1. Bai yu stori olsem wanem long famili bilong Jems?

 JEMS em brata bilong Jisas na em i kamap bikpela insait long famili i pas gut wantaim God. * Papamama bilong em, Josep na Maria, i laikim tru Jehova na ol i givim bes bilong ol long mekim wok bilong em. Na Jems i gat narapela blesing tu—bikpela brata bilong em Jisas bai kamap dispela promis Mesaia. Em gutpela samting tru long Jems i stap insait long dispela famili, a?

2. I gat wanem ol risen na Jems inap laikim na rispektim bikpela brata bilong em?

² I gat planti risen long Jems inap laikim na rispektim bikpela brata bilong em. (Mat. 13:55) Eksampel: Jisas i save gut tru long Ol Skripsa na taim em i gat 12-pela krismas, em i mekim ol tok we ol hetman long Jerusalem i kirap nogut tru long en. (Luk 2:46, 47) Ating Jems i bin wok wantaim brata bilong em Jisas long mekim wok kapenta. Na ating long dispela haptaim, em i save gut long brata bilong em. Olsem Nathan H. Knorr i bin tok: “Yu bai kisim planti skul long narapela taim yu wok wantaim em.” * Jems i save olsem “Jisas i wok long kamap bikpela na savetingting bilong em tu i wok long i go bikpela, na God na ol man tu i wok long laikim em moa yet.” (Luk 2:52) So yumi inap kisim tingting olsem ating Jems bai kamap wanpela bilong ol fes disaipel bilong Jisas. Tasol dispela samting i no bin kamap.

3. Jems i mekim wanem taim Jisas i kirapim wok autim tok bilong em?

³ Taim Jisas i kirap mekim wok autim tok bilong em long  graun, Jems i no kamap wanpela disaipel bilong Jisas. (Jon 7:3-5) Ating Jems em wanpela bilong ol wanblut bilong Jisas husat i bin tok long Jisas olsem, “tingting bilong em i paul pinis.” (Mak 3:21) I no gat stori long Baibel i soim olsem Jems i bin stap wantaim mama bilong ol, Maria, taim ol i bin kilim i dai Jisas long diwai pos.—Jon 19:25-27.

4. Yumi bai stori long wanem tupela skul yumi ken kisim long dispela atikol?

⁴ Bihain Jems i bilip long Jisas na em i kamap wanpela elda long kongrigesen Kristen. Long dispela atikol, yumi bai stori long 2-pela skul yumi ken kisim long Jems: (1) as na yumi mas daunim yumi yet na (2) hau yumi ken mekim gut wok tisa.

5. Jems i bin mekim wanem taim Jisas i bin kirap bek na kamap long em?

⁵ Wanem taim Jems i kamap olsem wanpela gutpela disaipel bilong Jisas? Bihain long Jisas i kirap bek long dai, “em i kamap long Jems, na bihain em i kamap long olgeta aposel.” (1 Kor. 15:7) Bihain long dispela bung bilong em wantaim Jisas, Jems i kamap wanpela disaipel. Em i bin stap namel long ol aposel taim ol i bin kisim holi spirit antap long rum long Jerusalem. (Apo. 1:13, 14) Bihain Jems i bin mekim wok olsem wanpela hetman bilong gavening bodi long taim bilong ol aposel. (Apo. 15:6, 13-22; Gal. 2:9) Na sampela haptaim paslain long 62 C.E., holi spirit i kirapim em long raitim pas i go long ol Kristen God i bin makim. Dispela pas inap helpim yumi long nau, maski yumi bilong kisim laip long heven o long graun. (Jems 1:1) Saveman Josifas i tok, Yangpela Hetpris Ananaias Bilong Juda i tok na ol i bin kilim i dai Jems. Jems i bin stap gut long Jehova i go inap long em i pinisim wok bilong em long graun.

