Harvey em i fesbon na em i gat 3-pela brata. Famili bilong em i kisim tok i tru long Midland Junction, long Western Australia, long taim i gat bikpela hevi bilong mani long yia 1930 samting. Harvey i kisim pasin bilong laikim Jehova na em i kisim baptais long taim em i gat 14 krismas. Bihain liklik, em i lain olsem em i no ken tok nogat long ol tiokratik asainmen. Taim em i yangpela mangi, em i tok nogat long brata i askim em long ritim Wastaua long miting, bikos em i ting em i no winim yet mak bilong mekim olsem. Tasol brata i toktok wantaim Harvey i tokim em olsem, “Taim wanpela long oganaisesen bilong Jehova i askim yu long mekim samting, em i pilim olsem yu winim pinis mak bilong mekim olsem!”—2 Kor. 3:5.

Mi kisim tok i tru long Inglan, wankain olsem mama na bikpela susa bilong mi i bin mekim. Pastaim papa bilong mi i bin birua long tok i tru, tasol bihain em i kisim tok i tru. Mi kisim baptais long taim mi gat 9-pela krismas tasol, maski papa i no orait long dispela. Mi putim mak long mekim wok painia na bihain kamap misineri. Tasol papa i no orait long mi painia inap long mi winim  21 krismas. Mi no laik wet longpela taim. Olsem na long taim mi gat 16 krismas, papa i tok orait long mi na mi muv i go stap wantaim bikpela susa bilong mi long Australia—em i bin muv i go stap long hap. Taim mi gat 18 krismas, mi kirap mekim wok painia.

Long Australia, mi bungim Harvey. Mitupela wantaim i gat laik long mekim wok bilong Jehova olsem ol misineri. Mitupela i marit long 1951. Na mipela i mekim wok painia inap tupela yia, na bihain ol i askim mipela long mekim wok sekit. Sekit bilong mipela i karamapim bikpela teritori long Western Australia, so planti taim mipela i save draiv inap planti aua long ol bikpela ples drai nating bilong i go long ol ples i stap longwe tru.

Long 1954, ol i invaitim mipela i go long namba 25 klas bilong Skul Gileat. Klostu nau laik bilong mipela long kamap misineri bai kamap tru! Mipela i ron long sip na i go kamap long New York na mipela i kirap stadi gut tru long ol tok bilong Baibel. Long skul, mipela i mas lainim tokples Spen tu, na Harvey i hatwok bikos em i no inap kolim gut leta ‘r’ long dispela tokples.

Long skul, ol tisa i toksave olsem husat i gat laik long go mekim wok misineri long Japan, em i ken raitim nem bilong em long klas bilong lainim tokples Japan. Mitupela i no mekim olsem bikos mipela i laik oganaisesen bilong Jehova i makim asainmen bilong mipela. Bihain liklik, Albert Schroeder, em wanpela tisa bilong Skul Gileat i kisim save olsem mipela i no raitim nem bilong mipela. Em i tokim mitupela: “Tingim gen dispela samting.” Maski i olsem, mipela i no raitim nem bilong mipela, na Brata Schroeder i tok: “Mi wantaim ol narapela tisa i raitim nem bilong yutupela pinis. Traim lainim tokples Japan.” Harvey i pilim isi long lainim dispela tokples na em i mekim olsem.

Mipela i go kamap long Japan long 1955 taim i gat olsem 500 pablisa tasol long kantri olgeta. Long dispela taim Harvey i gat 26 krismas na mi gat 24 krismas. Ol i salim mipela i go long Kobe em taun long nambis, na mipela i mekim wok long hap inap 4-pela yia. Bihain ol i singautim mipela i go bek gen long wok sekit na mipela i mekim wok klostu long taun Nagoya. Mipela i laikim olgeta samting long asainmen bilong mipela—ol brata, ol kaikai, na ol ples long kantri sait. I no longtaim, mipela i kisim narapela asainmen na mipela i no tok nogat long Jehova.

Mipela i mekim wok sekit inap 3-pela yia, na bihain Japan brens i askim mipela sapos mipela bai redi long go long Taiwan long mekim wok namel long ol asples Amis. Pasin apostet i kirap long hap na Taiwan i nidim wanpela brata i save gut long tokples Japan long helpim na stretim hevi. * Mipela i laikim tru wok bilong mipela long Japan so i hatwok long mekim disisen. Tasol Harvey i lain pinis olsem mipela i no ken tok nogat long wanpela asainmen, so mipela i orait long go.

