SAMPELA TAIM ol i bihainim. Tingim wanpela eksampel. Lo 24:14, 15 i tok: “Sapos wokboi bilong yupela i sot long ol samting, orait yupela i no ken mekim nogut long em, maski em i wantok o man bilong narapela lain i stap long taun bilong yupela. . . . Sapos yupela i no givim mani long em, bai em i krai long Bikpela na yupela i gat asua long ai bilong God.”

Ol i bin raitim wanpela askim long dispela kain samting, em ol i bin raitim long yia 650 B.C.E. samting. Ol i bin painim dispela rait klostu long Asdot. Ating ol i raitim dispela tok i go long man bilong wok long gaden husat i no bin givim stret skel bilong wit em yet i bin tok promis long givim. Dispela rait i stap long sospen graun i bruk pinis. Dispela rait i tok: “Bihain long wokman bilong yu [man bilong bringim kot keis i go long kot] i pinisim wok bilong bungim bali sampela de i go pinis, Hoshayahu, pikinini man bilong Shobay, i kam na kisim saket bilong wokman bilong yu. . . . Olgeta wanwok husat i wok wantaim mi long kisim bali long taim bilong san bai tokaut . . . olsem samting mi tok long en, em i tru. Mi no bin mekim wanpela rong. . . . Sapos gavana i no tok orait long givim bek saket bilong wokman bilong yu, orait yu mas sori long em! Yu no ken pasim maus sapos wokman bilong yu i no kisim bek saket bilong em.”

Saveman Simon Schama i tok, dispela rait “i helpim yumi long luksave long hevi bilong wokman husat i no kisim bek [saket bilong em]. Na tu, man bilong bringim kot keis i go long kot i save long sampela lo bilong Baibel, kain olsem lo i stap long Wok Pris na Lo we i tok long no ken mekim pasin nogut long rabisman.”