1, 2. Wanem bung bilong 2018 inap helpim ol manmeri bilong God long pas gut wantaim? Bilong wanem? (Lukim piksa long kirap bilong stadi.)

TAIM san i go daun long Mas 31, 2018, ol manmeri bilong God na ol manmeri i gat gutpela bel, ol bai mekim bung bilong Kaikai Bilong Bikpela. Long wan wan kantri long olgeta hap bilong graun, planti milion manmeri bai mekim bung bilong Memorial long tingim dai bilong Krais. Long olgeta wan wan yia, dispela bung i save helpim ol manmeri bilong God long olgeta hap bilong Graun long pas gut wantaim!

² Jehova na Jisas i amamas tru taim tupela i lukim olsem insait long wan wan aua, planti milion manmeri long olgeta hap bilong graun i wok long kam long dispela bung. Baibel i tok profet olsem “bikpela lain manmeri, ol man i no inap kaunim namba bilong ol. Ol i bilong olgeta kantri na bilong olgeta lain na bilong olgeta lain pipol na bilong olgeta tokples,” ol bai singaut olsem: “God bilong mipela i sindaun long sia king, na Pikinini Sipsip, tupela i kisim bek mipela.” (Rev. 7:9, 10) Tru tumas, Jehova na Jisas i save kisim biknem long rot bilong Memorial!

3. Dispela stadi bai bekim wanem ol askim?

 ³ Dispela stadi bai bekim sampela askim. (1) Olsem wanem yumi wan wan inap redi bambai bung bilong Memorial i helpim yumi? (2) Olsem wanem Memorial i helpim ol manmeri bilong God long pas gut wantaim? (3) Olsem wanem yumi wan wan inap strongim pasin bilong pas gut wantaim? (4) Bai i gat laspela Memorial? Sapos olsem, orait em bai kamap long wanem taim?

4. Bilong wanem em i bikpela samting long i go long Memorial?

⁴ Tingim risen na em i bikpela samting long i go long Memorial. Ol miting bilong kongrigesen em hap bilong wok lotu bilong yumi. Jehova na Jisas i luksave long husat i save givim bel long i go long Memorial, em spesel bung yumi save mekim long olgeta yia. Sapos yumi kisim bikpela bagarap long bodi o yumi sik nogut tru na yumi no inap i go long dispela bung, orait tupela i save long dispela. Taim yumi soim olsem yumi tingim ol miting olsem bikpela samting long yumi, orait Jehova bai putim nem bilong yumi long “buk bilong laip.” Dispela “buk i gat nem bilong ol manmeri” husat bai kisim laip oltaim.—Mal. 3:16; Rev. 20:15.

5. Paslain long taim bilong Memorial, olsem wanem yumi inap ‘skelim yumi yet olsem yumi holimpas bilip o nogat?’

⁵ Sampela de paslain long taim bilong Memorial, yumi ken lusim sampela haptaim long beten na skelim gut pasin pren bilong yumi wantaim Jehova. (Ritim 2 Korin 13:5.) Yumi inap mekim olsem wanem? ‘Yumi mas skelim yumi yet olsem yumi holimpas bilip o nogat.’ Askim yu yet: ‘Mi bilip tru olsem mi stap insait long gutpela oganaisesen em Jehova i yusim bilong inapim samting em i tingting pinis long kamapim? Mi save givim bel olgeta long autim gutnius bilong Kingdom na skulim ol man? Pasin bilong mi i soim olsem mi bilip tru olsem yumi stap long taim bilong las de na klostu nau wok bos bilong Satan bai pinis? Mi gat strongpela bilip long Jehova na Jisas olsem mi bin i gat taim mi dediket long God Jehova?’ (Mat. 24:14; 2 Tim. 3:1; Hib. 3:14) Taim yumi skelim ol kain askim olsem, dispela bai helpim yumi long luksave long pasin pren bilong yumi wantaim Jehova i stap strong o nogat.

6. (a) Yumi mas mekim wanem bilong kisim laip oltaim? (b) Wanpela elda i save mekim wanem bilong redim em yet paslain long Memorial? (c) Olsem wanem yu inap mekim kain stadi projek olsem?

