1-2. Wai na yumi save mekim Memorial long olgeta yia?

 KLOSTU 2,000 yia i go pinis, Jisas i bin givim laip bilong em bilong baim bek yumi, na em i opim rot long yumi inap kisim laip oltaim. Long nait paslain long Jisas i dai, em i tokim ol disaipel bilong em long tingim dispela pasin laikim em i mekim long rot bilong wanpela bung i gat bret na wain long en.​—1 Kor. 11:23-26.

² Yumi bihainim tok bilong Jisas bikos yumi laikim em tru. (Jon 14:15) Long olgeta yia long taim bilong Memorial, yumi save soim tenkyu bilong yumi long rot bilong lusim haptaim long beten na tingim tingim long bel samting em dai bilong Jisas i mekim long yumi. Yumi amamas long lusim bikpela haptaim long autim tok na kirapim planti manmeri moa long kam joinim yumi long dispela spesel bung. Tru tumas, yumi tingting strong olsem yumi no ken larim wanpela samting i pasim yumi long kam long Memorial.

3. Yumi bai stori long wanem samting long dispela atikol?

³ Long dispela atikol yumi bai stori long 3-pela samting em lain bilong Jehova i mekim bilong daunim ol hatwok bambai ol i ken bung bilong tingim dai bilong Jisas: (1) Bihainim wei bilong Jisas long mekim Memorial, (2) invaitim ol narapela i kam long Memorial, na (3) mekim Memorial maski i gat ol hatwok i stap.

4. (a) Long taim bilong Memorial, tok i kamap i save stori long wanem ol bikpela tok i tru? (b) Wai na em i bikpela samting long yumi mas tingim gut ol dispela tok i tru? (Luk 22:19, 20)

⁴ Long olgeta yia long taim bilong Memorial, yumi save harim  wanpela tok bilong Baibel we i save givim klia bekim bilong planti askim. Yumi kisim save long wai na yumi ol man i nidim pe bilong baim bek yumi, na hau dai bilong wanpela man inap karamapim sin bilong planti manmeri. Yumi kisim save gen long bret na wain i makim wanem samting na wanem lain tasol i ken kisim. (Ritim Luk 22:19, 20.) Na yumi save tingim tingim long bel ol gutpela blesing i wetim ol manmeri husat bai kisim laip oltaim long graun. (Ais. 35:5, 6; 65:17, 21-23) Em i bikpela samting long yumi mas tingim gut ol dispela tok i tru. Bikos planti bilion manmeri i no kliagut long ol dispela tok i tru, na ol i no tingim olsem sakrifais bilong Jisas em samting i dia tumas. Na tu, ol i no save mekim Memorial bilong Jisas long wankain wei em Jisas i bin mekim long bipo. Wai na i olsem?

5. Bihain long planti aposel i dai pinis, yu ting ol man i bihainim yet wei bilong Jisas long mekim Memorial?

⁵ Bihain tasol long planti disaipel bilong Jisas i dai pinis, ol Kristen giaman i kam insait long kongrigesen. (Mat. 13:24-27, 37-39) Ol i mekim “ol tok kranki bilong pulim ol disaipel i go bihainim ol.” (Apo. 20:29, 30) Wanpela bilong “ol tok kranki” em ol dispela Kristen giaman i skulim ol man long en em ol i tok Jisas i no bin givim “ofa wanpela taim tasol bilong karim ol sin bilong planti man” olsem Baibel i tok, nogat, em i mas givim dispela ofa planti taim. (Hib. 9:27, 28) Long nau, planti manmeri i bilipim dispela tok giaman. Ol i save go bung planti taim long ol haus lotu o sampela taim long olgeta de, bilong mekim dispela bung ol i kolim olsem “Ofa bilong Misa.” b Na sampela narapela lotu, ol i no save mekim bung bilong tingim dai bilong Jisas planti taim, na planti man bilong dispela lotu i no kliagut long samting em ofa bilong Jisas i bin mekim. Sampela inap ting, ‘Tru tru dai bilong Jisas i opim rot long God i fogivim ol sin bilong mi?’ Wai na ol i mekim kain askim olsem? Sampela taim, ating ol i bilipim ol tok em ol narapela i mekim na ol i gat tupela tingting olsem ofa bilong Jisas i no inap opim rot long God i fogivim sin bilong ol. Ol disaipel tru bilong Jisas i bin mekim wanem samting bilong helpim ol kain manmeri olsem?

6. Long 1872, wanpela grup bilong ol Baibel sumatin i kisim wanem save?

⁶ Long yia 1870 samting, wanpela grup bilong ol Baibel sumatin em Charles Taze Russell i go pas long en, ol i kirap long stadi gut tru long ol tok bilong Baibel. Ol i laik save long tok i tru long samting em ofa bilong Jisas i mekim long yumi ol manmeri na hau ol i ken mekim bung bilong tingim dai bilong em. Long 1872, ol i kisim stretpela save long Baibel olsem Jisas i bin givim ofa bilong baim bek sin bilong olgeta manmeri. Ol i no haitim dispela save ol i kisim, nogat. Ol i tokim ol narapela long dispela save long rot bilong ol buk, ol niuspepa, na ol magasin. Bihain tasol long en, ol i bihainim pasin bilong ol Kristen bilong pastaim na ol i kirap long mekim bung bilong Memorial long wanpela taim long olgeta wan wan yia.

