1-2. Wai na yumi ken tok samting i painim yumi i wankain long dispela yangpela man em paragraf 1 i stori long em?

 PIKSAIM long tingting olsem wanpela yangpela man i kamap bikpela insait long famili i gat planti mani kago. Wanpela taim bikpela hevi tru i kamap; papamama bilong em i dai long wanpela eksiden. Dispela nius i bagarapim tru bel bilong em. Tasol i gat narapela nius i nogut moa. Em i painimaut tu olsem papamama i tromoi nating olgeta mani bilong ol, na ol i gat bikpela dinau tru. Olsem na taim ol i dai, em i no kisim mani kago bilong famili. Ol i lusim em wantaim bikpela dinau tru, na ol man em ol i gat dinau long ol, ol i askim askim em long bekim dispela dinau. Dispela dinau i antap tumas na em i no inap long bekim.

² Samting i painim yumi i wankain long samting i painim dispela yangpela man. Fes papamama bilong yumi, Adam na Iv, i gutpela olgeta na ol i bin stap long naispela ples paradais. (Stt. 1:27; 2:​7-9) Rot i op long ol i ken stap laip oltaim na stap amamas tru. Tasol bihain, olgeta samting i senis. Ol i lusim gutpela ples paradais ol i stap long en, na tu, ol i lus long kisim laip oltaim. Tupela i lusim wanem samting long ol tumbuna pikinini bilong ol? Baibel i tok: “Long rot bilong wanpela man tasol [Adam] sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.” (Rom 5:12) Yumi kisim sin long Adam, olsem na yumi save dai. Sin yumi kisim long Adam i olsem wanpela dinau i antap tumas na i no gat wanpela bilong yumi inap long bekim.—Sng. 49:8.

 3. Wai na yumi ken tok ol sin bilong yumi i olsem ol “dinau”?

³ Jisas i tok ol sin bilong yumi i olsem ol “dinau.” (Mat. 6:12; ftn.; Luk 11:4) Taim yumi mekim sin, i olsem yumi gat dinau  long Jehova. Sapos Jehova i no bin mekim wanpela samting bilong helpim yumi, bai i no gat rot long yumi bekim dispela dinau. Taim yumi dai, dispela tasol em bai rot bilong pinisim dispela dinau yumi gat.—Rom 6:​7, 23.

 4. (a) Wanem samting bai painim yumi ol sinman sapos yumi no bin kisim helpim? (Buk Song 49:​7-9) (b) Long Baibel, dispela tok “sin” i makim wanem? (Lukim blok “ Sin.”)

⁴ Yu ting yumi inap kisim bek olgeta samting em Adam na Iv i bin lusim? Yumi yet i no inap mekim olsem. (Ritim Buk Song 49:​7-9.) Sapos yumi no bin kisim helpim, yumi no inap bilip na wet long kirap bek o long kisim laip oltaim long bihain. Indai bilong yumi bai wankain olsem bilong ol animal, yumi bai no inap kirap bek.—Ekl. 3:19; 2 Pita 2:12.

 5. Olsem wanem gutpela Papa bilong yumi i helpim yumi long bekim dinau bilong sin yumi gat? (Lukim piksa.)

⁵ Tingim dispela yangpela man em yumi stori long em long kirap bilong atikol, em bai pilim olsem wanem sapos wanpela maniman i tok em i laik bekim olgeta dinau bilong em? Em bai amamas tru long kisim dispela helpim. Wankain olsem, gutpela Papa bilong yumi Jehova i givim yumi wanpela presen bilong bekim dinau bilong sin em yumi kisim long Adam. Jisas i tok: “God i laikim tumas olgeta manmeri bilong graun, olsem na em i givim dispela Pikinini tru bilong em long ol bai olgeta man husat i bilip long em ol inap abrusim bagarap na kisim laip oltaim.” (Jon 3:16) Dispela presen i opim rot tu long yumi inap pas gut wantaim Jehova.

