1-2. (a) Taim yumi tingim laip na wok autim tok bilong Jisas, yumi inap pilim olsem wanem? (b) Yumi bai stori long wanem samting long dispela atikol?

 TAIM wanpela yumi laikim tru i dai, yumi save misim em tru! Yumi save pilim bikpela bel sori tru taim yumi tingim ol de paslain long em i dai, moa yet sapos em i bin sik na pilim sampela pen paslain long em i dai. Bihain long sampela haptaim yumi save pilim amamas gen taim yumi tingim wanpela samting em i bin skulim yumi long en o samting em i bin mekim o em i bin tok bilong strongim yumi o mekim yumi smail.

² Wankain olsem, yumi save pilim bikpela bel sori tru taim yumi ritim stori long bikpela pen na hevi Jisas i bin karim na i dai. Moa yet, long taim bilong Memorial yumi save tingim tingim olsem wanem pe bilong baim bek man i bikpela samting. (1 Kor. 11:24, 25) Tasol yumi save kisim bikpela amamas tru taim yumi tingim olgeta tok na pasin Jisas i bin mekim taim em i stap long graun. Na tu, taim yumi tingim wok em i mekim long nau na ol samting em bai mekim bilong helpim yumi long bihain, dispela i save strongim yumi. Taim yumi tingim tingim long bel ol dispela samting na pasin laikim bilong em long yumi, dispela inap kirapim yumi long soim tenkyu bilong yumi long planti rot, olsem yumi bai stori long en long dispela atikol.

3. I gat wanem ol risen na yumi mas tenkyu long pe bilong baim bek man?

³ Yumi save pilim tru taim yumi tingim laip bilong Jisas na dai bilong em. Long wok autim tok bilong Jisas long graun, em i kirapim ol man long tingim ol blesing em Kingdom Bilong God bai bringim. Yumi pilim tru ol dispela tok i tru bilong Kingdom. Yumi tenkyu tru long pe bilong baim bek man bikos em i opim  rot long yumi inap pas gut wantaim Jehova na Jisas. Ol man em ol i bilip long Jisas, ol tu inap bilip na wet long kisim laip oltaim na lukim ol pren na wanfamili bilong ol i kirap bek. (Jon 5:28, 29; Rom 6:23) Yumi no bin mekim wanpela samting na bai God i givim yumi ol dispela blesing, na yumi no inap tru long bekim dispela pe em God na Krais i bin givim bilong helpim yumi. (Rom 5:8, 20, 21) Tasol yumi ken soim ol olsem yumi tenkyu tru long samting ol i bin mekim. Hau yumi ken mekim olsem?

4. Olsem wanem Maria Makdala i soim tenkyu bilong em long samting Jisas i bin mekim long em? (Lukim piksa.)

⁴ Tingim stori bilong wanpela meri Juda nem bilong em Maria Makdala. Em i karim bikpela hevi tru bikos 7-pela spirit nogut i bin stap long em na mekim nogut long em. Ating em i pilim olsem i no gat rot long em inap kisim helpim. Olsem na tingim, em i amamas tru taim Jisas i rausim ol dispela spirit nogut long em! Em i tenkyu tru long samting Jisas i bin mekim na dispela i kirapim em long kamap wanpela disaipel bilong Jisas na em i givim taim, strong, na ol samting bilong em long helpim Jisas long wok autim tok bilong em. (Luk 8:1-3) Maski Maria i pilim tru samting Jisas i bin mekim bilong helpim em, ating em i no luksave long nambawan gutpela presen em klostu nau Jisas bai givim. Em bai givim laip bilong em bilong helpim ol man, na “bai olgeta man husat i bilip long em ol inap abrusim bagarap na kisim laip oltaim.” (Jon 3:16) Tasol Maria i soim tenkyu bilong em long Jisas long rot bilong stap gut yet long em. Taim Jisas i karim pen na hevi na hangamap long diwai pos, Maria i sanap klostu long em, long mekim gut bel bilong em na ol narapela. (Jon 19:25) Bihain long Jisas i dai, Maria na tupela meri i bringim ol samting i gat gutpela smel i kam long matmat long putim long bodi bilong em. (Mak 16:1, 2) Jehova i givim gutpela blesing tru long Maria bikos em i stap gut long Jisas. Jisas i bungim Maria na toktok wantaim em bihain long em i kirap bek. Em wanpela blesing planti disaipel i no bin kisim.​—Jon 20:11-18.

