1-3. Wanem sampela samting inap kamap na mekim lain bilong Jehova i aiwara?

 WANEM laspela taim yu bin krai? Wan wan taim yumi save amamas, olsem na yumi save aiwara. Tasol planti taim yumi save krai bikos yumi pilim bikpela bel hevi tru. Olsem, yumi inap krai taim wanpela yumi laikim tru i dai. Lorilei, em wanpela sista long Amerika, em i tok: “Sampela taim mi save pilim bikpela bel hevi tru taim mi tingim pikinini meri bilong mi i bin dai, na i no gat wanpela samting inap mekim gut bel bilong mi. Long ol dispela taim mi save tingting, bel bilong mi bai kamap strong gen o nogat?” *

² Ating ol narapela samting inap mekim na yumi aiwara. Hiromi, em wanpela painia long Japan, em i tok: “Sampela taim mi save bel hevi bikos ol man mi autim tok long ol, ol i no save amamas long putim yau long tok bilong Baibel. Sampela taim mi save aiwara wantaim na beten askim Jehova long helpim mi long bungim wanpela man o meri husat i wok long painim tok i tru.”

³ Yu save pilim wankain olsem ol dispela bratasista? Yes, planti bilong yumi i pilim olsem. (1 Pita 5:9) Yumi laik “amamas na lotu long Jehova,” tasol yumi inap aiwara taim yumi mekim wok bilong God bikos yumi krai sori long wanpela yumi laikim tru i dai, yumi bel hevi, o wanpela bikpela hevi i kamap na i traim pasin bilong yumi long stap gut long God. (Sng. 6:6; 100:2) Yumi ken mekim wanem taim yumi pilim olsem?

4. Yumi bai stori long wanem samting long dispela atikol?

⁴ Yumi ken kisim skul long eksampel bilong Jisas. Sampela taim, ol samting i kamap i mekim em i bel hevi tru, olsem na em i “aiwara.” (Jon 11:35; Luk 19:41; 22:44; Hib. 5:7) Yumi ken stori long ol dispela samting. Taim yumi mekim olsem, yumi bai  lukim skul yumi ken lainim. Na tu, yumi bai stori long ol rot we yumi ken karim ol hevi we i save mekim na yumi aiwara.

5. Yumi kisim wanem skul long Jisas long Jon 11:32-36?

⁵ Long winta bilong yia 32 C.E., gutpela pren bilong Jisas, Lasarus, i kisim sik na em i dai. (Jon 11:3, 14) Lasarus i gat tupela sista, em Maria na Marta, na Jisas i laikim tru dispela famili. Dispela tupela meri i bel hevi tru taim brata bilong ol em ol i save laikim tumas i dai. Bihain long Lasarus i dai, Jisas i go long Betani, em hap we Maria na Marta i stap long en. Taim Marta i harim olsem Jisas i kam, hariap tru em i go bilong bungim em. Piksaim bikpela bel hevi em i pilim taim em i tok: “Bikpela, sapos yu bin stap long hia, brata bilong mi i no inap i dai.” (Jon 11:21) Bihain liklik, taim Jisas i lukim Maria na ol narapela i krai, “aiwara bilong Jisas i pundaun.”—Ritim Jon 11:32-36.

6. Wai na Jisas i krai long dispela taim?

⁶ Wai na Jisas i krai long dispela taim? Insight on the Scriptures i bekim dispela askim olsem: “Indai bilong pren bilong em Lasarus, na bel hevi dispela i bin kamapim long ol susa bilong Lasarus, dispela i bin mekim na ‘bel bilong Jisas i sori tru na em i krai.’” * Ating Jisas i tingim bikpela pen em gutpela pren bilong em Lasarus i bin pilim taim em i sik nogut tru, na em i piksaim long tingting Lasarus i pilim olsem wanem taim em i luksave olsem klostu nau em bai dai. Na tu, Jisas i aiwara taim em i lukim Maria na Marta i krai nogut tru long brata bilong ol i dai. Sapos wanpela gutpela pren bilong yu o wanpela long famili bilong yu i dai, ating yu tu i bin pilim wankain bikpela bel sori olsem. Tingim 3-pela samting yu ken lainim long dispela stori.