6. Long wanem rot Jems i narapela kain long ol hetman bilong lotu long taim bilong em?

⁶ Jems i gat pasin daun. Wai na yumi ken tok olsem? Tingim pasin em bihain Jems i bin mekim long Jisas na pasin em ol hetman bilong lotu i bin mekim. Taim Jems i lukim evidens i pruvim olsem Jisas em i Pikinini Bilong God, long pasin daun em i orait long dispela. Ol hetman long Jerusalem, ol i no mekim olsem. Eksampel, ol i save olsem Jisas i bin kirapim bek Lasarus long indai. Tasol ol i no orait long Jisas olsem man em Jehova i makim, nogat. Ol i painim rot bilong kilim i dai Jisas na Lasarus wantaim. (Jon 11:53; 12:9-11) Bihain taim Jisas yet i bin kirap bek long dai, ol i painim rot bilong haitim dispela tok i tru long ol manmeri.  (Mat. 28:11-15) Pasin antap bilong ol dispela hetman bilong lotu i kirapim ol long sakim Mesaia.

7. Wai na yumi mas sakim pasin antap?

⁷ Skul yumi kisim: Sakim pasin antap, na larim Jehova i skulim yumi. Sik inap mekim ol rop bilong blut i go strong na bai lewa i no pam gut, olsem tasol, sapos yumi gat pasin antap, dispela inap mekim bel bilong yumi i go strong na inap pasim yumi long kisim ol daireksen i kam long Jehova. Ol Farisi i larim bel bilong ol i kamap strong tru na long dispela rot ol i no luksave long ol evidens em holi spirit bilong God i soim long ol. (Jon 12:37-40) Samting ol i mekim i nogut tru, long wanem, dispela i pasim ol long kisim laip oltaim. (Mat. 23:13, 33) Olsem na em i bikpela samting tru long yumi mas wok yet long larim Tok Bilong God na holi spirit bilong em i stretim stretim pasin bilong yumi, tingting bilong yumi, na ol disisen yumi mekim! (Jems 3:17) Jems i gat pasin daun, olsem na em i larim Jehova i skulim em. Na olsem yumi bai lukim, pasin daun bilong em i mekim na em i kamap wanpela gutpela tisa.

8. Wanem samting bai helpim yumi long kamap ol gutpela tisa?

⁸ Jems i no bin kisim bikpela skul bilong dispela graun. Ol hetman bilong lotu long taim bilong em, ol i gat wankain tingting long Jems olsem ol i gat long Pita na Jon—“olsem tupela i no bin kisim bikpela skul na tupela i man nating tasol.” (Apo. 4:13) Tasol Jems i lain gut long pasin bilong skulim gut ol man, na dispela i stap ples klia long buk em nem bilong em i stap long en. Wankain olsem Jems, ating yumi tu i no bin kisim bikpela skul bilong dispela graun. Maski i olsem, holi spirit bilong Jehova na ol trening yumi kisim long oganaisesen bilong em inap helpim yumi long kamap ol gutpela tisa. Yumi ken skelim eksampel bilong Jems olsem wanpela gutpela tisa na ol skul yumi ken kisim long em.

9. Yu bai stori olsem wanem long pasin bilong Jems long skulim ol man?

⁹ Jems i no yusim ol bikpela tok em ol man i no save o kliagut long en. Dispela i mekim na ol man i harim tok bilong em, ol i save long samting ol i mas mekim na hau ol inap mekim olsem. Eksampel, skelim tok Jems i mekim olsem  ol Kristen i mas lain long karim hevi bilong ol pasin i no stret na ol i no ken bel hevi long dispela samting. Em i tok: “Mipela i tingim olsem ol man husat i sanap strong na karim hevi, ol i stap amamas. Yupela harim pinis stori bilong Jop long em i bin sanap strong na long ol samting Jehova i bin mekim long em, olsem Jehova i gat pasin bilong sori tru na marimari.” (Jems 5:11) Ol tok Jems i mekim i kam long Ol Skripsa. Em i yusim Tok Bilong God long helpim ol manmeri i putim yau long em olsem oltaim Jehova i save mekim gut long ol man—olsem Jop—em ol i stap gut long Em. Ol man i kliagut long ol tok Jems i mekim, long wanem, em i yusim ol tok i isi long ol man i kisim gut. Long dispela rot, em i kirapim ol long tingim Jehova, na i no long tingim em.

