1-2. (a) Olsem wanem tok bilong Aisaia 41:10 i helpim Yoshiko? (b) Jehova i laik helpim husat lain na em i kirapim Aisaia long raitim dispela tok?

YOSHIKO em wanpela sista Kristen, na em i kisim wanpela toksave. Dokta i tokim em olsem em bai stap laip inap sampela mun tasol na bihain em bai dai. Yoshiko i mekim wanem? Em i tingim feiveret skripsa bilong em, Aisaia 41:10. (Ritim.) Em i stap bel isi na tokim dokta olsem em i no pret bikos Jehova i holim han bilong em. * Gutpela tok long dispela ves i helpim Yoshiko long trastim tru Jehova. Dispela ves inap helpim yumi tu long stap bel isi taim ol bikpela hevi tru i painim yumi. Orait yumi ken skelim risen bilong God long givim dispela tok long Aisaia.

² Jehova i kirapim Aisaia long raitim tok i stap long Aisaia 41:10 bambai dispela tok inap mekim gut bel bilong ol Juda em bihain ol bai i go kalabus long Babilon. Jehova i lukautim gut dispela tok na bai dispela tok i helpim lain Juda na olgeta manmeri bilong em kirap long bipo i kam inap long nau. (Ais. 40:8; Rom 15:4) Yumi stap long “taim nogut” we i “givim hatwok long ol man,” olsem na yumi nidim tru tok bilong Buk Aisaia long strongim yumi.—2 Tim. 3:1.

3. (a) Wanem ol tok promis i stap long Aisaia 41:10, em yiateks bilong 2019? (b) Bilong wanem yumi nidim ol dispela tok bilong strongim yumi?

³ Dispela stadi bai skelim 3-pela tok promis bilong Jehova long Aisaia 41:10: (1) Jehova bai i stap wantaim yumi, (2) em i God bilong yumi, na (3) em bai helpim yumi. Yumi  nidim ol dispela tok bilong strongim * yumi bikos yumi olgeta i save bungim hevi, wankain olsem Yoshiko. Na tu, ol samting nogut i kamap long graun i putim hevi long yumi. Sampela bilong yumi i karim hevi long han bilong ol strongpela gavman. Yumi ken skelim wan wan bilong ol dispela tok promis.

4. (a) Yumi bai skelim wanem namba 1 tok promis? (Lukim tu futnot.) (b) Olsem wanem Jehova i kamapim tingting tru bilong em? (c) Yu pilim olsem wanem long tok promis bilong God?

⁴ Namba 1 tok promis Jehova i mekim bilong strongim yumi em olsem: “Yu no ken pret, bikos mi stap wantaim yu.” * Jehova i tingim na laikim yumi, na dispela i soim olsem em i stap wantaim yumi. Skelim ol tok em i mekim bilong kamapim tingting tru bilong em. Em i tok: “Yu kamap samting i dia tumas long ai bilong mi, yu bin kisim biknem tru, na mi bin laikim yu tumas.” (Ais. 43:4) I no gat wanpela samting long ples antap o long graun inap pinisim pasin bilong Jehova long laikim ol manmeri i mekim wok bilong em. I no gat wanpela samting bai tekewe pasin bilong em long i stap gut long yumi. (Ais. 54:10) Em i laikim yumi na em i stap pren bilong yumi, na dispela i strongim tru bel bilong yumi. Em bai lukautim yumi long nau, wankain olsem em i bin lukautim pren bilong em Abram (Abraham) long bipo. Jehova i tokim em: “Abram, yu no ken pret. Bai mi stap olsem hap plang bilong pait bilong haitim yu.”—Stt. 15:1.

5-6. (a) Hau na yumi save olsem Jehova i laik helpim yumi long karim hevi? (b) Yumi kisim wanem skul long eksampel bilong Yoshiko?

