1-2. Ol gutpela wokman bilong Jehova inap bungim wanem ol hevi?

 TAIM yumi bungim wanpela bikpela hevi, laip bilong yumi inap senis wantu tasol. Olsem, wanpela brata em nem bilong em Luis a i bin kisim sik kensa. Dokta i tokim em olsem em bai dai bihain long sampela mun tasol. Monika na man bilong em i givim bel tru long mekim wok bilong God. Tasol wanpela taim, Monika i painimaut olsem man bilong em—em wanpela elda—i hait long em na mekim wanpela bikpela sin inap planti yia. Olivia em wanpela singel sista, em i mas ranawe na lusim haus bilong em bikos wanpela bikpela saiklon i kam long ples em i stap long en. Taim em i kam bek, em i lukim olsem dispela saiklon i bagarapim tru haus bilong em. Insait long sotpela haptaim tasol, laip bilong ol dispela bratasista i senis olgeta. Olsem wanem? Yu bin bungim bikpela hevi tru na dispela i senisim laip bilong yu wantu tasol?

² Yumi ol gutpela wokman bilong Jehova, tasol yumi bai sik na karim ol hevi wankain olsem olgeta narapela manmeri. Na tu, ating yumi mas sanap strong na karim hevi long pasin birua yumi feisim long ol man i heitim God. Em tru olsem Jehova i no inap banisim yumi long ol kain hevi olsem, tasol em i tok promis olsem em bai helpim yumi. (Ais. 41:10) Jehova bai helpim yumi long holimpas amamas bilong yumi, mekim ol gutpela disisen, na stap gut long em, maski yumi karim ol bikpela hevi tru. Long dispela atikol, yumi bai skelim 4-pela rot Jehova i save helpim yumi taim yumi bungim ol bikpela hevi tru. Na tu, yumi bai stori long samting yumi mas mekim bilong kisim helpim i kam long em.

JEHOVA BAI LUKAUTIM YU

3. Taim yumi karim wanpela bikpela hevi, yumi inap pilim hatwok long mekim wanem?

³ Hatwok bilong en. Taim yumi karim wanpela bikpela hevi, yumi inap pilim hatwok long tingting gut na mekim ol disisen. Bilong  wanem? Bikos yumi bel hevi tru. Ating yumi tingting planti na dispela i daunim yumi tru. Yumi inap pilim olsem yumi wokabaut long wanpela ples em smok i karamapim olgeta na dispela i mekim na yumi no save long wanem rot long bihainim. Tupela sista em yumi stori pinis long ol, lukim ol i pilim olsem wanem taim ol i karim ol hevi. Olivia i tok: “Bihain long saiklon i bagarapim haus bilong mi, mi pilim olsem dispela hevi i daunim mi tru na mi no save mi bai mekim wanem.” Monika i stori long em i pilim olsem wanem taim em i painimaut olsem man bilong em i no stap gut long em. Em i tok: “Mi bel hevi tru long pasin em i mekim. Mi pilim olsem wanpela i sutim mi long naip na dispela i givim mi bikpela pen tru. I hatwok tru long mi mekim ol wok bilong wan wan de. Samting em mi no ting bai kamap i kamap long mi.” Jehova i promis long helpim yumi long wanem rot taim yumi pilim olsem hevi i daunim yumi tru?

4. Olsem Filipai 4:​6, 7 i kamapim, Jehova i tok promis long mekim wanem?

⁴ Hau Jehova i helpim yumi. Em i tok promis long givim yumi “dispela bel isi bilong God” em Baibel i stori long en. (Ritim Filipai 4:​6, 7.) Yumi kisim dispela kain bel isi taim yumi pas gut tru wantaim Jehova na bel na tingting bilong yumi i stap isi tru. Dispela bel isi “i winim tru tingting bilong man,” em i gutpela moa winim samting yumi tingim. Yu save pilim olsem bel na tingting bilong yu i stap isi tru bihain long yu beten strong long Jehova? Yu pilim olsem bikos yu kisim “dispela bel isi bilong God.”

5. Olsem wanem bel isi bilong God i lukautim bel na tingting bilong yumi?

⁵ Tok bilong Filipai 4:7 i stori tu olsem dispela bel isi bilong God “bai lukautim,” o banisim, “bel bilong yupela na tingting bilong yupela.” Long tok Grik, dispela tok “lukautim” em wanpela tok ol i yusim bilong stori long ol soldia em ol i lukautim wanpela taun bambai ol birua i no ken kam pait long ol. Ol lain long dispela taun i stap bel isi na slip gut long nait bikos ol i save olsem ol soldia i was i stap long ol geit bilong taun. Olsem tasol, taim bel isi bilong God i lukautim bel na tingting bilong yumi, yumi no save wari na tingting planti moa bikos yumi save olsem yumi stap seif long han bilong Jehova. (Sng. 4:8) Olsem Hana, maski ol samting long sindaun bilong yumi i no senis hariap, yumi inap stap bel isi yet. (1 Sml. 1:​16-18) Na taim yumi stap bel isi, em isi moa long yumi tingting gut na mekim ol gutpela disisen.