⁶ Ritim ol hap bilong Baibel we i stori long Memorial, na tingim tingim ol risen na em i bikpela samting long i go long Memorial. (Ritim Jon 3:16; 17:3.) Taim yumi “kisim save” long Jehova na “bilip” long Pikinini tru bilong em, Jisas, orait yumi bai kisim laip oltaim. Paslain long Memorial, i gutpela long mekim wanpela stadi projek we inap helpim yu long i go klostu long Jehova na Jisas. Wanpela elda husat i stap longpela taim long tok i tru i bin mekim olsem. Inap planti yia, em i bungim ol Wastaua we i stori long Memorial, na pasin laikim Jehova na Jisas i mekim long yumi. Sampela wik paslain long Memorial, em i save ritim gen ol dispela Wastaua na tingim tingim risen na Memorial em i bikpela samting. Oltaim em i save kisim ol nupela atikol na bungim wantaim ol olpela atikol em i gat pinis. Em i save ritim gen ol dispela atikol na Baibel ritim bilong Memorial na tingim tingim ol tok bilong en, na dispela i helpim em long kisim ol nupela save long olgeta yia. Bikpela samting moa em olsem, dispela pasin i helpim em long pilim olsem pasin bilong em long laikim Jehova na Jisas i kamap strong long olgeta yia. Taim yu mekim kain stadi projek olsem, dispela inap strongim pasin laikim bilong yu long Jehova na Jisas, na bung bilong Memorial inap helpim yu tru.

7. (a) Long dispela nait ol i mekim Kaikai Bilong Bikpela, Jisas i beten long wanem samting? (b) Wanem samting i kamap na i soim olsem Jehova i bekim beten bilong Jisas?

⁷ Long dispela nait ol i mekim Kaikai Bilong Bikpela, Jisas i beten long God olsem ol disaipel bilong em i ken pas gut wantaim, wankain olsem em i pas gut wantaim Papa bilong em. (Ritim Jon 17:20, 21.) Jehova i bekim beten bilong Pikinini bilong em, olsem na nau planti milion manmeri i bilip olsem Jehova i salim Pikinini bilong em i kam bilong helpim yumi. Ol Witnes Bilong Jehova i save mekim bung bilong Memorial, na dispela i kamapim klia olsem ol i save pas gut wantaim. Ol manmeri bilong narapela narapela kantri na skin kala i bung wantaim long olgeta hap bilong graun. Long sampela hap, ol manmeri i no bin lukim ol lain bilong narapela narapela kantri na skin kala i bung wantaim, na sampela i no amamas long ol kain bung olsem. Tasol Jehova na Jisas i laikim tru dispela kain pasin bilong bung wantaim!

8. Jehova i givim wanem tok long Esekiel long pasin bilong pas gut wantaim?

⁸ Yumi ol manmeri bilong Jehova i amamas long pas gut wantaim. Jehova i bin tok profet long dispela samting. Skelim tok God i givim long Esekiel long kisim tupela stik na joinim. Em “stik bilong lain Juda” na “stik bilong lain Josep.” (Ritim Esekiel 37:15-17.) Atikol “Askim” long Wastaua bilong Julai 2016 i tok: “Jehova i tokim Esekiel olsem taim lain Israel i lusim kalabus na go bek long Graun Bilong Promis, ol bai bung gen na stap wanpela lain manmeri. Dispela tok profet i makim tu olsem ol manmeri bilong God bai bung na stap olsem wanpela lain tasol long haptaim bilong las de.”

9. Olsem wanem bung bilong Memorial i truim tok profet bilong Esekiel?

⁹ Kirap long yia 1919 na i kam, Jehova i stretim stretim na bungim gen ol Kristen em i bin makim, em “stik bilong lain Juda” i makim. Bihain planti manmeri husat bai kisim laip long graun, em “stik bilong lain Josep,” ol i joinim lain God i makim na kamap olsem “wanpela lain sipsip.” (Jon 10:16; Sek. 8:23) Jehova i tok promis long joinim dispela 2-pela stik na em bai stap olsem 1-pela stik long han bilong em. (Ese. 37:19) Long nau, dispela 2-pela lain i pas gut wantaim na mekim wok bilong God aninit long wok King bilong Jisas Krais, em man God i kolim long tok profet olsem “wokman bilong mi, Devit.” (Ese. 37:24, 25) Pasin bilong pas gut wantaim em Esekiel i tok profet long en, i save kamap tru long taim bilong Memorial. Long olgeta yia, ol Kristen God i makim na ol i stap yet long graun, ol i save bung wantaim “ol arapela sipsip” na mekim bung bilong tingim dai bilong Jisas! Tasol yumi wan wan inap mekim wanem bilong lukautim na strongim pasin bilong pas gut wantaim?

