1. Yumi ken mekim wanem bilong amamasim Jehova?

 PIKSAIM long tingting olsem yu givim presen long wanpela yu laikim tru, na dispela presen i luk nais tru na em inap yusim long mekim gutpela wok. Ating yu bai bel hevi tru sapos em i putim dispela presen insait long wanpela boks na em i no tingim moa dispela presen! Tasol yu bai amamas tru sapos em i yusim gut dispela presen na em i tok tenkyu long yu givim dispela presen long em. Wanem poin bilong dispela tok piksa? Jehova i givim Pikinini bilong em bilong helpim yumi. Olsem na Jehova i save amamas tru taim yumi soim tenkyu bilong yumi long dispela naispela presen na long pasin laikim bilong em we i bin kirapim em long givim pe bilong baim bek man!—Jon 3:16; Rom 5:​7, 8.

2. Yumi bai stori long wanem samting long dispela atikol?

² Bihain long ol yia i lus, ating yumi no moa pilim tru ofa bilong baim bek man em Jehova i givim long yumi olsem presen. I olsem yumi putim dispela presen insait long wanpela boks. Yumi amamas long kisim, tasol yumi lusim tingting long en. Bilong helpim yumi long no ken mekim olsem, oltaim yumi mas tingting long samting God na Krais i mekim bilong helpim yumi. Dispela atikol i ken helpim yumi long mekim olsem. Yumi bai stori long hau pe bilong baim bek man i helpim yumi long nau na hau em inap helpim yumi long bihain tu. Yumi bai stori tu long hau yumi ken soim tenkyu bilong yumi long pasin laikim bilong Jehova, moa yet long dispela haptaim bilong Memorial.

HELPIM YUMI KISIM LONG NAU

3. Wanem wanpela rot pe bilong baim bek man i helpim yumi long nau?

³ Long nau yet, yumi wok long kisim helpim long ofa bilong baim bek man em Krais i bin givim. Olsem, long rot bilong dispela ofa, Jehova i save fogivim ol sin bilong yumi. I no olsem em i mas fogivim yumi. Tasol em i laik mekim olsem. Man bilong raitim song i  pilim tru pasin bilong Jehova long fogivim yumi, na em i tok: “O Jehova, yu gutpela tru na yu save redi long fogivim ol sin bilong mipela.”—Sng. 86:5; 103:​3, 10-13.

4. Jehova i givim pe bilong baim bek man bilong helpim husat? (Luk 5:32; 1 Timoti 1:15)

⁴ Sampela inap pilim olsem ol i no gutpela inap long Jehova i fogivim ol. Tru tru, yumi olgeta i no gutpela inap long Jehova i fogivim yumi. Aposel Pol i kliagut olsem em i “no gutpela man inap long ol i kolim [em] wanpela aposel.” Tasol em i tok: “Long rot bilong bikpela pasin helpim bilong God mi kisim dispela wok.” (1 Kor. 15:​9, 10) Taim yumi tanim bel long ol sin bilong yumi, Jehova i save fogivim yumi. Wai? Bikos em i laikim yumi na i no bikos yumi gutpela inap long em i ken fogivim yumi, nogat. Sapos yu pilim olsem yu no gutpela inap long God i ken fogivim yu, orait tingim olsem Jehova i givim pe bilong baim bek man bilong helpim ol sinman i tanim bel na i no bilong helpim ol manmeri em ol i no gat sin.—Ritim Luk 5:32; 1 Timoti 1:15.

5. Yu ting i stret long Jehova i mekim pasin marimari long yumi? Stori long dispela.

⁵ Yumi no ken pilim olsem i stret long Jehova i marimari long yumi, maski yumi bin mekim wok bilong em inap planti yia. Em tru olsem Jehova i tingim ol wok bilong em yumi bin mekim. (Hib. 6:10) Em i givim Pikinini bilong em olsem presen i fri long yumi, na i no bikos em i baim yumi long ol wok bilong em yumi mekim, nogat. Sapos yumi pilim olsem i stret long Jehova i mekim pasin marimari long yumi o yumi pilim olsem yumi mekim planti wok bilong em so em i mas fogivim yumi, orait i olsem yumi tok Krais i dai nating.—Skelim Galesia 2:21.

