1. Wai na Memorial em i nambawan bikpela de bilong yia? (Luk 22:​19, 20)

 LAIN bilong Jehova i tingim Memorial bilong dai bilong Krais olsem nambawan bikpela de bilong yia. Dispela em i wanpela bung tasol we Jisas i bin tokim ol disaipel bilong em long ol i mas mekim. (Ritim Luk 22:​19, 20.) I gat planti risen na yumi luk fowed long bung bilong Memorial. Yumi ken stori long sampela bilong ol dispela risen.

2. I gat wanem sampela risen na yumi luk fowed long bung bilong Memorial?

² Bung bilong Memorial i helpim yumi long tingim olsem wanem pe bilong baim bek man em i bikpela samting tru. Em i kirapim yumi long tingim ol rot we yumi ken soim tenkyu bilong yumi long ofa bilong Jisas. (2 Kor. 5:​14, 15) Na tu, em i opim rot long yumi inap ‘strongim ol bratasista bilong yumi na ol i strongim yumi.’ (Rom 1:12) Long olgeta wan wan yia, planti lain i lusim miting na wok autim tok ol i save kam long dispela bung. Sampela i kam bek long Jehova bikos long pasin laikim ol bratasista i soim long ol long taim bilong Memorial. Na planti nupela lain i kam, ol i save amamas long ol samting ol i lukim na harim na dispela i kirapim ol long stadi long Baibel. Olgeta dispela samting i mekim na Memorial em i spesel tru long yumi!

3. Olsem wanem Memorial i bungim lain bilong Jehova em ol i stap long olgeta hap bilong graun? (Lukim tu piksa.)

³ Tingim, Memorial i bungim lain bilong Jehova em ol i stap long olgeta hap bilong graun. Long olgeta hap bilong graun, ol Witnes Bilong Jehova i save bung wantaim bilong mekim Memorial taim san i go daun. Yumi olgeta i save harim wanpela tok i stori gut olsem pe bilong baim bek man em i bikpela samting. Yumi save mekim tupela singsing bilong preisim Jehova, tilim bret na wain, na long bel olgeta yumi save tok “amen” long fopela beten. Insait long 24 aua, olgeta kongrigesen i bihainim wankain pasin. Yu inap piksaim long tingting olsem Jehova na Jisas i amamas taim ol i lukim yumi olgeta i bung wantaim long olgeta hap bilong graun bilong onarim tupela long dispela rot?

4. Yumi bai stori long wanem samting long dispela atikol?

 ⁴ Long dispela atikol, yumi bai kisim bekim bilong ol dispela askim: Olsem wanem yumi ken redim bel bilong yumi long tingim Memorial? Olsem wanem yumi ken helpim ol narapela long kisim helpim long dispela bung? Na olsem wanem yumi ken helpim ol lain em ol i lusim miting na wok autim tok? Bekim bilong ol dispela askim bai helpim yumi long redi long dispela spesel bung bai kamap.

OLSEM WANEM YUMI KEN REDIM BEL BILONG YUMI LONG TINGIM MEMORIAL?

5. (a) Wai na yumi mas tingim olsem pe bilong baim bek man em i bikpela samting? (Buk Song 49:​7, 8) (b) Yu lainim wanem samting long vidio Bilong Wanem Jisas i Dai?

⁵ Wanpela gutpela rot yumi ken redim bel bilong yumi long tingim Memorial em long tingim olsem wanem ofa bilong Jisas Krais long baim bek yumi em i bikpela samting. Yumi yet i no inap mekim wanpela samting bilong lusim kalabus bilong sin na dai. (Ritim Buk Song 49:​7, 8; lukim tu vidio Bilong Wanem Jisas i Dai?) a Olsem na Jehova i stretim rot bilong Jisas i ken givim laip bilong em bilong kisim bek yumi. Jehova na Jisas wantaim i mekim bikpela samting tru bilong helpim yumi. (Rom 6:23) Taim yumi kisim pasin bilong tingim tingim long bel samting em Jehova na Jisas i bin mekim bilong helpim yumi, dispela bai strongim pasin bilong yumi long pilim tru pe bilong baim bek man. Yumi bai stori long sampela samting em Jehova na Jisas i bin mekim bilong kisim bek yumi, maski i gat hatwok bilong en. Tasol pastaim yumi bai stori long wanem ol samting i insait long pe bilong baim bek man.