7. Olsem wanem wok painimaut bilong ol dispela sumatin bilong Baibel i helpim yumi long nau?

⁷ Long nau, yumi kisim helpim long ol wok painimaut em ol dispela man Kristen i bin mekim planti yia i go pinis. Yumi kisim helpim long wanem rot? Jehova i blesim yumi, na ai bilong yumi i op na nau yumi inap luksave long ofa bilong Jisas na samting dispela ofa i mekim long yumi. (1 Jon 2:1, 2) Yumi kisim save tu long tok Baibel i mekim long gutpela  samting bai painim tupela lain manmeri em ol i amamasim God—wanpela lain bai kisim laip oltaim long heven we ol i no inap dai gen, na narapela lain em planti milion, ol bai kisim laip oltaim long graun. Yumi pas gut moa wantaim Jehova taim yumi luksave long pasin bilong em long laikim yumi tru na gutpela helpim yumi wan wan i kisim long ofa bilong Jisas. (1 Pita 3:18; 1 Jon 4:9) So wankain olsem ol brata bilong yumi long bipo, yumi invaitim ol narapela long kam bung wantaim yumi long dispela Memorial long wei em Jisas i bin mekim long bipo.

8. Lain bilong Jehova i bin mekim wanem bilong invaitim ol narapela i kam long Memorial? (Lukim piksa.)

⁸ Inap planti yia, lain bilong Jehova i gat pasin bilong invaitim ol narapela i kam long Memorial. Long yia 1881, ol i invaitim ol bratasista long Amerika long kam bung long wanpela haus long Allegheny, Pennsylvania, long mekim dispela spesel bung. Bihain, olgeta wan wan kongrigesen i mekim Memorial bilong ol yet. Long Mas 1940, ol pablisa i kisim toksave olsem ol i ken invaitim ol manmeri long teritori bilong ol em ol i gat laik long kam long Memorial. Long 1960, em fes taim we Betel i prinim ol Memorial invatesen na givim long ol kongrigesen long yusim. Kirap long dispela taim na i kam, yumi bin tilim planti bilion Memorial invatesen. Wai na yumi lusim bikpela haptaim na strong long invaitim ol narapela?

9-10. Wok bilong yumi long invaitim ol man long Memorial i helpim wanem lain? (Jon 3:16)

⁹ Wanpela risen na yumi save invaitim ol narapela i kam long bung bilong Memorial em yumi laik bai ol manmeri em ol i kam fes taim  ol i ken kisim stretpela save long Jehova na Jisas na samting tupela i bin mekim bilong helpim yumi olgeta. (Ritim Jon 3:16.) Yumi laik bai ol samting ol i lukim na harim long Memorial bai kirapim ol long kisim sampela save moa na kamap ol wokman bilong Jehova. Tasol i gat narapela lain tu i save kisim helpim.

¹⁰ Yumi save invaitim tu ol manmeri em ol i lusim wok bilong Jehova. Yumi mekim olsem bilong kirapim ol long tingim olsem God i laikim ol yet. Planti i save amamas long dispela invatesen, na yumi save amamas long lukim ol i kam. Taim ol i kam long Memorial, dispela i kirapim ol long tingim gen amamas ol i save pilim taim ol i bin mekim wok bilong Jehova long bipo. Tingim stori bilong Monica. c Em i kirap gen long stap olsem pablisa long taim bilong COVID-19 pendemik. Bihain long em i kam long Memorial long 2021, em i tok: “Dispela Memorial em i spesel tru long mi. Insait long 20 yia, dispela em fes taim mi bin autim tok long ol manmeri na singautim ol i kam long Memorial. Mi givim bel tru long mekim olsem bikos mi tenkyu tru long samting em Jehova na Jisas i bin mekim long mi.” (Sng. 103:1-4) Maski ol manmeri i kisim invatesen bilong yumi na ol i kam o nogat, yumi givim bel yet long invaitim ol man i kam long Memorial, long wanem, yumi save olsem Jehova i amamas long wok yumi mekim.

11. Long wanem rot Jehova i blesim wok bilong yumi long invaitim ol man i kam long Memorial? (Hagai 2:7)

¹¹ Jehova i blesim tru wok bilong yumi long invaitim ol manmeri i kam long Memorial. Long 2021, maski i gat ol tambu bilong sik COVID-19 pendemik i stap, bikpela lain manmeri i kam long Memorial, inap olsem 21,367,603. Dispela namba i antap inap 2 na hap taim moa winim namba bilong Ol Witnes Bilong Jehova long graun olgeta! Tru, Jehova i no save tingim ol namba olsem bikpela samting long em, nogat. Em i save tingim tru ol manmeri. (Luk 15:7; 1 Tim. 2:3, 4) Yumi save olsem Jehova i yusim wok bilong yumi long tilim invatesen bilong helpim yumi long painim ol manmeri i gat gutpela bel.​—Ritim Hagai 2:7.

