1. Olsem King Devit, sampela bilong yumi inap mekim wanem askim?

YUMI olgeta i laik stap isi na stap bel isi. I no gat wanpela man i save amamas long tingting planti. Tasol sampela taim yumi inap tingting planti. Sampela wokman bilong Jehova inap mekim wankain askim em King Devit i bin mekim taim em i askim Jehova olsem: “Wanem taim bai ol hevi mi karim i pinis? Na wanem taim bai bel hevi mi karim long olgeta de i pinis?”—Sng. 13:2.

2. Yumi bai stori long wanem samting long dispela atikol?

² Yumi no inap abrusim pasin bilong tingting planti, tasol yumi inap mekim sampela samting bilong daunim pasin bilong tingting planti. Long dispela atikol, pastaim yumi bai stori long ol samting we inap mekim yumi tingting planti. Na bihain yumi bai stori long 6-pela rot em yumi ken bihainim bilong helpim yumi long stap isi taim ol hevi i painim yumi.

3. (a) Wanem ol samting inap mekim yumi tingting planti? (b) Yu ting yumi inap kontrolim ol dispela samting?

³ Yumi no inap kontrolim sampela samting we inap mekim yumi tingting planti. Olsem, long olgeta yia pe bilong ol kaikai, klos, na haus i go antap, na yumi no inap daunim pe bilong ol dispela samting; na tu, planti taim ol wanwok na ol wanskul bai traim long pulim yumi long mekim tok giaman o mekim pasin pamuk, na yumi no inap kontrolim ol. Na yumi no inap stopim ol manmeri long mekim pasin raskol long hap yumi stap long en. Ol dispela hevi i stap bikos yumi stap long  graun we planti manmeri i no bihainim ol stiatok bilong Baibel. Satan em god bilong dispela graun, na em i save olsem sampela manmeri bai larim “ol wari bilong laip long dispela taim” i pasim ol long lotuim Jehova. (Mat. 13:22; 1 Jon 5:19) Olsem na graun i pulap long kain kain hevi we i mekim ol manmeri i tingting planti!

4. Yumi inap tingting planti tru long wanem ol samting?

⁴ Yumi inap tingting planti tru long ol hevi i kamap na dispela i pasim yumi long tingim ol narapela samting. Olsem, ating yumi wari olsem yumi no inap kisim inap mani long baim ol samting yumi nidim, o yumi bai kisim sik na yumi no inap go long wok o kampani inap pinisim yumi long wok. Na tu, yumi inap wari olsem nogut wanpela traim i kamap long yumi na yumi brukim lo bilong God na yumi no stap gut long em. Klostu nau Satan bai kirapim ol lain em i kontrolim long pait long ol manmeri bilong God, so yumi inap tingting planti long wanem samting yumi bai mekim long dispela taim. Yumi inap tingting olsem, ‘I stret mi wari long ol kain samting olsem?’

5. Taim Jisas i tok: “Lusim pasin bilong tingting planti,” yu ting tok bilong em i makim wanem samting?

⁵ Jisas i bin tokim ol disaipel bilong em olsem: “Lusim pasin bilong tingting planti.” (Mat. 6:25) Yu ting tok bilong Jisas i makim olsem yumi no ken tingting planti long wanpela samting? Nogat! Sampela wokman bilong Jehova long pastaim i bin bel hevi na tingting planti, maski i olsem Jehova i orait yet long ol. * (1 Kin. 19:4; Sng. 6:3) Jisas i laik mekim isi bel bilong yumi. Em i no laik bai yumi tingting planti tru long ol samting yumi nidim na dispela i pasim yumi long mekim wok bilong God. So wanem sampela rot yumi inap bihainim bilong daunim pasin bilong tingting planti?—Lukim blok “Rot Bilong Mekim.”

6. Olsem Filipai 4:6, 7 i kamapim, wanem samting inap helpim yumi long stap bel isi?

⁶ (1) Beten oltaim. Taim ol Kristen i karim hevi na ol i tingting planti, ol i ken beten long Jehova bilong kisim helpim. (1 Pita 5:7) Jehova inap bekim ol beten bilong yu long rot bilong givim yu “dispela bel isi bilong God i winim tru tingting bilong man.” (Ritim Filipai 4:6, 7.) Long rot bilong holi spirit bilong em i gat bikpela strong tru, Jehova i helpim yumi long stap isi.—Gal. 5:22.