6. Yumi ken mekim wanem na bai bel isi bilong God i ken helpim yumi? (Lukim tu piksa.)

⁶ Samting yumi mas mekim. Taim yu tingting planti, yu ken askim God long lukautim yu. Hau yu ken mekim olsem? Beten planti taim inap long yu pilim olsem yu kisim bel isi bilong God. (Luk 11:9; 1 Tes. 5:17) Luis em yumi stori pinis long em, em i stori long olsem wanem em na meri bilong em Ana i kisim bel isi, maski tupela i  painimaut olsem em bai lusim laip bilong em insait long sampela mun tasol. Em i tok: “Long kain taim olsem, em i hatwok tru long mekim ol disisen long sait bilong helt-ke na ol narapela samting. Tasol pasin bilong beten i save givim bel isi long mipela long dispela taim we mipela i tingting planti na pret.” Luis na meri bilong em i tok tupela i beten strong inap planti taim, na ol i askim Jehova long mekim isi bel na tingting bilong ol, na givim ol savetingting bilong mekim ol gutpela disisen. Na ol i pilim tru helpim bilong em. Sapos yu bungim wanpela hevi, orait holim strong pasin bilong beten, na yu bai kisim dispela bel isi bilong Jehova i lukautim bel na tingting bilong yu.—Rom 12:12.

JEHOVA BAI MEKIM YU STAP GUT

7. Yumi inap pilim olsem wanem taim yumi bungim wanpela bikpela hevi?

⁷ Hatwok bilong en. Taim yumi karim wanpela bikpela hevi, filings, tingting, na pasin bilong yumi bai senis senis na bai yumi no inap stap isi. Yumi inap pilim olsem ol tingting na filings bilong yumi i sakim yumi i go i kam wankain olsem ol weiv long solwara i sakim wanpela sip i go i kam. Ana em yumi stori pinis long em, em i tok bel na tingting bilong em i no stap isi bihain long Luis i dai. Em i tok: “Sampela taim mi save bel hevi nogut tru na mi save sori long mi yet. Na mi save belhat tu olsem em i lusim mi.” Na tu, Ana i pilim olsem em i stap wanpis, na em i no amamas long mekim ol disisen long ol samting em pastaim Luis i save mekim disisen long ol. Sampela taim, em i pilim olsem em i stap long solwara na i gat bikpela win na ren. Olsem wanem Jehova i save helpim yumi taim ol kain tingting na filings olsem i daunim yumi tru?

8. Olsem Aisaia 33:6 i kamapim, Jehova i tok promis long mekim wanem long yumi?

⁸ Hau Jehova i helpim yumi. Em i tok promis olsem em bai mekim yumi stap gut. (Ritim Aisaia 33:6.) Taim wanpela sip i ron long solwara na bikpela win i sakim strong dispela sip long wanpela sait i go long narapela sait, dispela inap kamapim bikpela hevi. Bilong sip i ken stap isi na win i no ken sakim em i go i kam, em i gat ol spesel pul long sait sait bilong en we i save kam ausait aninit long wara. Ol dispela pul i helpim sip bambai strongpela win na ren i no ken sakim sip i go i kam, na bai ol pasindia long sip i stap seif na ol i no kisim bagarap. Tasol ol dispela pul i save wok gut taim sip i wok long ron i go na em i no stap tasol long wanpela hap. Olsem tasol, Jehova bai strongim yumi taim yumi stap gut long em na mekim yet wok bilong em taim yumi bungim ol bikpela hevi.

