1-3. (a) Bilong wanem Jehova i laikim Solomon? (b) Solomon i kisim wanem ol blesing? (c) Yumi bai kisim bekim bilong wanem ol askim long dispela stadi?

SOLOMON i kamap king bilong Israel taim em i yangpela man. Taim em i kirap mekim wok king, Jehova i kamap long em long driman na i tok: “Yu ken askim mi long wanem samting yu laik mi givim long yu.” Solomon i tok: “Mi yangpela man tasol na mi no gat bikpela save. . . . So mi laik yu givim mi, wokman bilong yu, gutpela bel bilong bihainim tok na bai mi ken mekim wok jas namel long ol manmeri bilong yu.” (1 Kin. 3:5-10) Solomon i gat pasin daun, olsem na em i askim God long givim em “gutpela bel bilong bihainim tok”! Olsem na Jehova i laikim tumas Solomon! (2 Sml. 12:24) God i amamas tru long tok bilong Solomon, olsem na em i blesim Solomon wantaim “savetingting na gutpela bel bilong skelim samting.”—1 Kin. 3:12.

² Solomon i holimpas bilip na Jehova i givim planti blesing long em. Em i wokim tempel “bilong givim ona long nem bilong Jehova, God bilong Israel.” (1 Kin. 8:20) God i givim savetingting long Solomon, olsem na Solomon i kisim biknem na planti manmeri i save long em. Spirit bilong God i kirapim em long mekim ol gutpela tok we i stap nau long 3-pela buk bilong Baibel. Wanpela em Buk Provep.

³ Dispela tok, “bel,” i stap inap olsem wan handret taim long Buk Provep. Provep 4:23 i tok: “Long olgeta samting yu was long en, yu mas was gut long bel bilong yu.” Long dispela ves, “bel” i makim wanem samting? Dispela stadi bai bekim dispela askim. Yumi bai skelim tu ol bekim bilong 2-pela moa askim: Satan i mekim wanem bilong posinim bel bilong yumi? Yumi  inap mekim wanem bilong lukautim bel bilong yumi? Sapos yumi laik stap gut long God, orait yumi mas kliagut long bekim bilong ol dispela askim.

4-5. (a) Long Song 51:6, “bel” inap makim wanem samting? (b) Olsem wanem pasin bilong lukautim bodi i wankain long pasin bilong lukautim bilip?

⁴ Long Provep 4:23, “bel” i makim tingting tru bilong yu em ol man i no inap save long en. (Ritim Buk Song 51:6.) Dispela tok “bel” i makim tingting, filings, astingting, na laik tru bilong yumi yet. Em i makim pasin tru bilong yumi we i kirap long insait na i kam ausait.

⁵ Pasin bilong lukautim bodi i wankain long pasin bilong lukautim bilip. Namba 1: Sapos yumi laik bai bodi long insait i wok gut, orait yumi mas kisim gutpela kaikai na eksasais oltaim. Olsem tasol, sapos yumi laik stap gut long bilip, orait yumi mas kisim gutpela kaikai bilong strongim bilip na oltaim yumi mas mekim wok bilong soim olsem yumi bilip long Jehova. Yumi mas bihainim save yumi kisim na autim bilip bilong yumi. (Rom 10:8-10; Jems 2:26) Namba 2: Taim yumi skelim bodi bilong yumi, yumi inap ting olsem yumi stap helti, tasol sik inap stap insait long bodi. Olsem tasol, yumi inap mekim wok lotu na ting olsem bilip bilong yumi i stap strong, tasol yumi inap stat long kisim ol laik nogut. (1 Kor. 10:12; Jems 1:14, 15) Satan i laik bai yumi kisim tingting bilong em. Em inap mekim wanem ol samting bilong pulim yumi long bihainim tingting bilong em? Olsem wanem yumi inap lukautim yumi yet?

6. (a) Satan i laik bai yumi mekim wanem? (b) Satan i yusim wanem samting bilong pulim yumi long bihainim tingting na pasin bilong em?