7. Taim yumi beten long God, yumi mas tingim wanem ol samting?

⁷ Taim yu beten long Jehova, autim olgeta tingting na filings bilong yu long em. Kolim stret ol samting yu tingting long en. Tokim em long wanem hevi yu karim, na tokim em long tingting tru bilong yu. Sapos i gat rot bilong stretim dispela hevi, orait askim em long givim yu savetingting bilong luksave long rot bilong stretim dispela hevi na strong bilong mekim olsem. Sapos i no gat samting yu inap mekim bilong stretim dispela hevi, orait askim Jehova long helpim yu long no ken tingting planti tumas. Taim yu beten na kolim stret ol samting yu tingim, bihain yu bai luksave long hau Jehova i bekim ol beten bilong yu. Sapos yu no kisim bekim bilong yu hariap bihain long yu bin beten, orait no ken givap. Jehova i laik bai yu mas kolim stret ol samting yu tingim na yu mas beten oltaim.—Luk 11:8-10.

8. Taim yumi beten, yumi ken mekim wanem tu?

⁸ Taim yu beten na tokim Jehova long ol samting yu tingting planti long en, i gutpela yu ken tok tenkyu tu long em. Maski yumi  karim ol hevi, i gutpela long yumi mas tingim ol blesing yumi kisim. Sapos sampela taim yu pilim olsem yu no save long wanem tok yu bai mekim bilong autim bel hevi bilong yu, orait tingim olsem Jehova bai bekim beten bilong yu maski sapos yu mekim sotpela tok olsem, ‘Plis helpim mi!’—2 Sto. 18:31; Rom 8:26.

9. Yumi mas mekim wanem na bai yumi inap stap gut?

⁹ (2) Trastim savetingting bilong Jehova, i no savetingting bilong yu yet. Long yia 778 B.C.E. samting, ol manmeri bilong Juda i pret olsem ol Asiria bai kam pait long ol. Ol i no laik bai ol Asiria i pait na daunim ol, so ol i askim ol haiden lain bilong Isip long helpim ol. (Ais. 30:1, 2) Jehova i givim tok lukaut long ol olsem pasin bilong ol long trastim ol Isip bai kamapim bikpela hevi long ol. (Ais. 30:7, 12, 13) Long rot bilong Aisaia, Jehova i tokim ol manmeri long hau ol inap i stap gut. Em i tok: “Yupela bai kamap strong sapos yupela i stap isi na trastim” Jehova.—Ais. 30:15b.

10. Wanem ol samting inap kamap na i opim rot long yumi inap soim olsem yumi trastim Jehova?

¹⁰ Hau bai yumi inap soim olsem yumi trastim Jehova? Skelim ol dispela eksampel. Ating yu kisim wok mani i gat gutpela pe, tasol yu mas wok inap planti aua na dispela i pasim yu long mekim wok lotu bilong yu. O ating wanpela long ples wok i mekim sampela tok o pasin i soim olsem em i laik maritim yu, tasol em i no wanpela wokman bilong God i baptais pinis. O tingim olsem wanpela long famili em yu laikim tru i tokim yu olsem: “Yu makim, mi o God bilong yu.” Long olgeta dispela eksampel, yu mas mekim ol bikpela disisen, tasol Jehova bai stiaim yu long mekim rait disisen. (Mat. 6:33; 10:37; 1 Kor. 7:39) Tasol askim nau em olsem, Yu bai trastim ol stiatok bilong Jehova na bihainim?

