STADI ATIKOL 3
SINGSING 35 “Skelim Gut Wanem Ol Samting i Bikpela Samting Moa”
Mekim Ol Disisen i Amamasim Jehova
“Pasin bilong pret long Jehova, em i stat bilong savetingting, na save bilong God Holi Tru i save givim pasin bilong kliagut long ol samting.”—PROV. 9:10.
SKUL YUMI BAI KISIM
Hau yumi ken yusim save, pasin bilong kliagut long ol samting, na pasin bilong skelim gut ol samting long mekim ol gutpela disisen.
1. Wanem sampela hatwok em yumi olgeta i save bungim?
LONG olgeta de yumi mas mekim ol disisen. Sampela disisen em isi long mekim, olsem bai yumi kaikai wanem samting long moning o wanem taim bai yumi slip long nait. Tasol sampela narapela disisen em hatwok long mekim. Ol dispela disisen inap mekim sampela samting long helt bilong yumi, pasin bilong yumi long stap amamas, famili bilong yumi, na lotu bilong yumi tu. Yumi laik mekim ol disisen we inap helpim yumi yet na famili bilong yumi tu. Na bikpela samting moa, yumi laik bai ol disisen yumi mekim i amamasim Jehova.—Rom 12:1, 2.
2. Yu inap mekim wanem ol samting na bai yu ken mekim ol gutpela disisen?
2 Yu inap mekim ol gutpela disisen sapos yu (1) kisim gut stori, (2) skelim tingting bilong Jehova long dispela samting, na (3) skelim gut ol samting. Dispela atikol bai stori long dispela 3-pela poin, na tu, em bai stori long hau yumi ken kamap gutpela moa long pasin bilong yumi long skelim gut ol samting.—Prov. 2:11.
KISIM GUT STORI
3. Wai na yu mas kisim gut stori paslain long yu mekim disisen? Stori long tok piksa.
3 Fes samting yu ken mekim na bai yu mekim gutpela disisen em yu mas kisim gut stori. Wai na dispela em i bikpela samting? Tingim olsem wanpela sikman i go lukim wanpela dokta bikos em i gat bikpela sik. Yu ting dispela dokta bai hariap long mekim disisen long wanem marasin em bai givim long em na em i no sekim gut sikman na givim em sampela askim? Nogat, em i no inap mekim olsem. Yu tu inap mekim ol gutpela disisen sapos yu kisim gut stori na yu kliagut long ol samting i insait long disisen yu bai mekim. Hau yu inap mekim olsem?
4. Olsem i stret wantaim Provep 18:13, yu inap mekim wanem na bai yu ken save long ol samting bai kamap? (Lukim tu piksa.)
4 Planti taim yu inap kisim gut stori long rot bilong givim sampela askim. Tingim olsem wanpela i invaitim yu long go long wanpela bung. Yu ting yu mas go long dispela bung? Sapos yu no save gut long man i wokim dispela bung na ol samting em i plen long mekim long dispela bung, orait yu ken givim ol kain askim olsem: “Long wanem ples na wanem taim bai dispela bung i kamap? Em bai bikpela o liklik bung? Husat bai lukautim dispela bung? Husat bai go long dispela bung? Wanem sampela ektiviti o amamas em ol i plen long mekim long dispela bung? Bai i gat alkohol long dispela bung?” Ol bekim bilong ol dispela askim bai helpim yu long mekim gutpela disisen.—Ritim Provep 18:13.
Kisim gut stori long rot bilong givim ol askim (Lukim paragraf 4) a
5. Yu mas mekim wanem taim yu save pinis long ol samting bai kamap?
5 Bihain long yu save pinis long ol samting bai kamap, tingting gut long olgeta samting i insait long dispela bung. Olsem wanem sapos yu save olsem ol manmeri em ol i no save bihainim ol stiatok bilong Baibel ol bai go long dispela bung, o yu save olsem bai i gat planti alkohol na ol man i ken dring long laik bilong ol? Yu ting wanem? Dispela bung inap kamap wanpela pati i gat planti pairap? (1 Pita 4:3) O olsem wanem sapos taim bilong dispela bung i wankain long taim bilong yu long go long miting bilong kongrigesen o taim bilong yu long go autim tok? Taim yu tingim olgeta dispela samting, dispela bai helpim yu long mekim gutpela disisen. Tasol i gat narapela samting em yu mas mekim. Yu save pinis long tingting yu gat long dispela bung, tasol Jehova i gat wanem tingting long dispela bung?—Prov. 2:6.
SKELIM TINGTING BILONG JEHOVA
6. Olsem Jems 1:5 i kamapim, wai na yumi mas beten askim Jehova long helpim yumi?
6 Beten askim Jehova long helpim yu long kliagut long tingting bilong em. Jehova i tok promis long givim yumi savetingting na bai yumi inap save olsem disisen yumi mekim bai amamasim em, o nogat. Em i save “givim planti [savetingting] long ol man na em i no save krosim ol taim em i mekim olsem.”—Ritim Jems 1:5.
