1-2. (a) Taim Jisas i redim kaikai bilong Memorial, bilong wanem em i redim long pasin we em isi na i no hatwok? (b) Yumi bai skelim wanem ol pasin bilong Jisas?

YU TING yu inap stori long ol samting i save kamap long Memorial bilong tingim dai bilong Krais? Ating yumi olgeta inap tingim ol samting i save kamap long dispela bung. Bilong wanem? Em liklik kaikai na i no hatwok long redim. Tasol dispela kaikai i gat bikpela mining. Olsem na yumi laik save, ‘Bilong wanem dispela kaikai em liklik?’

² Taim Jisas i stap long graun, em i skulim ol manmeri long ol bikpela tok i tru. Em i mekim wok tisa long pasin we em isi na i no hatwok long ol man inap kisimgut tok. (Mat. 7:28, 29) Olsem tasol, taim em i mekim memorial * bilong tingim dai bilong em, em i redim kaikai long pasin we em isi na i no hatwok. Yumi laik tingim gut Memorial na tingim tu ol tok na ol samting Jisas i mekim. Dispela bai helpim yumi long pilim moa yet ol pasin bilong Jisas, em pasin daun, pasin bilong strongim bel, na pasin laikim. Na tu, yumi bai kisim save long hau yumi inap bihainim gut ol pasin bilong em.

3. (a) Olsem Matyu 26:26-28 i tok, Jisas i yusim wanem ol samting taim em i mekim fes Memorial? (b) Bret na wain i makim wanem samting?

³ Jisas i mekim fes Memorial bilong tingim dai bilong em taim em i stap wantaim 11-pela gutpela aposel. Em i yusim ol  hap kaikai bilong Pasova long mekim dispela bung. (Ritim Matyu 26:26-28.) Em i yusim wain na bret i no gat yis. Jisas i gutpela olgeta, olsem na em i tokim ol aposel olsem bret na wain i makim bodi na blut bilong em. Em bai givim laip bilong em olsem ofa bilong baim bek ol. Ating ol aposel i no kirap nogut taim ol i lukim olsem Jisas i redim liklik samting tasol bilong mekim dispela nupela bung. Bilong wanem?

4. Olsem wanem tok Jisas i givim long Marta i soim klia risen bilong Jisas long redim liklik kaikai bilong Memorial?

⁴ Sampela mun paslain, long namba 3 yia bilong Jisas long mekim wok autim tok, em i go visitim ol gutpela pren bilong em—Lasarus, Marta, na Maria. Em i stap long haus bilong ol na skulim ol. Tasol Marta i bisi tru long redim bikpela kaikai. Jisas i bihainim gutpela pasin na em i stretim tingting bilong Marta; em i helpim Marta long luksave olsem i no gat wok long redim bikpela kaikai. (Luk 10:40-42) Bihain, sampela aua paslain long Jisas i dai, em i mekim samting em i bin tokim Marta long mekim. Em i redim liklik kaikai tasol taim em i kirapim bung bilong Memorial. Yumi kisim wanem skul long samting em i mekim?

5. (a) Liklik bung bilong tingim dai bilong Jisas i soim olsem em i gat wanem kain pasin? (b) Olsem wanem dispela i stret wantaim tok bilong Filipai 2:5-8?

⁵ Jisas i bihainim pasin daun long olgeta toktok na pasin bilong em, na em i mekim olsem tu long nait paslain long em i dai. (Mat. 11:29) Em i save olsem em bai givim nambawan bikpela sakrifais i winim olgeta narapela sakrifais ol man i givim, na Jehova bai kirapim em bek na em bai mekim wok king long heven. Tasol em i no mekim bikpela kaikai na bai ol man i givim biknem long em, nogat. Em i tokim ol disaipel long mekim wankain liklik bung long olgeta yia bilong tingim dai bilong em. (Jon 13:15; 1 Kor. 11:23-25) Dispela liklik bung i soim olsem Jisas i gat pasin daun. Yumi amamas olsem pasin daun em wanpela bikpela pasin bilong King bilong yumi long heven.—Ritim Filipai 2:5-8.

6. Olsem wanem yumi inap bihainim pasin daun bilong Jisas taim hevi i painim yumi?

⁶ Olsem wanem yumi inap bihainim pasin daun bilong Jisas? Yumi mas tingim laik bilong ol narapela na no ken tingim tasol laik bilong yumi yet. (Fili. 2:3, 4) Tingim gen laspela nait bilong Jisas long graun. Em i save olsem em bai karim bikpela pen na i dai; tasol em i tingim moa yet ol  aposel bikos ol bai krai na bel sori long em. Olsem na em i skulim ol, strongim ol, na mekim isi bel bilong ol. (Jon 14:25-31) Jisas i daunim em yet na tingim ol narapela, na em i no tingim em yet. Em i stap nambawan gutpela eksampel yumi ken bihainim!