7. Yumi lainim wanem samting long Jehova taim Jisas i krai long ol pren bilong em?

⁷ Jehova i kliagut long samting yu pilim. Jisas “em i piksa tru” bilong Papa bilong em. (Hib. 1:3) Taim Jisas i krai, em i kamapim klia samting Papa bilong em i pilim taim wanpela yumi laikim tru i dai. (Jon 14:9) Sapos yu karim hevi  long wanpela yu laikim tru i dai, yu ken save tru olsem Jehova i luksave long bel sori bilong yu, na tu, em i pilim tru long bel samting yu pilim. Em i save olsem yu pilim bikpela bel wari na em i laik mekim gut bel bilong yu.—Sng. 34:18; 147:3.

8. Wai na yumi ken bilip tru olsem Jisas bai kirapim bek ol lain em yumi laikim tru em ol i dai pinis?

⁸ Jisas i laik kirapim bek ol lain em yu laikim tru em ol i dai pinis. Paslain liklik long Jisas i krai, em i tokim Marta olsem: “Brata bilong yu bai kirap bek.” Marta i bilipim tok bilong Jisas. (Jon 11:23-27) Olsem wanpela gutpela wokmeri bilong Jehova, Marta i save long stori olsem profet Elaija na Elisa i bin kirapim bek sampela manmeri long bipo. (1 Kin. 17:17-24; 2 Kin. 4:32-37) Na tu, ating em i harim stori long Jisas i bin kirapim bek sampela manmeri. (Luk 7:11-15; 8:41, 42, 49-56) Yu tu ken bilip tru olsem yu bai lukim gen ol lain em yu laikim tru em ol i dai pinis. Jisas i krai taim em i mekim gut bel bilong ol pren bilong em husat i krai sori, na dispela i kamapim klia olsem em i gat laik tru long kirapim bek ol man i dai pinis!

9. Olsem Jisas, hau yu ken helpim ol lain i krai sori? Stori long wanpela eksampel.

⁹ Yu ken helpim ol lain i krai sori. Jisas i krai wantaim Marta na Maria, na tu, em i putim yau na mekim ol tok bilong strongim ol. Yumi ken mekim wankain long ol lain em ol i krai sori. Dan, em wanpela elda long Australia, em i tok: “Bihain long meri bilong mi i dai, mi nidim helpim. Sampela marit i redi long helpim mi, na long de na long nait ol i save kam bilong putim yau long mi. Ol i save larim mi krai sori, na ol i no sem taim mi krai long ai bilong ol. Na tu, ol i save redi long helpim mi long ol narapela samting olsem wasim kar bilong mi, go baim ol kaikai long stua, na kukim kaikai bilong mi taim mi yet i hatwok long mekim ol dispela samting. Na planti taim ol i save beten wantaim mi. Ol i kamapim klia olsem ol i pren tru na ol i stap ‘olsem ol brata long taim bilong hevi.’”—Prov. 17:17.

10. Luk 19:36-40 i stori long wanem samting?

¹⁰ Long Nisan 9, 33 C.E., Jisas i go kamap long Jerusalem. Taim em i kamap long taun, bikpela lain manmeri i bung na ol i lainim ol saket bilong ol long rot bilong kisim em olsem King bilong ol. Dispela em i taim bilong amamas. (Ritim Luk 19:36-40.) Olsem na ating ol disaipel bilong em i no bin ekspektim samting i kamap bihain. “Taim [Jisas] i kamap klostu, em i lukim taun na em i krai long en.” Jisas i krai na em i tok profet long samting nogut bai painim ol manmeri bilong Jerusalem.—Luk 19:41-44.

11. Wai na Jisas i krai long ol manmeri bilong Jerusalem?

¹¹ Jisas i bel hevi tru bikos em i save olsem maski ol lain Juda i amamas long em, planti bilong ol i bin soim pinis olsem ol i no inap putim yau long tok bilong Kingdom. Em as na ol birua bai bagarapim Jerusalem, na ol manmeri em ol i abrusim bagarap, ol birua bai kisim ol i go kalabus. (Luk 21:20-24) Sori tru, olsem Jisas i bin tok, planti manmeri i bin sakim em. Ol manmeri long hap bilong yu i save mekim wanem long tok bilong Kingdom yu autim? Sapos sampela lain tasol i putim yau long tok yu autim, orait yu ken lainim wanem samting long aiwara bilong Jisas? Skelim 3-pela moa skul yumi ken kisim.