 6. Yumi bai skelim wanem ol tok em Baibel i mekim, na bilong wanem?

⁶ Yumi mas mekim wanem bilong kisim helpim long dispela nambawan gutpela presen em God i givim bilong lusim ol sin o ol “dinau” bilong yumi? Yumi ken kisim bekim bilong dispela askim taim yumi skelim ol tok Baibel i mekim olsem kamap wanbel wantaim God, God i stretim rot bilong tekewe sin bilong yumi, pe bilong baim bek man, God i kisim bek o baim bek yumi, na God i kolim yumi stretpela man. Long dispela atikol, yumi bai stori long mining bilong ol dispela tok. Taim yumi tingim tingim mining bilong ol dispela tok, dispela bai strongim pasin bilong yumi long pilim tru long bel ol samting Jehova i mekim bilong fogivim yumi.

JEHOVA I LAIK YUMI KAMAP WANBEL WANTAIM EM

 7. (a) Adam na Iv i lusim tu wanem samting? (b) Yumi ol tumbuna pikinini bilong Adam na Iv i nidim tru wanem samting? (Rom 5:​10, 11)

⁷ Adam na Iv i lusim gutpela presen ol i kisim em long stap laip oltaim, na ol i lusim tu gutpela pasin pren bilong ol wantaim Papa bilong ol, Jehova. Paslain long tupela i mekim sin, ol i hap bilong famili bilong God. (Luk 3:38) Tasol taim ol i sakim tok bilong Jehova, em i rausim  ol long famili bilong em paslain long ol i kamapim ol pikinini. (Stt. 3:​23, 24; 4:1) Yumi ol tumbuna pikinini bilong tupela, olsem na yumi mas kamap wanbel wantaim Jehova. (Ritim Rom 5:​10, 11.) Dispela i makim olsem yumi mas stretim pasin pren bilong yumi wantaim em. Wanpela buk i tok dispela tok Grik ol i yusim long hia olsem “kamap wanbel,” em inap makim olsem “kamap pren bilong wanpela birua.” Tingim dispela, Jehova yet i go pas long mekim samting bilong kamap wanbel wantaim yumi. Hau em i mekim olsem?

GOD I STRETIM ROT BILONG TEKEWE SIN

 8. Jehova i mekim wanem bilong tekewe sin bilong yumi?

⁸ Jehova i stretim rot bilong tekewe sin bilong ol sinman na bai ol i kamap pren bilong em gen. Em i stretim rot long kisim bek samting em Adam i bin lusim, na em i mekim olsem long rot bilong givim samting i gat wankain pe olsem samting i bin lus. Ol Skripsa Grik tu i stori long samting Jehova i mekim bilong stretim rot bilong ol man i ken kamap wanbel wantaim em o kamap pren bilong em.—Rom 3:25.

 9. Jehova i stretim wanem rot bilong em i ken lusim ol sin bilong ol Israel?

⁹ Bilong ol Israel i ken pas gut wantaim Jehova, em i stretim rot bilong em i ken lusim ol sin bilong ol. Long Israel bilong bipo, long olgeta wan wan yia ol i save mekim Bikpela De Bilong God i Tekewe Sin Bilong Ol Manmeri. Long dispela de, hetpris i save ofaim ol animal olsem sakrifais bilong God i tekewe sin bilong ol manmeri. Em tru olsem ol animal ol i ofaim olsem sakrifais i no inap tekewe olgeta ol sin bilong ol manmeri bikos laip bilong ol man i winim laip bilong ol animal. Tasol Jehova i redi long fogivim ol Israel husat i tanim bel taim ol i givim ol sakrifais em i orait long en. (Hib. 10:​1-4) Na tu, ol sakrifais ol i givim long dispela bikpela de na long ol narapela taim tu, dispela i helpim ol Israel long luksave olsem ol i gat sin na ol i nidim wanpela samting i gutpela moa bilong tekewe olgeta ol sin bilong ol.

10. Jehova i stretim wanem gutpela rot bilong lusim olgeta ol sin bilong ol manmeri?

¹⁰ Jehova i tingim pinis samting em bai mekim bilong lusim ol sin bilong ol manmeri. Em i stretim rot long Pikinini em i laikim tumas i “givim em yet olsem ofa wanpela taim tasol bilong karim ol sin bilong planti man.” (Hib. 9:28) Jisas i givim “laip bilong em olsem pe bilong baim bek planti manmeri.” (Mat. 20:28) Pe bilong baim bek man i makim wanem samting?

PE BILONG BAIM BEK MAN

11. (a) Long Baibel, pe bilong baim bek man i makim wanem? (b) Husat tasol inap givim pe bilong baim bek man?