7. Bihain tasol long Jisas i mekim Kaikai Bilong Bikpela, wanem samting i kamap na em i strongim tru bel?

⁷ Bihain tasol long Jisas i mekim Kaikai Bilong Bikpela, hevi i painim em na em i strongim tru bel. Em i redi long bihainim laik bilong Papa maski em i save olsem ol birua bai kilim em i dai. Ol bai sutim tok olsem em i tok bilas long God. (Mat. 26:65, 66; Luk 22:41, 42) Jisas i stap gut long God bikos em i laik onarim nem bilong Jehova, sapotim wok bos bilong God, na opim rot bilong ol manmeri long tanim bel na kisim laip oltaim. Na tu, em i redim ol disaipel long sanap strong taim hevi i painim ol.

8. (a) Jisas i toksave long ol aposel long wanem samting? (b) Planti yia bihain long Jisas i dai, olsem wanem ol disaipel i bihainim yet pasin bilong em?

⁸ Jisas i strongim bel na em i no larim wanpela samting i pulim tingting bilong em, nogat. Em i tingting tasol long ol samting em i mas mekim bilong helpim ol aposel. Bihain long em i tokim Judas long lusim ol, em i mekim liklik kaikai bilong tingim dai bilong em. Dispela kaikai bai helpim ol disaipel long tingim ol blesing ol bai kisim long blut bilong Jisas, na ol bai tingim tu olsem ol bai insait long nupela kontrak. (1 Kor. 10:16, 17) Jisas i kolim ol samting ol i mas mekim na bai em na Papa bilong em i orait long ol i ken kisim laip long heven. (Jon 15:12-15) Jisas i toksave long ol aposel long ol hevi bai painim ol. Em i kirapim ol long bihainim eksampel bilong  em na em i tok: “Strongim bel!” (Jon 16:1-4a, 33) Planti yia bihain, ol disaipel i bihainim yet pasin bilong Jisas na ol i strongim bel na daunim laik bilong ol yet. Kain kain hevi i painim ol, tasol ol i strongim narapela narapela.—Hib. 10:33, 34.

9. Olsem wanem yumi inap strongim bel olsem Jisas i bin mekim?

⁹ Long nau tu, yumi bihainim pasin bilong Jisas long strongim bel. Yumi mas strongim bel na helpim ol bratasista husat i karim hevi long han bilong ol birua. Sampela taim ol birua i kalabusim nating ol bratasista maski ol i no mekim rong. Sapos dispela kain hevi i kamap, yumi mas mekim olgeta samting na mekim stretpela tok tu bilong sambai long ol. (Fili. 1:14; Hib. 13:19) Na tu, yumi mas wok yet long autim tok na “no [ken] pret.” (Apo. 14:3) Olsem Jisas, yumi tingting strong long autim tok bilong Kingdom maski ol manmeri i birua na mekim nogut long yumi. Tasol sampela taim yumi inap pret. Yumi inap mekim wanem bilong daunim pret?

10. Yumi mas mekim wanem long ol wik paslain long Memorial? Bilong wanem?

¹⁰ Yumi ken tingim ol blesing yumi kisim long rot bilong ofa bilong Krais long baim bek yumi, na dispela bai strongim bel bilong yumi. (Jon 3:16; Efe. 1:7) Long ol wik paslain long Memorial, i gat ol gutpela samting yumi inap mekim na bai yumi pilim tru pe bilong baim bek yumi. Ritim ol skripsa ol i makim bilong ritim long taim bilong Memorial, na beten na skelim ol samting i kamap klostu long taim Jisas i dai. Sapos yumi mekim ol dispela samting na yumi go long Memorial, yumi bai pilim tru mining bilong bret na wain—ol dispela samting i makim nambawan bikpela ofa bilong Krais. Jisas na Jehova i mekim bikpela samting bilong helpim yumi na ol wanfamili na ol pren. Taim yumi pilim tru samting ol i  mekim, yumi bai bilip strong moa olsem yumi bai kisim ol blesing long bihain, na yumi bai strongim bel na sanap strong i go inap long pinis.—Hib. 12:3.

11-12. Yumi kisim save pinis long wanem ol samting?

¹¹ Kaikai Bilong Bikpela i kirapim yumi long tingim tu ol bikpela pasin bilong Jisas, em pasin daun na pasin bilong strongim bel. Jisas i bihainim yet ol dispela pasin bikos em i stap Hetpris long heven na em i save askim God long lusim ol rong bilong yumi. (Hib. 7:24, 25) Sapos yumi pilim tru ol dispela pasin Jisas i mekim bilong helpim yumi, orait yumi mas mekim memorial bilong tingim dai bilong em. (Luk 22:19, 20) Yumi save mekim memorial long de i stret wantaim det bilong Naisan 14, em spesel det bilong yia.

¹² Ol samting Jisas i yusim long Kaikai Bilong Bikpela i skulim yumi long narapela pasin we i kirapim Jisas long givim laip bilong em long helpim yumi. Taim em i stap olsem man long graun, em i gat nem long dispela pasin. Em wanem pasin?

13. (a) Jon 15:9 na 1 Jon 4:8-10 i stori olsem wanem long pasin laikim bilong Jehova na Jisas? (b) Husat i kisim helpim long pasin laikim bilong tupela?