7. Hau yu ken painimaut tingting Jehova i gat long wanpela samting? Stori long tok piksa.
7 Taim yu beten pinis long Jehova long givim yu daireksen bilong stiaim yu, orait putim gut yau long bekim bilong em. Yumi ken tok piksa olsem: Yu wok long travel i go long wanpela hap na yu luksave olsem yu paul long rot, so yu askim wanpela asples long helpim yu. Yu ting yu bai lusim em na go paslain long em i givim yu ol daireksen bilong stiaim yu long wanem rot yu mas bihainim? Nogat, yu no inap mekim olsem. Yu bai putim gut yau long em taim em i givim ol daireksen long yu. Long wankain pasin, bihain long yu askim Jehova long givim yu savetingting, orait traim long painim bekim bilong Em long rot bilong skelim gut ol lo na ol stiatok bilong Baibel i stret long samting yu laik mekim. Olsem, taim yu laik mekim disisen long yu bai go long bung em yumi stori pinis long en o nogat, orait yu ken tingim tok Baibel i mekim long ol pati i gat planti pairap, long ol poroman nogut, na risen na yumi mas putim wok bilong Kingdom i go pas long ol samting yumi laik mekim.—Mat. 6:33; Rom 13:13; 1 Kor. 15:33.
8. Yu ken mekim wanem sapos yu mas kisim helpim long painim ol tok yu nidim? (Lukim tu piksa.)
8 Sampela taim yu mas kisim helpim long painim ol tok yu nidim. Yu inap kisim ol gutpela tok bilong helpim yu i kam long ol brata o sista i gat bikpela ekspiriens. Tasol yu bai kisim gutpela helpim tu taim yu yet i mekim wok painimaut. I gat planti gutpela tok i stap long ol stadi tul bilong yumi, olsem Risets Gaid Bilong Ol Witnes Bilong Jehova na Ol Skripsa Bilong Kristen Laip. Tingim mak yu laik winim: Yu laik mekim disisen we i amamasim Jehova.
Skelim tingting bilong Jehova (Lukim paragraf 8) b
9. Hau yumi ken save tru olsem disisen yumi mekim bai amamasim Jehova? (Efesus 5:17)
9 Hau yumi ken save tru olsem disisen yumi mekim bai amamasim Jehova? Namba wan samting yumi mas mekim em long save gut long em. Baibel i tok: “Save bilong God Holi Tru i save givim pasin bilong kliagut long ol samting.” (Prov. 9:10) Tru tumas, bilong yumi ken kisim pasin bilong kliagut long ol samting, yumi mas save long ol pasin bilong Jehova, samting em i tingting pinis long mekim, na ol samting em i laikim na heitim. Yu ken askim yu yet olsem, ‘Mi save gut long tingting na pasin bilong Jehova, so mi ken mekim wanem disisen we bai amamasim em?’—Ritim Efesus 5:17.
10. Wai na ol stiatok bilong Baibel i bikpela samting moa winim kastam bilong famili o kalsa bilong ples bilong yumi?
10 Bilong yumi ken amamasim Jehova, sampela taim yumi mas mekim ol disisen em ol wanfamili na ol pren i no inap amamas long en. Olsem, sampela papamama inap strong long pikinini meri bilong ol i mas maritim man i gat planti mani kago—o wanpela man husat inap baim bikpela braid-prais—maski dispela man i no stap strong long sait bilong bilip. Em tru olsem ol i laik bai pikinini meri bilong ol i stap gut na em i gat ol samting bilong skin em i nidim, tasol husat bai helpim em long kamap strong long sait bilong bilip? Jehova i gat wanem tingting long dispela? Yumi lukim bekim i stap long Matyu 6:33. Dispela ves i tok ol Kristen i mas wok yet long “painim Kingdom pastaim.” Tru, yumi laik onarim papamama bilong yumi na soim rispek long ol manmeri long komiuniti, tasol nambawan bikpela samting yumi mas mekim em long amamasim Jehova.
SKELIM GUT OL SAMTING
11. Filipai 1:9, 10 i stori long wanem pasin we bai helpim yu long mekim gutpela disisen?
11 Taim yu skelim pinis ol stiatok bilong Baibel i stret wantaim disisen yu laik mekim, orait nau yu mas skelim gut ol samting. (Ritim Filipai 1:9, 10; lukim stadi nout “full discernment” long Study Bible.) Pasin bilong skelim gut ol samting inap helpim yu long tingim wanem ol samting inap kamap long ol disisen yu mekim. Sampela disisen em isi long mekim. Tasol ol narapela disisen em hatwok liklik long mekim. Maski i olsem, pasin bilong skelim gut ol samting bai helpim yu long mekim ol gutpela disisen tu long ol bikpela samting bilong laip.
12-13. Hau pasin bilong skelim gut ol samting i ken helpim yu long mekim gutpela disisen long sait bilong wok mani?
