1-2. (a) Wanpela ensel i mekim wanem tok long ol meri long ples matmat bilong Jisas? (b) Jisas i givim wanem tok long ol?

EM MONINGTAIM tru long Nisan 16, 33 C.E. Sampela wokmeri bilong God i bel hevi tru na ol i go long matmat; 2-pela de i go pinis, ol i bin putim bodi bilong Jisas Krais long matmat. Ol i laik putim sampela sanda na spais ol i wokim long ol lip samting i gat gutpela smel long bodi bilong Jisas, tasol taim ol i kamap long matmat, ol i kirap nogut olsem bodi bilong Jisas i no stap! Wanpela ensel i tokim ol dispela meri olsem Jisas i kirap bek, na em i tok moa olsem: “Em i go long Galili paslain long yupela. Bai yupela i lukim em long dispela hap.”—Mat. 28:1-7; Luk 23:56; 24:10.

² Bihain long ol dispela meri i lusim matmat na i go, Jisas i kamap long ol na i givim dispela tok long ol: “Go na tokim ol brata bilong mi long i go long Galili, na ol bai lukim mi long dispela hap.” (Mat. 28:10) Jisas i laik givim sampela bikpela tok long ol disaipel, olsem na bihain tasol long em i kirap bek, em i stretim rot long bung wantaim ol!

3-4. Wai na yumi inap ting olsem tok i stap long Matyu 28:19, 20 i no go long ol aposel tasol? (Lukim fran pes piksa.)

³ Ritim Matyu 28:16-20. Long dispela bung em Jisas i oganaisim, em i tokim ol disaipel long wanpela bikpela wok ol bai mekim—em wankain wok yumi mekim long tude. Jisas i tok: “Yupela i mas i go na kamapim ol disaipel long olgeta lain man, na . . . skulim ol long bihainim olgeta samting mi tokim yupela long mekim.”

 ⁴ Jisas i laik bai olgeta disaipel bilong em i mas autim tok. Em i no tokim ol 11-pela aposel tasol long autim tok. Hau na yumi save long dispela? Yu ting ol aposel tasol i bin i stap long maunten long Galili taim Jisas i givim tok long kamapim ol disaipel? Tingim, ensel i bin tokim ol meri: “Bai yupela i lukim em long [Galili].” Olsem na yumi inap ting olsem ol dispela bilip meri tu i bin i stap. Tasol i no dispela tasol. Aposel Pol i kamapim klia olsem Jisas i “kamap long winim 500 brata” long wankain taim. (1 Kor. 15:6) Em i kamap long ol long wanem hap?

5. Yumi lainim wanem samting long tok bilong 1 Korin 15:6?

⁵ Yumi inap tok olsem Pol i tingim dispela bung long Galili em Matyu sapta 28 i stori long en. Bilong wanem yumi inap tok olsem? Namba 1, planti disaipel bilong Jisas i bilong Galili. Olsem na wanpela maunten long Galili—na i no wanpela haus long Jerusalem—em bai gutpela ples long planti manmeri i bung. Namba 2, bihain long Jisas i kirap bek, em i bung pinis wantaim 11-pela aposel long wanpela haus long Jerusalem. Sapos Jisas i laik bai ol aposel tasol i autim tok na kamapim disaipel, ating em bai tokim ol long Jerusalem, na em i no inap tokim ol na ol dispela meri na ol narapela long bungim em long Galili.—Luk 24:33, 36.

6. (a) Olsem wanem Matyu 28:20 i soim olsem tok bilong kamapim disaipel i stret long nau tu? (b) Planti manmeri i mekim wanem?

⁶ Tingim namba 3 risen. Jisas i no tok ol Kristen long dispela taim tasol i mas autim tok. Hau na yumi save long dispela? Laspela tok Jisas i givim long ol disaipel em olsem: “Mi stap wantaim yupela olgeta de i go inap long pinis bilong dispela taim.” (Mat. 28:20) Tok bilong Jisas i stret tru, tude wok autim tok i wok long i go yet. Tingim! Long olgeta yia, klostu 300 tausen manmeri i save kisim baptais olsem Witnes Bilong Jehova na kamap disaipel bilong Jisas Krais!