5. Olsem wanem yumi ken soim tenkyu bilong yumi long olgeta samting em Jehova na Jisas i bin mekim long yumi?

 ⁵ Yumi tu i ken soim tenkyu bilong yumi long olgeta samting em Jehova na Jisas i bin mekim long yumi long rot bilong yusim taim, strong, na mani kago bilong yumi long sapotim wok bilong Kingdom. Olsem, yumi ken redi long helpim wok konstraksen na wok meintenens i kamap long ol haus bilong mekim lotu i tru.

6. Wai na yumi ken tok pe bilong baim bek man em wanpela presen i kam long yumi wan wan?

⁶ Taim yumi tingim olsem Jehova na Jisas i laikim tru yumi, dispela i kirapim yumi long laikim ol tu. (1 Jon 4:10, 19) Yumi laikim ol tru taim yumi luksave olsem Jisas i bin dai bilong helpim yumi wan wan. Aposel Pol i luksave long dispela na em i soim tenkyu bilong em long pas em i raitim i go long ol Kristen long Galesia, em i tok: “Pikinini Bilong God . . . i bin laikim mi tumas na givim em yet bilong helpim mi.” (Gal. 2:20) Long rot bilong pe bilong baim bek man, Jehova i bringim yu i go klostu long em na bai yu ken kamap pren bilong em. (Jon 6:44) Yu amamas long save olsem Jehova i bin lukim sampela gutpela samting long yu na em i givim dispela bikpela pe tru bambai yu ken kamap pren bilong em? Dispela i strongim pasin bilong yu long laikim Jehova na Jisas? I gutpela yumi askim yumi yet olsem, ‘Dispela pasin laikim i mas kirapim mi long mekim wanem?’   

7. Olsem yumi lukim long piksa, olsem wanem yumi olgeta i ken soim olsem yumi laikim Jehova na Jisas? (2 Korin 5:14, 15; 6:1, 2)

⁷ Yumi laikim God na Krais na dispela i kirapim yumi long soim pasin laikim long ol narapela. (Ritim 2 Korin 5:14, 15; 6:1, 2.) Wanpela rot yumi soim pasin laikim bilong yumi em long rot bilong givim bel olgeta long wok autim tok. Yumi autim tok long olgeta man yumi bungim. Yumi no save skelim man long lain  em i kam long en, traib, mani kago, biknem, o namba bilong em, nogat. Long dispela rot yumi mekim samting i stret wantaim laik bilong Jehova, “em i laik kisim bek olgeta kain man na em i laik bai ol i kisim stretpela save long tok i tru.”​—1 Tim. 2:4.

8. Olsem wanem yumi ken soim olsem yumi laikim ol bratasista bilong yumi?

⁸ Yumi soim tu olsem yumi laikim God na Krais long rot bilong soim pasin laikim long ol bratasista bilong yumi. (1 Jon 4:21) Yumi tingim tru olgeta wan wan bilong ol na yumi helpim ol taim ol i karim ol hevi. Yumi mekim isi bel bilong ol taim wanpela ol i laikim tru i dai, go visitim ol taim ol i sik, na yumi mekim ol samting yumi inap mekim bilong strongim ol taim ol i bel hevi. (2 Kor. 1:3-7; 1 Tes. 5:11, 14) Yumi wok yet long tingim ol long beten bikos yumi save olsem “beten bilong stretpela man i gat bikpela pawa na i mekim gutpela wok.”​—Jems 5:16.

9. Wanem narapela rot yumi ken soim olsem yumi laikim ol bratasista bilong yumi?

⁹ Yumi soim tu olsem yumi laikim ol bratasista bilong yumi taim yumi wok strong long stap wanbel wantaim ol. Yumi wok strong long bihainim eksampel bilong Jehova long fogivim ol narapela. Jehova i bin redi long larim Pikinini bilong em i dai bilong tekewe sin bilong yumi, olsem na yumi tu i mas redi long fogivim ol bratasista bilong yumi taim ol i rongim yumi. Yumi no laik kamap olsem dispela wokboi nogut long tok piksa bilong Jisas. Bihain long king i lusim bikpela dinau bilong em, dispela wokboi i no laik fogivim wanwok bilong em husat i gat liklik dinau tasol long em. (Mat. 18:23-35) Sapos yu gat bel hevi namel long yu na wanpela insait long kongrigesen, yu ting yu ken go pas long kamap bel isi wantaim em paslain long yu kam long Memorial? (Mat. 5:23, 24) Taim yu mekim olsem, yu soim olsem yu laikim tru Jehova na Jisas.