⁵ Jehova i laik helpim yumi long karim ol hevi i painim yumi bikos em yet i tok promis olsem: “Taim yu brukim ol wara na i go, mi bai stap wantaim yu, na taim yu wokabaut brukim wara, wara i no inap tait na karamapim yu. Taim yu wokabaut namel long paia, paia i no inap kukim yu, na paia i lait i no inap kukim yu.” (Ais. 43:2) Wanem mining bilong ol dispela tok?

 ⁶ Jehova i no inap pinisim ol hevi i painim yumi. Ol hevi bai stap, tasol ol i no inap karamapim yumi olsem “wara,” o pinisim yumi olsem “paia.” Em i tok promis long stap wantaim yumi na helpim yumi long “brukim ol wara,” olsem yumi bai winim hevi. Jehova bai helpim yumi long daunim pret na i stap bel isi bambai yumi inap i stap gut yet long em, maski yumi inap lusim laip bilong yumi. (Ais. 41:13) Dispela samting i kamap long Yoshiko. Pikinini meri bilong Yoshiko i tok: “Mipela i pilim tru pasin bilong Mama long i stap bel isi. Mipela i luksave olsem Jehova yet i mekim na tingting na bel bilong em i stap isi. I go inap long taim Mama i dai, em i save toktok long ol nes na ol sikman na stori long ol long Jehova na ol tok promis bilong em.” Yumi kisim wanem skul long eksampel bilong Yoshiko? Taim yumi trastim tok promis bilong God olsem “Mi stap wantaim yu,” yumi tu bai strongim bel na karim hevi.

7-8. (a) Yumi bai skelim wanem namba 2 tok promis? Wanem mining bilong dispela tok? (b) Bilong wanem Jehova i tokim lain Juda olsem: “Yu no ken tingting planti”? (c) Wanem tok long Aisaia 46:3, 4 i mekim isi bel bilong ol manmeri bilong God?

⁷ Namba 2 tok promis bilong God long Buk Aisaia em olsem: “Yu no ken tingting planti, bikos mi God bilong yu.” Wanem mining bilong dispela tok? Tok Hibru ol i trensletim olsem “tingting planti” i makim pasin bilong “pret na tanim na lukluk long baksait” o “kirap nogut na lukluk nabaut.”

⁸ Bilong wanem Jehova i tokim lain Juda long ol i no ken “tingting planti”? Em i save olsem ol manmeri bilong Babilon bai pret. Wanem samting bai mekim ol i pret? Taim 70 yia bilong ol Juda long kalabus long Babilon i laik pinis, ami bilong Midia-Persia bai daunim Babilon. Jehova bai yusim dispela ami long helpim lain Juda long lusim kalabus bilong Babilon. (Ais. 41:2-4) Taim ol manmeri bilong Babilon na ol narapela kantri i harim olsem ol birua i kam klostu long Babilon, ol i tokim narapela narapela: “Strongim bel.” Na tu, ol i wokim planti giaman god bikos ol i bilip na hop olsem ol dispela god bai lukautim ol. (Ais. 41:5-7) Tasol Jehova i mekim isi bel bilong ol Juda, na em i tok: “Yu, O Israel, [yu no olsem ol neiba bilong yu] yu wokman bilong mi . . . Yu no ken tingting planti, bikos mi God bilong yu.” (Ais. 41:8-10) Jehova i tok: “Mi God bilong yu.” Em i laik bai ol manmeri bilong em i tingim olsem em i no lusim tingting long ol—em i stap yet olsem God bilong ol, na ol i stap yet olsem ol manmeri bilong em. God i tokim ol: “Mi bai karim yupela . . . na kisim bek yupela.” Dispela tok i strongim lain Juda i stap kalabus.—Ritim Aisaia 46:3, 4.

9-10. Bilong wanem i no gat wok long yumi pret? Stori long tok piksa.

