1. Devit i bungim wanem hevi?

 DEVIT i tingim laip bilong em na em i ranawe. Sol, em strongpela king bilong Israel, em i tingting strong long kilim em i dai. Taim Devit i sot long kaikai, em i stop long taun bilong Nop, na long dispela hap em i askim long 5-pela bret. (1 Sml. 21:1, 3) Bihain, em na ol ami bilong em i hait long wanpela keiv. (1 Sml. 22:1) Hau dispela hevi i painim Devit?

2. Olsem wanem Sol i kamapim hevi long em yet? (1 Samuel 23:16, 17)

² Sol i jeles nogut tru long Devit bikos planti man i save long em na em i bin winim planti pait. Na tu, Sol i save olsem em i sakim tok bilong Jehova, olsem na Jehova i no laik em i stap king bilong Israel, na Jehova i makim Devit long mekim wok king. (Ritim 1 Samuel 23:16, 17.) Maski i olsem, Sol i stap olsem king bilong Israel, olsem na em i gat bikpela lain ami na planti man i sapotim em, dispela i mekim na Devit i tingim laip bilong em na em i mas ranawe. Yu ting Sol inap stopim samting em God i tingting pinis long mekim, em long makim Devit i kamap king? (Ais. 55:11) Baibel i no tok olsem, tasol yumi ken save tru long wanpela samting: Sol i kamapim hevi long em yet. Ol man husat i pait long God, oltaim ol i save lus!

3. Devit i pilim olsem wanem long ol hevi i painim em?

³ Devit em man i gat pasin daun. Em yet i no makim em long kamap king bilong Israel. Jehova i givim em dispela wok. (1 Sml. 16:1, 12, 13) Tasol Sol i heitim tru Devit na em i tingim em olsem birua. Maski i olsem, Devit i no sutim tok long Jehova long hevi i painim em, na tu, em i no komplein olsem em i no gat inap kaikai na em i hait insait long wanpela keiv. Long dispela taim em i hait insait long keiv, ating em i raitim ol naispela tok bilong  dispela song bilong preisim God, na ol hap tok bilong en i stap long tim skripsa bilong yumi olsem: “Ol man i wok long painim Jehova, ol bai i no sot long wanpela gutpela samting.”—Sng. 34:10.

4. (a) Yumi bai skelim wanem ol askim long dispela atikol? (b) Wai na ol dispela askim em bikpela samting?

⁴ Long nau planti wokman bilong Jehova i sot long kaikai na ol narapela samting ol i nidim bilong i stap laip. * Dispela samting i bin painim planti wokman bilong Jehova long dispela taim bilong pendemik. Na ol samting bai go nogut moa taim yumi wok long go klostu moa long taim bilong “traipela hevi tru.” (Mat. 24:21) So em bai gutpela long yumi kisim bekim bilong 4-pela bikpela askim: Long wanem rot Devit “i no sot long wanpela gutpela samting”? Wai na yumi mas lain long amamas long ol samting yumi holim pinis? Wai na yumi ken bilip tru olsem Jehova bai lukautim yumi? Na yumi ken mekim wanem bilong redi nau long ol samting bai kamap bihain?

5-6. Olsem wanem tok bilong Buk Song 23:1-6 i helpim yumi long kliagut long tok Devit i mekim olsem ol wokman bilong God “bai i no sot long wanpela gutpela samting”?

⁵ Wanem mining bilong tok bilong Devit olsem ol wokman bilong Jehova bai “i no sot long wanpela gutpela samting”? Yumi inap kliagut long dispela taim yumi skelim ol wankain tok i stap long Buk Song 23. (Ritim Buk Song 23:1-6.) Devit i kirapim tok bilong dispela song olsem: “Jehova em i Wasman bilong mi. Olsem na mi no inap sot long wanpela samting.” Long dispela Song olgeta, Devit i kolim ol samting em ol i bikpela samting tru—em ol gutpela samting Jehova i givim em bikos em i larim Jehova i stap olsem Wasman bilong em. Jehova i stiaim Devit long wokabaut long “stretpela rot,” na em i stap gut long Devit long ol gutpela taim na long ol taim nogut. Devit i tokaut olsem Jehova i stiaim em i go long ol hap i gat “gutpela gras,” tasol laip bilong em bai i gat ol hevi tu. Ating sampela taim em bai  bel hevi, i olsem em i wokabaut long “veli i tudak nogut tru,” na em bai bungim ol birua. Tasol Jehova i stap olsem Wasman bilong em, olsem na Devit i “no pret long wanpela samting.”