12. Wanem samting inap mekim na i hatwok long yumi mekim Memorial? (Lukim piksa.)

¹² Jisas i bin tok profet olsem long taim bilong las de, yumi bai bungim planti kain hevi, olsem; famili i birua, ol man i mekim nogut long yumi, ol woa, ol sik, na planti moa. (Mat. 10:36; Mak 13:9; Luk 21:10, 11) Sampela taim, ol dispela samting i mekim na i hatwok long yumi mekim Memorial bilong tingim dai bilong Jisas. Ol brata na sista bilong yumi i bin mekim wanem samting bilong winim ol dispela hatwok, na olsem wanem Jehova i bin helpim ol?

13. Hau Jehova i blesim pasin bilong Artem long strongim bel na mekim Memorial taim em i stap long kalabus?

¹³ Stap long kalabus. Ol brata bilong yumi i stap long kalabus bikos ol i holimpas bilip, ol i wok strong long mekim Memorial bilong tingim dai bilong Jisas. Tingim stori bilong Artem. Long Memorial bilong 2020, Artem i stap long wanpela kalabus em bikpela bilong en inap 17 skwe mita na sampela taim i gat inap olsem 5-pela kalabusman insait long dispela rum. Maski em i stap kalabus, em i painim sampela samting em inap yusim olsem bret na wain bilong Memorial, na em i tingting long mekim Memorial tok bilong helpim em yet. Tasol ol wankalabus bilong em i save smok na tok nogut planti taim. So em i mekim wanem? Em i askim ol long ol i no ken tok nogut na ol i no ken smok inap wanpela aua  tasol. Artem i kirap nogut olsem ol wankalabus bilong em i wanbel olsem ol bai i no inap smok o tok nogut long taim bilong Memorial. Artem i tok: “Mi tokim ol olsem mi laik stori long ol long Memorial.” Maski ol i tok ol i no laik harim stori long Memorial, bihain long ol i lukim na harim Artem i mekim Memorial, ol i askim em long stori long ol long dispela samting.

14. Lain bilong Jehova i mekim wanem bilong mekim Memorial long taim bilong COVID-19 pendemik?

¹⁴ Sik COVID-19 pendemik. Long taim bilong dispela pendemik, lain bilong Jehova i no inap bung wantaim bilong mekim Memorial. Tasol dispela i no pasim ol long mekim Memorial. d Ol kongrigesen em ol i gat Intenet, ol i mekim Memorial long rot bilong vidio konferens. Tasol olsem wanem long planti milion em ol i no gat Intenet? Long sampela kantri, ol i stretim rot na bai tok i ken kamap long rot bilong televisen na redio. Na tu, ol brens i rekodim ol tok long winim 500 tokples, na bai ol ples i stap longwe tru, ol i ken mekim Memorial. Na ol brata i stretim rot na bai ol dispela kongrigesen i ken kisim ol dispela tok.

15. Yu kisim wanem skul long stori bilong wanpela Baibel sumatin nem bilong em Sue?

 ¹⁵ Famili i birua. Long sampela bratasista, pasin bilong famili long birua long ol i mekim na i hatwok long ol i mekim Memorial. Tingim stori bilong wanpela Baibel sumatin nem bilong em Sue. Long 2021, long de paslain long Memorial, Sue i tokim Baibel tisa bilong em olsem famili i birua long em so em i no inap kam long Memorial. Baibel tisa bilong em i ritim tok bilong Luk 22:44. Na em i stori long sumatin olsem taim yumi bungim ol hevi, yumi mas bihainim eksampel bilong Jisas long rot bilong beten na trastim tru Jehova olsem em bai helpim yumi. Long neks de, Sue i redim bret na wain na em i watsim spesel Moning Wosip program long jw.org. Na long dispela apinun, em i stap wanpis long rum bilong em na em i konek long tok bilong Memorial long rot bilong fon. Bihain Sue i raitim tok i go long Baibel tisa bilong em olsem: “Yu strongim mi tru long asde. Mi mekim olgeta samting mi inap mekim bilong insait long Memorial na Jehova i mekim ol narapela samting bilong helpim mi. Mi amamas na mi tenkyu tru!” Yu ting Jehova i ken helpim yu sapos yu bungim wankain hevi olsem?

16. Wai na yumi save tru olsem Jehova bai blesim ol hatwok bilong yumi long mekim Memorial? (Rom 8:31, 32)

¹⁶ Jehova i tingim tru hatwok bilong yumi long mekim Memorial bilong tingim dai bilong Jisas. Yumi ken save tru olsem em bai blesim yumi taim yumi soim olsem yumi tenkyu tru long samting em i bin mekim bilong helpim yumi. (Ritim Rom 8:31, 32.) So yumi ken tingting strong long go long Memorial bilong dispela yia na givim bel tru long mekim wok autim tok long ol wik paslain na bihain long Memorial.