1-2. (a) Planti manmeri bilong Jehova i save bungim wanem hevi? (b) Dispela hevi inap mekim wanem long ol?

TINGIM ol dispela hevi: Dokta i tokim wanpela yangpela brata olsem em i gat sik nogut na dispela sik bai pinisim tru strong bilong em. Wanpela brata husat i winim pinis 50 krismas, em i mekim wok mani, tasol bos i pinisim em long wok na maski em i traim bes long painim wok, em i no kisim wanpela wok. Wanpela lapun sista i no gat strong moa long lusim bikpela haptaim long mekim wok bilong Jehova olsem em i bin mekim long bipo.

² Sapos kain hevi olsem i painim yu, ating yu inap pilim olsem yu samting nating. Yu bai i no amamas moa, na yu inap pilim nogut long yu yet, na yu no inap pas gut wantaim ol narapela.

3. Satan na ol man i bihainim laik bilong em, ol i holim wanem tingting long laip bilong ol man?

³ Ol manmeri bilong dispela graun i bihainim tingting bilong Satan. Oltaim Satan i save daunim tru ol manmeri na mekim ol i pilim olsem ol i samting nating. Em i tokim Iv long wanpela samting Iv i ken mekim bilong kisim fridom, tasol em i save olsem Iv bai dai sapos em i sakim tok bilong God. Oltaim Satan i kontrolim wok bisnis, wok politik, na ol lotu bilong dispela graun. Olsem na planti lida bilong lotu na ol man bilong wok bisnis na wok politik, ol i bihainim pasin bilong Satan na ol i no rispektim laip bilong ol narapela na givim biknem long ol.

4. Long dispela atikol, yumi bai stori long wanem samting?

 ⁴ Jehova i laik bai yumi amamas long yumi yet, na em i helpim yumi taim yumi bungim ol hevi we inap daunim yumi. (Sng. 136:23; Rom 12:3) Dispela atikol bai stori long hau Jehova i helpim yumi: (1) Taim yumi sik, (2) taim yumi bungim hevi bilong mani, na (3) taim yumi kamap lapun na yumi pilim olsem yumi samting nating na yumi no inap moa long mekim wok bilong Jehova. Pastaim yumi ken stori long ol samting i soim klia olsem yumi olgeta wan wan i dia tru long ai bilong Jehova.

5. Wanem samting i soim klia olsem ol man i dia tru long ai bilong Jehova?

⁵ Em tru olsem God i yusim graun long wokim yumi, tasol em i tingim yumi olsem samting i dia tumas. (Stt. 2:7) Skelim sampela samting i soim klia olsem yumi dia tru long ai bilong Jehova. Yumi inap bihainim ol pasin bilong em. (Stt. 1:27) Olsem na yumi ol man i winim tru olgeta narapela samting God i bin wokim, na yumi inap bosim graun na ol animal.—Sng. 8:4-8.

6. Wanem narapela samting i soim olsem Jehova i tingim tru yumi ol sinman?

⁶ Maski Adam i mekim rong, Jehova i tingim tru ol manmeri. Yumi dia tumas long em, olsem na em i salim Jisas, Pikinini em i laikim tumas, long givim laip bilong em olsem pe bilong baim bek yumi long sin. (1 Jon 4:9, 10) Jehova bai yusim dispela pe long kirapim bek ol man i dai pinis, “em ol stretpela man na ol man nogut wantaim.” (Apo. 24:15) Baibel i soim olsem yumi dia tumas long ai bilong God maski yumi gat hevi long sait bilong helt na mani, o yumi kamap lapun.—Apo. 10:34, 35.

7. Wanem sampela moa samting i soim klia olsem Jehova i tingim tru ol wokman bilong em?

⁷ I gat sampela samting moa i soim klia olsem Jehova i tingim tru yumi. Em i kirapim yumi long i go klostu long em, na em i lukim amamas bilong yumi taim yumi harim gutnius. (Jon 6:44) Taim yumi stat long i go klostu long Jehova, em tu i kam klostu moa long yumi. (Jems 4:8) Na tu, Jehova i lusim sampela haptaim na strong bilong em long skulim yumi, na long dispela rot em i soim olsem yumi dia tumas long em. Em i save long ol pasin bilong yumi, na em i save olsem pasin bilong yumi inap kamap gutpela moa. Em i save givim tok bilong stretim yumi bikos em i laikim yumi. (Prov. 3:11, 12) Dispela i soim klia tru olsem Jehova i tingim tru yumi!