10. Olsem wanem yumi inap strongim pasin bilong pas gut wantaim ol manmeri bilong God?

¹⁰ Namba 1 rot bilong strongim pasin bilong pas gut wantaim ol manmeri bilong God em olsem, yumi mas kisim pasin daun. Taim Jisas i stap long graun, em i kirapim ol disaipel long bihainim pasin daun. (Mat. 23:12) Sapos yumi gat pasin daun, yumi no inap litimapim nem bilong yumi yet, nogat. Yumi bai stap daun long ol lain i go pas long yumi, na dispela inap helpim kongrigesen long pas gut wantaim. Moa yet, pasin daun bilong yumi bai mekim God i amamas bikos em “i save sakim ol man i mekim pasin antap. Tasol em i save kamapim bikpela pasin helpim long ol man i gat pasin daun.”—1 Pita 5:5.

11. Taim yumi tingim tingim samting em bret na wain i makim, olsem wanem dispela i strongim pasin bilong yumi long pas gut wantaim?

¹¹ Namba 2 rot bilong strongim pasin bilong pas gut wantaim ol wanbilip em olsem, yumi mas tingim tingim long bel bret na wain ol i yusim long Memorial i makim wanem samting.  Paslain long Memorial o long taim bilong Memorial, i gutpela long tingim tingim risen na ol i yusim bret i no gat yis na retpela wain. (1 Kor. 11:23-25) Bret i makim bodi bilong Jisas we i no gat sin long en na em i givim olsem sakrifais, na wain i makim blut bilong Jisas. Yumi mas tingim ol dispela samting na mekim sampela samting moa. Tingim olsem ofa bilong baim bek ol man i kamapim klia bikpela pasin laikim bilong Jehova na Jisas. Jehova i laikim yumi na em i givim Pikinini bilong em long helpim yumi, na Jisas i laikim yumi na em i redi long givim laip bilong em long baim bek yumi. Taim yumi tingim tingim pasin bilong tupela long laikim yumi, dispela bai kirapim yumi long laikim tupela. Pasin bilong yumi long laikim Jehova i stap olsem rop we i pasim yumi wantaim na strongim pasin bilong yumi long pas gut wantaim.

12. Long tok piksa bilong Jisas, olsem wanem em i kamapim klia olsem Jehova i laik bai yumi mas fogivim ol narapela?

¹² Namba 3 rot bilong strongim pasin bilong yumi long pas gut wantaim em olsem, yumi mas redi long fogivim ol narapela. Taim yumi fogivim ol narapela, yumi soim olsem yumi pilim tru pasin bilong God long fogivim yumi long rot bilong ofa bilong Krais long baim bek ol man. Tingim tok piksa Jisas i mekim long Matyu 18:23-34, na askim yu yet: ‘Mi save bihainim tok em Jisas i mekim? Mi no les kwik long wanbilip na kliagut long tingting na filings bilong em? Mi redi long fogivim ol lain i rongim mi?’ Sampela rong ol narapela i mekim long yumi em bikpela tru na i hatwok long yumi ol sinman i lusim tingting long en. Maski i olsem, tok piksa bilong Jisas i kamapim klia olsem Jehova i laik bai yumi mas fogivim ol narapela. (Ritim Matyu 18:35.) Jisas i kamapim klia olsem Jehova i no inap fogivim yumi sapos yumi no fogivim wanbilip bilong yumi. Taim yumi bihain tok bilong Jisas na fogivim rong ol narapela i mekim long yumi, orait yumi lukautim pasin bilong yumi long pas gut wantaim ol manmeri bilong God.

13. Taim yumi stap olsem man o meri bilong kamapim bel isi, olsem wanem dispela i strongim pasin bilong pas gut wantaim?

¹³ Taim yumi fogivim ol narapela, yumi kamapim klia olsem yumi laik stap man o meri bilong kamapim bel isi. Aposel Pol i tok olsem yumi mas “wok strong long holimpas pasin wanbel bilong holi spirit na stap bel isi,  em pasin i save bungim yumi wantaim.” (Efe. 4:3) Long ol wik paslain long Memorial na moa yet long taim bilong Memorial, tingim pasin yu save mekim long ol narapela. Askim yu yet: ‘Mi gat pasin bilong lusim rong ol narapela i mekim long mi? Ol narapela i tingim mi olsem man o meri bilong kamapim bel isi?’ Yumi mas tingim ol dispela bikpela askim long taim bilong Memorial.

