1. Wai na sampela taim yumi inap pret?

 OLGETA man i save pret sampela taim. Em tru olsem yumi bin stadi long Baibel na dispela i helpim yumi long lusim pasin bilong pret long ol daiman, ol spirit nogut, na long ol samting bai kamap long bihain. Tasol yumi stap long haptaim i gat planti hevi, olsem na yumi bai “lukim ol samting i mekim [yumi] i pret,” olsem woa, pasin raskol, na ol bikpela sik. (Luk 21:11) Na tu, yumi inap pret long ol man, olsem ol gavman i mekim nogut long yumi na ol wanfamili em ol i birua long lotu i tru. Sampela i wari olsem ol bai i no inap long sanap strong na karim wanpela hevi ol i bungim long nau o wanpela hevi i painim ol long bihain.

2. Stori long samting i kamap long Devit taim em i stap long Get.

² Sampela taim Devit i bin pret. Olsem, taim King Sol i wok long painim em bilong kilim em i dai, em i ranawe i go long Get em wanpela taun bilong ol Filistia. I no longtaim na king bilong Get, em Akis, em i painimaut olsem Devit em dispela strongpela man bilong pait em ol manmeri i bin singsing amamas long em olsem em i bin kilim i dai “planti planti tausen” Filistia. Devit “i pret nogut tru.” (1 Sml. 21:​10-12) Em i tingting planti long samting Akis inap mekim long em. Devit i mekim wanem bilong daunim pasin bilong pret?

3. Olsem Buk Song 56:​1-3, 11 i kamapim, Devit i mekim wanem bilong daunim pasin bilong pret?

³ Long Buk Song 56, Devit i autim tingting na filings bilong em taim em i stap long Get. Long dispela singsing, Devit i stori long risen na em i pret, na em i stori tu long wanem samting i helpim em long daunim pasin bilong pret. Taim Devit i pret, em i bilip strong long Jehova. (Ritim Buk Song 56:​1-3, 11.) I gat ol gutpela  risen long Devit i ken bilip strong long Jehova. Jehova i helpim Devit na em i mekim wanpela narakain plen: Em i giaman na mekim olsem em i longlong! Dispela i mekim na Akis i no laik kilim i dai Devit, em i laik bai Devit i lusim em na i go, na dispela i opim rot long Devit inap ranawe.—1 Sml. 21:13–22:1.

4. Long wanem rot yumi ken strongim pasin bilong yumi long bilip strong long Jehova? Stori long tok piksa.

⁴ Yumi tu i ken daunim pasin bilong pret long rot bilong bilip strong long Jehova. Tasol hau yumi ken strongim pasin bilong yumi long trastim Jehova, moa yet long taim yumi pret? Tingim dispela tok piksa. Sapos yu painimaut olsem yu gat wanpela sik, ating pastaim yu bai pret. Tasol yu ken daunim pasin bilong yu long pret sapos yu trastim dokta bilong yu. Ating em i bin helpim gut planti narapela husat i gat wankain sik olsem yu. Ating em i putim gut yau long yu taim yu toktok, na em i soim olsem em i pilim tingting bilong yu. Na em inap tokim yu long kisim wanpela tritmen we i bin helpim ol narapela. Olsem tasol, yumi strongim pasin bilong yumi long bilip strong long Jehova long rot bilong tingim ol samting em i bin mekim pinis, ol samting em i mekim long nau, na ol samting em bai mekim long yumi long bihain. Devit i bin mekim olsem. Taim yumi skelim ol tok em i bin raitim long Buk Song 56, tingim olsem wanem yu tu i ken strongim pasin bilong yu long bilip strong long Jehova na daunim pasin bilong pret.

JEHOVA I MEKIM WANEM SAMTING PINIS?

5. Bilong daunim pasin bilong pret, Devit i tingim tingim long bel wanem samting? (Buk Song 56:​12, 13)

⁵ Em tru olsem Devit i bungim taim nogut, maski i olsem em i putim tingting olgeta long ol samting Jehova i bin mekim pinis. (Ritim Buk Song 56:​12, 13.) Dispela em samting Devit i bin tingting long en long laip olgeta bilong em. Olsem, sampela taim em i tingim tingim long bel kriesen bilong Jehova, dispela i kirapim em long tingim bikpela strong bilong Jehova na pasin bilong em long laikim tru ol manmeri. (Sng. 65:​6-9) Na tu, Devit i tingim tingim long bel ol samting Jehova i bin mekim long ol narapela. (Sng. 31:19; 37:​25, 26) Na moa yet, em i tingim tingim long bel ol samting Jehova i bin mekim pinis bilong helpim em. Kirap long taim Devit i bebi yet, Jehova i sapotim em na lukautim em. (Sng. 22:​9, 10) Tru tumas, taim Devit i tingim tingim long  bel ol dispela samting, dispela i strongim tru pasin bilong em long bilip strong long Jehova!

