1. Hau yumi ken lusim haptaim wantaim Jehova?

 YUMI save amamas long lusim haptaim long stap wantaim ol manmeri yumi laikim tru. Ol marit i pas gut wantaim, ol i save amamas long lusim haptaim long stap wantaim. Ol yangpela i save amamas long lusim haptaim long stap wantaim ol gutpela pren bilong ol. Na yumi olgeta i save amamas long lusim haptaim long stap wantaim ol wanbilip bilong yumi. Tasol bikpela samting moa, yumi amamas long lusim haptaim wantaim God bilong yumi. Yumi ken mekim olsem long rot bilong beten long em, ritim Tok bilong em, na tingim tingim long bel ol samting em i tingting pinis long mekim na ol gutpela pasin bilong em. Tru tumas, haptaim yumi lusim wantaim Jehova em i dia tumas!—Sng. 139:17.

2. Yumi bungim wanem hatwok?

² Maski yumi amamas long lusim haptaim wantaim Jehova, i gat wanpela hatwok bilong en. Long olgeta wan wan de, yumi save bisi tru, olsem na dispela inap mekim na i hatwok long yumi makim gut taim bilong mekim ol samting bilong bilip. Olsem, wok mani, wok bilong lukautim famili, na ol narapela wok yumi mekim inap kisim bikpela haptaim bilong yumi na yumi inap pilim olsem yumi bisi tru na yumi no gat taim long beten, stadi, o tingim tingim ol tok bilong Baibel.

3. Wanem narapela samting inap pulim bikpela haptaim bilong yumi?

³ I gat narapela samting tu we inap pulim bikpela haptaim bilong yumi. Sapos yumi no was gut, yumi inap mekim ol samting we i no gat rong long mekim, tasol dispela inap pulim bikpela haptaim bilong yumi, em haptaim we yumi inap yusim long i go klostu moa long Jehova. Olsem, tingim haptaim yumi lusim long kisim amamas. Yumi olgeta i save kisim gutpela helpim taim yumi  lusim sampela haptaim long kisim amamas. Tasol ol gutpela amamas inap kisim bikpela haptaim bilong yumi, na nau yumi no gat taim long mekim ol samting bilong bilip. Yumi mas putim amamas long ples stret bilong en. Yumi no ken putim amamas i stap olsem nambawan bikpela samting.—Prov. 25:27; 1 Tim. 4:8.

4. Nau bai yumi skelim wanem ol samting?

⁴ Long dispela atikol, yumi bai skelim as na yumi mas makim taim bilong mekim ol bikpela samting. Na tu, yumi bai skelim hau yumi ken lusim haptaim wantaim Jehova na hau yumi ken kisim helpim taim yumi yusim gut taim bilong yumi.

5. Olsem wanem tok i stap long Efesus 5:15-17 inap helpim wanpela yangpela long mekim bes disisen long laip bilong em?

⁵ Makim gutpela rot bilong bihainim long laip bilong yu. Planti taim ol yangpela i save tingting planti long wanem bes samting ol i ken mekim long laip bilong ol. Wanpela samting em olsem, ol tisa na ol wanfamili em ol i no wanbilip inap kirapim ol long go long bikpela skul na kisim ol wok mani i gat bikpela pe. Taim ol i bihainim dispela rot, em inap pulim bikpela haptaim bilong ol. Narapela samting em olsem, ol papamama na ol pren insait long kongrigesen inap kirapim ol yangpela long yusim laip bilong ol long mekim wok bilong Jehova. Wanem samting inap helpim wanpela yangpela husat i laikim Jehova long mekim bes disisen? Em bai kisim helpim taim em i ritim Efesus 5:15-17 na tingim tingim long bel ol tok bilong en. (Ritim.) Bihain long wanpela yangpela i ritim ol dispela ves, em inap askim em yet olsem: Wanem “laik bilong Jehova”? Wanem ol disisen mi mekim inap amamasim em? Wanem disisen mi mekim bai helpim mi long “yusim gut taim” bilong mi? Tingim, “nau em i taim nogut” na dispela graun em Satan i bosim klostu nau em bai bagarap. Yumi bihainim savetingting taim yumi yusim laip bilong yumi long mekim ol samting i amamasim Jehova.