⁶ So nau yumi ken kisim bekim bilong dispela askim: Long wanem rot Devit “i no sot long wanpela gutpela samting”? Long sait bilong bilip, em i gat olgeta samting em i nidim. Em i no kisim amamas long ol samting bilong skin em i gat, nogat. Devit i amamas long ol samting Jehova i givim em. Bikpela samting moa long Devit em olsem, God i blesim em na lukautim em.

7. Olsem Luk 21:20-24 i kamapim, ol Kristen long Judia long taim bilong ol aposel i bungim wanem bikpela hevi?

⁷ Ol tok Devit i mekim i helpim yumi long lukim olsem em i bikpela samting long yumi mas holim stretpela tingting long ol samting bilong skin. Yumi ken amamas long ol samting bilong skin yumi gat, tasol yumi no ken putim ol dispela samting i stap olsem namba 1 samting long laip bilong yumi. Dispela em i wanpela bikpela tok i tru em ol Kristen long Judia long taim bilong ol aposel i kliagut long en. (Ritim Luk 21:20-24.) Jisas i tok lukaut long ol olsem wanpela taim bai kamap na ol bai lukim “ol ami i kam banisim Jerusalem.” Taim ol i “ranawe i go long ol maunten,” dispela bai lukautim laip bilong ol, tasol ol bai lusim planti samting bilong skin em ol i holim. Sampela yia i go pinis, Wastaua i tok: “Ol i lusim ol gaden na haus bilong ol, na ol i no go insait long haus bilong ol long kisim sampela kago. Ol i bilip tru olsem Jehova bai lukautim ol na helpim ol, olsem na ol i putim wok bilong lotuim Jehova i go pas long olgeta narapela samting i olsem bikpela samting” long ol.

8. Yumi inap kisim wanem bikpela skul long samting i kamap long ol Kristen long Judia long taim bilong ol aposel?

⁸ Yumi inap kisim wanem bikpela skul long ol samting i kamap long ol Kristen long Judia long taim bilong ol aposel? Dispela seim Wastaua i tok: ‘Sampela traim inap kamap bilong traim tingting bilong yumi long mani kago i bikpela samting tru long yumi, o pasin bilong God long kisim bek yumi olgeta i insait long lain bilong em i bikpela samting moa? Tru tumas, pasin bilong yumi long ranawe inap kamapim sampela hevi na yumi inap lus long sampela samting. Yumi mas redi long mekim ol samting yumi mas mekim, olsem ol manmeri long taim bilong ol aposel ol i bin mekim—ol i ranawe lusim Judia.’ *

9. Olsem wanem tok Pol i mekim long ol Hibru i ken strongim yu tu?

⁹ Olsem wanem? Yu inap piksaim hatwok em ol dispela Kristen i bungim taim ol i lusim olgeta samting bilong ol na kirapim gen nupela laip bilong ol? Ol i mas bilip na trastim Jehova olsem em bai lukautim ol long ol samting ol i nidim. Na tru tumas, i gat helpim i stap. Faivpela yia paslain long ol Rom i kam banisim Jerusalem, aposel Pol i givim sampela gutpela edvais long ol Hibru olsem: “Long sindaun bilong yupela, yupela i no ken bihainim pasin bilong laikim tumas mani. Yupela i mas ting olsem ol samting yupela i gat pinis em inap long yupela. Long wanem, God i tok: ‘Mi no inap tru long lusim yu, na mi no inap givim baksait long yu.’ Olsem na yumi ken strongim bel na tok: ‘Jehova em i helpim bilong mi; mi no inap pret. Ol man bai mekim wanem long mi?’” (Hib. 13:5, 6) So i klia tru olsem ol manmeri em ol i bihainim dispela tok bilong aposel Pol paslain long ol Rom i kam banisim Jerusalem, em i isi long ol i lain long nupela sindaun bilong ol long nupela ples ol i go stap long en. Ol i bilip tru olsem Jehova bai lukautim ol long ol samting ol i nidim. Ol tok bilong Pol i strongim yumi na helpim yumi long holim wankain bilip.

