1. Wanem wanpela risen na Jehova i kamapim marit?

 JEHOVA em i “God bilong amamas,” na em i laik bai yumi tu i amamas. (1 Tim. 1:11) Em i givim yumi planti presen bilong helpim yumi long enjoim laip. (Jems 1:17) Wanpela bilong ol dispela presen em marit. Taim wanpela man na meri i marit, ol i tok promis long laikim, rispektim, na tingim tru narapela narapela. Taim tupela i pas gut wantaim, dispela inap mekim ol i stap amamas tru.—Prov. 5:18.

2. Planti marit long nau i stap olsem wanem?

² Sori tru, planti marit long nau i lusim tingting long tok promis ol i bin mekim long taim ol i marit. Olsem na ol i no stap amamas. Wanpela ripot em Wol Helt Oganaisesen i kamapim i no longtaim i go pinis, em i tok planti man i save paitim meri bilong ol, mekim ol tok i daunim ol, o mekim ol pasin i no stret long ol. Maritman husat i save mekim olsem, em inap rispektim meri bilong em long ai bilong ol narapela, tasol long haus em i save mekim pasin i no stret long em. Na tu, planti marit i no save stap gut taim man i lukim ponografi.

3. Wanem samting inap kirapim maritman long abiusim meri bilong em?

³ Wanem samting inap kirapim sampela maritman long abiusim meri bilong ol? Ating papa bilong ol i gat pasin bilong kros pait, olsem na ol i ting olsem em nomol long kros pait long narapela. Ol narapela i larim tingting na pasin bilong ples bilong ol i stiaim ol, ating ol i gat dispela tingting olsem bilong stap olsem man tru yu mas yusim strong bilong yu long soim meri bilong yu olsem yu bos. Ol narapela man i no lain long bosim gut bel na tingting bilong ol, na pasin bilong ol long belhat. Sampela man i save lukim ponografi planti taim, olsem na ol inap kisim tingting nogut olsem ol meri i stap tasol bilong inapim ol laik bilong ol long maritpasin. Na tu, ol ripot i kamapim olsem COVID-19 pendemik i mekim na ol dispela hevi i go bikpela moa. Maski i olsem, maritman i no ken tru larim wanpela  samting i kirapim em long mekim nogut long meri bilong em na kros pait long em.

4. Ol maritman Kristen i mas was gut long wanem samting, na bilong wanem?

⁴ Ol maritman Kristen i mas was gut na ol i no ken kisim tingting kranki em ol man bilong dispela graun i gat long ol meri. a Bilong wanem? Wanpela risen em olsem planti taim ol samting man i tingting long en i save kirapim em long mekim samting. Aposel Pol i givim tok lukaut long ol Kristen God i makim long Rom olsem ol i “no ken wokabaut moa long wankain pasin olsem ol man bilong dispela taim i save bihainim.” (Rom 12:​1, 2) Taim Pol i raitim pas i go long ol Kristen long Rom, kongrigesen i kamap na i stap pinis inap sampela haptaim. Tasol tok bilong Pol i kamapim klia olsem sampela insait long kongrigesen i wok yet long larim ol kastam na tingting bilong ol man bilong dispela taim i stiaim ol. Olsem na em i kirapim ol long senisim tingting na ol pasin bilong ol. Tru tumas, dispela tok i stret long ol maritman Kristen long nau tu. Sori tru olsem sampela bilong ol i larim tingting em ol man bilong dispela graun i gat long ol meri i stiaim ol na ol i abiusim meri bilong ol. b Jehova i laik bai maritman i mekim wanem kain pasin long meri bilong em? Yumi kisim bekim bilong dispela askim long tim skripsa bilong dispela atikol.

5. Olsem 1 Pita 3:7 i kamapim, maritman i mas mekim wanem pasin long meri bilong em?

⁵ Ritim 1 Pita 3:7. Jehova i tokim ol maritman long givim ona long meri bilong ol. Dispela tok ona i makim pasin yumi mekim long wanpela em yumi rispektim em. Maritman husat i save onarim meri bilong em, em i save mekim gutpela pasin na pasin laikim long em. Long dispela atikol, yumi bai stori long hau maritman i ken givim ona long meri bilong em. Tasol pastaim, yumi ken stori long ol pasin we maritman inap mekim na dispela i no givim ona long meri bilong em.

SAKIM OL PASIN WE I NO GIVIM ONA LONG MERI BILONG YU

6. Jehova i pilim olsem wanem long ol man em ol i save paitim meri bilong ol? (Kolosi 3:19)

⁶ Pasin bilong paitim meri. Jehova i save heitim ol man i save paitim ol narapela. (Sng. 11:5) Na moa yet, Jehova i no save laikim tru ol maritman husat i save paitim meri bilong ol. (Mal. 2:16; ritim Kolosi 3:19.) Olsem tim skripsa bilong yumi long 1 Pita 3:7 i kamapim, sapos wanpela maritman i no mekim gutpela pasin long meri bilong em, dispela bai bagarapim pasin pren bilong em wantaim God. Na tu, Jehova i no inap harim ol beten bilong em.