10. Wanem wanpela rot yumi ken bihainim pasin bilong Jems taim yumi skulim ol man?

¹⁰ Skul yumi kisim: Mekim ol tok i isi long man i kisim, na skulim em long Tok Bilong God. Mak yumi laik putim em olsem, yumi no laik mekim na bai ol narapela i ting yumi gat bikpela save moa, nogat. Yumi laik helpim ol long tingim samting Jehova i save long en na hau Jehova i tingim tru olgeta wan wan bilong ol. (Rom 11:33) Yumi ken winim dispela mak sapos oltaim yumi skulim ol man long tok bilong Baibel. Eksampel, sapos ol Baibel sumatin i kamapim stori long wanpela samting i painim ol, orait yumi no ken tokim ol long samting yumi bai mekim sapos kain samting i painim yumi, nogat. Yumi mas helpim ol long skelim ol eksampel i stap long Baibel na helpim ol long kliagut long tingting na filings bilong Jehova. Long dispela rot, ol bai kisim laik bilong amamasim Jehova, na i no long amamasim yumi.

11. (a) Ol Kristen long taim bilong Jems i bin bungim wanem ol hatwok? (b) Jems i givim wanem tok kaunsel long ol? (Jems 5:13-15)

¹¹ Jems i tokaut stret long ol samting. Long pas Jems i raitim, em i soim olsem em i klia long ol hatwok em ol wanbilip bilong em i feisim, na em i givim klia daireksen long ol samting ol i mas mekim bilong daunim ol dispela hatwok. Eksampel, sampela Kristen ol i isi isi na ol i no hariap long bihainim tok kaunsel. (Jems 1:22) Ol narapela i save mekim wansait pasin long ol maniman. (Jems 2:1-3) Na sampela narapela i hatwok long bosim gut maus o tang bilong ol. (Jems 3:8-10) Ol dispela Kristen i gat ol pasin kranki, tasol Jems i no givap long ol. Em i mekim ol tok long gutpela pasin, tasol em i tokaut stret na em i strongim ol manmeri i no strong long bilip long ol i mas kisim helpim long ol elda.—Ritim Jems 5:13-15.

12. Hau yumi ken holim stretpela tingting taim yumi helpim ol Baibel sumatin bilong yumi?

¹² Skul yumi kisim: Tokaut stret, tasol holim stretpela tingting long ol narapela. Planti sumatin bilong yumi inap pilim hatwok long bihainim tok bilong Baibel. (Jems 4:1-4) Ating sampela haptaim i mas lus bambai ol i ken lusim ol pasin nogut bilong ol na kisim ol gutpela pasin bilong Krais. Yumi mas bihainim pasin bilong Jems na tokaut stret long ol Baibel sumatin bilong yumi long ol samting ol i mas stretim bilong kamap gutpela moa. Na tu, yumi mas holim stretpela tingting long ol, na bilip tru olsem Jehova yet bai bringim ol man i gat pasin daun i kam long em na em bai givim strong ol i nidim bilong mekim ol senis long laip bilong ol.—Jems 4:10.

13. Olsem Jems 3:2 i kamapim, Jems i luksave long wanem samting?

¹³ Jems i holim stretpela tingting long em yet. Jems i no pilim olsem famili bekgraun bilong em o ol gutpela asainmen bilong em i mekim na em i spesel o em i stap antap moa winim ol bratasista bilong em, nogat. Em i kolim ol wanbilip bilong em olsem “ol brata mi laikim tumas.” (Jems 1:16, 19; 2:5) Em i no mekim bai ol narapela i ting olsem em i gutpela olgeta, nogat. Em  i putim em yet i go insait long dispela tok em i mekim olsem: “Planti taim yumi olgeta i save popaia.”—Ritim Jems 3:2.

14. Wai na yumi mas redi long tokaut long ol popaia bilong yumi?

¹⁴ Skul yumi kisim: Tingim olsem yumi olgeta i sinman. Yumi no ken ting olsem yumi antap moa winim ol Baibel sumatin bilong yumi. Wai na yumi tok olsem? Sapos yumi mekim na sumatin i ting olsem yumi no save popaia, dispela inap mekim na em i pilim olsem em i no inap bihainim ol stretpela lo bilong God. Tasol sapos yumi tokaut olsem sampela taim yumi yet i hatwok long bihainim ol stiatok bilong Baibel, na yumi stori gut long hau Jehova i bin helpim yumi long winim ol hatwok bilong yumi, orait yumi inap helpim sumatin bilong yumi long luksave olsem em tu i ken lotuim Jehova.

