1. Yu save piksaim long tingting wanem samting taim yu tingim Jehova?

 SAMPELA taim yu save piksaim long tingting Jehova i luk olsem wanem? Taim yu toktok long em long rot bilong beten, yu save piksaim wanem samting? Maski yumi no inap lukim Jehova, Baibel i stori long em long planti narapela narapela rot. Baibel i tok Jehova “i olsem san na i olsem hap plang bilong pait” na em “i olsem wanpela bikpela paia i save kukim olgeta samting.” (Sng. 84:11; Hib. 12:29) Long visen Esekiel i lukim, em i tok ples Jehova i stap long en i olsem ston sapaia, metal i lait tru, na bikpela lait bilong renbo i raunim em. (Ese. 1:​26-28) Sampela bilong ol dispela tok Baibel i mekim long Jehova inap mekim yumi kirap nogut o pilim olsem yumi samting nating.

2. Wanem samting inap pasim sampela long i go klostu long Jehova?

² Yumi no inap lukim Jehova, olsem na yumi inap pilim hatwok long bilip olsem em i laikim yumi. Sampela i ting olsem Jehova i no inap tru long laikim ol bikos long ol samting i bin painim ol long bipo. Ating ol i no bin gat wanpela papa husat i laikim ol. Jehova i kliagut long ol samting yumi pilim long bel na em i save long risen na ol dispela samting inap mekim na yumi hatwok long i go klostu long em. Bilong helpim yumi, em i kamapim klia naispela pasin bilong em long Baibel.

3. Wai na yumi mas save gut moa long pasin laikim bilong Jehova?

³ Nambawan bikpela pasin bilong Jehova em pasin laikim. (1 Jon 4:8) Jehova em i pasin laikim. Pasin laikim i save stiaim olgeta samting em i mekim. Pasin laikim bilong God em i gutpela na i gat strong tru, olsem na em i save mekim dispela pasin long ol lain i laikim em, na tu, long ol lain i no laikim em. (Mat. 5:​44, 45) Long dispela atikol, yumi bai stori gut moa long Jehova na pasin laikim bilong em. Taim yumi kisim sampela save moa long God bilong yumi, dispela bai kirapim yumi long laikim em moa.

JEHOVA I LAIKIM YUMI TRU

4. Yu pilim olsem wanem long pasin bilong Jehova long sori tru long yumi? (Lukim tu piksa.)

⁴ “Jehova i gat pasin bilong sori tru.” (Jems 5:11) Long Baibel,  Jehova i tok em i olsem wanpela mama i save laikim tru pikinini bilong em. (Ais. 66:​12, 13) Piksaim long tingting wanpela mama i laikim tru pikinini bilong em na i lukautim em gut. Em i putim em antap long lek bilong em na baunsim em i go i kam, na em i toktok isi long em long naispela nek. Taim em i krai o em i pilim pen, mama bilong em i givim wanem samting em i laikim. Taim yumi karim pen na hevi, yumi ken bilip tru olsem Jehova i laikim yumi. Man bilong raitim song i tok: “Taim wari na tingting planti i daunim mi, yu save strongim mi na mekim bel bilong mi i stap isi.”—Sng. 94:19.

5. Yu pilim olsem wanem long gutpela pasin laikim bilong Jehova?

⁵ Jehova i save stap gut long yumi. (Sng. 103:8) Em i no save givap long yumi taim yumi mekim wanpela rong. Planti taim lain Israel i mekim Jehova i bel hevi, tasol taim ol i tanim bel, em i mekim ol dispela tok bilong soim olsem em i laikim ol yet, em i tok: “Yu kamap samting i dia tumas long ai bilong mi, yu bin kisim biknem tru, na mi bin laikim yu tumas.” (Ais. 43:​4, 5) Pasin laikim bilong God i no senis. Oltaim yumi ken bilip olsem em i laikim yumi. Maski yumi mekim ol bikpela rong, Jehova i no save lusim yumi. Taim yumi tanim bel na kam bek long Jehova, yumi bai lukim olsem em i laikim yet yumi. Em i tok promis olsem “em bai fogivim [yumi] olgeta.” (Ais. 55:7) Taim em i fogivim yumi, Baibel i tok “Jehova yet bai givim nupela strong” long yumi.—Apo. 3:19.

6. Yumi kisim wanem skul long Jehova long Sekaraia 2:8?

⁶ Ritim Sekaraia 2:8. Jehova i laikim yumi, olsem na wantu tasol em inap kliagut long ol samting yumi pilim long bel na em i laik tru long lukautim yumi. Taim em i lukim yumi bel hevi, em tu i save bel hevi. Olsem na i stret long yumi beten olsem: “Yu mas lukautim mi olsem yu lukautim ai kiau bilong yu.” (Sng. 17:8) Ai em i wanpela hap bilong bodi we yumi save lukautim gut na em i dia tumas. Olsem na taim Jehova i tok yumi olsem ai kiau bilong em, i olsem em i tok, ‘Husat man i mekim nogut long yupela ol manmeri bilong mi, em i mekim nogut long samting i dia tumas long mi.’