8. Olsem wanem tok bilong Song 18:27-29 inap helpim yumi long holim stretpela tingting long ol hevi i painim yumi?

⁸ Sampela lain i pilim olsem King Devit em samting nating, tasol Devit i save olsem Jehova i laikim em na sambai long em. Olsem na Devit i holim stretpela tingting taim hevi i painim em. (2 Sml. 16:5-7) Taim yumi bel hevi o hevi i painim yumi, Jehova inap helpim yumi long holim stretpela tingting na em inap helpim yumi long winim ol hevi. (Ritim Buk Song 18:27-29.) Taim Jehova i sambai long yumi, i no gat wanpela samting inap pinisim amamas bilong yumi long mekim wok bilong em. (Rom 8:31) Orait nau yumi ken skelim 3-pela hevi we inap kamap na long kain taim olsem yumi mas tingim olsem Jehova i laikim yumi na yumi dia tumas long em.

9. Hevi bilong sik inap mekim na yumi pilim olsem wanem long yumi yet?

⁹ Taim yumi sik, yumi inap bel hevi na pilim olsem yumi samting nating na yumi no inap moa long helpim ol narapela. Yumi inap pilim sem taim ol narapela i luksave long hevi em sik i kamapim long bodi bilong yumi o yumi  no gat strong moa long lukautim yumi yet. Maski ol narapela i no luksave olsem yumi sik, yumi inap pilim hatwok long daunim pasin bilong sem bikos yumi no inap mekim ol samting yumi save mekim long bipo. Long kain taim olsem, Jehova inap strongim yumi. Em inap yusim wanem ol rot?

10. Olsem Provep 12:25 i kamapim, wanem samting inap helpim yumi taim yumi sik?

¹⁰ Taim yumi sik, “gutpela tok” inap strongim yumi. (Ritim Provep 12:25.) Long Baibel, Jehova i putim ol gutpela tok we inap kirapim yumi long tingim gen olsem maski yumi sik, yumi stap yet olsem ol samting i dia tumas long ai bilong em. (Sng. 31:19; 41:3) Sapos yumi ritim Tok Bilong God na yumi ritim gen inap planti taim, Jehova bai helpim yumi long daunim ol tingting kranki i save kamap taim yumi sik.

11. Olsem wanem Jehova i helpim wanpela brata?

¹¹ Skelim ekspiriens bilong Jorge. Taim Jorge i stap yangpela man, em i kisim wanpela bikpela sik we i pinisim strong bilong em na em i pilim olsem em i samting nating. Em i tok: “Sik i mekim na ol manmeri i lukluk long mi, na mi pilim sem. Sik i kamap bikpela moa, na mi tingim ol senis bai kamap long laip bilong mi. Bel hevi i daunim mi tru na mi askim strong Jehova long helpim mi.” Olsem wanem Jehova i strongim em? “Mi hatwok long putim tingting olgeta long ol tok mi ritim, olsem na ol narapela i kirapim mi long ritim ol sotpela sotpela tok i stap long Buk Song we i stori long pasin bilong Jehova long lukautim ol wokman bilong em. Insait long olgeta wan wan de, mi ritim ol dispela skripsa inap planti taim, na dispela i strongim mi na mekim isi bel bilong mi. Bihain, ol narapela i luksave olsem mi wok long smail. Ol i tok tu olsem ol i kisim strong taim ol i lukim olsem mi amamas. Mi luksave olsem Jehova i harim beten  bilong mi! Em i helpim mi long senisim tingting mi holim long mi yet. Mi stat long tingim tok Baibel i mekim long tingting God i holim long mi maski mi sik.”

12. Taim sik i daunim yu, olsem wanem yu inap luksave long helpim bilong Jehova?

¹² Taim sik i daunim yu, yu ken bilip tru olsem Jehova i save long hevi bilong yu. Askim em strong long helpim yu na bai yu inap kisim stretpela tingting long hevi bilong yu. Yusim Baibel long tingim gen ol gutpela tok Jehova i redim bilong helpim yu. Tingim ol ves we i soim olsem Jehova i tingim tru ol wokman bilong em. Long dispela rot, yu bai luksave olsem Jehova i soim gutpela pasin long olgeta man husat i stap gut long em.—Sng. 84:11.

13. Het bilong famili inap pilim olsem wanem sapos bos i pinisim em long wok?

¹³ Het bilong famili i laik lukautim famili long olgeta samting ol i nidim. Tasol olsem wanem sapos bosman i pinisim nating wanpela brata long wok? Maski em i traim bes long painim wok, em i no kisim wanpela wok. Em inap pilim olsem em i samting nating. Sapos em i tingim ol tok promis bilong Jehova, hau bai dispela inap helpim em?

14. Wai na Jehova i save truim ol tok promis bilong em?

¹⁴ Oltaim Jehova i save truim ol tok promis bilong em. (Jos. 21:45; 23:14) I gat sampela risen na em i mekim olsem. Em i tingim nem, o gutnem bilong em. Jehova i bin tok promis long lukautim ol manmeri i stap gut long em, olsem na em i pilim olsem em i mas truim dispela tok. (Sng. 31:1-3) Na tu, yumi stap insait long lain famili bilong Jehova, na em i save olsem yumi bai bel hevi tru sapos em i no lukautim yumi. Em i tok promis long lukautim yumi long sait bilong haus, klos, na kaikai, na lukautim yumi tu long sait bilong bilip, na i no  gat wanpela samting bai pasim em long truim dispela tok!—Mat. 6:30-33; 24:45.

