1-2. (a) Taim planti milion manmeri i mekim bung bilong Memorial, Jehova i lukim wanem kain lain long dispela bung? (Lukim fran pes piksa.) (b) Long dispela stadi, yumi bai skelim wanem askim?

PLANTI milion manmeri long olgeta hap i mekim bung bilong Memorial. Jehova i lukim olgeta wan wan man husat i stap long dispela bung. Em i lukim ol manmeri husat i save kam long dispela bung long olgeta yia. Sampela i karim bikpela hevi tru long han bilong ol birua. Sampela i no save kam oltaim long ol miting, tasol ol i tingim Memorial olsem nambawan bikpela bung ol i mas i stap long en. Jehova i lukim tu ol manmeri husat i kam fes taim long Memorial; ating ol i laik save long ol samting i kamap long dispela bung.

² Jehova i amamas tru long lukim planti manmeri i kam long Memorial. (Luk 22:19) Tasol em i no tingim tasol namba bilong ol manmeri, nogat. Em i laik save long risen bilong ol long kam; dispela em bikpela samting long Jehova. Em i redim ol miting bilong helpim ol manmeri i laikim em. Long dispela stadi, yumi bai skelim wanpela bikpela askim: Bilong wanem yumi go long Memorial long olgeta yia, na yumi go tu long ol miting bilong olgeta wan wan wik?

3-4. (a) Bilong wanem pasin bilong i go long miting em bikpela samting? (b) Taim yumi go long miting, dispela i soim olsem yumi gat wanem ol pasin? (c) Olsem 1 Korin 11:23-26 i kamapim, bilong wanem yumi mas i go long Memorial?

³ Pasin bilong i go long miting em wanpela wok lotu bilong yumi. Na tu, Jehova i skulim yumi taim yumi go long ol miting. Ol man i gat pasin antap i no laik bai narapela i skulim ol. (3 Jon 9) Tasol yumi laik tru long kisim skul i  kam long Jehova na oganaisesen bilong em.—Ais. 30:20; Jon 6:45.

⁴ Taim yumi go long ol miting, dispela i soim olsem yumi gat pasin daun, na yumi redi long kisim skul. Taim yumi go long Memorial bilong tingim dai bilong Jisas, dispela i no olsem wanpela samting nating, nogat. Yumi bihainim tok bilong Jisas, em i tok: “Yupela i mas mekim olsem yet bilong tingim mi.” (Ritim 1 Korin 11:23-26.) Dispela bung i strongim bilip bilong yumi long ol samting bai kamap bihain, na i kirapim yumi long tingim bikpela pasin laikim bilong Jehova. Em i save olsem yumi nidim ol tok bilong strongim na mekim gut bel bilong yumi long olgeta taim, na i no wanpela taim tasol long yia, nogat. Olsem na em i redim ol miting bilong olgeta wik na em i laik tru bai yumi go long ol dispela miting. Pasin daun i save kirapim yumi long bihainim tok. Long olgeta wik, yumi save lusim sampela aua bilong redi na go long ol miting.

5. Ol manmeri i gat pasin daun i amamas long mekim wanem?

⁵ Jehova i laik givim skul long yumi, olsem na long olgeta yia planti manmeri i daunim ol yet na amamas long kisim dispela skul. (Ais. 50:4) Ol i go long Memorial, na ol i go tu long ol miting. (Sek. 8:20-23) Yumi olgeta i amamas long kisim skul na ol stiatok i kam long Jehova, em “man bilong helpim” na “kisim bek” yumi. (Sng. 40:17) Yumi bai amamas moa yet taim yumi kisim skul i kam long Jehova na Jisas, dispela Pikinini em God i laikim tumas!—Mat. 17:5; 18:20; 28:20.

6. Olsem wanem pasin daun i kirapim wanpela man long i go long Memorial?

⁶ Long olgeta yia, yumi givim bel tru long invaitim planti manmeri moa long i kam long Memorial bilong tingim dai bilong Jisas. Planti manmeri i kisim helpim taim ol i kam long dispela bung. Sampela yia i go pinis, wanpela man i kisim invatesen bilong Memorial, tasol em i tokim brata i givim invatesen olsem em i no inap go long dispela bung. Tasol long taim bilong Memorial, brata i kirap nogut long lukim dispela man i go long Haus Kingdom. Dispela man i pilim tru pasin bilong ol bratasista long welkamim em, olsem na em i stat long go long ol miting i kamap namel long wik. Long yia bihain long Memorial, em i go long olgeta miting, na em i misim 3-pela miting tasol. Wanem samting i kirapim em long i go long olgeta miting? Pasin daun i kirapim em long mekim olsem. Brata husat i bin invaitim em i tok, “Em i daunim tru em yet.” Jehova yet i kirapim dispela man long lotuim em. Nau em i baptais pinis na stap olsem brata bilong yumi.—2 Sml. 22:28; Jon 6:44.