6. Maria i mekim wanem disisen, na wai na dispela em i gutpela disisen?

⁶ Tingim ol bikpela samting. Sampela taim, bilong yusim gut taim bilong yumi, yumi mas makim wanpela bilong 2-pela samting em yumi save mekim maski i no gat rong long mekim 2-pela wantaim. Yumi lukim dispela poin taim yumi skelim samting i kamap taim Jisas i go long haus bilong Maria na Marta. Marta i amamas tru olsem Jisas i kam long haus bilong em, olsem na em i redim bikpela kaikai. Long wankain taim, Maria em sista bilong Marta, i amamas long Jisas i kam na em i sindaun klostu long Bikpela bilong em na em i putim gut yau long ol tok em i skulim ol long en. Samting Marta i mekim i no gat rong long en, tasol Maria “i bin makim nambawan samting.” (Luk 10:38-42, ftn.) Bihain, ating Maria i lusim tingting long wanem kaikai ol i bin kaikai long dispela taim, tasol yumi ken save tru olsem em i no lusim tingting long ol tok em i bin kisim skul long en long Jisas. Wankain olsem Maria i bin amamas long lusim haptaim wantaim Jisas, yumi tu i amamas long lusim haptaim wantaim Jehova. Hau yumi ken yusim gut dispela haptaim?

7. Wai na em i bikpela samting long beten, stadi, na tingim tingim ol tok long bel?

⁷ Yumi mas tingim olsem pasin bilong beten, stadi, na tingim tingim ol tok long bel em ol hap wok lotu bilong yumi. Taim yumi beten, yumi wok long toktok wantaim Papa bilong yumi long heven, husat i laikim tru yumi. (Sng. 5:7) Taim yumi stadi long Baibel, yumi wok long “save gut long God,” em i As bilong olgeta savetingting. (Prov. 2:1-5) Taim yumi tingim tingim long bel  ol samting yumi lainim long Jehova, yumi tingim ol naispela pasin bilong em na yumi tingim ol naispela samting em i laik mekim bilong helpim yumi na olgeta manmeri. Dispela em i bes wei long yusim gut taim bilong yumi. Tasol wanem samting inap helpim yumi long mekim olsem?

8. Yumi ken kisim wanem skul long hau Jisas i yusim gut taim bilong em long ples nating?

⁸ Sapos inap, painim wanpela ples i no gat nois. Tingim eksampel bilong Jisas. Paslain long Jisas i kirapim wok autim tok bilong em, em i stap long ples nating inap 40 de. (Luk 4:1, 2) Long dispela ples i no gat nois, Jisas i gat rot long beten long Jehova na tingim tingim samting Papa bilong em i laik em i mas mekim. Tru tumas, taim Jisas i mekim olsem, dispela i redim em long ol traim em klostu nau bai painim em. Olsem wanem eksampel bilong Jisas inap helpim yu? Sapos yu insait long wanpela bikpela famili, ating bai i no gat rot long painim wanpela ples i no gat nois long haus bilong yu. Sapos olsem, yu ken painim wanpela ples i no gat nois ausait long haus. Em samting Julie i save mekim taim em i laik lusim haptaim long beten long Jehova. Em na man bilong em i stap long Frans. Ol i stap long wanpela liklik apatmen na i hatwok long em i stap em yet na i no gat nois. Julie i tok: “Olsem na long olgeta de, mi save go wokabaut long pak. Long hap, mi yet i ken stap na tingim gut samting mi laik mekim na toktok long Jehova.”

9. Maski Jisas i bisi tru, hau em i soim olsem em i tingim tru pasin pren bilong em wantaim Jehova?

⁹ Taim Jisas i stap long graun, em i bisi tru. Long wok autim tok bilong em hia long graun, bikpela lain manmeri i save bihainim em long olgeta hap em i go long en, olgeta i laik stap wantaim em. Wanpela taim, “olgeta manmeri bilong taun i bung stret long dua bilong haus” bilong lukim em. Maski i olsem, Jisas i makim taim bilong strongim pasin pren bilong em wantaim Jehova. Long bikmoning paslain long san i kirap, em i painim “wanpela hap i no gat man” we em inap lusim haptaim long toktok wantaim Papa bilong em.—Mak 1:32-35.

10-11. (a) Olsem Matyu 26:40, 41 i kamapim, long gaden Getsemani Jisas i tokim ol disaipel bilong em long mekim wanem? (b) Tasol ol disaipel i mekim wanem?

¹⁰ Long laspela nait bilong Jisas long graun na klostu nau wok bilong em bai pinis, long dispela taim gen em i painim wanpela ples i no gat nois na bai em i ken tingim tingim ol samting na beten. Em i lukim olsem naispela ples long mekim olsem em long gaden Getsemani. (Mat. 26:36) Long dispela taim, Jisas i tokim ol disaipel bilong em long sampela bikpela samting long pasin bilong beten.