7. Olsem Efesus 4:​31, 32 i kamapim, ol maritman i mas abrusim wanem kain ol tok? (Lukim tu “Mining Bilong Tok.”)

⁷ Pasin bilong toknogutim meri. Sampela maritman i save abiusim meri bilong ol long rot bilong mekim ol tok nogut na ol tok i bagarapim bel bilong meri bilong ol. Tasol Jehova i save heitim pasin bilong “kros na belhat na bikmaus na tok nogut.” c (Ritim Efesus 4:​31, 32.) God i save harim olgeta samting. Pasin em maritman i bihainim bilong toktok long meri bilong em, em i bikpela samting long Jehova, na dispela i makim tu taim tupela i stap ol yet long haus bilong ol na toktok. Maritman husat i toktok strong long meri bilong em, em i bagarapim marit bilong em, na tu, em i bagarapim pasin pren bilong em yet wantaim God.—Jems 1:26.

8. Jehova i pilim olsem wanem long pasin bilong lukim ponografi, na bilong wanem?

⁸ Pasin bilong lukim ponografi. Jehova i pilim olsem wanem long pasin bilong lukim ponografi? Em i heitim tru dispela pasin. So maritman husat i  lukim ol piksa doti, em i bagarapim pasin pren bilong em yet wantaim Jehova na em i nogutim tu meri bilong em. d Jehova i laik bai maritman i stap gut long meri bilong em long ol pasin em i mekim na long tingting bilong em tu. Jisas i tok olsem man husat i lukluk long narapela meri na aigris long em, “long bel” em i mekim pinis pasin adaltri. e—Mat. 5:​28, 29

9. Wai na Jehova i heitim pasin bilong maritman long fosim meri bilong em long mekim samting em i no laik mekim taim ol i mekim maritpasin?

⁹ Fosim meri long mekim samting em i no laik mekim taim tupela i mekim maritpasin. Sampela maritman i save fosim meri bilong ol long mekim sampela kain maritpasin we i mekim na meri i pilim olsem em i no klin o mekim em i pilim olsem man i no laikim em. Jehova i save heitim dispela kain pasin we man i tingim em yet tasol na em i no tingim meri bilong em. Em i laik bai maritman i laikim na tingim meri bilong em na rispektim filings bilong em. (Efe. 5:​28, 29) Olsem wanem sapos wanpela maritman Kristen i save daunim meri bilong em o abiusim em o em i save lukim ponografi? Hau em inap senisim tingting na ol pasin bilong em?

HAU OL MARITMAN I KEN SAKIM OL PASIN I NO ONARIM MERI BILONG OL

10. Olsem wanem ol maritman i ken kisim helpim long eksampel bilong Jisas?

¹⁰ Wanem samting i ken helpim maritman long daunim pasin bilong abiusim meri na fosim em long mekim ol samting we i daunim em? Em i ken wok strong long bihainim pasin bilong Jisas. Maski Jisas i no bin marit, pasin em i mekim long ol disaipel bilong em i stap olsem gutpela eksampel em ol maritman i ken bihainim long pasin ol i mekim long meri bilong ol. (Efe. 5:25) Olsem, ol maritman i ken kisim skul long pasin Jisas i mekim long ol aposel bilong em na long pasin bilong em long toktok long ol.

11. Jisas i mekim wanem pasin long ol aposel bilong em?

¹¹ Jisas i mekim gutpela pasin long ol aposel bilong em na em i givim ona long ol. Em i no mekim hatpela pasin long ol o daunim ol. Maski Jisas em i Bikpela na Bosman bilong ol, em i no pilim olsem em i mas soim ol olsem em i gat namba long bosim ol na mekim ol samting bilong soim strong bilong em long ol, nogat. Em i daunim em yet na mekim ol wok bilong helpim ol. (Jon 13:​12-17) Em i tokim ol disaipel bilong em olsem: “Kisim skul long mi, long wanem, mi man bilong pasin isi na pasin daun, na yupela bai kisim nupela strong.” (Mat. 11:​28-30) Yu ken lukim olsem Jisas i gat pasin isi. Man i gat pasin isi, dispela i no makim olsem em i no gat strong, nogat. Em i gat strongpela bel bilong soim olsem em i ken bosim gut em yet. Taim ol samting i sikirapim bel bilong em, em i save stap isi na bosim bel na tingting bilong em.

12. Jisas i bihainim wanem kain pasin long taim em i save toktok long ol narapela?

¹² Jisas i save mekim ol tok bilong mekim isi bel bilong ol narapela na givim nupela strong long ol. Em i no bin toktok strong long ol disaipel bilong em. (Luk 8:​47, 48) Taim ol birua i tok nogut long em na traim long sikirapim bel bilong em, “em i no bekim tok nogut long ol.” (1 Pita 2:​21-23) Sampela taim, Jisas i stap isi tasol na em i no bekim hatpela tok long ol. (Mat. 27:​12-14) Em gutpela eksampel tru long ol maritman Kristen i ken bihainim!