6. Wai na Pol i wok hat long mekim wok bilong Jehova?

⁶ Pol i save olsem maski em i mekim planti wok bilong Jehova, dispela i no makim olsem i stret Jehova i fogivim em, nogat. So wai na em i givim bel olgeta long mekim wok bilong Jehova? Em i mekim olsem bikos em i pilim tru bikpela pasin helpim Jehova i mekim long em, na i no bikos em i laik soim olsem i stret long Jehova i fogivim em. (Efe. 3:7) Olsem Pol, yumi wok yet long givim bel olgeta long mekim wok bilong Jehova bilong soim tenkyu bilong yumi long pasin marimari bilong em, na i no bikos yumi laik soim Jehova olsem i stret em i mekim pasin marimari long yumi, nogat.

7. Wanem narapela rot pe bilong baim bek man i helpim yumi long nau? (Rom 5:1; Jems 2:23)

⁷ Narapela rot pe bilong baim bek man i helpim yumi long nau em olsem, yumi inap pas gut wantaim Jehova olsem pren bilong em. a Olsem yumi bin stori long atikol i go pinis, taim yumi bon, yumi no bin stap pren bilong God. Tasol long rot bilong pe bilong baim bek man, yumi inap ‘stap wanbel wantaim God’ na yumi inap i go klostu long em.—Ritim Rom 5:1; Jems 2:23.

8. Wai na yumi mas tenkyu long Jehova i opim rot long yumi inap beten long em?

⁸ Tingim wanpela spesel samting i insait long pasin pren bilong yumi wantaim Jehova—yumi inap beten long em. Jehova i save putim yau long ol beten bilong ol manmeri bilong em taim ol i bung wantaim, na tu, em i save putim yau long ol beten bilong yumi wan wan. Beten i ken mekim isi bel na tingting bilong yumi, na mekim sampela samting moa. Em inap strongim pasin pren bilong yumi wantaim God. (Sng. 65:2; Jems 4:8; 1 Jon 5:14) Taim Jisas i stap long graun, planti taim em i beten bikos em i save olsem Jehova i wok long putim yau long em, na em i save tu olsem pasin bilong beten bai strongim pasin bilong em long pas gut wantaim Papa bilong em. (Luk 5:16) Yumi amamas tru olsem long rot bilong ofa bilong Jisas, yumi inap stap olsem ol pren bilong Jehova, na tu, yumi inap toktok wantaim Em long rot bilong beten!

 HELPIM YUMI INAP KISIM LONG BIHAIN

9. Hau pe bilong baim bek man inap helpim lain bilong Jehova long bihain?

⁹ Hau pe bilong baim bek man inap helpim lain bilong Jehova long bihain? Ol bai kisim laip oltaim. Planti man i ting olsem i no gat rot bilong stap laip oltaim bikos inap planti tausen yia ol man i dai. Tasol taim God i wokim Adam na Iv, laik bilong Em i olsem ol manmeri i mas stap laip oltaim. Sapos Adam i no bin mekim sin, ol man bai i no tingim laip oltaim olsem wanpela driman nating, nogat. Na long nau maski i hatwok long piksaim long tingting olsem yumi inap stap laip oltaim, yumi inap bilipim tru dispela tok bikos yumi save olsem Jehova i givim pe i antap tumas—laip bilong Pikinini bilong em—bilong opim rot long yumi ken stap laip oltaim.—Rom 8:32.