6. Taim yumi pret, wanem samting bai helpim yumi long bilip strong long Jehova?

⁶ Taim yu pret, askim yu yet olsem, ‘Jehova i bin mekim wanem samting pinis?’ Tingim ol samting em i bin wokim. Olsem, taim yumi “lukim gut” hau Jehova i lukautim ol pisin na ol plaua—em ol i no inap kamapim ol pasin bilong em na ol i no inap lotuim em—dispela bai strongim tru pasin bilong yumi long bilip olsem em bai lukautim yumi tu. (Mat. 6:​25-32) Tingim tu ol samting Jehova i bin mekim bilong helpim ol manmeri i lotuim em. Ating yu ken stadi long stori bilong wanpela man o meri long Baibel em ol i gat strongpela bilip, o yu ken ritim ekspiriens bilong wanpela wokman bilong Jehova i stap long taim bilong yumi. a Na tu, tingim tingim long bel ol rot Jehova i bin lukautim yu. Long wanem rot em i bringim yu i kam insait long tok i tru? (Jon 6:44) Hau em i bekim ol beten bilong yu? (1 Jon 5:14) Long olgeta wan wan de, olsem wanem yu wok long kisim helpim long ofa bilong Pikinini bilong em?—Efe. 1:7; Hib. 4:​14-16.

7. Olsem wanem stori bilong profet Daniel i helpim Vanessa long daunim pasin bilong pret?

⁷ Vanessa, b em wanpela sista long Haiti, em i bungim wanpela hevi i mekim em i pret nogut tru. Wanpela man i stap long komiuniti bilong em i ringim em na salim ol mesis long em long olgeta de bilong fosim em long prenim em. Vanessa i tokaut stret long em olsem em i no laik prenim em. Tasol dispela man i belhat nogut tru na em i mekim ol tok bilong pretim em. Vanessa i tok: “Mi pret.” Olsem wanem Vanessa i daunim pasin bilong pret? Em i mekim sampela samting bilong lukautim em yet. Wanpela elda i helpim em long kontektim ol polis. Na tu, Vanessa i tingim tingim olsem wanem Jehova i bin lukautim ol wokman bilong em long bipo. Vanessa i tok: “Fes man mi tingim em profet Daniel. Maski em i no gat asua, ol i tromoi em i go insait long hul bilong ol laion em ol i hangre nogut tru. Tasol Jehova i lukautim em. Mi beten long Jehova na putim olgeta samting long han bilong em. Bihain long dispela, mi no pret moa.”—Dan. 6:​12-22.

JEHOVA I MEKIM WANEM LONG NAU?

8. Devit i save tru long wanem samting? (Buk Song 56:8)

⁸ Maski bikpela hevi tru inap painim Devit taim em i stap long Get, em i no larim pasin bilong pret i daunim em, nogat. Em i putim tingting i go long ol samting Jehova i mekim bilong helpim em long dispela taim. Devit i luksave olsem Jehova i stiaim em na lukautim em na Em i kliagut tu long hau Devit i pilim. (Ritim Buk Song 56:8.) Na tu, Devit i gat ol gutpela pren, olsem Jonatan na Hetpris Ahimelek, em ol i bin stap gut long em na helpim em. (1 Sml. 20:​41, 42; 21:​6, 8, 9) Na maski King Sol i tingting strong long kilim em i dai, Devit i ranawe long em na em i no kisim bagarap. Devit i save tru olsem Jehova i luksave long hevi em i karim na em i luksave tu long hau Devit i pilim long dispela taim.

9. Jehova i luksave long wanem samting long yumi wan wan?

⁹ Taim yu bungim wanpela hevi na dispela i mekim yu pret, tingim olsem Jehova i luksave long hevi yu karim na em i luksave tu long hau yu pilim. Olsem, Jehova i luksave long hatpela pasin ol man i mekim long lain Israel taim ol i stap long Isip, na tu, em i luksave long “pen na hevi ol i karim.” (Kis. 3:7) Devit i singsing long Jehova olsem Em i lukim “ol pen na hevi” na “bikpela bel hevi” em i karim. (Sng. 31:7) Na taim lain bilong God i karim pen na hevi long ol disisen i no stret ol yet i bin mekim, “dispela i mekim em tu i bel hevi.” (Ais. 63:9) Taim yu  pret, Jehova i kliagut long samting yu pilim long bel na em i laik tru long helpim yu long daunim pasin bilong pret.