10-11. Olsem wanem ol elda i ken soim olsem ol i laikim Jehova na Jisas? (1 Pita 5:1, 2)

¹⁰ Olsem wanem ol elda i ken soim olsem ol i laikim Jehova na Jisas? Nambawan gutpela rot em long lukautim ol sipsip bilong Jisas long ol samting ol i nidim. (Ritim 1 Pita 5:1, 2.) Jisas i kamapim klia dispela samting long aposel Pita. Bihain long Pita i tok 3-pela taim olsem em i no save long Jisas, ating Pita i laik tru long soim klia olsem em i laikim Jisas. Taim Jisas i kirap bek, em i askim Pita olsem: “Saimon, pikinini bilong Jon, yu laikim mi moa winim ol dispela samting, o nogat?” Yumi ken save tru olsem Pita inap mekim olgeta samting em inap mekim bilong soim olsem em i laikim tru Bikman bilong em. Jisas i tokim Pita: “Lukautim ol liklik sipsip bilong mi.” (Jon 21:15-17) Na long laip olgeta bilong Pita, em i lukautim gut ol sipsip bilong Bikpela, long dispela rot em i soim olsem em i laikim Jisas.

¹¹ Ol elda, long taim bilong Memorial, olsem wanem yupela i ken soim olsem tok Jisas i mekim long Pita em i bikpela samting long yupela? Yupela i ken soim olsem yupela i laikim tru Jehova na Jisas long rot bilong oltaim mekim sepeding visit na givim taim na strong bilong yupela long helpim ol lain i lusim Jehova long kam bek long em. (Ese. 34:11, 12) Na tu, yupela i ken strongim ol Baibel sumatin na ol nupela em ol i kam long Memorial, na mekim olgeta samting yupela inap mekim bilong welkamim ol dispela lain em ol inap kamap disaipel bilong Jisas.

12. Taim yumi tingim tok Jisas i bin mekim long nait paslain long em i dai, olsem wanem dispela i strongim yumi? (Jon 16:32, 33)

¹² Long nait paslain long Jisas i dai, em i tokim ol disaipel bilong em olsem: “Long graun yupela i karim pen na hevi, tasol strongim bel!  Mi winim pinis strong bilong dispela graun.” (Ritim Jon 16:32, 33.) Wanem samting i helpim Jisas long sanap strong taim ol birua i mekim nogut long em na em i stap gut long God i go inap long em i dai? Em i bilip na wet long Jehova i helpim em. Jisas i save olsem ol disaipel bilong em bai bungim ol wankain hevi, olsem na em i tokim Jehova long lukautim ol. (Jon 17:11) Olsem wanem dispela i strongim yumi? Em i strongim yumi bikos Jehova i gat bikpela strong moa winim olgeta birua bilong yumi. (1 Jon 4:4) Jehova i save lukim olgeta samting. Yumi save tru olsem sapos yumi bilip na wet long Jehova i helpim yumi, orait yumi ken strongim bel na sanap strong.

13. Olsem wanem Josep bilong Arimatea i strongim bel?

¹³ Yumi ken stori long eksampel bilong Josep bilong Arimatea. Ol man Juda i save rispektim em tru. Em i wanpela memba bilong Sanhedrin, em suprim kot bilong ol Juda. Tasol long taim Jisas i mekim wok autim tok bilong em long graun, Josep i no gat pasin bilong strongim bel. Jon i tok Josep em i “wanpela disaipel bilong Jisas, tasol em i haitim dispela, long wanem, em i pret long ol Juda.” (Jon 19:38) Maski Josep i laikim tok bilong Kingdom, em i no tokaut long ol narapela olsem em i bilip long Jisas. Ating em i pret olsem em inap lusim biknem na namba em i gat long komiuniti. Tasol Baibel i tok bihain long Jisas i dai, Josep “i strongim bel na i go long Pailat na askim long kisim bodi bilong Jisas.” (Mak 15:42, 43) Nau Josep i no traim long haitim olsem em i wanpela disaipel bilong Jisas.