Mipela i go kamap long Novemba 1962. Taiwan i gat 2,271 pablisa, planti em ol Amis. Tasol pastaim mipela i mas lainim tokples Saina. Mipela i gat wanpela teks buk na wanpela tisa husat i no save long tok Inglis, tasol mipela i lainim tokples.

Bihain tasol long mipela i go kamap long Taiwan, ol i makim Harvey long mekim wok olsem brens sevan. Brens em i liklik, so Harvey i save mekim wok bilong em long ofis, na em i save autim tok wantaim ol Amis bratasista inap 3-pela wik long olgeta mun. Na sampela taim em i save mekim wok olsem distrik ovasia na mekim tok long ol kibung. Harvey inap mekim ol tok long tokples Japan na ol Amis bratasista inap kliagut long en. Tasol gavman i putim lo olsem olgeta bung bilong lotu i mas kamap long tokples Saina. Olsem na maski Harvey i no lain gut yet long tokples, em i save mekim tok long tokples Saina na wanpela brata i save tanim tok bilong em i go long tokples Amis.

Long dispela taim, ol soldia i bosim Taiwan, olsem na ol brata i mas kisim tok orait bilong mekim ol kibung. Na em i no isi long kisim tok orait, na planti taim polis i no save hariap long givim tok orait. Sapos Polis i no givim tok orait inap long wik bilong kibung, orait Harvey i save go sindaun long polis stesin inap long ol i givim tok orait. Ol polis i save sem long lukim man bilong narapela ples i kam wet longpela taim long stesin, olsem na ol i save hariap long givim tok orait.

Long ol wik we mipela i save autim tok wantaim ol bratasista, mipela i save wokabaut inap planti aua na kalapim ol maunten na brukim ol wara. Mi tingim fes taim mi kalapim maunten. Bihain long moningtaim kaikai, mipela i go kisim bas long 5:30 a.m. na go long wanpela viles i stap longwe tru, bihain mipela brukim wara na kalapim maunten. Dispela maunten i antap tru inap long mak we brata i wokabaut paslain long mi, lek bilong em i stap long mak bilong ai bilong mi.

Long dispela moning, Harvey i autim tok wantaim sampela brata, na mi wanpela i go autim tok long wanpela liklik viles we ol manmeri i save mekim tokples Japan i stap long en. Long 1 o’klok, mi pilim olsem mi bai feint bikos mi no kaikai inap sampela aua pinis. Taim mi go bungim Harvey, i no gat ol brata i stap. Harvey i bin tilim sampela magasin na kisim 3-pela nupela kiau bilong kararuk olsem pe bilong nius. Em i soim mi hau long kaikai dispela nupela kiau long rot bilong wokim liklik hul long tupela sait bilong en na pulim long maus. Maski em i no teist gut, mi traim wanpela. Tasol husat bai kaikai namba 3 kiau? Mi kaikai, bikos Harvey i pilim olsem em i no gat strong  long karim mi kam daun long maunten sapos hangre i mekim na mi feint.

Long wanpela kibung sekit, mi bungim wanpela hevi. Mipela i stap long haus bilong wanpela brata klostu tru long Haus Kingdom. Pasin bilong waswas em i bikpela samting long ol Amis, olsem na meri bilong wasman sekit i redim ol samting bilong mipela long waswas. Harvey i bisi so em i askim mi long waswas pastaim. Ples waswas i gat 3-pela baket—wanpela kol wara, narapela hot wara, na narapela emti. Mi kirap nogut olsem meri bilong wasman sekit i putim ol dispela samting bilong waswas ausait long haus long ai bilong Haus Kingdom na olgeta brata i wok long redim ol samting bilong kibung inap lukim mi waswas. Mi askim em long wanpela keten. Na em i bringim wanpela klia plastik i kam givim long mi! Mi tingting long go baksait long haus na waswas, tasol long hap i gat ol pato i putim het i kam ausait long banis na redi long kaikaim husat man i go klostu long ol. Na mi tingting olsem, ‘Ol brata i bisi long wok na ol i no inap bisi long mi waswas. Na sapos mi no waswas, ol bai bel nogut long dispela. So larim, bai mi waswas tasol!’ Na mi waswas.