15. (a) Wanem hevi i bin painim ol Kristen long taim bilong ol aposel? (b) Olsem wanem Song 37:18, 19 inap strongim bilip bilong yumi?

¹⁵ Taim yumi tingim risen bilong Jehova long truim ol tok promis bilong em, yumi inap sanap strong na karim hevi i painim yumi long sait bilong mani. Tingim eksampel bilong ol Kristen long taim bilong ol aposel. Taim bikpela pasin birua i painim kongrigesen long Jerusalem, “olgeta i go nabaut . . . , na ol aposel tasol i stap yet long Jerusalem.” (Apo. 8:1) Dispela i kamapim hevi. Bikpela hevi bilong mani! Ol Kristen i lusim haus na wok bisnis. Tasol Jehova i no givim baksait long ol; na tu, ol i holim yet amamas bilong ol. (Apo. 8:4; Hib. 13:5, 6; Jems 1:2, 3) Jehova i sambai long ol dispela Kristen, na em bai sambai tu long yumi.—Ritim Buk Song 37:18, 19.

16. Wanem samting inap mekim na yumi pilim olsem Jehova i no tingim moa wok lotu bilong yumi?

¹⁶ Taim yumi kamap lapun, yumi inap pilim olsem yumi no gat strong moa long mekim wok bilong Jehova. Ating King Devit i bin holim wankain tingting olsem taim em i kamap lapun. (Sng. 71:9) Olsem wanem Jehova inap helpim yumi?

17. Yumi inap kisim wanem skul long ekspiriens bilong Jheri?

¹⁷ Tingim ekspiriens bilong wanpela sista, nem bilong em Jheri. Em i kisim invatesen bilong go long wanpela bung i stori long rot bilong lukautim na stretim ol samting i bagarap long Haus Kingdom, tasol em i no laik i go. Em i tok: “Mi lapun, mi wanpela wido, na mi no gat wanpela save em Jehova inap yusim. Mi samting nating.” Long nait paslain long de bilong kisim trening, em i beten na autim olgeta tingting bilong em long Jehova. Taim em i  go long Haus Kingdom long neks de, em i holim yet 2-pela tingting. Long dispela bung, wanpela brata i tok, sapos yumi redi long larim Jehova i skulim yumi, dispela em nambawan bikpela save bilong mekim wok. Jheri i tok: “Mi tingim olsem, ‘Mi gat dispela save bilong mekim wok!’ Mi stat long aiwara bikos mi luksave olsem Jehova i harim beten bilong mi. Em i strongim mi long bilip olsem mi gat save bilong mekim wok na em i redi long skulim mi!” Jheri i tok: “Taim mi go long dispela bung, mi bin pret na bel hevi. Tasol taim mi lusim dispela bung, mi no bel hevi moa, na mi holim strongpela tingting olsem mi inap mekim sampela wok!”

18. Olsem wanem Baibel i soim olsem Jehova i tingim yet wok lotu bilong yumi taim yumi kamap lapun?

¹⁸ Taim yumi wok long kamap lapun, yumi ken bilip tru olsem Jehova i gat sampela wok yumi inap mekim. (Sng. 92:12-15) Jisas i skulim yumi olsem maski yumi no gat save bilong mekim wanpela wok o yumi mekim liklik wok tasol, Jehova i pilim tru olgeta wok yumi inap mekim bilong sapotim lotu i tru. (Luk 21:2-4) Olsem na putim tingting i go long samting yu inap mekim. Kain olsem, yu ken stori long ol narapela long Jehova, beten askim God long helpim ol wanbilip, na strongim ol narapela long stap gut long bilip. Jehova i tingim yu olsem wanwok bilong em bikos yu redi long bihainim tok bilong em, na i no olsem em i tingim skel bilong wok yu mekim.—1 Kor. 3:5-9.

19. Olsem wanem Rom 8:38, 39 inap strongim bilip bilong yumi?

¹⁹ Yumi ken amamas tru olsem yumi lotuim Jehova, em God husat i tingim tru ol manmeri i mekim wok bilong em! Em i wokim yumi bambai yumi inap bihainim laik bilong em, na lotu i tru i helpim yumi long i stap amamas. (Rev. 4:11) Ol manmeri bilong dispela graun inap pilim olsem yumi samting nating, tasol Jehova i no holim kain tingting olsem long yumi. (Hib. 11:16, 38) Taim yumi karim hevi bilong sik, mani, na kamap lapun, yumi mas tingim olsem i no gat wanpela samting inap tekewe yumi long pasin laikim bilong Papa bilong yumi long heven.—Ritim Rom 8:38, 39.