14. Yu mas mekim wanem sapos yu save pret long ol man?

¹⁴ Yu save pret long ol man wankain olsem Josep i bin pilim? Long skul o long wok, sampela taim yu save pilim sem long tokaut olsem yu wanpela Witnes Bilong Jehova? Yu no laik kamap pablisa o kisim baptais bikos yu wari long tingting ol narapela inap i gat long yu? No ken larim ol kain tingting olsem i stopim yu long mekim samting em yu save i stret long mekim. Beten strong long Jehova. Askim em long strongim yu long mekim laik bilong em. Taim yu lukim hau Jehova i bekim ol beten bilong yu, dispela bai mekim yu kamap strong moa na yu bai kisim pasin bilong strongim bel.​—Ais. 41:10, 13.

15. Ol disaipel i amamas taim Jisas i kamap long ol, na dispela i kirapim ol long mekim wanem? (Luk 24:52, 53)

¹⁵ Ol disaipel i bin bel hevi tru taim Jisas i dai. Piksaim yu yet long dispela taim. Gutpela pren bilong ol i dai, na tu, ol i pilim olsem ol i no gat hop moa. (Luk 24:17-21) Maski i olsem, taim  Jisas i kamap long ol, em i lusim haptaim long helpim ol long kliagut long olsem wanem em i inapim tok profet bilong Baibel. Na tu, em i givim ol wanpela bikpela wok bilong mekim. (Luk 24:26, 27, 45-48) Jisas i stap wantaim ol inap 40 de na bihain em i go long heven, long dispela taim ol disaipel i no bel hevi moa. Nau ol i amamas bikos ol i save olsem Bikman bilong ol i stap laip na em i redi long helpim ol long inapim nupela wok bilong ol. Ol i amamas na dispela i kirapim ol long mekim wok bilong Jehova na ol i no lusim dispela wok.​—Ritim Luk 24:52, 53; Apo. 5:42.

16. Hau yumi ken bihainim pasin bilong ol disaipel bilong Jisas?

¹⁶ Hau yumi ken bihainim pasin bilong ol disaipel bilong Jisas? Yumi ken kisim amamas long lotuim Jehova long taim bilong Memorial, na tu, long dispela yia olgeta. Dispela i makim olsem yumi mas putim Kingdom Bilong God i stap nambawan samting long laip bilong yumi. Olsem, planti i bin senisim sediul bilong ol long wok na bai ol i ken insait long wok autim tok, go long ol miting, na mekim famili lotu long olgeta taim. Sampela i no laik kisim ol samting bilong skin em ol narapela i ting ol i bikpela samting, ol i mekim olsem na bai ol i ken sapotim kongrigesen o i go long hap i gat bikpela nid bilong ol pablisa bilong Kingdom. Yumi nidim pasin bilong sanap strong bambai yumi ken mekim yet wok bilong Jehova, na em i tok promis long blesim yumi sapos yumi putim Kingdom i stap nambawan samting long laip bilong yumi.​—Prov. 10:22; Mat. 6:32, 33.   

17. Yu tingting strong long mekim wanem long dispela taim bilong Memorial? (Lukim piksa.)

¹⁷ Yumi luk fowed long mekim bung bilong Memorial long Tunde, Epril 4. Maski i olsem, no ken wet i go inap long dispela taim long tingim laip bilong Jisas na dai bilong em na pasin laikim we em na Jehova i bin mekim long yumi. Long ol wik paslain na bihain long Memorial, lusim haptaim long tingim ol dispela samting. Olsem, makim haptaim long ritim na tingim tingim long bel ol samting i bin kamap olsem i stap long sat “Laspela Wik Bilong Jisas Long Graun,” long Apendiks B12 bilong Nupela Taim Trenslesen. Taim yu mekim olsem, lukim ol tok bilong Baibel we i strongim pasin bilong yu long soim tenkyu, pasin laikim, strongpela bel, na amamas bilong yu. Na luksave long ol rot we yu ken soim tenkyu bilong yu. Yu ken save tru olsem Jisas bai tingim olgeta samting yu mekim bilong tingim em long dispela taim bilong Memorial.​—Rev. 2:19.