7. Yumi bai stori long wanem samting? Wai?

⁷ Planti man i stadi long Baibel na ol i kisim baptais. Sampela i save mekim Baibel stadi long olgeta taim, tasol ol i surik long kamap disaipel. Ol i amamas long stadi, tasol ol i no winim mak bilong kisim baptais. Sapos yu stadi wantaim wanpela long Baibel, orait mipela i save olsem yu laik helpim em long bihainim skul em i kisim na bai em inap kamap disaipel bilong Krais. Dispela atikol bai stori long hau yumi inap kirapim sumatin long laikim God na kamap strong long sait bilong bilip. Wai na yumi mas stori long dispela samting? Bikos sampela taim bihain, yumi inap wokim disisen olsem yumi bai stadi yet wantaim em o yumi bai stop.

8. Wai na sampela Baibel sumatin i pilim hatwok long laikim Jehova?

⁸ Jehova i laik bai ol manmeri i lotuim em bikos ol i laikim em. So yumi laik helpim ol Baibel sumatin long kliagut olsem Jehova i tingim tru na laikim tru olgeta wan wan bilong ol. Yumi laik helpim ol long tingim Jehova olsem “papa bilong ol pikinini i no gat papa na man bilong lukautim ol wido.” (Sng. 68:5) Taim ol Baibel sumatin i pilim tru pasin laikim bilong God, dispela bai kirapim ol long laikim em moa yet. Sampela Baibel sumatin bai hatwok long tingim Jehova olsem gutpela Papa bikos papa bilong ol yet i no soim pasin laikim long ol. (2 Tim. 3:1, 3) Taim yu mekim stadi, kamapim klia ol gutpela pasin bilong Jehova. Helpim ol Baibel sumatin long kliagut olsem God bilong yumi i laik bai ol i kisim laip oltaim, na em i redi long helpim ol long  kisim laip oltaim. Yumi ken mekim wanem samting moa?

9-10. (a) Yumi ken yusim wanem ol buk long mekim Baibel stadi wantaim narapela? (b) Wai na yumi mas yusim ol dispela buk?

⁹ Yusim ol buk, “Tok Baibel i Skulim Yumi Long En” na “Rot Bilong Stap Yet Insait Long Laikim Bilong God.” Ol dispela buk i bilong helpim yumi long kirapim ol Baibel sumatin long laikim God. Eksampel, sapta 1 bilong buk Skulim Yumi i bekim ol dispela askim: God i save tingim yumi o em i man nogut?, God i ting olsem wanem taim hevi i painim ol man?, na Yu inap kamap pren bilong Jehova? Olsem wanem long buk Stap Yet Insait Long Laikim Bilong God? Dispela buk bai helpim sumatin long luksave olsem taim em i bihainim ol stiatok bilong Baibel, dispela inap helpim sindaun bilong em na em bai go klostu moa long Jehova. Maski yu stadi pinis wantaim ol narapela long ol dispela buk, redim gut olgeta wan wan stadi, na tingim gut ol tok i stret long sindaun bilong olgeta wan wan sumatin.

¹⁰ Ating sumatin i laik save long wanpela topik i stap long narapela pablikesen we yumi no inap yusim long stadi wantaim em. Yu ken  tokim em long ritim dispela pablikesen long taim bilong em yet na yutupela i ken stadi yet long wanpela bilong ol buk bilong stadi em paragraf i kolim pinis.

11. (a) Wanem taim yumi mas kirapim na pinisim stadi long rot bilong beten? (b) Olsem wanem yu inap stori long dispela samting?

¹¹ Kirapim stadi long rot bilong beten. Taim yu kirap long stadi wantaim wanpela, kwiktaim o bihain long wanpela o 2-pela wik samting, yu ken kirapim na pinisim stadi long rot bilong beten. Yumi mas helpim sumatin long luksave olsem God tasol inap helpim yumi long kliagut long Tok Bilong Em. Sampela Baibel stadi kondakta i save stori long beten long rot bilong ritim Jems 1:5, em i tok: “Sapos wanpela bilong yupela i sot long savetingting, orait em i mas wok yet long askim God.” Bihain kondakta i save askim sumatin, “Olsem wanem yumi inap askim God long savetingting?” Sumatin bai wanbel olsem yumi mas beten long God.