Harvey i luksave olsem ol Amis bratasista i no kamap strong long bilip bikos planti i no save long rit na rait na ol i no gat ol litresa. I no longtaim i go pinis, ol i yusim leta A, B, C, long raitim tokples Amis, olsem na rot i op long skulim ol Amis bratasista long ritim tokples bilong ol. Dispela em bikpela wok tru, tasol nau ol bratasista i lain long mekim stadi bilong ol yet. Long yia 1967, i gat ol litresa long tokples Amis, na long 1968, ol i wokim nius Wastaua long tokples Amis.

Tasol gavman i tambuim ol pablikesen i no stap long tokples Saina. So long abrusim hevi, ol i wokim Wastaua long narapela narapela pasin. Olsem, inap sampela haptaim mipela i yusim Mandarin-Amis edisen bilong Wastaua. Sapos sampela i laik save, ol i ken save olsem mipela i yusim dispela magasin long skulim ol manmeri long tokples Saina. Kirap long dispela taim na i kam, oganaisesen bilong Jehova i bin wokim planti pablikesen long tokples Amis bilong helpim ol dispela lain long kisim save long tok i tru bilong Baibel.—Apo. 10:34, 35.

Long haptaim bilong 1960 na 1970, planti Amis  bratasista i no bihainim gut ol stretpela lo bilong God long i stap bilong ol. Ol i no kliagut tumas long ol stiatok bilong Baibel, na sampela i insait yet long pasin pamuk, dring spak, smok, na kaikai buai. So Harvey i go visitim planti kongrigesen, na em i traim long helpim ol bratasista long kisim tingting bilong Jehova long ol dispela samting. Long wanpela raun olsem, mipela i bungim hevi em mi stori long en long kirap bilong dispela atikol.

Ol brata i gat pasin daun ol i redi long mekim ol senis, tasol sori tru, planti narapela i no mekim olsem—namba bilong ol pablisa long Taiwan i bin 2,450, tasol insait long 20 yia em i go daun na i gat 900 pablisa. Dispela i bin mekim mipela i bel hevi. Tasol mipela i save olsem Jehova i no inap tru long blesim oganaisesen i no stap klin. (2 Kor. 7:1) Bihain, ol kongrigesen i mekim wok bilong Jehova long stretpela pasin, na Jehova i blesim ol na nau Taiwan i gat winim 11,000 pablisa.

Kirap long yia 1980 samting, mipela i lukim ol kongrigesen bilong ol Amis i kamap strong long bilip, na Harvey i save lusim bikpela haptaim wantaim ol manmeri i mekim tokples Saina. Em i amamas long helpim ol man bilong ol sista Kristen long kamap ol Witnes Bilong Jehova. Mi tingim em i bin tok olsem em i amamas tru taim wanpela bilong ol dispela man i bin beten long Jehova long namba 1 taim. Mi tu bin amamas tru long skulim planti manmeri i gat gutpela bel long go klostu long Jehova. Mi bin amamas tru olsem long Taiwan brens, mi bin wok wantaim pikinini man na pikinini meri bilong wanpela Baibel sumatin bilong mi.

Nau poroman marit bilong mi em i no stap moa. Long Janueri 1, 2010, klostu long 59 yia bilong marit bilong mitupela, gutpela man bilong mi Harvey i dai long sik kensa. Em i insait long wok fultaim sevis klostu 60 yia olgeta! Mi misim em tru. Tasol mi amamas olsem mi bin sapotim em gut na mitupela i mekim wok long tupela kantri we wok autim tok i bin kirap nupela long en! Mitupela i lainim tupela tokples Esia i hatwok long lainim, tasol Harvey i mas lain tu long raitim ol tok long dispela tupela tokples bikos long wok bilong em.

Sampela yia bihain, lain Gavening Bodi i tok krismas bilong mi i go antap so i gutpela mi go bek long Australia. Fes samting mi tingting long en em, ‘Mi no laik lusim Taiwan.’ Tasol Harvey i skulim mi olsem mi no ken tok nogat long oganaisesen bilong Jehova, so mi bihainim tok na go bek. Bihain mi luksave olsem em gutpela disisen.

Long nau, mi wok long Australasia brens namel long wik na long ol wiken mi save wok wantaim kongrigesen bilong mi. Long Betel, mi amamas long mekim ol tua long tokples Japan na tokples Saina. Na mi wetim dispela de em God i promis long kirapim bek ol man i dai pinis, bikos mi save olsem Harvey—em i bin lain olsem em i no ken tok nogat long Jehova—em i stap seif long memori bilong Em.—Jon 5:28, 29.