12 Piksaim long tingting dispela samting. Yu wok long painim wok mani bilong sapotim famili bilong yu. Na yu painim pinis tupela wok mani. Nau yu bai skelim gut olgeta samting long dispela tupela wok, olsem em wanem kain wok, sediul bilong wok, na hamas haptaim yu bai lusim bilong go na kam, na ol narapela samting. Tupela wok mani wantaim i stret long ol Kristen i ken mekim. Ating yu laikim moa wanpela bilong dispela tupela wok mani bikos em wok yu save laikim o bikos pe i antap moa. Tasol i gat ol narapela samting tu em yu mas tingim gut paslain long yu mekim disisen.
13 Olsem wanem? Dispela tupela wok mani inap pasim yu long go long miting bilong kongrigesen? O ating ol inap kisim bikpela haptaim bilong yu na nau yu no gat taim long lukautim gut famili na helpim ol long stap gut na pas gut wantaim Jehova? Ol kain askim olsem bai helpim yu long skelim gut “wanem ol samting i bikpela samting moa”—em lotu bilong yu na ol samting famili i nidim—winim mani kago samting. Taim yu mekim olsem, yu bai mekim gutpela disisen em Jehova bai blesim.
14. Olsem wanem pasin laikim na pasin bilong skelim gut ol samting bai helpim yumi long abrusim pasin bilong pundaunim ol arapela?
14 Pasin bilong skelim gut ol samting inap kirapim yumi long luksave long hau ol disisen bilong yumi inap mekim sampela samting long ol narapela, long dispela rot yumi inap abrusim pasin bilong “pundaunim ol arapela.” (Fili. 1:10) Dispela em i bikpela samting taim yumi mekim ol disisen long sampela samting, olsem long pasin bilong bilas na mekim gut skin. Olsem, ating yumi laikim wanpela kain stail bilong klos o pasin bilong stretim gut skin. Tasol olsem wanem sapos ol narapela insait o ausait long kongrigesen i no amamas long dispela? Pasin bilong skelim gut ol samting bai helpim yumi long rispektim tingting na filings bilong ol narapela. Pasin laikim bai kirapim yumi long mekim pasin daun na tingim gut ol samting bilong “helpim narapela.” (1 Kor. 10:23, 24, 32; 1 Tim. 2:9, 10) Long dispela rot, yumi bai mekim disisen i soim olsem yumi laikim na rispektim ol narapela.
15. Yu mas plenim gut wanem ol samting paslain long yu mekim wanpela bikpela disisen?
15 Sapos yu mas mekim wanpela bikpela disisen, orait yu mas tingim gut wanem ol samting yu mas mekim bilong bihainim dispela disisen. Jisas i skulim yumi long “skelim gut pe” bilong ol samting yumi laik mekim. (Luk 14:28) So skelim gut taim, strong, na ol samting yu gat em yu mas lusim bilong bihainim dispela disisen. Sampela taim, ating yu mas toktok gut wantaim ol wanfamili bilong yu na bai ol i ken save long samting ol i mas mekim bilong sapotim disisen bilong yu. Wai na i gutpela long plenim gut ol samting? Bikos taim yu mekim olsem, yu inap luksave long sampela senis em yu mas mekim long disisen bilong yu o narapela rot em yu inap bihainim we i gutpela moa. Na taim yu toktok gut wantaim ol wanfamili na yu putim gut yau taim ol i kamapim tingting bilong ol, ol bai redi moa long wok gut wantaim yu na gutpela samting bai kamap long disisen yu mekim.—Prov. 15:22.
MEKIM DISISEN WE BAI KAMAPIM GUTPELA SAMTING
16. Yu inap mekim wanem ol samting na bai disisen bilong yu i kamapim gutpela samting? (Lukim tu blok “ Hau Long Mekim Ol Gutpela Disisen.”)
16 Sapos yu mekim ol samting em yumi stori pinis long en, orait dispela i makim olsem nau yu redi long mekim gutpela disisen. Yu kisim gut stori na yu skelim ol stiatok we bai helpim yu long mekim disisen i amamasim Jehova. Nau yu ken beten askim Jehova long helpim yu na bai gutpela samting i kamap long disisen yu mekim.
17. Wanem samting bai helpim yu long mekim ol gutpela disisen?
17 Maski yu bin mekim planti gutpela disisen long pastaim, yu mas tingim olsem bilong yu ken mekim yet ol gutpela disisen, yu mas kisim helpim long savetingting bilong Jehova, na yu no ken bilip long save na ekspiriens bilong yu yet. Jehova wanpela tasol i ken givim yu save, pasin bilong kliagut long ol samting, na pasin bilong skelim gut ol samting—em ol bikpela samting we inap helpim yu long i gat savetingting. (Prov. 2:1-5) Jehova inap helpim yu long mekim ol disisen i amamasim em.—Sng. 23:2, 3.
SINGSING 28 Kamap Pren Bilong Jehova