10. Wai na yu bilip tru olsem Jehova i tingim yu na em bai helpim yu long karim ol hevi i painim yu?

¹⁰ Ating yu wok long tingting long olsem wanem Jehova i helpim yu long karim wanpela hevi i mekim yu pret nogut tru. Sapos olsem, orait beten askim em long helpim yu long luksave long wanem rot em i helpim yu. (2 Kin. 6:​15-17) Bihain tingim dispela: I gat wanpela tok o wanpela bekim yu harim long miting bilong kongrigesen we i bin strongim yu? Ol tok bilong wanpela pablikesen, wanpela vidio, o wanpela orijinel singsing i bin strongim yu? Wanpela i mekim wanpela gutpela tok o kamapim tok bilong wanpela skripsa i mekim isi bel bilong yu? Em isi long yumi lusim tingting long gutpela pasin laikim bilong ol wanbilip bilong yumi na ol gutpela tok bilong strongim bilip em yumi save kisim bilong helpim yumi. Tasol tru tru, ol dispela samting ol i nambawan gutpela presen i kam long Jehova. (Ais. 65:13; Mak 10:​29, 30) Ol i soim klia olsem Jehova i tingim yu. (Ais. 49:​14-16) Na ol i soim tu olsem yu inap bilip strong long em.

11. Wanem samting i helpim Aida long daunim pasin bilong pret?

¹¹ Aida, em wanpela sista i stap long Senegal, em i luksave long hau Jehova i helpim em taim em i karim hevi. Em i fesbon pikinini long famili, olsem na papamama bilong em i laik bai em i kisim gutpela wok mani bilong lukautim em yet na famili bilong em. Tasol Aida i bungim hevi bilong mani taim em i mekim senis long sindaun bilong em na holim liklik samting tasol bilong em i ken mekim wok painia. Dispela i mekim na famili bilong em i belhat long em na ol i sutim tok long em. Aida i tok: “Mi pret olsem i no gat rot long mi ken helpim papamama bilong mi, na olgeta bai les long mi. Na tu, mi sutim tok long Jehova olsem em i as bilong dispela hevi i kamap.” Tasol bihain em i harim wanpela tok i kamap long miting. Em i tok: “Brata i mekim dispela tok i kirapim mipela long tingim olsem Jehova i save long ol samting em yumi wan wan i save wari na tingting planti long en. Isi isi long rot bilong edvais mi kisim long ol elda na ol narapela, mi luksave olsem Jehova i laikim mi. So taim mi beten long Jehova, mi bilip tru olsem em bai helpim mi, na mi kisim bikpela bel isi tru taim mi lukim olsem em i bekim ol beten bilong  mi.” I no longtaim, Aida i painim wok mani we i helpim em long sapotim wok painia bilong em, na tu, em inap sapotim papamama bilong em na ol narapela. Em i tok: “Mi kisim skul olsem mi mas bilip strong long Jehova. Na taim mi beten, mi no save pret moa.”

JEHOVA BAI MEKIM WANEM SAMTING LONG BIHAIN?

12. Olsem Buk Song 56:9 i kamapim, Devit i bilip tru long wanem samting?

¹² Ritim Buk Song 56:9. Dispela ves i stori long narapela rot Devit i daunim pasin bilong pret. Maski ol birua inap mekim nogut long em na kilim em i dai, em i tingim tingim long bel ol samting Jehova bai mekim long bihain bilong lukautim em. Devit i save olsem long taim stret, Jehova bai helpim em. Em i save long dispela bikos Jehova yet i bin tokaut olsem em bai kamap neks king bilong Israel. (1 Sml. 16:​1, 13) Devit i bilip tru olsem olgeta samting Jehova i tok promis long mekim, em bai kamap tru.

13. Yumi ken bilip tru olsem Jehova bai mekim wanem?

¹³ Jehova i promis long mekim wanem long yu? Yumi no ekspektim em long banisim yumi long olgeta hevi i painim yumi, nogat. c Tasol yu ken bilip tru olsem long nupela taim we bai kamap klostu taim, Jehova bai pinisim olgeta hevi em yu karim long nau. (Ais. 25:​7-9) Krieta bilong yumi i gat bikpela strong long kirapim bek ol daiman, oraitim yumi, na bagarapim na pinisim olgeta birua bilong yumi.—1 Jon 4:4.