12. Yumi ken lainim wanem samting long Jehova taim Jisas i krai long ol manmeri?

¹² Jehova i save tingim tru ol manmeri. Jisas i aiwara na dispela i kamapim klia long yumi olsem Jehova i save tingim tru ol manmeri. Baibel i tok: “Em i no laik bai wanpela i kisim bagarap. Em i laik bai olgeta i tanim bel.” (2 Pita 3:9) Long nau, yumi soim olsem yumi laikim ol arapela taim yumi givim taim na strong bilong  yumi yet na redi long skulim ol long gutnius bilong Kingdom.—Mat. 22:39.

13-14. (a) Olsem wanem Jisas i soim olsem em i sori long ol manmeri? (b) Hau na yumi ken bihainim pasin bilong em?

¹³ Jisas i givim bel tru long autim tok. Em i soim olsem em i laikim ol manmeri taim em i wok yet long autim tok taim rot i op. (Luk 19:47, 48) Wanem samting i kirapim em long mekim olsem? Jisas i sori tru long ol. Sampela taim, planti manmeri tru i laik harim tok bilong Jisas, olsem na em na ol disaipel bilong em “i no inap kaikai.” (Mak 3:20) Na tu, em i redi long autim tok long nait—wanpela taim em i autim tok long wanpela man i redi long putim yau. (Jon 3:1, 2) Planti manmeri em pastaim ol i bin harim tok bilong Jisas, ol i no kamap ol disaipel bilong em. Tasol olgeta man husat i bin harim tok bilong em, em i givim bel tru long autim tok long ol. Long nau, yumi laik autim gutnius long olgeta kain manmeri taim rot i op long mekim olsem. (Apo. 10:42) Bilong inapim dispela wok, ating yumi mas mekim sampela senis long wei bilong yumi long autim tok.

¹⁴ Redi long mekim senis long wei bilong yu long autim tok. Sapos yumi no senisim ol taim we yumi save autim tok, ating yumi no inap bungim ol man em ol i gat laik long harim gutnius. Wanpela painia nem bilong em Matilda, em i tok: “Mi na man bilong mi i traim long autim tok long ol manmeri long kain kain taim. Long bikmoning, mipela i save autim tok long ol bisnis teritori. Long namel bilong de taim ol manmeri i bisi long mekim ol wok bilong ol, mipela i save yusim ol litresa kat. Long apinun, mipela i save autim tok long ol haus na mipela i bungim planti manmeri long haus bilong ol.” Yumi no ken redi tasol long autim tok long ol taim we i stret long yumi, nogat, yumi mas redi long mekim senis long sediul bilong yumi na autim tok long ol taim we yumi inap bungim planti manmeri moa. Sapos yumi mekim olsem, yumi ken save tru olsem Jehova bai amamas long yumi.

15. Olsem Luk 22:39-44 i kamapim, wanem samting i kamap long laspela nait bilong Jisas?

¹⁵ Long nait bilong Nisan 14, 33 C.E., Jisas i go long gaden Getsemani. Long dispela hap, em i kamapim bel hevi bilong em long Jehova.  (Ritim Luk 22:39-44.) Em long dispela taim, Jisas i “singaut strong na krai na aiwara i pundaun taim em i beten strong.” (Hib. 5:7) Jisas i beten long wanem samting long dispela laspela nait paslain long em i dai? Em i beten long em i ken kisim strong long stap gut long Jehova na mekim laik bilong Em. Jehova i harim bel hevi bilong Pikinini bilong em taim em i beten strong long Em na em i salim wanpela ensel i go bilong strongim Jisas.