¹¹ Long Baibel, pe bilong baim bek man i makim pe God i givim bilong opim rot long yumi ken kamap wanbel gen wantaim em. a Long tingting bilong Jehova, dispela pe i opim rot long yumi inap kisim bek samting i bin lus. Bilong wanem yumi tok olsem? Tingim, Adam na Iv i lusim laip i gutpela olgeta na presen bilong i stap laip oltaim. So pe bilong baim bek man i mas stret o i mas wankain long pe bilong samting i bin lus. (1 Tim. 2:6) Bilong givim dispela pe, wanpela man i bikpela pinis i mas (1) gutpela olgeta; (2) em inap i stap laip oltaim long graun; na (3) em i mas redi long givim laip bilong em olsem ofa bilong helpim yumi. Long dispela rot tasol, laip bilong dispela man inap baim bek dispela laip i gutpela olgeta we i bin lus.

12. Wai na Jisas inap givim pe bilong baim bek man?

¹² Tingim tripela risen na Jisas inap givim pe bilong baim bek man. (1) Em i gutpela olgeta—“em i no bin mekim sin.” (1 Pita 2:22) (2) Em  i no gat sin, olsem na em inap stap laip oltaim long graun. (3) Em i redi long dai na givim laip bilong em bilong baim bek yumi. (Hib. 10:​9, 10) Jisas em man i gutpela olgeta, olsem na em i wankain long fes man Adam paslain long em i bin mekim sin. (1 Kor. 15:45) So taim Jisas i dai, em inap long givim pe i stret bilong baim bek yumi long sin bilong Adam; em i givim pe i stret long baim bek samting Adam i bin lusim. (Rom 5:19) Long dispela rot, Jisas i kamap “laspela Adam.” I no gat wok long narapela man i gutpela olgeta i mas kam na baim bek samting em Adam i bin lusim. Jisas i dai “wanpela taim tasol . . . bilong helpim ol manmeri inap oltaim oltaim.”—Hib. 7:27; 10:12.

13. Jehova i mekim wanem bilong opim rot long yumi ken kamap pren bilong em?

¹³ Jehova i mekim wanem bilong opim rot long yumi ken kamap pren bilong em? Yumi kisim save pinis olsem God i stretim rot bilong tekewe sin bilong yumi na bai yumi ken pas gut wantaim Em. Tasol bilong em i ken mekim olsem, em i mas givim pe bilong baim bek man. Taim Jisas i kapsaitim blut bilong em i dia tumas, em i givim dispela pe bilong baim bek yumi. Wanem gutpela samting i kamap long dispela? (Efe. 1:7; Hib. 9:14) Nau yumi bai stori long dispela.

GOD I KISIM BEK YUMI NA KOLIM YUMI STRETPELA MAN

14. Nau yumi bai skelim wanem askim, na bilong wanem?

¹⁴ God i stretim rot bilong tekewe ol sin bilong yumi, na wanem gutpela samting i kamap long dispela? Baibel i yusim sampela tok bilong stori long dispela. Em tru olsem mining bilong ol dispela tok i klostu wankain, tasol ol dispela tok i helpim yumi long kliagut long olsem wanem samting God i mekim i opim rot long em i ken fogivim yumi. Taim yumi skelim ol dispela tok, yumi bai luksave tu long helpim yumi kisim long samting God i bin mekim.

15-16. (a) Long Baibel, dispela tok “kisim bek” i makim wanem? (b) Yumi pilim olsem wanem long lusim kalabus bilong sin na dai?

¹⁵ Long Baibel, dispela tok kisim bek i makim olsem yumi kamap fri, na dispela samting i kamap bikos long pe God i givim bilong baim bek yumi. Aposel Pita i stori long dispela, na em i tok: “Yupela i save olsem God i bin mekim yupela i kamap fri [long tok Grik, “baim bek yupela”] long pasin yupela i bin wokabaut long en long bipo, em pasin yupela i bin kisim long ol tumbuna bilong yupela na i no gat as bilong en. God i no bin kisim bek yupela long rot bilong gol na silva, em ol samting i save bagarap. Nogat. Em i bin kisim bek yupela long blut bilong Krais i dia tumas. Dispela blut i olsem blut bilong sipsip, em sipsip i no gat mak long en na i klin olgeta.”—1 Pita 1:​18, 19; ftn.