10. Pol “i save” long wanem samting na em i tokim yumi long dispela?

¹⁰ Pol i mekim wankain tok long Timoti, na ol dispela tok i kam long yumi tu. Em i tok: “Olsem na sapos yumi gat kaikai na laplap samting, orait yumi ken ting ol dispela samting em inap long yumi.” (1 Tim. 6:8) Yu ting dispela i makim olsem yumi no ken kisim ol gutpela kaikai, i gat naispela haus, o sampela taim baim ol nupela klos? Nogat. Dispela em i no mining bilong tok bilong Pol. Pol i tok yumi mas amamas long ol samting yumi gat pinis. (Fili. 4:12) Dispela em samting Pol “i save long en.” Nambawan samting yumi gat em pasin pren bilong yumi wantaim God, na i no ol samting bilong skin em yumi gat.—Hab. 3:17, 18.

11. Long ol tok Moses i mekim long lain Israel, yumi lainim wanem samting long pasin bilong amamas long ol samting yumi gat pinis?

¹¹ Ating tingting bilong yumi i no wankain long tingting bilong Jehova long ol samting yumi nidim. Lukim tok Moses i mekim long ol Israel bihain long ol i raun long ples drai nating inap 40 yia, em i tok: “Jehova, God bilong yupela, i bin blesim olgeta samting yupela i mekim. Em i bin lukautim yupela taim yupela i wokabaut long dispela bikpela ples nating. Na long dispela 40 yia, Jehova, God bilong yupela, i bin stap wantaim yupela na yupela i no bin sot long wanpela samting.” (Lo 2:7) Insait long dispela 40 yia, Jehova i givim mana long ol Israel i ken kaikai. Klos bilong ol—em ol klos ol i bin werim taim ol i lusim Isip—i no bruk. (Lo 8:3, 4) Maski sampela inap ting olsem ol dispela samting  em i no inap long ol, tasol Moses i kirapim ol Israel long tingim olsem ol i gat olgeta samting ol i nidim. Jehova bai amamas sapos yumi lain long holim tingting olsem ol samting yumi gat em inap long yumi, na amamas long ol liklik samting em i givim long yumi olsem blesing na yumi tenkyu long dispela.

12. Wanem samting i soim olsem Devit i bilip long Jehova na em i no bilip long em yet?

¹² Devit i save olsem Jehova i save stap gut long ol man i laikim em na em i save lukautim ol. Maski Devit inap lusim laip bilong em taim em i raitim tok bilong Buk Song 34, long ai bilong bilip Devit i lukim “ensel bilong Jehova” i “was raunim” em. (Sng. 34:7) Ating Devit i piksaim ensel bilong Jehova olsem wanpela soldia i wokim kem long ples pait, na oltaim em i was i stap long ol birua. Maski Devit em i hapman bilong pait na Jehova i promis long givim wok king long en, Devit i no bilip long save bilong em yet long yusim katapel long sutim ston, o yusim bainat long daunim ol birua bilong em. (1 Sml. 16:13; 24:12) Devit i trastim God na em i bilip tru olsem ensel bilong Jehova i save kisim bek ol man em ol i pret long em. Long nau, God i no inap wokim mirakel long lukautim yumi. Tasol yumi save tru olsem olgeta man em ol i trastim Jehova, ol bai kisim laip oltaim long bihain maski ol i lusim laip bilong ol long nau.

13. (a) Taim Gok Bilong Magok i kam pait long yumi, wai na bai i luk olsem bagarap bai painim yumi? (b) I gat wanem as na yumi no inap pret? (Lukim fran pes piksa.)

¹³ Liklik taim bihain, ol samting bai kamap na traim pasin bilong yumi long trastim Jehova long lukautim yumi. Taim Gok Bilong Magok, em ol kantri i bung wantaim, i kam pait long ol manmeri bilong God, bai i luk olsem bagarap bai painim yumi. Yumi mas bilip olsem Jehova bai lukautim yumi na em bai kisim bek yumi. Ol kantri bai lukim yumi olsem ol sipsip i no gat wasman bilong lukautim ol. (Ese. 38:10-12) Yumi bai no gat ol samting bilong pait na yumi no kisim trening bilong pait. Ol kantri bai lukim olsem em isi tru long daunim yumi. Ol bai no inap lukim samting yumi lukim long ai bilong bilip—em bikpela lain ensel i was raunim ol manmeri bilong God na ol i redi long sambai long yumi. Wai na ol kantri bai i no lukim ol? Bikos ol i no gat ai bilong bilip. Ol bai kirap nogut tru taim ol ami bilong heven i kam pait bilong helpim yumi!—Rev. 19:11, 14, 15.