15. Yu bai stori olsem wanem long ol tok piksa em Jems i bin yusim? (Jems 3:2-6, 10-12)

¹⁵ Jems i yusim ol tok piksa em ol man i pilim tru long bel. Tru tumas, holi spirit i bin helpim em long mekim olsem. Na tu, em i lain gut long pasin bilong skulim ol man long rot bilong skelim gut ol tok piksa em bikpela brata bilong em Jisas i bin yusim. Ol tok piksa em Jems i bin yusim long pas bilong em, ol i simpol na em isi long ol man i kisim skul long en na bihainim.—Ritim Jems 3:2-6, 10-12.

16. Wai na yumi mas yusim ol tok piksa em ol man i kliagut long en?

¹⁶ Skul yumi kisim: Yusim ol tok piksa em ol man inap kliagut long en. Taim yu yusim ol tok piksa em ol man i kliagut long en, ol man bai harim tok yu mekim, na long wankain taim, ol i piksaim long tingting. I olsem yu peintim piksa long tingting bilong ol. Ol dispela piksa bai helpim ol man i putim yau long yu long tingim gut ol bikpela tok i tru bilong Baibel. Jisas i save gut tru long yusim ol tok piksa em ol man i kliagut long en, na brata bilong em Jems i bihainim eksampel bilong em. Yumi ken stori long wanpela tok piksa bilong Jems na lukim wai na planti man i kisim gut poin bilong en.

17. Wai na planti man i kliagut long tok piksa i stap long Jems 1:22-25?

¹⁷ Ritim Jems 1:22-25. Tok piksa Jems i mekim long mira em tok planti man i kliagut long en. Em i tingim wanpela poin stret taim em i mekim dispela tok piksa, olsem bilong kisim helpim long Tok Bilong God, yumi mas ritim na bihainim ol tok yumi ritim. Jems i yusim tok piksa em odiens bilong em i kliagut long en—man i lukim pes bilong em long mira. So wanem  poin em i laik mekim? Em bai longlong pasin sapos wanpela man i lukluk long mira na em i lukim sampela samting i no stret long em yet, na em i no mekim wanpela samting bilong stretim. Olsem tasol, em bai longlong pasin sapos yumi ritim Tok Bilong God, na yumi lukim sampela samting long pasin na toktok bilong yumi em yumi mas senisim, tasol yumi no mekim wanpela samting bilong stretim.

18. Yumi mas tingim wanem 3-pela samting taim yumi laik mekim ol tok piksa?

¹⁸ Taim yu laik mekim tok piksa, yu ken bihainim eksampel bilong Jems na mekim 3-pela samting: (1) Tok piksa i mas stret wantaim poin yu laik stori long en. (2) Mekim tok piksa em odiens bilong yu i save gut long en. (3) Poin bilong tok piksa i mas stap ples klia. Sapos yu pilim hatwok long tingim ol gutpela tok piksa, orait yu ken skelim ol tok bilong Watch Tower Publications Index. Aninit long het tok “Illustration,” yu bai painim planti gutpela tok piksa em yu ken yusim. Tasol tingim, ol tok piksa ol i olsem maikrofon—ol bai mekim na poin yu laik kamapim bai stap ples klia moa. Olsem na skelim gut na mekim tok piksa long ol bikpela poin em yu laik skulim man long en. Tru tumas, bikpela samting yumi laik tingim em bilong helpim wok tisa bilong yumi, na i no bilong mekim ol man i tingim yumi, nogat. Em bilong helpim planti manmeri moa long kam insait long famili bilong Jehova em ol i stap amamas long nau.

19. Long wanem rot yumi soim olsem yumi amamas long bikpela lain famili bilong yumi, em ol bratasista Kristen bilong yumi?

¹⁹ I no gat wanpela bilong yumi i bin kamap bikpela wantaim wanpela brata em i gutpela olgeta, tasol yumi amamas tru olsem yumi olgeta i ken mekim wok bilong Jehova wantaim bikpela lain famili—em ol bratasista Kristen bilong yumi. Yumi soim olsem yumi laikim ol taim yumi bung wantaim ol, na yumi kisim skul long ol, na yumi wok gut wantaim ol long mekim wok bilong autim tok na skulim ol man. Taim yumi wok strong long bihainim eksampel bilong Jems long tingting, pasin, na wok tisa bilong yumi, yumi givim ona long Jehova na yumi helpim ol manmeri i gat gutpela bel long kam klostu long Papa bilong yumi long heven.