16. Wai na Jisas i bel hevi tru taim em i beten long gaden Getsemani?

¹⁶ Jisas i krai taim em i beten long gaden Getsemani bikos em i bel hevi tru long tingim olsem ol manmeri bai ting em i no rispek long nem bilong God. Na tu, em i save long bikpela wok em bai mekim—em i mas stretim bek gutnem bilong Papa bilong em. Sapos yu wok long feisim wanpela bikpela hevi tru we i traim pasin bilong yu long stap gut long Jehova, yu ken lainim wanem samting long aiwara bilong Jisas? Skelim 3-pela moa samting yumi ken lainim.

17. Yu inap lainim wanem samting long Jehova taim em i bekim ol beten bilong Jisas?

¹⁷ Jehova i save harim ol beten bilong yu. Jehova i bin harim ol beten em Jisas i mekim we em i pilim tru long bel. Wai? Bikos nambawan samting long Jisas em long stap gut long Papa bilong em na long stretim bek gutnem bilong Em. Sapos nambawan samting long yumi em long stap gut long Jehova na long stretim bek gutnem bilong em, orait Jehova bai harim ol beten bilong yumi na helpim yumi.—Sng. 145:18, 19.

18. Long wanem ol rot Jisas i olsem wanpela pren i save pilim tru hevi bilong yumi?

¹⁸ Jisas i kliagut long ol samting yu pilim long bel. Taim yumi bel hevi, yumi save amamas tru taim wanpela pren i pilim tru hevi bilong yumi, moa yet em wanpela pren husat i bin bungim wankain hevi olsem yumi. Jisas em i dispela pren. Em i save hau yumi ol man i save pilim taim yumi no gat strong na yumi nidim helpim. Em i save long ol samting yumi no gat strong long en, na em bai mekim ol samting na bai yumi ken kisim helpim yumi nidim “long taim stret.” (Hib. 4:15, 16) Wankain olsem Jisas i kisim helpim long wanpela ensel long gaden Getsemani, yumi tu i mas redi long kisim helpim em Jehova i givim—ating em long  rot bilong wanpela pablikesen, wanpela vidio, wanpela tok, o visit bilong wanpela elda o pren husat i stap strong long bilip.

19. Hau yu ken kisim strong taim yu feisim wanpela hevi i traim pasin bilong yu long stap gut long God? Stori long eksampel.

¹⁹ Jehova bai givim yu “dispela bel isi bilong God.” Olsem wanem Jehova bai strongim yumi? Taim yumi beten, yumi bai kisim “dispela bel isi bilong God i winim tru tingting bilong man.” (Fili. 4:6, 7) Bel isi em Jehova i givim yumi i save mekim isi bel bilong yumi na helpim yumi long holim stretpela tingting. Lukim hau dispela i kamap tru long wanpela sista em nem bilong em Luz. Em i tok: “Mi save pilim olsem mi stap wanpis. Sampela taim, ol dispela tingting mi gat i save mekim na mi ting olsem Jehova i no laikim mi. Tasol taim mi pilim olsem, hariap tru mi save tokim Jehova long hau mi pilim. Beten i save mekim gut bel bilong mi.” Olsem ekspiriens bilong em i soim, yumi ken kisim bel isi long rot bilong beten.

20. Yumi kisim wanem skul long aiwara bilong Jisas?

²⁰ Yumi lainim planti samting long aiwara bilong Jisas na dispela i mekim gut bel bilong yumi! Yumi kisim skul olsem yumi mas helpim ol pren bilong yumi em ol i krai sori, na yumi mas trastim Jehova na Jisas olsem ol bai helpim yumi taim wanpela yumi laikim tru i dai. Na tu, yumi tingting strong long mekim pasin sori long ol man taim yumi autim tok na skulim ol bikos Jehova God na Jisas Krais i bin mekim pasin sori long yumi. Na yumi kisim bel isi taim yumi save olsem Jehova na Pikinini bilong em i kliagut long samting yumi pilim, na ol i sori long yumi long ol samting yumi no gat strong long en, na ol i laik helpim yumi long sanap strong. Yumi laik wok yet long bihainim ol samting yumi lainim i go inap long dispela taim we Jehova bai inapim dispela naispela tok promis bilong em olsem: “Em bai mekim drai aiwara i stap long ai bilong” yumi!—Rev. 21:4.