6. Wanem ol samting i insait long pe bilong baim bek man?

⁶ Pe bilong baim bek man em pe man i save givim bilong baim bek wanpela samting. Taim God i wokim namba wan man Adam, em i gutpela olgeta. Taim Adam i mekim sin, em i lus long kisim laip oltaim, na tu, em i pasim rot long ol pikinini bilong em inap kisim laip oltaim. Bilong baim bek samting Adam i bin lusim, Jisas i givim laip bilong em i gutpela olgeta olsem ofa. Long laip olgeta bilong Jisas taim em i stap long graun, em “i no bin mekim sin, na i no gat wanpela tok giaman i bin kamap long maus bilong em.” (1 Pita 2:22) Olsem na taim Jisas i givim laip bilong em olsem ofa, em i givim laip i gutpela olgeta wankain olsem laip em Adam i bin lusim.—1 Kor. 15:45; 1 Tim. 2:6.

7. Wanem sampela traim Jisas i bin bungim taim em i stap long graun?

⁷ Taim Jisas i stap long graun, em i bihainim gut tok bilong Jehova long olgeta samting, maski sampela taim i hatwok long mekim olsem. Taim Jisas i liklik, em i daun long wok bos bilong papamama bilong em, em ol i no gutpela olgeta maski em yet i gutpela olgeta. (Luk 2:51) Taim em i tineja, em i daunim ol presa we inap mekim na em i sakim tok bilong papamama bilong em o i no stap gut long God. Na taim Jisas i kamap bikpela man, em i sanap strong na sakim ol traim i kam long Satan dispela Devil. Dispela i makim tu ol traim em Satan i kamapim bilong mekim Jisas i lusim pasin bilong em long stap gut long God. (Mat. 4:​1-11) Satan i tingting strong long pundaunim Jisas na bai em i mekim sin na em i no givim pe bilong baim bek man.

8. Jisas i bungim wanem ol narapela traim?

⁸ Taim Jisas i stap long graun, em i bungim ol narapela traim. Ol man i birua long em na traim long kilim em i dai. (Luk 4:​28, 29; 13:31) Na tu, taim ol disaipel bilong em i mekim ol popaia, dispela inap traim pasin bilong em long i no les kwik long ol. (Mak 9:​33, 34) Taim ol i kotim em bilong kilim em i dai, ol i mekim nogut long em na tok bilas long em. Em i karim bikpela pen na hevi tru na ol i kilim em i dai olsem wanpela man nogut. (Hib. 12:​1-3) Em i sanap strong na karim  dispela traim, na long dispela taim Jehova i no lukautim em. b—Mat. 27:46.

9. Yumi pilim olsem wanem long ofa bilong Jisas? (1 Pita 1:8)

⁹ Tru tumas, Jisas i karim bikpela pen na hevi tru bilong givim laip bilong em olsem ofa bilong baim bek yumi. Yumi laikim tru Jisas taim yumi tingim olgeta samting em i redi long mekim bilong helpim yumi.—Ritim 1 Pita 1:8.

10. Jehova i mekim wanem bilong redim pe bilong baim bek man?

¹⁰ Olsem wanem long Jehova? Em i redi long mekim wanem na bai Jisas i ken givim pe bilong baim bek man? Jehova na Jisas i pas gut tru winim pasin pren namel long tupela papa na pikinini. (Prov. 8:30) Orait tingim, Jehova i pilim olsem wanem long lukim Jisas i karim pen na hevi taim em i stap long graun. Tru tumas, Jehova i pilim bikpela bel pen tru taim em i lukim ol man i mekim nogut long Pikinini bilong em, sakim em, na givim pen long em.

11. Stori long Jehova i pilim olsem wanem taim em i lukim ol man i kilim i dai Jisas.

¹¹ Ol papamama em wanpela pikinini bilong ol i dai, ol i save long bikpela bel sori em ol papamama i save pilim taim pikinini i dai. Yumi bilip strong long kirap bek, tasol dispela i no inap tekewe bel sori yumi save pilim taim wanpela yumi laikim tru i dai. Dispela eksampel i helpim yumi long kliagut long Jehova i pilim olsem wanem taim em i lukim Pikinini em i laikim tumas i karim pen na hevi na dai long dispela de bilong yia 33 C.E. c—Mat. 3:17.