¹³ Long olgeta samting Jisas i mekim, em i soim klia olsem Jehova i laikim tru yumi. (Ritim Jon 15:9; 1 Jon 4:8-10.) Jisas i soim bikpela pasin laikim tru taim em i givim laip bilong em long helpim yumi. Maski yumi wanpela bilong ol Kristen em God i anointim o yumi wanpela bilong “ol arapela sipsip,” yumi kisim helpim long ofa bilong Krais we i kamapim klia bikpela pasin laikim bilong Jehova na Pikinini bilong em. (Jon 10:16; 1 Jon 2:2) Ol samting Jisas i yusim bilong mekim Memorial i soim olsem em i laikim na tingim tru ol disaipel. Bilong wanem yumi tok olsem?

14. Olsem wanem Jisas i soim olsem em i laikim tru ol disaipel?

¹⁴ Jisas i laikim tru ol disaipel em God i anointim, olsem na em i no redim planti kain kain samting, nogat. Em i yusim ol simpol samting long redim liklik kaikai tasol. Long ol yia bihain, ol disaipel i bihainim yet pasin bilong mekim Memorial maski kain kain hevi i painim ol, olsem ol i stap long kalabus. (Rev. 2:10) Yu ting ol i bihainim tok bilong Jisas? Yes, ol i mekim olsem!

15-16. Olsem wanem sampela inap mekim Memorial long taim bilong hevi?

¹⁵ Kirap long taim bilong Jisas na i kam inap long nau, ol Kristen tru i wok yet long mekim memorial bilong tingim dai bilong Jisas. Ol i mekim ol samting olsem Jisas i bin mekim, na ol i mekim olsem tu long taim bilong hevi. Em hia sampela eksampel. Taim Brata Harold King i stap kalabus long Saina, em i plenim gut hau em bai mekim memorial bilong tingim dai bilong Jisas. Em i bihainim savetingting, na long pasin hait em i yusim ol samting i stap long rum kalabus na redim bret na wain. Na tu, em i skelim gut tru ol det na bai em inap save long det bilong Memorial. Em i stap wanpis long rum kalabus. Long det bilong Memorial, em i singsing, beten, na em i yusim ol tok bilong Baibel long mekim wanpela tok.

¹⁶ Narapela eksampel: Long taim bilong Wol Woa 2, sampela sista i stap kalabus na ol i mekim Memorial maski ol inap lusim laip bilong ol. Ol i bihainim savetingting na long pasin hait ol i mekim dispela bung. Ol i tok: “Mipela i sanap klostu klostu raunim wanpela liklik stul we mipela i karamapim long waitpela laplap na putim bret na  wain long en. Mipela i yusim lait bilong kendel na ofim lait bilong rum na bai ol narapela i no ken luksave long samting mipela i mekim. . . . Mipela i kolim gen tok promis bilong mipela long Papa, olsem mipela bai yusim olgeta strong bilong mipela long stap gut long nem holi bilong em.” Ol dispela sista i gat strongpela bilip! Jisas i soim bikpela pasin laikim long yumi—em i mekim liklik bung tasol bilong tingim dai bilong em, olsem na long taim bilong hevi tu, i no hatwok long yumi inap mekim dispela bung.

17. Yumi ken givim wanem ol askim long yumi yet?

¹⁷ Det bilong Memorial i kam klostu, olsem na yumi ken askim yumi yet: ‘Hau bai mi inap bihainim gut moa pasin laikim bilong Jisas? Mi tingting moa long helpim ol wanbilip long ol samting ol i nidim o mi tingim mi yet? Mi ekspektim ol bratasista long mekim planti wok moa, o mi luksave long skel bilong ol?’ Oltaim yumi mas bihainim pasin bilong Jisas na “pilim hevi bilong narapela.”—1 Pita 3:8.

18-19. (a) Yumi ken bilip tru long wanem samting? (b) Yu tingting strong long mekim wanem?

¹⁸ Taim bai kamap na yumi no inap moa long mekim Memorial bilong tingim dai bilong Krais. “Lain God i bin makim,” ol bai kisim laip long heven. Long taim bilong traipela hevi tru, Jisas bai “kam” na kisim ol i go long heven, olsem na yumi no inap moa long mekim Memorial.—1 Kor. 11:26; Mat. 24:31.

¹⁹ Bung bilong Memorial bai pinis, tasol ol manmeri bilong Jehova bai tingim yet dispela liklik kaikai we i soim klia olsem Jisas i gat pasin daun, pasin bilong strongim bel, na bikpela pasin laikim. Long nupela taim, ol manmeri i bin mekim dispela bung bai stori long dispela samting. Sapos yumi laik bai dispela bung i helpim yumi, orait yumi mas tingting strong long bihainim ol pasin bilong Jisas—pasin daun, pasin bilong strongim bel, na pasin laikim. Yumi ken bilip tru olsem Jehova bai givim gutpela pe long yumi.—2 Pita 1:10, 11.