¹¹ Skelim wanem samting i kamap. Taim ol i kamap long gaden Getsemani, em leit pinis, ating em long biknait tru. Jisas i tokim ol aposel bilong em long “was i stap” na em i go bilong beten. (Mat. 26:37-39) Tasol taim em i wok long  beten, ol i slip pinis. Taim Jisas i kam bek na lukim ol i slip i stap, em i tokim ol gen long ol i mas “was i stap na beten oltaim.” (Ritim Matyu 26:40, 41.) Em i luksave olsem ol i pilim bikpela presa na ol i taiet nogut tru. Long pasin sori, Jisas i tokaut olsem “bodi i no gat strong.” Maski i olsem, 2-pela taim gen Jisas i go beten, na taim em i kam bek em i luksave olsem ol disaipel bilong em i slip i stap na ol i no beten.—Mat. 26:42-45.

12. Yumi ken mekim wanem sapos sampela taim yumi pilim bikpela presa o yumi pilim taiet long beten?

¹² Makim gut taim. Sampela taim yumi inap pilim bikpela presa o yumi pilim taiet na yumi no laik beten. Sapos dispela samting i kamap long yu, yu no stap wanpis. Yu ken mekim wanem? Sampela em oltaim ol i save beten long Jehova long pinis bilong de, ol i luksave olsem i gutpela long beten long apinun taim ol i no pilim taiet tumas. Ol narapela i pilim olsem ol i ken putim tingting olgeta i go long beten taim ol i sindaun o brukim skru na beten. Tasol olsem wanem sapos yu tingting planti o yu bel hevi na yu hatwok long beten? Tokim Jehova long hau yu pilim. Yu ken bilip tru olsem Papa bilong yumi husat i gat pasin marimari i kliagut long samting yu pilim.—Sng. 139:4.

13. Olsem wanem ol elektronik divais inap pulim haptaim yumi laik lusim wantaim Jehova?

¹³ Sakim ol samting we inap pulim nabaut tingting taim yu stadi. Beten em rot yumi ken strongim pasin pren bilong yumi wantaim Jehova, na yumi ken mekim narapela samting tu. Taim yumi stadi long Baibel na go oltaim long ol miting bilong kongrigesen, dispela inap helpim yumi long go klostu moa long God. Yu ken mekim wanem na bai yu ken yusim gut taim yu makim bilong mekim stadi na taim yu makim bilong go long miting? Askim yu yet, ‘Wanem samting i save pulim tingting bilong mi taim mi stap long miting o taim mi laik stadi?’ Yu ting em pasin bilong kisim ol fon kol, ol e-meil, o ol teks mesis long smat fon o long ol narapela elektronik divais bilong yu? Long nau, planti bilion manmeri i gat ol dispela tul. Sampela wok painimaut i tok olsem sapos yumi putim fon klostu long yumi taim yumi laik mekim wanpela samting, dispela inap pulim nabaut tingting bilong yumi na yumi no putim gut tingting long wanpela samting. Wanpela saveman i tok: “Dispela bai mekim na bai yu no inap putim gut tingting long samting yu laik mekim. Tingting bilong yu i stap long narapela hap.” Paslain long ol kibung i kirap, planti taim brata i save toksave long  yumi long ofim ol elektronik divais bilong yumi so yumi no ken distebim ol narapela. Yu ting yumi ken mekim wankain taim yumi yet i stap so fon o teblet samting bilong yumi i no ken distebim yumi taim yumi lusim haptaim wantaim Jehova?

14. Olsem Filipai 4:6, 7 i kamapim, hau Jehova bai helpim yumi long putim tingting olgeta long wanpela samting?

¹⁴ Askim Jehova long helpim yu long putim tingting olgeta long wanpela samting. Taim yu luksave olsem tingting bilong yu i wokabaut taim yu mekim pesenel stadi bilong yu yet o long taim bilong miting, askim Jehova long helpim yu. Sapos yu wari o tingting planti, ating em bai hatwok long yu daunim dispela bel hevi na putim tingting long ol samting bilong bilip, tasol em i bikpela samting long yu mas mekim olsem. Beten askim God long givim yu dispela bel isi long lukautim bel bilong yu, na tu, “tingting bilong [yu].”—Ritim Filipai 4:6, 7.

15. Wanem wanpela helpim yu inap kisim taim yu lusim haptaim wantaim Jehova?

¹⁵ Sapos yu lusim haptaim long toktok wantaim Jehova, putim yau long em, na oltaim tingim em, dispela bai helpim yu tru. Hau? Namba 1, yu bai mekim ol gutpela disisen. Baibel i tokim yumi olsem “man i wokabaut wantaim ol man i gat savetingting, em bai gat savetingting.” (Prov. 13:20) So taim yu lusim haptaim wantaim Jehova, em As bilong savetingting, yu bai i gat savetingting. Yu bai kliagut hau long amamasim em na hau long sakim ol disisen we inap mekim em i bel hevi.