⁶ Satan i laik bai yumi bihainim tingting na pasin bilong em—em i bikhet na tingim laik bilong em yet tasol na em i sakim ol lo bilong Jehova. Satan i no inap fosim yumi. Olsem na em i yusim ol poroman nogut bilong pulim yumi long bihainim tingting na pasin bilong em. Yumi stap namel long ol manmeri em ol i bihainim pasin bilong Satan. (1 Jon 5:19) Satan i laik bai yumi bung wantaim ol poroman  nogut maski yumi save olsem ol bai “bagarapim,” o posinim, tingting na pasin bilong yumi. (1 Kor. 15:33) King Solomon i bung wantaim ol poroman nogut. Em i maritim planti haiden meri, na ol i “strong long pulim tingting bilong em” na “isi isi ol . . . i pulim tingting bilong em i go longwe” long Jehova.—1 Kin. 11:3; futnot.

7. (a) Satan i yusim wanem ol samting long kamapim tingting bilong em? (b) Bilong wanem yumi mas lukaut?

⁷ Satan i yusim ol muvi na ol TV program long kamapim tingting bilong em. Em i save olsem ol man i gat pasin bilong amamas long harim stori, na stori inap kirapim man long kisim kain kain tingting, filings, na mekim sampela samting. Jisas i bin skulim ol man long rot bilong ol stori. Tingim tok piksa bilong Jisas long gutpela man Samaria na pikinini man husat i lusim ples na pinisim mani kago bilong em yet. (Mat. 13:34; Luk 10:29-37; 15:11-32) Ol man husat i bihainim tingting bilong Satan, ol inap yusim ol stori long posinim bel bilong yumi. Olsem na yumi mas bihainim stretpela tingting. Ol muvi na ol TV program inap amamasim na skulim yumi. Tasol yumi mas lukaut. Taim yumi makim wanem kain amamas yumi laik kisim, yumi mas askim yumi yet: ‘Dispela muvi o TV program i skulim mi olsem i orait long bihainim ol laik bilong bodi?’ (Gal. 5:19-21; Efe. 2:1-3) Yu mas mekim wanem sapos yu luksave olsem wanpela program i sapotim tingting bilong Satan? Abrusim dispela program long wankain pasin olsem yu bai abrusim sik we inap kalap kwik long man!

8. Olsem wanem papamama inap helpim pikinini long lukautim bel bilong em?

⁸ Ol papamama, yupela i gat bikpela wok long lukautim pikinini na bai Satan i no ken posinim bel bilong em. Yupela i save lukautim gut pikinini na bai em i no kisim bikpela sik. Yupela i save klinim haus na rausim olgeta kain samting we inap mekim yupela o pikinini i sik. Olsem tasol, yupela i mas lukautim pikinini na bai em i no kisim tingting  bilong Satan long rot bilong ol TV program, elektronik gem, na ol Web-sait. Jehova i givim wok long yupela long helpim pikinini long kamap pren bilong em. (Prov. 1:8; Efe. 6:1, 4) Olsem na yupela i mas putim ol lo em ol stretpela lo bilong Baibel i as bilong en na bai pikinini i ken bihainim. Tokim pikinini long ol program em inap lukim na ol program em i no ken lukim, na helpim em long kliagut long risen bilong ol disisen yu mekim. (Mat. 5:37) Taim pikinini i kamap bikpela, lainim em long kliagut long wanem samting i stret na wanem samting i no stret long ai bilong Jehova. (Hib. 5:14) Tingim, toktok bilong yu bai givim save, tasol pasin bilong yu bai givim bikpela skul moa long pikinini.—Lo 6:6, 7; Rom 2:21.

9. (a) Satan i laik bai ol man i holim wanem tingting? (b) Bilong wanem dispela tingting inap bagarapim yumi?