7. Wai na yumi mas strongim pasin bilong yumi long bilip tru olsem Jehova i laikim yumi?

⁷ Jehova i laik bai yumi save olsem em i laikim yumi wan wan. Tasol em i save olsem ol samting i bin painim yumi long bipo inap mekim na yumi holim tupela tingting olsem em i laikim yumi o nogat. O yumi inap bungim ol hevi long nau we i  traim pasin bilong yumi long bilip olsem Jehova i laikim yumi. Wanem samting bai strongim pasin bilong yumi long bilip olsem God i laikim yumi? Taim yumi skelim ol tok Jehova i mekim bilong soim olsem em i laikim Jisas, ol Kristen em i bin makim, na yumi olgeta, dispela bai strongim pasin bilong yumi long bilip olsem God i laikim yumi.

OL ROT JEHOVA I SOIM PASIN LAIKIM BILONG EM

8. Wai na Jisas i bilip tru olsem Papa bilong em i laikim em?

⁸ Jehova na Pikinini bilong em i pas gut wantaim longpela taim tru winim pasin pren i stap namel long ol narapela. Insait long planti bilion yia tupela i stap wantaim long heven, ol i pas gut wantaim na ol i kisim pasin bilong laikim tru narapela narapela. Jehova i mekim ol tok bilong soim olsem em i laikim Jisas, olsem yumi bin ritim long Matyu 17:5. Jehova inap tok tasol olsem, ‘Dispela em man mi amamas long em.’ Tasol em i laik bai yumi save olsem em i laikim tru Jisas, olsem na em i tok long Jisas olsem “Pikinini bilong mi, mi laikim em tumas.” Jehova i amamas long Jisas, na moa yet bikos em i redi long givim laip bilong em bilong helpim yumi. (Efe. 1:7) Na tru tumas, Jisas i save olsem Papa bilong em i laikim em tru. Jehova i laikim Jisas na Jisas i pilim tru dispela pasin laikim long bel bilong em. Planti taim em i tokaut stret olsem Papa i laikim em.—Jon 3:35; 10:17; 17:24.

9. Wanem ol tok i kamapim klia olsem Jehova i laikim ol Kristen em i bin makim? Stori long dispela. (Rom 5:5)

⁹ Jehova i mekim ol tok bilong soim tu olsem em i laikim ol Kristen em i bin makim. (Ritim Rom 5:5.) Dispela tok “pulap long bel” i makim pasin bilong Jehova long laikim ol. Em i tok Jehova i pulapim bel bilong ol wantaim pasin laikim. Wanpela referens i tok pasin laikim bilong God i olsem wanpela wara i ron i stap. Em naispela tok piksa i kamapim klia pasin laikim bilong Jehova long ol Kristen em i bin makim! Ol Kristen God i bin makim, ol i save olsem “God . . . i laikim” ol. (Jut 1) Aposel Jon i kamapim klia tingting bilong ol taim em i tok: “Olaman! Pasin laikim Papa i mekim long yumi i bikpela tru. Em i larim yumi kisim nem olsem ol pikinini bilong God.” (1 Jon 3:1) Yu ting Jehova i laikim tasol ol Kristen em i bin makim? Nogat, Jehova i kamapim klia olsem em i laikim yumi olgeta.

10. Wanem nambawan samting i kamapim klia olsem Jehova i laikim yu?

¹⁰ Wanem nambawan samting i kamapim klia pasin laikim bilong Jehova? Pe bilong baim bek man em nambawan rot Jehova i soim bikpela pasin laikim bilong em long yumi! (Jon 3:16; Rom 5:8) Jehova i givim Pikinini em i laikim tumas bilong dai na baim bek olgeta manmeri, na bai God i fogivim ol sin bilong yumi na yumi kamap pren bilong Em. (1 Jon 4:10) Taim yumi lusim haptaim long tingim tingim long bel pe em Jehova na Jisas i givim bilong baim bek yumi, yumi bai kliagut moa long bikpela pasin laikim tupela i gat long yumi olgeta wan wan. (Gal. 2:20) Jehova i givim pe bilong baim bek man bikos em i God bilong stretpela pasin, na i gat narapela risen tu na em i mekim olsem. Dispela em presen i kamapim klia pasin laikim bilong em. Jehova i soim olsem em i laikim yumi long rot bilong givim Jisas, em Pikinini em i laikim tumas, bilong helpim yumi. Jehova i larim Pikinini bilong em i karim pen na hevi na dai bilong helpim yumi.