14. Yumi ken tingim tingim long bel wanem ol samting?

¹⁴ Taim yu pret, tingim tingim long bel ol samting Jehova bai mekim long bihain. Tingim hau yu bai pilim taim Satan na ol man nogut i no stap moa na ol stretpela man tasol i stap, na taim yu wok long kamap gutpela olgeta long olgeta wan wan de. Wanpela soim i bin kamap long program bilong rijinel kibung bilong 2014 i soim hau yumi ken tingim tingim long bel ol samting yumi bilip na wet long en. Wanpela papa i stori wantaim famili bilong em long ol tok bilong 2 Timoti 3:​1-5 bai olsem wanem sapos ol dispela ves i stori long Paradais, em i tok: “Long nupela taim ol man bai stap amamas tru. Ol man bai laikim ol narapela, laikim ol samting bilong lotu, ol bai gat pasin daun, ol bai litimapim nem bilong God, ol bai bihainim tok bilong papamama, ol bai tok tenkyu, ol bai stap gut long narapela, ol bai laikim tru ol wanfamili bilong ol, ol bai kamap wanbel, ol bai mekim tok i litimapim nem bilong ol narapela, ol bai bosim bel, stap isi, laikim ol gutpela pasin, ol narapela bai trastim ol, ol bai daun long ol narapela, ol bai laikim tru God, bai ol i givim bel tru long God; na yu mas pas gut wantaim ol dispela kain man.” Yu save stori wantaim famili bilong yu na ol wanbilip bilong yu long laip bai olsem wanem long nupela taim?

15. Tanja i bin pret, tasol wanem samting i helpim em long daunim pasin bilong pret?

¹⁵ Wanpela sista long Not Masedonia, nem bilong em Tanja, em i bin daunim pasin bilong pret long rot bilong tingim tingim long bel ol blesing em bai kisim long bihain. Papamama bilong em i birua nogut tru long em i stadi long Baibel. Em i tok: “Sampela bilong ol samting mi bin pret long ol bai kamap, ol i kamap pinis. Bihain long olgeta miting, mama bilong mi i save paitim mi. Papamama i tok ol bai kilim mi i dai sapos mi kamap wanpela Witnes Bilong Jehova.” Na bihain, papamama bilong Tanja i rausim em long haus. Em i mekim wanem? Tanja i tok: “Mi tingim bikpela amamas mi bai kisim inap oltaim sapos mi makim olsem mi laik stap gut long God. Na tu, maski mi lusim sampela samting long nau, mi tingim gutpela pe Jehova bai givim mi long nupela taim, long dispela taim mi no inap tingim moa ol hevi i painim mi long nau.” Tanja i holimpas pasin bilong em long stap gut long God. Jehova i helpim em na em i painim wanpela ples bilong i stap long en. Long nau, Tanja i marit long  wanpela gutpela brata na tupela wantaim i amamas long mekim wok autim tok fultaim.

STRONGIM PASIN BILONG YU LONG BILIP LONG NAU

16. Wanem samting bai helpim yumi long strongim bel yet taim yumi lukim truim bilong ol samting em Luk 21:​26-28 i tok profet long en?

¹⁶ Long taim bilong traipela hevi tru, “pasin bilong pret . . . bai mekim ol [manmeri] i airaun.” Tasol lain bilong God bai strongim bel na sanap strong yet. (Ritim Luk 21:​26-28.) Wai na yumi no inap larim pasin bilong pret i daunim yumi? Bikos yumi bai lain pinis long bilip strong long Jehova. Tanja, em yumi stori pinis long em, em i tok ol hevi i painim em long bipo i helpim em long sanap strong na karim ol narapela hevi i painim em bihain. Em i tok: “Mi kisim skul olsem maski wanem samting i kamap, Jehova i ken helpim yumi long sanap strong na karim ol hevi na em bai blesim yumi tu. Sampela taim yumi inap pilim olsem ol narapela i kontrolim ol samting, tasol tru tru Jehova i gat bikpela strong moa winim ol na em i bosim olgeta samting. Na maski wanpela hevi i gat hatwok bilong em, dispela hevi bai pinis.”

17. Olsem wanem yiateks bilong 2024 bai helpim yumi? (Lukim fran pes piksa.)

¹⁷ Olgeta man i save pret. Tasol olsem Devit, yumi no ken larim pasin bilong pret i daunim yumi olgeta. Yiateks bilong 2024 em beten Devit i mekim long Jehova, em i tok: “Taim mi pret, mi bilip strong long yu.” (Sng. 56:3) Wanpela Baibel referens i tok long dispela ves olsem, Devit “i no tingim tingim ol samting i mekim em i pret na em i no tingim ol hevi bilong em. Em i lukluk i go long Man Bilong Baim Bek em husat bai seivim em.” Tingim yiateks bilong yumi long ol mun i kam bihain, na moa yet long taim ol hevi i kamap na i mekim yu pret nogut tru. Lusim sampela haptaim long tingim ol samting Jehova i bin mekim long bipo, ol samting em i mekim long nau, na ol samting em bai mekim long bihain. Long dispela rot, wankain olsem Devit, yu ken tok: “Mi bilip tru long God; na mi no pret long wanpela samting.”—Sng. 56:4.