⁹ Satan i laik bai yumi trastim tingting bilong graun na i no tingting bilong Jehova, na long dispela rot em inap posinim bel bilong yumi. (Kol. 2:8) Satan i laik bai ol man i tingting tasol long bungim mani kago. Tasol i no olgeta man inap kamap maniman. Maski ol i kamap maniman o nogat, hevi inap painim ol bikos ol i tingting tasol long kisim mani na ol i no tingim helt bilong ol, pasin bilong ol long pas gut wantaim ol wanfamili, na ol i givim baksait tu long God. (1 Tim. 6:10) Papa bilong yumi long heven i pulap long savetingting, olsem na em i helpim yumi long holim stretpela tingting long mani.—Ekl. 7:12; Luk 12:15.

10-11. (a) Yumi mas mekim wanem bilong lukautim yumi yet? (b) Long taim bipo, wasman bilong taun i save mekim wanem? (c) Olsem wanem maus bilong bel inap stap olsem wasman bilong taun?

¹⁰ Sapos yumi laik lukautim bel, yumi mas luksave long ol samting we inap posinim bel, na kwiktaim yumi mas sakim ol dispela samting. Long Provep 4:23, dispela tok “was gut” i kirapim yumi long tingim man i save was long taun. Long taim bilong King Solomon, wasman bilong taun i save sanap long rup i stap antap long banis, na em bai singaut taim em i lukim ol birua i kam. Wok bilong dispela wasman bai skulim yumi long ol samting yumi mas mekim bilong stopim Satan long posinim tingting bilong yumi.

¹¹ Ol wasman bilong taun i save wok bung wantaim ol wasman bilong geit. (2 Sml. 18:24-26) Olgeta dispela wasman i save was long taun na pasim ol geit taim ol birua i kam klostu. (Neh. 7:1-3) Taim yumi yusim ol lo bilong Baibel long trenim maus bilong bel, * maus bilong bel inap stap olsem wasman bilong tok lukaut long yumi taim Satan i laik posinim tingting, filings, astingting, na laik tru bilong yumi. Taim maus bilong bel i gat tok, yumi mas mekim olgeta samting yumi inap mekim bilong abrusim hevi, i olsem yumi pasim geit.

12-13. (a) Wanem kain traim inap painim yumi? (b) Yumi mas mekim wanem sapos dispela kain traim i kamap?

¹² Yumi ken skelim wanpela eksampel long olsem wanem yumi inap lukautim yumi yet na bai Satan i no ken pulim yumi long bihainim tingting bilong em. Jehova i tok: “Yupela i no ken larim toktok bilong pasin pamuk na olgeta kain pasin i no klin . . . i kamap namel long yupela.” (Efe. 5:3) Tasol yumi bai mekim wanem sapos ol wanwok na ol wanskul i stori long pasin  pamuk? Yumi mas “givim baksait long olgeta samting i no stret wantaim laik bilong God na . . . olgeta laik nogut bilong dispela graun.” (Tai. 2:12) Maus bilong bel i olsem wasman bilong taun, na em inap toksave long hevi inap kamap. (Rom 2:15) Olsem wanem? Yumi bai bihainim maus bilong bel? O yumi bai sakim maus bilong bel na putim yau long stori bilong ol na lukim ol piksa ol i serim? Mobeta yumi senisim stori o lusim ol, na long dispela rot i olsem yumi pasim ol geit bilong taun.

¹³ Yumi mas strongim bel na bai yumi inap sakim presa i kam long ol wanlain long tingting long ol samting i no klin o mekim ol pasin i no stret. Jehova i save lukim hatwok bilong yumi, na em bai strongim yumi na givim yumi savetingting long sakim tingting bilong Satan. (2 Sto. 16:9; Ais. 40:29; Jems 1:5) Tasol olsem wanem yumi inap lukautim yet bel bilong yumi?

14-15. (a) Yumi mas larim wanem samting i stiaim tingting bilong yumi? (b) Hau bai yumi inap kisim tingting bilong God? (c) Olsem Provep 4:20-22 i kamapim, yumi mas mekim wanem na bai tok bilong Baibel i helpim yumi? (Lukim tu blok “ Tingim Tingim Tok Yu Ritim.”)