¹⁶ Long rot bilong pe bilong baim bek man, yumi lusim kalabus bilong sin na dai we i save givim yumi planti pen na hevi tru. (Rom 5:21) Tru tumas, i gat gutpela risen long yumi pilim olsem yumi gat bikpela dinau long Jehova na Jisas long ol i kisim bek yumi long rot bilong blut o laip bilong Jisas we i dia tumas.—1 Kor. 15:22.

17-18. (a) Taim God i kolim yumi stretpela man, dispela i makim wanem? (b) Dispela i mekim wanem long yumi?

¹⁷ Taim God i kolim yumi stretpela man, dispela i makim olsem em i tekewe ol sin o ol dinau bilong yumi na i no gat wok long yumi bekim dispela dinau. Maski i olsem, Jehova i bihainim yet stretpela pasin bilong em. Em i no kolim yumi stretpela man bikos yumi bin mekim sampela samting, na tu, i no olsem Jehova i orait long ol sin yumi bin mekim, nogat. Jehova inap lusim ol sin bilong yumi bikos em i givim pinis pe bilong baim bek man na yumi bilip long rot em i stretim bilong tekewe o lusim ol sin bilong yumi.—Rom 3:24; Gal. 2:16.

 ¹⁸ Taim Jehova i kolim yumi stretpela man, dispela i mekim wanem long yumi? Ol lain em God i bin makim ol long mekim wok king na pris wantaim Jisas long heven, Em i kolim ol olsem ol stretpela man na ol i stap olsem ol pikinini bilong Em. (Tai. 3:7; 1 Jon 3:1) God i lusim pinis ol sin bilong ol. I olsem ol i no bin mekim ol dispela sin long bipo, olsem na ol i winim mak bilong i go insait long Kingdom. (Rom 8:​1, 2, 30) Ol lain em ol i bilip na wet long kisim laip long graun, God i kolim ol olsem ol stretpela man na ol i stap pren bilong em, na em i lusim pinis ol sin bilong ol. (Jems 2:​21-23) Bikpela lain manmeri em ol i abrusim Armagedon, ol bai stap laip oltaim na ol bai i no inap dai. (Jon 11:26) “Ol stretpela man na ol man nogut wantaim” em ol i dai pinis, ol bai kisim laip gen. (Apo. 24:15; Jon 5:​28, 29) Na bihain, olgeta gutpela wokman bilong Jehova long graun, ol bai “kisim dispela pasin bilong i stap fri i nambawan tru olsem bilong ol pikinini bilong God.” (Rom 8:21) Yumi bai kisim naispela blesing tru long rot God i stretim bilong tekewe sin bilong yumi—yumi bai stap olsem ol pikinini i gutpela olgeta em ol i kamap wanbel gen wantaim Papa bilong ol, Jehova!

19. Samting em Jehova na Jisas i mekim long yumi, dispela i helpim yumi olsem wanem? (Lukim tu blok “ Dispela i Mekim Wanem Long Yumi?”)

¹⁹ Yumi olsem dispela yangpela man em yumi stori pinis long em, em i no kisim wanpela samting long papamama na ol i lusim em wantaim bikpela dinau we em i no inap tru long bekim. Tasol yumi amamas olsem Jehova i helpim yumi. Gutpela samting i kamap long yumi bikos God i stretim rot bilong tekewe sin bilong yumi na em i givim pe bilong baim bek yumi. Yumi bilip long Jisas Krais, na dispela i opim rot long God i kisim bek yumi na yumi no stap kalabus moa long sin na dai. Na tu, God inap lusim o tekewe ol sin bilong yumi, i olsem yumi no bin mekim ol dispela sin long bipo. Na bikpela samting moa, nau rot i op long yumi inap pas gut wantaim gutpela Papa bilong yumi long heven, Jehova.

20. Yumi bai stori long wanem samting long neks atikol?

²⁰ Yumi amamas tru taim yumi tingim tingim long bel samting Jehova na Jisas i bin mekim bilong helpim yumi. (2 Kor. 5:15) Sapos tupela i no bin helpim yumi, yumi no inap bilip na wetim gutpela samting long painim yumi long bihain! Tasol yumi laik save, taim Jehova i lusim rong bilong yumi, dispela i mekim wanem long yumi wan wan? Yumi bai stori long dispela long neks atikol.