⁹ Long nau pasin nogut bilong graun i go nogut moa, olsem na ol manmeri i tingting planti moa yet. Ol wankain pasin i putim hevi long yumi tu. Tasol i no gat wok long yumi pret. Jehova i tokim yumi: “Mi God bilong yu.” Bilong wanem dispela tok inap mekim isi bel bilong yumi?

¹⁰ Tingim dispela tok piksa: Jim na Ben i stap insait long balus na strongpela win i wok long sakim balus. Taim win i seksekim balus, pailot i mekim toksave long spika olsem: “Pasim strong sialet. Yumi bai flai insait long strongpela win inap sampela haptaim.” Jim i tingting planti. Tasol pailot i tok moa: “Mi pailot bilong yupela. Olgeta samting bai orait, olsem na no ken tingting planti.” Jim i seksekim het na  tok, “Hau na em i tok olgeta samting bai orait?” Jim i lukim olsem Ben i no tingting planti. Olsem na Jim i askim em: “Wai na yu stap bel isi tru?” Ben i smail na tok: “Bikos mi save gut long dispela pailot. Em papa bilong mi!” Ben i tok moa: “Mi laik stori long yu long papa bilong mi. Sapos yu save long em na wei bilong em long flaim balus, yu tu bai stap bel isi.”

11. Yumi kisim wanem skul long tok piksa?

¹¹ Yumi kisim wanem skul long tok piksa yumi stori pinis long en? Olsem Ben, yumi stap bel isi tru bikos yumi save gut long Jehova, Papa bilong yumi long heven. Yumi save olsem long dispela haptaim nogut bilong nau, ol bikpela hevi tru kain olsem strongpela win bai painim yumi, tasol Jehova bai stiaim na lukautim gut yumi. (Ais. 35:4) Pret i pinisim strong bilong ol manmeri, tasol yumi trastim Jehova, olsem na yumi inap i stap bel isi tru. (Ais. 30:15) Na tu, yumi bihainim pasin bilong Ben taim yumi tokim ol narapela long ol risen na ol inap trastim God. Long dispela rot, ol tu inap bilip olsem maski wanem hevi i painim ol, Jehova bai sambai long ol.

12. (a) Yumi bai skelim wanem namba 3 tok promis? (b) Baibel i stori long “han” bilong Jehova na dispela i kirapim yumi long tingim wanem samting?

¹² Namba 3 tok promis em Aisaia i raitim em olsem: “Mi bai strongim yu, yes, mi bai helpim yu.” Aisaia i stori pinis long olsem wanem Jehova bai strongim ol manmeri bilong Em, na em i tok: “Jehova bai kam wantaim bikpela strong, na han bilong em bai mekim wok bos.” (Ais. 40:10) Planti taim Baibel i kolim “han” olsem tok piksa bilong makim strong. Olsem na taim Aisaia i tok “han bilong [Jehova] bai mekim wok bos,” dispela i kirapim yumi long tingim olsem Jehova em King i gat bikpela strong. Em i yusim bikpela strong bilong em long sapotim na sambai long ol wokman bilong em long bipo, na long nau  em i wok yet long strongim na lukautim ol manmeri husat i trastim em.—Lo 1:30, 31; Ais. 43:10, futnot.

13. (a) Jehova i save truim tok promis bilong em long wanem kain taim? (b) Wanem tok promis i strongim yumi na kirapim yumi long trastim God?

¹³ Taim ol birua i mekim nogut long yumi, Jehova i save truim dispela tok promis: “Mi bai strongim yu.” Long sampela kantri, ol birua i laik stopim wok bilong yumi long autim tok, o ol i laik stopim oganaisesen long mekim wok. Maski i olsem, yumi no tingting planti. Jehova i mekim tok promis we i strongim yumi na kirapim yumi long trastim em. Em i tok: “I no gat wanpela samting bilong pait em ol i wokim bilong pait long yu inap bagarapim yu.” (Ais. 54:17) Dispela tok i kirapim yumi long tingim 3-pela samting.