9. Olsem wanem ol tul bilong mekim wok painimaut i helpim yumi long stap gut? (Lukim tu piksa.)

⁹ Samting yumi mas mekim. Taim yu tingting planti na bel hevi na dispela i daunim yu tru, wok strong yet long bihainim sediul bilong yu long beten, go long miting, na autim tok. Em tru olsem  yu no inap mekim planti samting em yu save mekim long bipo, tasol tingim olsem Jehova i holim stretpela tingting long ol samting yu ken mekim. (Skelim Luk 21:​1-4.) Bilong strongim yet bilip bilong yu, makim haptaim bilong mekim pesenel stadi na tingim tingim long bel ol tok yu lainim. Bilong wanem yu mas mekim olsem? Long rot bilong oganaisesen bilong em, Jehova i givim yumi planti naispela atikol na ol vidio i kamapim ol tok we i ken helpim yumi long stap gut long taim bilong hevi. Bilong painim ol tok yu nidim, yu ken yusim ol tul bilong mekim wok painimaut i stap long tokples bilong yu, olsem JW Library^® ap, Watch Tower Publications Index, na Research Guide for Jehovah’s Witnesses. Monika em yumi stori pinis long em, em i tok em i yusim ol tul bilong mekim wok painimaut bilong kisim edvais taim em i pilim olsem bel na tingting bilong em i no stap isi. Olsem, em i mekim wok painimaut long dispela tok “belhat.” Long ol narapela taim, em i mekim wok painimaut long ol dispela tok “givim baksait long narapela” o “stap gut long narapela.” Em i save ritim ol atikol i stori long ol dispela samting inap long em i kisim bel isi. Em i tok: “Taim mi bin kirap long mekim wok painimaut, bel na tingting bilong mi i no stap isi. Tasol taim mi ritim ol tok, isi isi mi pilim olsem Jehova i holimpasim mi. Taim mi wok long rit, mi luksave olsem Jehova i kliagut long olgeta samting mi pilim, na em i wok long helpim mi.” Kain helpim olsem i kam long Jehova i ken helpim yu long bosim tingting na filings bilong yu inap long yu pilim olsem yu stap gut na bel na tingting bilong yu i stap isi.—Sng. 119:​143, 144.

JEHOVA BAI SAPOTIM YU

10. Yumi inap pilim olsem wanem bihain long wanpela bikpela hevi i kamap long yumi?

¹⁰ Hatwok bilong en. Bihain long wanpela bikpela hevi i kamap, sampela taim yumi inap pilim olsem yumi no gat strong na bel na tingting bilong yumi i no stap isi. Yumi inap pilim olsem wanpela man bilong ran long resis husat i save ron spit tru, tasol nau em i gat bagarap long lek so em i mas wokabaut isi isi. Yumi inap pilim hatwok long mekim ol wok em pastaim yumi pilim isi long mekim, o ating yumi no gat laik long mekim ol samting em pastaim yumi save kisim amamas long mekim. Olsem Elaija, yumi inap pilim olsem yumi hatwok long kirap na yumi laik slip tasol. (1 Kin. 19:​5-7) Jehova i tok promis long mekim wanem taim yumi pilim olsem yumi no gat strong?

11. I gat wanem narapela rot Jehova i save helpim yumi? (Buk Song 94:18)

¹¹ Hau Jehova i helpim yumi. Em i tok promis long sapotim yumi. (Ritim Buk Song 94:18.)  Wankain olsem man bilong ran long resis husat i gat bagarap long lek i nidim sapot long wokabaut, yumi tu i nidim helpim bilong mekim yet wok bilong Jehova. Long ol kain taim olsem, Jehova i tok promis long yumi olsem: “Mi, Jehova, God bilong yu, mi wok long holim rait han bilong yu, Mi tokim yu, ‘Yu no ken pret. Mi bai helpim yu.’” (Ais. 41:13) King Devit i kisim dispela kain helpim. Taim em i bungim ol hevi na ol birua i mekim nogut long em, em i tok long Jehova olsem: “Yu sapotim mi long rait han bilong yu.” (Sng. 18:35) Tasol olsem wanem Jehova i save givim sapot long yumi?

12. Jehova inap yusim husat long helpim yumi taim yumi no gat strong?

¹² Planti taim Jehova i save sapotim yumi long rot bilong kirapim ol narapela long helpim yumi. Olsem, wanpela taim Devit i pilim olsem em i no gat strong, olsem na pren bilong em Jonatan i visitim em bilong strongim em. (1 Sml. 23:​16, 17) Na tu, Jehova i makim Elisa long givim helpim long Elaija. (1 Kin. 19:​16, 21; 2 Kin. 2:2) Long nau, Jehova inap yusim ol wanfamili bilong yu, ol pren bilong yu, na ol elda long sapotim yumi. Tasol taim wanpela i bagarapim bel bilong yumi, ating yumi no laik bung moa wantaim ol narapela. Yumi laik stap wanpis. Olgeta man i save pilim olsem. Yumi ken mekim wanem bilong kisim sapot i kam long Jehova?