12. Yumi ken mekim wanem long ol wik paslain long Memorial?

¹² Kirap long nau na i go inap long taim bilong Memorial, yu ting yu ken mekim wanpela pesenel stadi projek o Famili Lotu projek bilong kisim sampela save moa long pe bilong baim bek man? Yusim Research Guide for Jehovah’s Witnesses (sapos i stap long tokples bilong yu) o ol narapela tul bilong stadi long Baibel bilong helpim yu long save gut moa long dispela topik. d Na tu, yu ken bihainim sediul bilong Memorial Baibel ritim i stap long Kristen Laip na Wok Autim Tok—Miting Wok Buk. Na long de bilong Memorial, no ken lusim tingting long watsim spesel Moning Wosip program. Taim yumi redim bel bilong yumi yet long mekim Memorial, yumi bai redi long helpim ol narapela long kisim helpim tu long dispela bung.—Esr. 7:10.

 HELPIM OL NARAPELA LONG KISIM HELPIM

13. Wanem namba wan samting yumi ken mekim bilong helpim ol narapela long kisim helpim long Memorial?

¹³ Olsem wanem yumi ken helpim ol narapela long kisim helpim long Memorial? Namba wan samting yumi ken mekim em yumi ken invaitim ol. Yumi save invaitim ol lain yumi bungim taim yumi autim tok, na tu, yumi ken mekim lista bilong ol lain em yumi save long ol so yumi ken invaitim ol. Yumi ken invaitim ol wanblut bilong yumi, ol wanwok, ol wanskul, na ol narapela. Sapos yumi no gat inap kopi bilong ol invatesen em ol i prinim, yumi ken salim link bilong invatesen i go long ol long fon o teblet bilong ol. Yumi inap kirap nogut long lukim planti i kam long dispela bung!—Ekl. 11:6.

14. Taim yu givim invatesen long wanpela yu save long em, olsem wanem dispela inap kamapim gutpela samting? Stori long dispela.

¹⁴ Taim yu givim invatesen bilong Memorial long wanpela yu save long em, dispela inap kirapim em long kam long dispela bung. Wanpela taim, wanpela sista i kirap nogut taim man bilong em husat i no Witnes i amamas na tokim em olsem em bai go wantaim em long Memorial. Wai na dispela sista i kirap nogut? Bikos planti taim long bipo em i save tokim man bilong em long kam long Memorial, tasol em i no save kam. Wanem samting i mekim na nau em i laik kam? Man bilong em i tok: “Wanpela i givim mi invatesen.” Em i tokim meri bilong em olsem wanpela elda husat i save long em i invaitim em long kam. Man bilong em i kam long dispela Memorial, na em i kam long ol Memorial i kamap long ol yia bihain tu.

15. Yumi laik tingim wanem samting taim yumi invaitim ol lain i kam long Memorial?

¹⁵ Tingim olsem, ol lain em yumi invaitim ol, ol inap i gat ol askim—moa yet sapos ol i no bin kam long wanpela miting bilong yumi long bipo. Yumi laik tingim ol askim em ol inap kamapim na redi long bekim ol dispela askim. (Kol. 4:6) Olsem, sampela inap tingting: ‘Wanem samting bai kamap long dispela bung?’ ‘Dispela bung em hamas aua?’ ‘I gat lo long wanem klos mi mas werim?’ ‘I gat sampela fi mi mas baim?’ ‘Ol bai kolektim mani long dispela bung?’ Taim yumi laik invaitim wanpela i kam long Memorial, yumi ken askim em olsem, “Yu gat sampela askim?” na  sapos em i gat ol askim, orait yumi ken bekim ol askim bilong em. Na tu, yumi ken yusim ol dispela vidio Tingim Dai Bilong Jisas na Wanem Samting i Save Kamap Long Haus Kingdom? bilong helpim em long kliagut long hau yumi save mekim ol miting bilong yumi. Na lesen 28 bilong buk Stap Amamas Oltaim! i kamapim planti gutpela poin em yumi ken stori wantaim em long en.