11. Yumi kisim wanem skul long Jeremaia 31:3?

¹¹ Olsem yumi stori pinis, Jehova i save laikim yumi, na em i save tokaut olsem em i laikim yumi. (Ritim Jeremaia 31:3.) Jehova i bringim yumi i go klostu long em bikos em i laikim yumi. (Skelim Lo 7:​7, 8.) I no gat wanpela man o wanpela samting inap tekewe yumi long pasin laikim bilong God. (Rom 8:​38, 39) Yu pilim olsem wanem long pasin laikim bilong God? Ritim Buk Song 23, na lukim pasin laikim na pasin sori bilong Jehova i mekim wanem long Devit na dispela inap mekim wanem long yumi tu.

 YU PILIM OLSEM WANEM LONG PASIN LAIKIM BILONG JEHOVA?

12. Yu bai stori olsem wanem long Buk Song 23?

¹² Ritim Buk Song 23:​1-6. Buk Song 23 em wanpela singsing i kamapim klia pasin bilong bilip tru long pasin laikim bilong Jehova na pasin bilong em long sori tru long yumi. Devit em man i bin raitim dispela song, em i stori long strongpela pasin pren i stap namel long em na Wasman bilong em, Jehova. Em i pilim seif taim em i larim Jehova i stiaim em, na em i trastim tru Jehova. Em i save olsem Jehova bai soim pasin laikim long em long olgeta de em i stap laip. Wanem samting i mekim na em i bilip tru long dispela?

13. Wai na Devit i bilip tru olsem Jehova bai lukautim em?

¹³ “Mi no inap sot long wanpela samting.” Devit i pilim olsem Jehova i lukautim em gut bikos oltaim Em i givim ol samting em i nidim. Na tu, Devit i amamas long pas gut wantaim Jehova na em i amamas olsem Jehova i orait long em. Olsem na em i bilip tru olsem maski wanem samting i painim em long bihain, Jehova bai wok yet long lukautim em long ol samting em i nidim. Devit i bilip tru olsem Jehova i laikim em na Em bai lukautim em, na dispela i helpim em long no ken wari long wanpela samting na amamas long ol samting em i gat pinis.—Sng. 16:11.

14. Olsem wanem Jehova inap lukautim gut yumi?

¹⁴ Jehova i save lukautim gut yumi, moa yet taim ol hevi i painim yumi. Claire, a em i mekim wok long Betel winim 20 yia, em i no save em bai mekim wanem bilong helpim famili bilong em taim ol i bungim ol bikpela hevi. Papa bilong em i kisim strok, na wanpela sista bilong em i raus, na famili bilong em i gat hevi bilong mani na ol i lusim liklik wok bisnis bilong ol na haus bilong ol. Jehova i mekim wanem bilong lukautim gut ol? Claire i tok: “Jehova i mekim ol samting na  bai oltaim famili bilong mi i gat ol samting ol i nidim long wan wan de. Planti taim Jehova i givim mipela planti samting moa winim ol samting mipela i nidim! Mi save tingim ol taim Jehova i bin helpim mipela, na mi no inap tru long lusim tingting long pasin laikim bilong em. Ol dispela memori i helpim mi long wok yet long sanap strong taim ol hevi i painim mi.”

15. Wai na Devit i pilim olsem em i kisim nupela strong? (Lukim tu piksa.)

¹⁵ “Em i givim mi nupela strong.” Sampela taim olgeta hevi na traim Devit i bungim i mekim em i bel hevi tru. (Sng. 18:​4-6) Maski i olsem, pasin bilong Jehova long laikim em na lukautim em i givim nupela strong long em. Jehova i stiaim gutpela pren bilong em husat i bel hevi tru i go long ples i gat “gutpela gras” na “ples i gat wara” we em i ken malolo. Olsem na Devit i kisim bek strong bilong em na dispela i helpim em long amamas long mekim yet wok bilong Jehova.—Sng. 18:​28-32.

16. Olsem wanem pasin laikim bilong Jehova i givim nupela strong long yu?

¹⁶ Long nau tu, “Jehova i gat gutpela pasin laikim, olsem na yumi no bagarap olgeta” taim yumi bungim ol bikpela hevi na ol hatwok. (Kra. 3:22; Kol. 1:11) Tingim eksampel bilong Rachel. Em i bel hevi tru taim man bilong em i lusim em na lusim Jehova tu long taim bilong COVID-19 pendemik. Jehova i mekim wanem bilong helpim Rachel? Em i tok: “Jehova i mekim ol samting na bai mi ken pilim olsem em i laikim mi. Em i givim mi ol pren em ol i spendim taim wantaim mi, bringim kaikai i kam long mi, salim ol mesis i gat ol gutpela tok na ol skripsa, ol i smail long mi, na ol i wok yet long kirapim mi long pilim olsem Jehova i tingim mi. Oltaim mi tenkyu long Jehova olsem em i givim mi wanpela bikpela famili em ol i laikim mi.”