7. Olsem wanem ol tok yumi harim long miting na ritim long Baibel inap helpim yumi long bihainim pasin daun?

⁷ Ol tok yumi harim long miting na ritim long Baibel inap helpim yumi long kisim pasin daun. Sampela wik paslain long Memorial, ol miting i save stori long eksampel bilong Jisas na olsem wanem em i daunim em yet na givim laip bilong em olsem ofa. Sampela de paslain long Memorial, yumi mas ritim ol stori bilong Baibel long ol samting i kamap long taim Jisas i dai na kirap bek. Ol tok yumi harim long miting na ritim long Baibel i kirapim yumi long pilim tru ofa bilong Jisas. Dispela i kirapim yumi long bihainim pasin bilong Jisas long daunim yumi yet na mekim laik bilong Jehova maski hevi i painim yumi.—Luk 22:41, 42.

8. Jisas i mekim wanem na dispela i soim olsem em i bin strongim bel?

⁸ Yumi bihainim pasin bilong Jisas taim yumi strongim bel. Sampela de paslain long Jisas i dai, em i soim olsem em i bin strongim bel. Em i save olsem ol birua bai semim em, paitim em, na kilim em i dai. (Mat. 20:17-19) Maski i olsem, em i redi long i dai. Taim ol birua i kam, em i tokim ol aposel husat i stap wantaim em long Getsemani: “Kirap na yumi go. Lukim! Man i laik putim mi long han bilong ol birua em i kam klostu pinis.” (Mat. 26:36, 46) Taim ol birua i kam bilong arestim em, em i sanap i go long fran na tokaut long em i husat, na em i tokim ol soldia long larim ol aposel i go. (Jon 18:3-8) Dispela i soim klia olsem Jisas i strongim bel! Long nau, ol Kristen em God i anointim na ol arapela sipsip i wok strong long bihainim pasin bilong Jisas long strongim bel. Ol i mekim wanem bilong soim olsem ol i strongim bel?

9. (a) Bilong wanem yumi mas strongim bel sapos yumi laik go oltaim long ol miting? (b) Taim yumi stap gut yet long lotuim God, hau bai dispela i strongim ol wanbilip husat i stap long kalabus?

⁹ Sapos yumi no laik lusim wanpela miting, orait yumi mas strongim bel na bai yumi inap go yet long miting long taim bilong hevi. Sampela bratasista i save go yet long miting maski wanpela hevi i mekim ol i bel sore, bel hevi, o sik i painim ol. Sampela i strongim bel na go yet long miting maski ol wanfamili o gavman i birua tru long ol. Gutpela pasin bilong yumi i save strongim ol bratasista i stap long kalabus. (Hib. 13:3) Taim ol i harim olsem yumi stap gut yet long lotuim Jehova maski hevi i painim yumi, dispela i strongim ol long holimpas bilip, strongim bel, na stap gut long God. Taim aposel Pol i stap kalabus long Rom, em i amamas tru taim em i harim olsem ol wanbilip i stap gut yet long lotuim God. (Fili. 1:3-5, 12-14) Ating paslain liklik o bihain liklik long Pol i lusim kalabus, em i raitim pas i go long ol Kristen i mekim tok Hibru. Em i kirapim ol long “wok yet long laikim ol arapela olsem ol i brata bilong [ol],” na no ken lusim pasin bilong bung wantaim long miting.—Hib. 10:24, 25; 13:1.

10-11. (a) Yumi mas invaitim husat long i kam long Memorial? (b) Olsem wanem Efesus 1:7 i strongim yumi long invaitim ol?

¹⁰ Taim yumi invaitim ol wantok, ol wanwok, na ol neiba i kam long Memorial, dispela bai soim olsem yumi strongim bel. Bilong wanem yumi invaitim ol? Yumi pilim tru ol samting em Jehova na Jisas i mekim bilong helpim yumi, olsem na yumi no surik long invaitim ol narapela long kam long Memorial. Yumi laik bai ol i kisim save long ol blesing ol inap kisim long bikpela pasin helpim bilong Jehova na ofa bilong Krais.—Ritim Efesus 1:7; Rev. 22:17.