16. Olsem wanem pasin bilong lusim haptaim wantaim Jehova inap mekim yu kamap gutpela tisa?

¹⁶ Namba 2, yu bai kamap gutpela tisa. Taim yumi stadi long Baibel wantaim wanpela, wanpela bilong ol bikpela mak yumi laik winim em long helpim Baibel sumatin long go klostu moa long Jehova. Taim yumi toktok wantaim Papa bilong yumi long heven long olgeta taim, pasin bilong yumi long laikim em bai kamap strong moa na yumi bai save gut moa long hau long skulim sumatin bilong yumi long laikim em. Dispela i kamap tru long Jisas. Em i stori long ol disaipel bilong em olsem Papa bilong em i gat gutpela pasin laikim, na dispela i helpim ol disaipel long laikim Jehova tu.—Jon 17:25, 26.

17. Wai na pasin bilong beten na stadi i helpim yumi long strongim bilip bilong yumi?

¹⁷ Namba 3, bilip bilong yu bai kamap strong moa. Skelim wanem samting i save kamap taim yu askim God long stiaim yu, mekim isi bel bilong yu, na sapotim yu. Long olgeta wan wan taim Jehova i bekim ol beten bilong yu, bilip bilong yu i kamap strong moa. (1 Jon 5:15) Wanem narapela samting i ken helpim yu long strongim bilip bilong yu? Pesenel stadi. Tingim, “ol man i harim tok pastaim na bihain ol i save bilip.” (Rom 10:17) Tasol bilong kisim  strongpela bilip, yumi mas kisim save, na tu, mekim sampela samting moa. Wanem narapela samting yumi mas mekim?

18. Wai na yumi mas tingim tingim long bel ol samting God i mekim? Stori long dispela.

¹⁸ Yumi mas tingim tingim long bel ol samting yumi wok long lainim. Skelim ekspiriens bilong man bilong raitim Buk Song 77. Em i bel hevi tru bikos em i pilim olsem Jehova i no orait moa long em na long ol wanlain Israel. Ol dispela samting em i tingting planti long en i mekim na em i no slip long nait. (Ves 2-8) Em i mekim wanem? Em i tokim Jehova olsem: “Mi bai tingim tingim long bel olgeta samting yu bin mekim na mi bai tingim tingim ol wok yu bin mekim.” (Ves 12) Dispela man bilong raitim Buk Song em i save long ol samting Jehova i bin mekim long bipo bilong helpim lain bilong Em, tasol em i tingting planti olsem: “Ating God i lusim tingting long mekim gutpela pasin? Na ating belhat bilong em i pasim pasin marimari bilong em, a?” (Ves 9) Em i tingim tingim long bel ol wok bilong Jehova na hau Jehova i bin mekim pasin marimari na pasin sori long ol long bipo. (Ves 11) Wanem samting i kamap? Em i bilip tru olsem Jehova i no inap lusim lain bilong em. (Ves 15) Wankain olsem, bilip bilong yu bai kamap strong moa taim yu tingim tingim long bel ol samting Jehova i bin mekim pinis bilong helpim lain bilong em na ol samting em i bin mekim bilong helpim yu.

19. Taim yumi lusim haptaim wantaim Jehova, olsem wanem dispela inap helpim yumi?

¹⁹ Namba 4, na bikpela samting moa, pasin laikim bilong yu long Jehova bai kamap strong moa. Pasin laikim i winim olgeta narapela pasin, na em bai kirapim yu long bihainim tok bilong Jehova, redi long lusim sampela samting na bai yu ken amamasim em, na long sanap strong long olgeta kain traim i painim yu. (Mat. 22:37-39; 1 Kor. 13:4, 7; 1 Jon 5:3) Nambawan gutpela samting yu inap kisim em long pas gut wantaim Jehova!—Sng. 63:1-8.

20. Yu ken mekim wanem na bai yu gat taim long beten, stadi, na tingim tingim ol tok long bel?

²⁰ Yu mas tingim olsem pasin bilong beten, stadi, na tingim tingim ol tok long bel em ol hap wok lotu bilong yumi. Olsem Jisas, painim ol hap i no gat nois na bai yu inap lusim haptaim wantaim Jehova. Rausim ol samting we inap pulim nabaut tingting bilong yu. Askim Jehova long helpim yu long putim tingting olgeta taim yu laik insait long mekim ol samting bilong bilip. Sapos yu yusim gut taim bilong yu long nau, Jehova bai givim yu gutpela pe tru em laip oltaim long nupela taim Em bai kamapim.—Mak 4:24.