12. Olsem wanem yu inap yusim Song 139:2-4 long helpim sumatin long mekim beten bilong em i kamap gutpela moa?

¹² Skulim sumatin long beten. Stori gut long em olsem Jehova i laik harim ol beten we sumatin i pilim tru long bel. Stori tu olsem long ol beten bilong yumi wan wan, yumi inap kamapim bel bilong yumi long Jehova na autim ol tingting we yumi no inap tokim ol narapela long en. Tingim, Jehova i save pinis long olgeta tingting bilong yumi. (Ritim Buk Song 139:2-4.) Yumi ken kirapim sumatin long askim God long helpim em long senisim ol tingting kranki bilong em na daunim ol laik nogut. Ating yu stadi wantaim wanpela husat i save selebretim wanpela holide em bilip giaman i as bilong en. Em i save olsem dispela i no stret, tasol em i amamas long sampela samting bilong dispela holide. Kirapim em long beten na autim ol tingting tru bilong em na askim Jehova long helpim em long laikim ol samting God i laikim.—Sng. 97:10.

13. (a) Bilong wanem kwiktaim yumi mas invaitim ol sumatin long kam long miting? (b) Yumi ken mekim wanem na bai sumatin i amamas taim em i kam long Haus Kingdom?

¹³ Kwiktaim invaitim Baibel sumatin long kam long miting. Taim sumatin i kam long miting, ol tok em i harim na ol samting em i lukim inap kirapim em long laikim God na mekim ol senis. Soim vidio Wanem Samting i Save Kamap Long Haus Kingdom? na invaitim em long kam wantaim yu long miting. Tokim em yu bai helpim em long sait bilong trenspot, sapos yu inap. Em gutpela long kisim narapela narapela pablisa i go wantaim yu long mekim stadi. Long dispela rot sumatin bai save long ol narapela long kongrigesen, na em bai amamas taim em i kam long miting.

14. Wanem samting inap kirapim sumatin long kamap strong long sait bilong bilip?

¹⁴ Yumi laik helpim Baibel sumatin long kamap strong long sait bilong bilip. (Efe. 4:13) Taim wanpela i tok orait long stadi long Baibel, ating em i laik save long hau stadi bai helpim em. Taim em i stat long laikim Jehova moa yet, em bai tingting long hau em inap helpim ol narapela, na helpim tu ol lain insait long kongrigesen. (Mat. 22:37-39) Long taim i stret, tokim em olsem yumi gat rot long sapotim wok bilong Kingdom long sait bilong mani.

15. Olsem wanem yumi inap helpim Baibel sumatin long stretim hevi?

¹⁵ Skulim Baibel sumatin long samting em i ken mekim taim hevi i kamap. Ating sumatin i kamap pablisa i no baptais, na em i tokim yu olsem wanpela insait long kongrigesen i  bagarapim bel bilong em. No ken stap long sait bilong em; mobeta yu kamapim gut ol tok bilong Baibel long samting em i ken mekim. Em i ken fogivim dispela brata, o em i ken go toktok long em na mekim long gutpela pasin na pasin laikim na bai em inap “kisim bek brata.” (Skelim Matyu 18:15.) Helpim sumatin long redim ol tok em bai mekim. Soim em hau long yusim JW Library^® app, Stadi Indeks Bilong Ol Witnes Bilong Jehova, na jw.org^® na bai em inap kisim save long ol rot bilong stretim hevi. Taim em i kisim kain trening olsem paslain long em i kisim baptais, dispela bai helpim em long stretim hevi na pas gut wantaim ol narapela insait long kongrigesen bihain long em i kisim baptais.