¹¹ Taim yumi strongim bel na bung wantaim,  yumi soim narapela gutpela pasin we God na Pikinini bilong em tu i bin soim.

12. (a) Olsem wanem ol miting i strongim pasin bilong yumi long laikim Jehova na Jisas? (b) Olsem wanem 2 Korin 5:14, 15 i kirapim yumi long bihainim pasin bilong Jisas?

¹² Yumi laikim tru Jehova na Jisas, olsem na yumi go long miting. Na tu, skul yumi kisim long miting i strongim moa yet pasin bilong yumi long laikim Jehova na Pikinini bilong em. Ol miting i kirapim yumi long tingim gen ol samting em God na Jisas i mekim bilong helpim yumi. (Rom 5:8) Memorial i kirapim yumi long tingim bikpela pasin laikim bilong tupela, na tupela i laikim tu ol manmeri husat i no kisim save yet long ofa bilong Krais. Yumi pilim tru pasin laikim bilong tupela, olsem na yumi laik bihainim pasin bilong Jisas long olgeta samting yumi mekim. (Ritim 2 Korin 5:14, 15.) Jehova i stretim rot bilong givim pe bilong baim bek yumi, na dispela i kirapim yumi long litimapim nem bilong em. Wanpela rot bilong litimapim nem bilong God em long bekim gut ol tok long miting.

13. Yumi ken mekim wanem bilong soim olsem yumi laikim tru Jehova na Pikinini bilong em? Stori long dispela.

¹³ Yumi inap soim olsem yumi laikim tru Jehova na Jisas taim yumi daunim ol laik bilong yumi yet. Yumi save daunim laik bilong yumi yet na go long ol miting. Planti kongrigesen i mekim miting long apinun, em taim we yumi pilim taiet. Narapela miting i save kamap long wiken, em taim we yumi laik malolo. Yu ting Jehova i luksave olsem yumi go long miting maski yumi taiet? Yes, em i luksave! Jehova bai pilim tru pasin laikim bilong yumi.—Mak 12:41-44.

14. Olsem wanem Jisas i stap gutpela piksa long daunim tru laik bilong em yet na soim pasin laikim long ol narapela?

¹⁴ Jisas i stap gutpela piksa long daunim tru laik bilong em yet na soim olsem em i laikim God na ol narapela. Em i redi long lusim laip bilong em bilong helpim ol disaipel, na oltaim em i tingim laik bilong ol na daunim laik bilong em yet. Em i bung wantaim ol disaipel maski em i pilim taiet o bel hevi. (Luk 22:39-46) Em i tingting moa long ol samting em inap givim long ol narapela, na i no ol samting em inap  kisim long ol. (Mat. 20:28) Sapos yumi laikim tru Jehova na ol bratasista, yumi bai stap long bung bilong tingim Kaikai Bilong Bikpela na olgeta narapela miting bilong kongrigesen.

15. Yumi gat bikpela laik moa long helpim husat?

¹⁵ Yumi stap insait long lain Kristen tru, na yumi amamas long lusim bikpela haptaim long invaitim ol nupela manmeri long bung wantaim yumi. Tasol yumi gat bikpela laik moa long helpim “ol wanbilip” em ol i kamap slek long bilip. (Gal. 6:10) Yumi soim pasin laikim taim yumi kirapim ol long kam long miting, na moa yet long Memorial. Olsem Jehova na Jisas, yumi amamas tru taim ol wanbilip i kam bek long Jehova, em Papa na Wasman bilong yumi.—Mat. 18:14.

16. (a) Olsem wanem yumi inap strongim narapela narapela? (b) Bilong wanem Memorial em gutpela taim bilong tingim tok bilong Jisas long Jon 3:16?

¹⁶ Long ol wik i kam, wok strong long invaitim planti manmeri moa long kam long bung bilong Memorial long Fraide apinun, Epril 19, 2019. (Lukim blok “ Bai Yu Invaitim Ol?”) Long dispela yia olgeta, yumi mas givim bel tru long strongim narapela narapela, na go oltaim long ol miting em Jehova i redim bilong helpim yumi. Pinis bilong haptaim nogut i klostu nau, olsem na ol miting bai helpim yumi long bihainim pasin daun, strongim bel, na soim pasin laikim. (1 Tes. 5:8-11) Jehova na Pikinini bilong em i soim bikpela pasin laikim tru long yumi, olsem na yumi mas givim bel olgeta long soim olsem yumi pilim tru dispela pasin laikim!—Ritim Jon 3:16.