17. Wai na Devit i “no pret long wanpela samting”?

¹⁷ “Mi no pret long wanpela samting. Long wanem, yu stap wantaim mi.” Planti taim Devit i bungim taim nogut, na planti birua bilong em ol i gat bikpela strong. Tasol pasin laikim bilong Jehova i mekim em i pilim seif na em i pilim olsem Jehova i lukautim em. Devit inap pilim olsem Jehova i stap wantaim em long olgeta samting em i mekim na dispela i strongim em. Olsem na em i singsing olsem: “[Jehova] i rausim olgeta pret bilong mi, na mi no pret moa.” (Sng. 34:4) Maski sampela taim Devit i pret nogut tru, em i daunim pret bilong em bikos em i save olsem Jehova i laikim em.

18. Taim yu save olsem Jehova i laikim yu, olsem wanem dispela inap strongim yu taim yu pret?

¹⁸ Taim yumi save olsem Jehova i laikim yumi, olsem wanem dispela inap strongim yumi taim  yumi bungim ol bikpela hevi we i mekim yumi pret? Wanpela painia nem bilong em Susi, em i stori long samting em na man bilong em i pilim taim pikinini man bilong ol i suasaid, em i tok: “Taim wanpela bikpela hevi i painim yu wantu tasol, dispela inap bagarapim tru bel na tingting bilong yu, na yu bai pilim olsem i no gat rot long yu kisim helpim. Tasol pasin sori bilong Jehova i mekim mipela i pilim seif na mipela i pilim olsem em i lukautim mipela.” Rachel, em yumi stori pinis long em, em i tok: “Wanpela nait mi pilim bikpela bel sori tru na mi wari na mi pret nogut tru, na mi krai na beten strong long Jehova. Long dispela taim stret, mi pilim olsem Jehova i mekim isi bel bilong mi na mi no pret moa na mi slip, wankain olsem wanpela mama i save mekim bebi bilong em i stap isi. Mi no inap tru long lusim tingting long dispela taim.” Wanpela elda nem bilong em Tasos, em i stap 4-pela yia long kalabus bikos em i no laik insait long ami. Olsem wanem em i pilim pasin bilong Jehova long laikim em na tingim em? Em i tok: “Jehova i lukautim mi long ol samting mi nidim, na em i mekim planti samting moa. Dispela i strongim mi long bilip tru olsem mi ken trastim em tru. Na tu, long rot bilong holi spirit bilong Jehova, em i mekim mi stap amamas maski kalabus em wanpela ples ol man i no save stap amamas. Dispela i helpim mi long bilip tru olsem taim mi pas gut moa wantaim Jehova, mi bai pilim tru pasin laikim bilong em. Olsem na mi kirap long mekim wok painia oltaim taim mi stap long kalabus.”

GO KLOSTU LONG GOD BILONG SORI TRU

19. (a) Taim yumi save olsem God i laikim yumi, dispela bai kirapim yumi long beten olsem wanem? (b) Yu laikim wanem ol tok i stori long pasin laikim bilong Jehova? (Lukim blok “ Ol Tok i Helpim Yumi Long Pilim Gutpela Pasin Laikim Bilong Jehova.”)

¹⁹ Olgeta ekspiriens em yumi stori long en i kamapim klia olsem Jehova em “God bilong pasin laikim,” em i stap wantaim yumi! (2 Kor. 13:11) Em i save tingim yumi olgeta wan wan. Yumi bilip tru olsem “gutpela pasin laikim bilong em [i] lukautim” yumi. (Sng. 32:10) Taim yumi tingim tingim long bel ol rot em i soim pasin laikim long yumi, dispela bai strongim tru bilip bilong yumi olsem em i tingim yumi, na yumi bai pilim olsem yumi pas gut moa wantaim em. Yumi ken beten na askim em long mekim pasin laikim long yumi. Yumi ken tokim em long olgeta samting yumi tingting planti long en na yumi ken bilip tru olsem em i kliagut long olgeta hevi yumi karim na em i laik tru long helpim yumi.—Sng. 145:​18, 19.

20. Olsem wanem pasin laikim bilong Jehova i mekim yumi i go klostu moa long em?

²⁰ Taim ples i kol, yumi save laik tru long pilim hat bilong paia, olsem tasol, taim yumi gat hevi yumi laik tru long pilim pasin laikim bilong Jehova. Maski pasin laikim bilong Jehova i gat bikpela strong, dispela pasin i save kirapim em tu long mekim pasin isi long ol man. So yu ken amamas bikos Jehova i laikim yu. Jehova i laikim yumi, olsem na yumi olgeta i ken mekim dispela tok olsem: “Mi laikim Jehova”!—Sng. 116:1.