11. Yumi ken ritim wanem ol stori long Baibel na bai yumi inap stap isi taim ol man i birua long yumi?

¹¹ (3) Kisim skul long ol gutpela eksampel na ol eksampel nogut. Baibel i gat planti stori i soim klia olsem em i bikpela samting long yumi mas stap isi na trastim Jehova. Taim yu ritim ol dispela stori, luksave long wanem samting i helpim ol wokman bilong God long holimpas pasin bilong stap isi maski ol man i birua long ol. Olsem, taim suprim kot bilong ol Juda i givim oda olsem ol aposel i mas stop long autim tok, ol aposel i no bin pret, nogat. Ol i strongim bel na tokaut olsem: “Mipela i mas bihainim tok bilong God tasol, na mipela i no ken bihainim tok bilong ol man.” (Apo. 5:29) Maski ol i bin wipim ol aposel, ol i no pret. Wai? Bikos ol i save olsem Jehova i sambai long ol. Em i amamas long ol. Olsem na ol i wok yet long autim gutnius long ol manmeri. (Apo. 5:40-42) Long wankain pasin, taim ol birua i laik kilim i dai disaipel Stiven, em i stap bel isi na em i no pret, na pes bilong em i luk “olsem pes bilong wanpela ensel.” (Apo. 6:12-15) Wai? Bikos Stiven i save tru olsem Jehova i orait long em.

12. Olsem 1 Pita 3:14 na 4:14 i kamapim, wai na yumi ken amamas taim ol man i mekim nogut long yumi?

¹² Ol aposel i lukim stret evidens i soim klia olsem Jehova i sambai long ol. Em i givim ol strong long wokim ol mirakel. (Apo. 5:12-16; 6:8) Long nau, Jehova i no save givim yumi strong long wokim ol mirakel. Maski i olsem, long rot bilong Baibel, Jehova i tokim yumi olsem taim yumi mekim stretpela pasin na long dispela rot yumi karim pen na hevi, em i amamas long yumi na holi spirit bilong em i stap wantaim yumi. (Ritim 1 Pita 3:14; 4:14.) So yumi no ken tingting planti tumas long yumi bai mekim wanem taim ol man i mekim nogut long yumi long bihain. Long nau yumi mas putim tingting i go long hau  yumi inap strongim pasin bilong yumi long trastim Jehova long lukautim yumi na kisim bek yumi. Olsem ol aposel long pastaim i bin mekim, yumi mas trastim tok promis bilong Jisas olsem: “Long maus bilong yupela mi bai putim ol tok i kamapim savetingting, na olgeta birua bilong yupela bai i no inap sakim o daunim dispela tok.” Em i tok moa olsem: “Pasin bilong yupela long sanap strong bai mekim na yupela i holimpas laip bilong yupela.” (Luk 21:12-19) Na oltaim no ken lusim tingting olsem Jehova i tingim olgeta liklik samting em ol wokman bilong em husat i stap gut long em i bin mekim paslain long ol i dai. Em bai yusim dispela save long kirapim bek ol.

13. Taim yumi ritim stori bilong ol lain em ol i no bin stap isi na trastim Jehova, hau dispela inap helpim yumi?

¹³ Yumi inap kisim skul tu long ol stori bilong ol lain em ol i no bin stap isi na trastim Jehova. Taim yumi ritim stori bilong ol dispela eksampel nogut, dispela bai helpim yumi long abrusim ol popaia ol i bin mekim. Olsem, taim King Asa i kirap mekim wok king, em i wetim Jehova i helpim em long pait long wanpela bikpela lain ami, na Jehova i blesim em na helpim em long winim pait. (2 Sto. 14:9-12) Tasol bihain taim King Basa bilong Israel na liklik lain ami bilong em i kam pait long Asa, em i baim ol Siria bilong ol i ken helpim em long winim pait, na Asa i no lukluk i go long Jehova bilong kisim bek ol olsem em i bin mekim long pastaim. (2 Sto. 16:1-3) Na taim em i kisim wanpela bikpela sik na klostu long em i laik dai, em i no askim Jehova long helpim em.—2 Sto. 16:12.

14. Yumi inap kisim wanem skul long ol popaia bilong Asa?

¹⁴ Taim Asa i bungim ol hevi long pastaim, em i lukluk long Jehova long helpim em. Tasol bihain em i no askim God bilong em long helpim em, em yet i laik stretim ol hevi bilong em. Ating long ai bilong ol man, dispela plen bilong Asa long askim ol Siria long helpim em long pait long ol Israel em wanpela gutpela plen. Tasol lain Juda i no stap bel isi inap longpela taim. Long rot bilong wanpela profet, Jehova i tokim Asa olsem: “Yu bin trastim king bilong Siria na yu no trastim Jehova, God bilong yu, olsem na ami bilong king bilong Siria i no stap moa long han bilong yu, ol i ranawe pinis.” (2 Sto. 16:7) Yumi mas was gut nogut yumi ting olsem yumi yet inap stretim ol hevi bilong yumi na yumi no larim Jehova i stiaim yumi long rot bilong Baibel. Maski yumi mas mekim hariap wanpela disisen, yumi mas stap isi na trastim Jehova, na em bai helpim yumi long mekim gutpela disisen.