13. Yumi mas mekim wanem bilong kisim helpim long sapot Jehova i givim long yumi? (Lukim tu piksa.)

¹³ Samting yumi mas mekim. Sakim pasin bilong stap yu yet. Taim yumi no bung wantaim ol narapela, dispela inap mekim yumi tingting long yumi yet tasol na ol hevi yumi wok long karim. Na dispela inap stiaim yumi long mekim ol disisen i no stret. (Prov. 18:1) Em tru olsem sampela taim yumi mas stap yumi yet, na moa yet taim yumi karim wanpela hevi. Tasol sapos yumi stap wanpis na yumi no bung wantaim ol narapela inap longpela taim tru, yumi inap sakim rot em Jehova i yusim bilong sapotim yumi. So maski em i hatwok tru long mekim olsem long taim bilong hevi, kisim helpim long ol wanfamili bilong yu, ol pren bilong yu, na ol elda. Tingim ol olsem helpim em Jehova i givim bilong sapotim yu.—Prov. 17:17; Ais. 32:​1, 2.

JEHOVA BAI MEKIM ISI BEL BILONG YU

14. Wanem ol hevi inap kamap na dispela inap mekim yumi pret nogut tru?

¹⁴ Hatwok bilong en. Sampela samting inap kamap na i mekim yumi pret nogut tru. Long Baibel, ol gutpela wokman bilong God i stori long ol taim we ol i tingting planti na pret bikos ol man i birua long ol o ol i bungim ol narapela hevi. (Sng. 18:4; 55:​1, 5) Olsem tasol, yumi inap bungim pasin birua long skul, long ples wok, insait  long famili, o long gavman. Yumi inap pret tu long dai sapos yumi kisim wanpela bikpela sik. Long ol kain taim olsem, yumi inap pilim olsem wanpela liklik pikinini husat i no gat rot bilong kisim helpim. Long wanem rot Jehova i save helpim yumi taim yumi pilim olsem?

15. Buk Song 94:19 i mekim wanem tok bilong strongim yumi?

¹⁵ Hau Jehova i helpim yumi. Em i strongim yumi na mekim isi bel bilong yumi. (Ritim Buk Song 94:19.) Tok bilong dispela song inap kirapim yumi long tingim wanpela liklik gel husat i pilim hatwok long slip, long wanem, em i pret long laitning na tanda i pairap. Yumi ken piksaim long tingting olsem papa bilong em i kam insait long rum na kisim em, na holim em inap long em i slip. Maski laitning na tanda i pairap strong yet, em i pilim seif long han bilong papa bilong em. Taim yumi bungim ol hevi i mekim yumi pret nogut tru, ating yumi tu bai nidim helpim bilong Papa bilong yumi long heven—i olsem em bai holim yumi inap long pret bilong yumi i pinis olgeta. Hau yumi ken kisim kain helpim long Jehova bilong mekim isi bel bilong yumi?

16. Yumi ken mekim wanem bilong kisim helpim long Jehova bilong mekim isi bel bilong yumi? (Lukim tu piksa.)

¹⁶ Samting yumi mas mekim. Oltaim yumi mas lusim sampela haptaim wantaim Jehova long rot bilong beten long em na ritim tok bilong em long Baibel. (Sng. 77:​1, 12-14) Na taim presa i daunim yu, fes samting yu bai tingting long mekim em long askim Papa bilong yu long heven long helpim yu. Tokim Jehova long ol samting i mekim yu pret na tingting planti. Na putim yau long em long rot bilong ritim tok bilong em long Baibel na bai yu luksave long rot em i mekim isi bel bilong yu. (Sng. 119:28) Ating yu bai luksave olsem taim yu ritim sampela buk bilong Baibel, dispela inap mekim isi bel bilong yu taim yu pret. Olsem, yu inap ritim ol tok bilong strongim yu i stap long Buk Jop, Buk Song, na Provep, na tu, ol tok bilong Jisas i stap long Matyu sapta 6. Taim yu beten long Jehova na ritim tok bilong em long Baibel, yu bai kisim bel isi bilong em.

17. Yumi ken bilip tru long wanem samting?

¹⁷ Yumi ken bilip tru olsem Jehova bai helpim yumi long taim bilong hevi. Yumi no inap tru long stap wanpis. (Sng. 23:4; 94:14) Jehova i tok promis long lukautim yumi, mekim yumi stap gut, sapotim yumi, na mekim isi bel bilong yumi. Long Aisaia 26:​3, Baibel i tok long Jehova olsem: “Yu bai banisim gut ol man i save lukluk i go long yu tasol; oltaim yu bai givim bel isi long ol, long wanem, ol i save trastim yu.” So trastim Jehova, na yusim gut ol rot em i givim long yu bilong helpim yu. Sapos yu mekim olsem, yu bai kisim bek strong na yu inap mekim olsem tu long taim bilong hevi.