10. Ol Kristen God i bin makim na lain arapela sipsip i bilip na wet long wanem samting?

¹⁰ Maski laip oltaim em blesing yumi bai kisim long bihain, Jehova i laik bai yumi tingting long en long nau. Ol Kristen God i bin makim ol i bilip na wet long kisim laip long heven na mekim wok king wantaim Krais na bosim ol manmeri long graun. (Rev. 20:6) Lain arapela sipsip i bilip na wet long stap laip oltaim long paradais long graun we i no gat pen na hevi na pasin bilong krai sori. (Rev. 21:​3, 4) Yu wanpela bilong lain arapela sipsip em ol i bilip na wet long stap laip oltaim long graun? Dispela em i gutpela blesing tru yu kisim long stap laip oltaim long graun wankain olsem ol Kristen God i bin makim i kisim gutpela blesing long stap laip long heven! God i bin disainim ol man long stap laip oltaim. Tru tumas, yumi bai amamas tru long stap laip oltaim long graun.

11-12. Wanem sampela blesing long Paradais em yumi bilip na wet long en? (Lukim tu ol piksa.)

¹¹ Piksaim long tingting laip bilong yu bai olsem wanem long Paradais long graun long bihain. Yu no inap tingting planti na wari long sik na dai. (Ais. 25:8; 33:24) Jehova bai givim yu olgeta samting i gutpela em yu laikim. Yu laik stadim wanem ol samting? Yu laik stadim ol kain kain animal? Yu laik lain long pilaim wanpela musik instramen? Yu laik lain long droim gut ol piksa? Long Paradais, yumi bai nidim ol fama na ol man i gat save long disainim na bildim ol haus.  Na tu, bai yumi nidim ol man i gat save long planim kaikai na redim kaikai, wokim ol tul, na planim ol naispela plaua gaden samting na lukautim ol. (Ais. 35:1; 65:21) Yu bai stap laip oltaim, so yu bai gat olgeta taim long lain long mekim ol dispela wok na planti narapela skil tu.

¹² Yumi bai amamas tru long welkamim bek ol lain i dai pinis em ol i kirap bek! (Apo. 24:15) Na tingim tu olsem yu bai amamas long kisim sampela save moa long Jehova taim yu lain long planti samting long kriesen em i bin wokim. (Sng. 104:24; Ais. 11:9) Na bikpela samting moa, yumi bai amamas long lotuim Jehova na bel i no inap kotim yumi long wanpela samting! Yu ting yu bai tromoi blesing bilong i stap laip oltaim long Paradais na bai yu ken “kisim amamas bilong sotpela taim tasol”? (Hib. 11:25) Nogat, yu no inap mekim olsem! Gutpela sindaun yumi bai kisim long bihain bai winim tru olgeta samting bilong graun em yumi mas lusim long nau. Tingim, Paradais long graun em samting yumi bilip na wet long en, tasol yumi no inap wet long en inap oltaim, nogat. Bihain, tru tru yumi bai stap laip long Paradais long graun. Dispela samting bai kamap tru bikos Jehova i laikim yumi tru na em i givim Pikinini bilong em olsem presen bilong helpim yumi!

SOIM TENKYU LONG PASIN LAIKIM BILONG JEHOVA

13. Hau yumi ken soim tenkyu bilong yumi long pasin laikim bilong Jehova? (2 Korin 6:1)

¹³ Hau yumi ken soim tenkyu bilong yumi long Jehova i bin givim pe bilong baim bek man? Yumi mekim olsem taim yumi putim wok bilong em i stap nambawan samting long laip bilong yumi. (Mat. 6:33) Tingim, Jisas i dai “bilong helpim olgeta man olsem bai ol man i stap laip ol i no ken bihainim laik bilong ol yet, nogat. Ol i mas bihainim laik bilong dispela man husat i kisim ples bilong ol na i dai na i kirap bek tu.” (2 Kor. 5:15) Tru tumas, yumi no laik lusim tingting long risen na Jehova i mekim bikpela pasin helpim long yumi.—Ritim 2 Korin 6:1.

14. Hau yumi ken soim olsem yumi trastim na bihainim ol daireksen Jehova i givim long yumi?

¹⁴ Narapela rot we yumi ken soim olsem yumi pilim tru pasin laikim bilong Jehova em yumi mas trastim em na bihainim daireksen em i givim. Hau yumi ken mekim olsem? Taim yumi gat wok long mekim ol disisen, olsem hamas ediukesen yumi mas kisim o wanem kain wok mani yumi mas mekim, yumi mas skelim tingting Jehova i gat long ol dispela samting. (1 Kor. 10:31; 2 Kor. 5:7) Taim yumi mekim ol samting bilong soim bilip bilong yumi, gutpela samting i kamap long dispela—bilip bilong yumi long Jehova na pasin pren bilong yumi wantaim em bai kamap strong moa. Na tu, yumi bai strongim bilip bilong yumi long stap laip oltaim.—Rom 5:​3-5; Jems 2:​21, 22.