16. Wanem ol gutpela samting inap kamap taim yu askim narapela pablisa long kam wantaim yu long stadi?

¹⁶ Invaitim ol narapela long kongrigesen—na wasman sekit taim em i visitim kongrigesen—long kam wantaim yu long stadi. Wai? Ol narapela pablisa inap helpim sumatin long samting yu yet i no inap long helpim em. Ating planti taim sumatin i traim long lusim pasin bilong smok, tasol em i no lusim. Askim wanpela Witnes i gat wankain ekspiriens olsem long kam wantaim yu long stadi—bipo dispela Witnes i bin traim long lusim smok, tasol em i hatwok long lusim, na bihain em i lusim tru dispela pasin. Ating wanbilip inap givim sampela gutpela edvais long sumatin. Sapos yu pilim hatwok long mekim stadi taim wanpela ekspiriens brata o sista i stap, orait askim em long mekim dispela stadi. Yusim ol brata na sista i gat ekspiriens long helpim ol arapela. Tingim, yumi laik helpim sumatin long kamap strong long sait bilong bilip.

17-18. Yu mas tingim wanem ol samting taim yu laik mekim disisen long stopim stadi?

¹⁷ Sapos Baibel sumatin i no mekim senis long laip bilong em, ating bai yu askim yu yet olsem, ‘Mi mas stopim stadi?’ Paslain long yu mekim disisen, yu mas tingim strong na save bilong em. Long sampela man, bikpela haptaim i save lus paslain long ol i mekim senis long laip bilong ol. Askim yu yet: ‘Sumatin bilong mi i wok long mekim ol senis i stret long sindaun bilong em?’ ‘Em i “bihainim” ol tok em i lainim?’ (Mat. 28:20) Maski sumatin i mekim ol senis isi isi, em i no ken stop long mekim ol senis.

¹⁸ Tasol olsem wanem sapos yumi stadi wantaim wanpela inap sampela haptaim na em i soim olsem stadi i no bikpela samting? Eksampel: Sumatin i pinisim stadi long buk Skulim Yumi, na ating nau em i stadi long buk Stap Yet Insait Long Laikim Bilong God, tasol em i no kam yet long wanpela miting bilong kongrigesen—Memorial tu nogat! Planti taim em i save kenselim stadi long ol liklik samting tasol. Sapos sumatin i save mekim olsem, orait yu mas tok stret long em. *

19. (a) Yu inap tok wanem long wanpela husat i no tingim tumas Baibel stadi? (b) Yu ken skelim wanem samting?

 ¹⁹ Yu ken askim em olsem, ‘Wanem samting i pasim yu long kamap wanpela Witnes Bilong Jehova?’ Ating sumatin bai tok, ‘Mi amamas long stadi long Baibel, tasol mi no inap tru long kamap wanpela Witnes Bilong Jehova!’ Sapos em i gat dispela tingting maski em i stadi inap sampela haptaim pinis, orait yu ken skelim olsem yu bai stadi yet wantaim em o stopim dispela stadi. Ating em bai fes taim tu long sumatin i tokim yu long wanem samting i pasim em long mekim ol senis. Ating em i pilim olsem em i no inap go long haus bilong ol man na autim tok. Taim yu save long tingting bilong em, yu inap helpim em.

20. Olsem wanem Aposel 13:48 inap helpim yumi long wokim disisen olsem yumi bai stadi yet wantaim sumatin o nogat?

²⁰ Sori tru, sampela sumatin i olsem ol Israel long taim bilong Esekiel. Jehova i tokim Esekiel: “Harim! Long ol, yu olsem wanpela lav song, em man i singim long naispela nek tru na pilaim gut long wanpela instramen i gat ol string. Ol bai harim ol tok bilong yu, tasol i no gat wanpela bai bihainim ol dispela tok.” (Ese. 33:32) Yumi inap pilim hatwok long tokim wanpela olsem yumi bai stop long stadi wantaim em. Tasol “taim i sot pinis.” (1 Kor. 7:29) Olsem na yumi no ken westim taim long stadi wantaim man i no mekim senis; mobeta yumi painim ol man i soim olsem “bel bilong ol i gutpela long kisim laip oltaim.”—Ritim Aposel 13:48.

21. (a) Wanem yiateks bilong 2020? (b) Dispela yiateks bai helpim yumi long mekim wanem?

²¹ Long yia 2020, yiateks bai helpim yumi long putim tingting i go long kamap gutpela moa long wok bilong kamapim disaipel. Yiateks i kamapim sampela tok em Jisas i mekim long bung i kamap long wanpela maunten long Galili: “Yupela i mas i go na kamapim ol disaipel . . . . na baptaisim ol.”—Mat. 28:19.