15) Olsem na em i bikpela samting long yumi mas bihainim pasin bilong Jehova long lusim rong bilong ol narapela. Tasol hau yumi ken mekim olsem? Neks atikol bai stori long dispela.