15. Long haptaim bilong Memorial, hau yumi inap soim tenkyu bilong yumi?

¹⁵ I gat narapela samting yumi ken mekim bilong soim olsem yumi pilim tru pasin laikim bilong Jehova. Yumi ken yusim haptaim bilong Memorial long soim olsem yumi tenkyu long pe bilong baim bek man. Yumi ken stretim ol samting  na bai yumi go long Memorial, na tu, yumi ken invaitim ol narapela long kam long dispela spesel bung. (1 Tim. 2:4) Eksplenim long ol lain em yu invaitim ol long wanem samting bai kamap long Memorial. Yu ken soim long ol dispela tupela vidio, Bilong Wanem Jisas i Dai? na Tingim Dai Bilong Jisas long jw.org. Ol elda i mas invaitim ol pablisa i lusim wok autim tok na miting inap longpela taim. Tingim bikpela amamas i kamap long heven na long graun taim sampela sipsip bilong Jehova em ol i lus, ol i kam bung gen wantaim bikpela lain sipsip bilong em! (Luk 15:​4-7) Long taim bilong Memorial, yumi mas gritim narapela narapela, na tu, gritim ol nupela lain o ol lain em ol i no kam long Memorial inap longpela taim. Yumi laik bai ol i pilim olsem ol i welkam long dispela bung!—Rom 12:13.

16. Wai na yumi mas tingting long mekim bikpela wok moa long autim tok long haptaim bilong Memorial?

¹⁶ Yu ting yu inap mekim bikpela wok moa long autim tok long haptaim bilong Memorial? Taim yu mekim olsem, yu soim tenkyu bilong yu long olgeta samting em God na Krais i bin mekim bilong helpim yu. Taim yumi givim bel moa yet long mekim wok bilong Jehova, yumi bai pilim tru sapot bilong em na dispela bai strongim pasin bilong yumi long trastim em. (1 Kor. 3:9) Na tu, bihainim Memorial Baibel ritim sediul i stap long buklet Skelim Sampela Tok Bilong Baibel Long Olgeta De o long sat i stap long miting wok buk bilong ol miting i kamap namel long wik. Na tu, yu inap yusim ol dispela ves bilong Baibel long mekim stadi projek bilong yu yet.

17. Wanem samting i save amamasim Jehova? (Lukim tu blok “ Ol Rot Yu Inap Soim Olsem Yu Pilim Tru Pasin Laikim Bilong Jehova.”)

¹⁷ Ating sindaun bilong yu i mekim na i hatwok long yu mekim olgeta samting em dispela atikol i stori long en. Tasol tingim, Jehova i save lukim bel bilong yu, na em i no skelim hamas wok yu mekim wantaim wok ol narapela i mekim, nogat. Em i save amamas taim em i lukim olsem long bel yu pilim tru na tenkyu tru long gutpela presen em i givim long yu, em pe bilong baim bek man.—1 Sml. 16:7; Mak 12:​41-44.

18. Wai na yumi tenkyu tru long God Jehova na Jisas Krais?

¹⁸ Long rot bilong ofa bilong baim bek man, God i ken fogivim ol sin bilong yumi, yumi inap stap pren bilong Em, na rot i op long yumi inap kisim laip oltaim. Olsem na oltaim yumi mas soim tenkyu bilong yumi long pasin laikim bilong Jehova we i kirapim em long givim yumi ol gutpela blesing. (1 Jon 4:19) Oltaim yumi mas soim tenkyu bilong yumi long Jisas, em i laikim yumi tru na em i givim laip bilong em bilong baim bek yumi!—Jon 15:13.