15. Yumi ken mekim wanem taim yumi ritim Baibel?

¹⁵ (4) Tingim gut ol Baibel ves. Taim yu painim ol ves bilong Baibel we i stori long yumi save kisim strong taim yumi stap isi na trastim Jehova, traim long tingim gut sampela bilong ol dispela ves. Yu ken mekim olsem long rot bilong ritim bikpela ol dispela ves, o yu ken raitim ol dispela ves long notbuk na skelim gen long bihain. God i tokim Josua long ritim buk bilong Lo long olgeta de na em i mas ritim isi isi ol dispela tok na bai em i ken bihainim savetingting. Na tu, ol dispela tok bai helpim em long daunim pasin bilong pret na bai em i ken strongim bel na lidim ol manmeri bilong God. (Jos. 1:8, 9) Planti tok i stap long Baibel inap helpim yu long kisim bel isi taim wanpela hevi i kamap na i mekim yu tingting planti o pret.—Sng. 27:1-3; Prov. 3:25, 26.

16. Olsem wanem Jehova i yusim kongrigesen long helpim yumi long stap isi na trastim em?

¹⁶ (5) Bung wantaim lain bilong God. Jehova i save yusim ol bratasista long helpim yumi  long stap isi na trastim Em. Long ol miting bilong yumi, yumi kisim helpim long rot bilong ol tok ol brata i mekim long pletfom, ol bekim bilong odiens, na ol stori yumi mekim wantaim ol bratasista bilong yumi long strongim bel bilong narapela narapela. (Hib. 10:24, 25) Na tu, yumi inap kisim strong taim yumi autim tingting na filings bilong yumi long ol pren insait long kongrigesen em yumi ken trastim ol. Taim wanpela pren i mekim “gutpela tok” long yumi, dispela inap daunim bel hevi bilong yumi.—Prov. 12:25.

17. Olsem Hibru 6:19 i kamapim, olsem wanem bilip bilong yumi long ol gutpela samting Kingdom bai kamapim i ken helpim yumi long sanap strong?

¹⁷ (6) Holimpas strongpela bilip. Yumi bilip na wetim gutpela samting Kingdom bai kamapim na dispela i “stap olsem anka bilong laip bilong yumi,” na dispela i helpim yumi long sanap strong maski yumi karim planti hevi o yumi tingting planti. (Ritim Hibru 6:19.) Tingim tingim tok promis bilong Jehova long gutaim bai kamap bihain we i no gat man bai wari o tingting planti moa. (Ais. 65:17) Piksaim yu yet long nupela taim we bel isi i stap, na i no gat wanpela samting bai mekim yu tingting planti o pret. (Mai. 4:4) Na tu, yu bai strongim bilip bilong yu taim yu tokim ol narapela long samting yu bilip na wet long en. Mekim olgeta samting yu inap mekim bilong autim tok na kamapim disaipel. Taim yu mekim olsem, yu ken “holimpas dispela samting [yu] bilip na wet long en i go inap long pinis.”—Hib. 6:11.

18. (a) Klostu nau wanem samting bai painim yumi? (b) Wanem samting bai helpim yumi long karim ol hevi?

¹⁸ Pinis bilong dispela haptaim nogut i kam klostu tru, olsem na yumi bai bungim planti hevi moa we inap mekim yumi tingting planti. Yiateks bilong 2021 i ken helpim yumi long stap isi na karim ol dispela hevi, na yumi bai mekim olsem long rot bilong trastim Jehova na yumi no trastim strong bilong yumi yet. Long dispela yia, yumi ken mekim ol samting bilong soim olsem yumi bilipim tok promis bilong Jehova olsem: “Yupela bai kamap strong sapos yupela i stap isi na trastim mi.”—Ais. 30:15.