14. Yumi ken mekim wanem nau bilong redi long ol samting bai kamap bihain?

¹⁴ Yumi ken mekim wanem nau bilong redi long ol samting bai kamap bihain? Yumi mas holim stretpela tingting long ol samting bilong skin yumi gat, na yumi mas tingim olsem wanpela taim bai kamap na yumi bai lusim ol samting yumi gat. Na tu, yumi mas amamas long ol samting yumi holim pinis na yumi ken amamas tru olsem yumi pas gut wantaim Jehova. Taim yumi save gut long God bilong yumi, yumi bai bilip tru olsem em i gat strong long lukautim yumi taim Gok Bilong Magok i kam pait long yumi.

15. Wanem ol samting i kamap long bipo na i helpim Devit long bilip tru olsem oltaim Jehova bai helpim em?

¹⁵ Tingim narapela samting tu i bin helpim Devit na dispela i ken redim yumi tu long ol hevi bai kamap bihain. Devit i tok: “Yupela i mas traim na lukim na bai yupela i save olsem Jehova i gutpela; man i go long em bilong em i ken i stap ples hait bilong em, dispela man i ken amamas.” (Sng. 34:8) Ol dispela tok i kamapim klia as na Devit i save olsem em i ken trastim Jehova olsem em bai lukautim em. Oltaim Devit i save wetim Jehova i helpim em, na oltaim  God i save helpim em. Taim Devit i yangpela mangi, em i go bungim dispela traipela man Filistia, em Goliat, na em i tokim dispela strongpela man bilong pait olsem: “Nau long dispela de tasol bai Jehova i givim yu long han bilong mi.” (1 Sml. 17:46) Bihain Devit i kamap wokman bilong King Sol na planti taim dispela king i traim long kilim em i dai. Tasol “Jehova i stap wantaim” Devit. (1 Sml. 18:12) Pastaim Devit i lukim Jehova i bin helpim em, olsem na em i bilip tru olsem Jehova bai helpim em long ol hevi i painim em long nau.

16. Long wanem ol rot yumi ken “traim” na lukim gutpela pasin bilong Jehova?

¹⁶ Long nau, sapos oltaim yumi bilip na wet long Jehova i helpim yumi, bihain bai yumi bilip tru long strong bilong Jehova long kisim bek yumi. Yumi mas bilip na wetim Jehova i helpim yumi taim yumi laik askim bos bilong yumi long kisim de-of bilong go long kibung o mekim sampela senis long sediul bilong yumi so yumi ken go long olgeta miting bilong kongrigesen na lusim bikpela haptaim moa long autim tok. Ating bos i no orait long ol dispela askim bilong yumi na em i pinisim yumi long wok. Olsem wanem? Yumi bilip tru olsem Jehova i no inap lusim yumi na oltaim em bai givim yumi ol samting yumi nidim? (Hib. 13:5) Planti bratasista i stap long fultaim sevis i ken stori gut long hau Jehova i bin helpim ol taim ol i nidim em tru. Jehova i save stap gut long yumi.

17. (a) Wanem yiateks bilong 2022? (b) Olsem wanem dispela yiateks i stret long yumi?

¹⁷ Jehova i stap long sait bilong yumi, olsem na i no gat as long yumi pret long ol samting bai kamap bihain. Oltaim God bilong yumi bai lukautim yumi taim yumi putim laik bilong em i stap namba 1 samting long laip bilong yumi. Bilong redim yumi nau long taim nogut bai painim yumi long bihain na long bilip olsem oltaim Jehova bai lukautim yumi, Gavening Bodi i makim Buk Song 34:10 olsem yiateks bilong 2022: “Ol man i wok long painim Jehova, ol bai i no sot long wanpela gutpela samting.”