16. Ol lain em ol i kam long Memorial, ol inap i gat wanem ol narapela askim?

¹⁶ Bihain long ol i kam long Memorial, ol man em ol i gat laik long kisim sampela save moa, ol inap i gat sampela moa askim. Ol inap tingting olsem wai na i no gat wanpela i kisim bret na wain, o wai na sampela tasol i kisim bret na wain. Na tu, ol inap i gat askim olsem hamas taim yumi save mekim bung bilong Memorial. Na ating ol i laik save sapos ol Witnes Bilong Jehova i save bihainim wankain pasin long mekim olgeta miting bilong ol. Maski brata i mekim Memorial tok i stori long planti bilong ol dispela poin, i gutpela yumi stori gut gen long ol dispela samting wantaim ol nupela manmeri i bin kam. Long jw.org, dispela atikol em nem bilong en “Wai na Bung Bilong Kaikai Bilong Bikpela Em Ol Witnes Bilong Jehova i Save Mekim i No Wankain Long Ol Narapela Lotu?” inap helpim yumi long bekim sampela askim bilong ol. Paslain long Memorial, taim bilong Memorial, na bihain long Memorial, yumi mas wok strong long helpim “olgeta manmeri em bel bilong ol i gutpela” long kisim helpim long dispela bung.—Apo. 13:48.

HELPIM OL LAIN I LUSIM MITING NA WOK AUTIM TOK

17. Olsem wanem ol elda i ken helpim ol lain i lusim miting na wok autim tok? (Esekiel 34:​12, 16)

¹⁷ Klostu long taim bilong Memorial, olsem wanem ol elda i ken helpim ol lain i lusim miting na wok autim tok? Soim ol olsem yu tingim ol. (Ritim Esekiel 34:​12, 16.) Paslain long Memorial, kontektim planti bilong ol dispela bratasista. Tokim ol olsem yu tingim ol na yu laik tru long helpim ol. Invaitim ol i kam long Memorial. Sapos ol i kam, amamas long welkamim ol. Bihain long Memorial, wok yet long visitim ol o ringim ol, na givim ol helpim ol i nidim long sait bilong bilip na bai ol i ken kam bek long Jehova.—1 Pita 2:25.

18. Olsem wanem yumi olgeta i ken helpim ol lain i lusim miting na wok autim tok? (Rom 12:10)

 ¹⁸ Olgeta insait long kongrigesen i ken helpim ol lain i lusim miting na wok autim tok. Hau ol i ken mekim olsem? Long rot bilong mekim pasin laikim, gutpela pasin, na pasin rispek long ol. (Ritim Rom 12:10.) Tingim olsem ol dispela bratasista em ol i dia tumas, ating ol i bin surik liklik long kam long miting. Ating ol i pret olsem ol bratasista i no inap welkamim ol o toktok long ol taim ol i kam long miting. e So sakim pasin bilong givim ol askim we inap semim ol o mekim ol tok we inap bagarapim bel bilong ol. (1 Tes. 5:11) Ol dispela bratasista ol i wanbilip bilong yumi. Yumi amamas long ol i kam bung gen wantaim yumi bilong lotuim Jehova!—Sng. 119:176; Apo. 20:35.

19. Wanem gutpela samting i save kamap taim yumi tingim dai bilong Jisas?

¹⁹ Yumi amamas olsem Jisas i tokim yumi long tingim dai bilong em long olgeta wan wan yia, na yumi kliagut long risen na dispela em i bikpela samting. Taim yumi mekim olsem, dispela i helpim yumi yet na ol narapela long planti rot. (Ais. 48:​17, 18) Em i strongim pasin bilong yumi long laikim Jehova na Jisas. Yumi soim olsem yumi tenkyu tru long samting ol i bin mekim bilong helpim yumi. Yumi strongim pasin bilong yumi long pas gut wantaim ol wanbilip bilong yumi. Na yumi inap helpim ol narapela long kisim save long hau ol tu i ken kisim ol blesing em pe bilong baim bek man i opim rot long yumi kisim. Olsem na yumi ken mekim olgeta samting bilong redi long Memorial bai kamap long dispela yia—em nambawan bikpela de bilong yia!