14. Olsem wanem yumi inap soim olsem yumi ‘karim hevi ol arapela i putim long yumi na mekim wantaim pasin laikim’?

¹⁴ Namba 4 rot bilong strongim pasin bilong pas gut wantaim em olsem, yumi mas soim pasin laikim olsem Jehova, em God bilong pasin laikim. (1 Jon 4:8) Yumi no ken holim kain tingting olsem long ol wanbilip, “Ating mi mas soim olsem mi laikim ol, tasol i no olsem mi mas laikim ol tru”! Sapos yumi holim kain tingting olsem, orait yumi no bihainim tok Pol i mekim bilong helpim yumi long “karim hevi ol arapela i putim long [yumi] na mekim wantaim pasin laikim.” (Efe. 4:2) Tingim, Pol i no tok tasol olsem “karim hevi ol arapela i putim long yupela,” nogat. Em i tok yumi mas “mekim wantaim pasin laikim.” Insait long kongrigesen, Jehova i singautim ol manmeri bilong narapela narapela sindaun na ples long i kam bung wantaim. (Jon 6:44) Jehova i laikim ol, olsem na em yet i singautim ol i kam. Olsem na i no stret long yumi skelim wanbilip na ting olsem yumi no ken laikim em. Jehova i laik bai yumi mas soim dispela pasin laikim long ol narapela!—1 Jon 4:20, 21.

15. Bilong wanem yumi tok olsem bai i gat laspela Memorial?

¹⁵ Wanpela taim bai yumi mekim laspela Memorial. Olsem wanem yumi save long dispela? Long namba 1 pas Pol i raitim long ol Kristen long Korin em God i makim ol long holi spirit, em i tok olsem taim yumi mekim bung bilong tingim dai bilong Jisas long olgeta yia, yumi “save tokaut long indai bilong Bikpela, inap long taim em i kam.” (1 Kor. 11:26) Dispela tok “i kam” i makim wankain taim em Jisas i tok profet long en, em taim em bai “kam” na pinis bai kamap. Jisas i tingim traipela hevi tru we klostu nau bai kamap, na em i tok: “Sain bilong Pikinini bilong man bai kamap long skai na olgeta lain bilong graun bai paitim bros bilong ol na krai sori. Na ol bai lukim Pikinini bilong man i stap antap long ol klaut na kam wantaim pawa na bikpela glori. Bikpela krai bilong trampet bai kamap na [Jisas] bai salim ol ensel bilong en i go. Na ol bai bungim lain bilong em, em lain God i bin makim, na ol bai kam long 4-pela hap bilong graun. Long arere tru bilong wanpela sait bilong skai i go olgeta long narapela sait.” (Mat. 24:29-31) Taim Jisas i mekim dispela tok, ‘bungim lain God i bin makim,’ em i tok long dispela haptaim we ol Kristen God i bin makim na ol i stap yet long graun bai kisim laip long heven. Dispela samting bai kamap bihain long traipela hevi tru i kirap, na paslain long pait bilong Armagedon. Bihain, lain 144,000 bai wok wantaim Jisas na helpim em long bagarapim ol king bilong graun long pait bilong Armagedon. (Rev. 17:12-14) Olsem na laspela Memorial bai kamap paslain long taim ol ensel i bungim hap lain em God i bin makim, long wanem, Jisas bai “kam” na ol bai kisim laip long heven.

16. Bilong wanem yu tingting strong long i go long Memorial bilong dispela yia?

¹⁶ Yumi olgeta i mas tingting strong long go long Memorial long Mas 31, 2018 bambai dispela bung i ken helpim yumi. Wok yet long askim Jehova long helpim yumi bambai yumi inap strongim yet pasin bilong yumi long pas gut wantaim! (Ritim Song 133:1.) Tingim, wanpela taim bai kamap na yumi bai mekim laspela Memorial. Olsem na long nau yet, yumi mas wok strong long i go long Memorial na kisim amamas long pasin bilong pas gut wantaim.