14. Bilong wanem yumi no kirap nogut olsem ol manmeri i mekim nogut long yumi?

¹⁴ Namba 1, yumi stap olsem ol disaipel bilong Krais, olsem na ol manmeri bai heitim yumi. (Mat. 10:22) Jisas i tok profet olsem ol man bai birua nogut tru long ol disaipel bilong em long taim bilong las de. (Mat. 24:9; Jon 15:20) Namba 2, Aisaia i tok lukaut olsem ol birua bai heitim yumi na yusim kain kain samting bilong pait long bagarapim yumi. Ol dispela samting bilong pait i makim tu olgeta kain tok giaman na strongpela pasin birua. (Mat. 5:11) Jehova i no inap stopim ol birua long yusim ol dispela samting bilong pait long bagarapim yumi. (Efe. 6:12; Rev. 12:17) Tasol yumi no ken pret. Bilong wanem yumi tok olsem?

15-16. (a) Wanem namba 3 samting yumi mas tingim? (b) Olsem wanem Aisaia 25:4, 5 i strongim dispela tok? (c) Aisaia 41:11, 12 i tok wanem samting bai painim ol birua bilong yumi?

¹⁵ Namba 3 samting yumi mas tingim em olsem: Jehova i tok “i no gat wanpela samting bilong pait . . . inap bagarapim yu.” Wol bilong haus i save lukautim yumi na strongpela win na ren i no inap bagarapim yumi. Olsem tasol, Jehova i save lukautim yumi, olsem na maski “ol hatpela bos i autim strong belhat bilong ol,” dispela  i no inap bagarapim yumi. (Ritim Aisaia 25:4, 5.) Maski ol birua i mekim nogut long yumi na kilim yumi dai, ol i no gat strong long stopim yumi long kisim blesing bilong i stap oltaim.—Ais. 65:17.

¹⁶ Jehova i stori gut long samting bai painim ol man husat i “belhat” long yumi, na dispela i kirapim yumi long trastim em moa yet. (Ritim Aisaia 41:11, 12.) Maski ol man i yusim olgeta kain pasin birua long bagarapim yumi, yumi save long samting bai kamap: Olgeta birua bilong ol manmeri bilong God “bai kamap samting nating na pinis olgeta.”

17-18. (a) Olsem wanem pasin bilong ritim Baibel inap kirapim yumi long trastim God moa yet? Stori long wanpela eksampel. (b) Taim yumi tingim tingim yiateks bilong 2019, hau bai dispela i helpim yumi?

¹⁷ Taim yumi kisim planti save moa long Jehova, dispela bai kirapim yumi long trastim em moa yet. Wanpela rot tasol bilong save gut long God em olsem: Yumi mas ritim gut Baibel na tingim tingim ol tok yumi ritim. Baibel i stori long ol samting Jehova i mekim bilong lukautim ol manmeri bilong em long bipo. Dispela i strongim yumi long bilip olsem em bai lukautim yumi long nau.

¹⁸ Tingim dispela eksampel: Aisaia i mekim naispela tok piksa bilong kamapim klia pasin Jehova i save mekim bilong lukautim yumi. Em i kolim Jehova olsem wasman bilong sipsip, na em i kolim ol wokman bilong God olsem ol sipsip. Aisaia i tok long Jehova olsem: “Em bai bungim ol pikinini sipsip long han bilong em, na em bai karim ol long bros bilong em.” (Ais. 40:11) Taim yumi luksave olsem Jehova i yusim strongpela han bilong em long lukautim yumi, yumi pilim olsem yumi stap seif na yumi stap bel isi. Gutpela wokboi i laik helpim yumi long i stap bel isi maski hevi i painim yumi, olsem na dispela wokboi i makim Aisaia 41:10 olsem yiateks bilong 2019, “Yu no ken tingting planti, bikos mi God bilong yu.” Yumi mas tingim tingim dispela tok, na dispela bai helpim yumi long sanap strong na karim ol hevi i painim yumi.