¹⁴ Yumi laik lukautim bel, olsem na yumi mas sakim ol samting we inap bagarapim yumi, na yumi mas kisim ol samting we inap helpim yumi. Tingim gen stori bilong taun i gat banis i raunim. Wasman bilong geit i save pasim ol geit bilong stopim ol birua long kam insait, tasol em i save opim ol geit taim ol man i laik bringim kaikai na ol narapela samting i kam insait long taun. Sapos em i no opim ol geit, ol manmeri bilong taun bai hangre nogut tru. Olsem tasol, oltaim yumi mas larim tingting bilong God i stiaim yumi, i olsem yumi opim geit na kisim tingting bilong em.

¹⁵ Tingting bilong Jehova i stap long Baibel, olsem na taim yumi ritim, yumi larim tingting bilong Jehova i stiaim tingting, filings, na pasin bilong yumi. Taim yumi ritim Baibel, yumi mas mekim wanem sapos yumi laik bai tok bilong en i helpim yumi? Yumi mas beten. Wanpela sista i tok: “Paslain long mi ritim Baibel, mi save beten na askim Jehova long helpim mi long ‘lukim gut ol gutpela gutpela samting’ i stap long Tok bilong em.” (Sng. 119:18) Na tu, yumi mas tingim tingim tok yumi ritim. Taim yumi beten, ritim, na tingim tingim Tok Bilong God, dispela tok bai go “insait tru long bel bilong [yumi],” na yumi bai laikim tingting bilong Jehova.—Ritim Provep 4:20-22; Sng. 119:97.

16. Olsem wanem JW Brodkasting i helpim planti bratasista?

¹⁶ Taim yumi watsim JW Brodkasting^®, dispela tu em narapela rot bilong larim tingting bilong God i stiaim yumi. Tupela marit i tok: “Ol program bilong olgeta mun i olsem bekim bilong ol beten bilong mipela! Ol i strongim mipela taim mipela i bel hevi o pilim olsem mipela i stap wanpis. Oltaim mipela i pilaim ol nupela singsing long haus. Mipela i harim taim mipela i kukim kaikai, klinim haus, o dring ti.” Ol dispela program i helpim yumi long lukautim bel bilong yumi. Ol i skulim yumi long bihainim tingting bilong Jehova na sakim tingting bilong Satan.

17-18. (a) Olsem 1 King 8:61 i kamapim, wanem samting bai kamap taim yumi bihainim skul yumi kisim long Jehova? (b) Yumi inap kisim wanem skul long eksampel bilong King Hesekia? (c) Olsem beten bilong Devit long Song 139:23, 24 i kamapim, yumi inap beten long kisim wanem samting?

¹⁷ Taim yumi bihainim stretpela pasin na gutpela samting i kamap, bilip bilong yumi bai kamap strong moa. (Jems 1:2, 3) Yumi amamas bikos Jehova i kolim yumi olsem  pikinini bilong em na dispela i strongim moa yet laik bilong yumi long amamasim em. (Prov. 27:11) Taim traim i kamap, yumi inap soim olsem yumi givim bel olgeta long lotuim Papa bilong yumi. (Sng. 119:113) Yumi soim klia olsem yumi laikim tru Jehova, na yumi redi long bihainim laik bilong em na olgeta lo bilong em.—Ritim 1 King 8:61.

¹⁸ Yu ting yumi bai mekim popaia? Yes, yumi bai popaia bikos yumi gat sin. Sapos yumi popaia, orait tingim eksampel bilong King Hesekia. Em i mekim ol popaia. Tasol em i tanim bel na “givim bel olgeta” long mekim yet wok bilong Jehova. (Ais. 38:3-6; 2 Sto. 29:1, 2; 32:25, 26) Yumi mas sakim traim bilong Satan long posinim tingting bilong yumi, na beten long kisim “gutpela bel bilong bihainim tok.” (1 Kin. 3:9; ritim Buk Song 139:23, 24.) Yumi inap stap gut long Jehova sapos yumi lukautim bel bilong yumi.