13. Olsem Matyu 19:​4-6 i kamapim, olsem wanem maritman inap “pas wantaim meri bilong em”? (Lukim tu piksa.)

¹³ Jisas i tokim ol maritman long stap gut long meri bilong ol. Em i kamapim tok bilong Papa bilong em olsem maritman i mas “pas wantaim meri bilong em.” (Ritim Matyu 19:​4-6.) Dispela tok “pas wantaim” ol i tanim long wanpela tok Grik i makim “gluim.” Olsem na pasin laikim namel long maritman na maritmeri i mas strong tru, i olsem glu i pasim tupela wantaim. Sapos wanpela bilong tupela i mekim pasin we i bagarapim bel bilong narapela, tupela wantaim inap karim hevi long dispela.  Maritman husat i gat dispela kain pasin laikim long meri bilong em, em bai sakim olgeta kain samting bilong ponografi. Em bai hariap tru long rausim ai bilong em na bai em i no ken “lukluk long ol samting i no gutpela.” (Sng. 119:37) Taim em i mekim olsem, i olsem em i mekim kontrak wantaim ai bilong em long no ken lukluk na aigris long ol narapela meri.—Jop 31:1.

14. Maritman i save abiusim meri bilong em, em i mas mekim wanem ol samting bilong stretim bek pasin pren bilong em wantaim Jehova na wantaim meri bilong em?

¹⁴ Maritman husat i save paitim meri bilong em na toknogutim em, em i mas mekim sampela samting bilong stretim bek pasin pren bilong em wantaim Jehova na wantaim meri bilong em. Em i mas mekim wanem ol samting? Namba 1, em i mas luksave olsem pasin em i mekim i no stret. I no gat wanpela samting i stap hait long ai bilong Jehova. (Sng. 44:21; Ekl. 12:14; Hib. 4:13) Namba 2, em i mas stop long abiusim meri bilong em na senisim pasin bilong em. (Prov. 28:13) Namba 3, em i mas tok sori long meri bilong em na long Jehova na askim ol long fogivim em. (Apo. 3:19) Na tu, em i mas beten strong na askim Jehova long givim em dispela laik bilong senisim pasin bilong em na helpim em i nidim bilong bosim gut tingting, toktok, na ol pasin bilong em. (Sng. 51:​10-12; 2 Kor. 10:5; Fili. 2:13) Namba 4, em i mas mekim ol samting i stret wantaim beten bilong em long rot bilong heitim olgeta kain pasin bilong pait na tok nogut. (Sng. 97:10) Namba 5, em i mas hariap long askim ol gutpela wasman insait long kongrigesen long helpim em. (Jems 5:​14-16) Namba 6, em i mas wokim wanpela plen we bai helpim em long abrusim ol dispela kain pasin long bihain. Maritman husat i save lukim ponografi, em i mas mekim tu ol dispela samting. Jehova bai blesim ol hatwok bilong em long senisim pasin bilong em. (Sng. 37:5) Maritman i mas sakim ol pasin i no givim ona long meri bilong em na em i mas mekim sampela samting moa. Em i mas lain tu long givim ona long meri bilong em. Hau em inap mekim olsem?

HAU YU KEN GIVIM ONA LONG MERI BILONG YU

15. Maritman inap mekim wanem bilong soim olsem em i laikim meri bilong em?

¹⁵ Soim em olsem yu laikim em. Sampela brata em marit bilong ol i stap amamas, ol i save mekim ol samting long olgeta de bilong soim meri bilong ol olsem ol i laikim em. (1 Jon 3:18) Maritman inap  mekim ol liklik samting bilong soim meri bilong em olsem em i laikim em, olsem holim han bilong em o holimpasim em. Em inap salim wanpela teks mesis long em na tokim em olsem “Mi misim yu” o askim em olsem “De bilong yu i orait?” Sampela taim, em inap soim meri bilong em olsem em i laikim em taim em i tingim gut ol naispela tok na raitim long wanpela kat na givim long em. Taim maritman i mekim ol dispela samting, em i givim ona long meri bilong em na strongim marit bilong tupela.

16. Wai na maritman i mas tok tenkyu long meri bilong em long ol samting em i mekim?

¹⁶ Tok tenkyu long ol samting em i mekim. Maritman husat i save givim ona long meri bilong em, em i save mekim ol tok bilong strongim em. Wanpela rot em i mekim olsem em taim em i tok tenkyu long meri bilong em long olgeta samting em i mekim bilong sapotim em. (Kol. 3:15) Taim maritman i tok tenkyu long meri bilong em, dispela i save mekim meri i amamas. Em bai pilim belgut na pilim olsem yu laikim em na onarim em.—Prov. 31:28.

17. Olsem wanem maritman i ken soim rispek long meri bilong em?

¹⁷ Mekim gutpela pasin na rispektim meri bilong yu. Maritman husat i save laikim meri bilong em, em i save tingim tru em. Em i tingim meri bilong em olsem wanpela presen i dia tumas i kam long Jehova. (Prov. 18:22; 31:10) Olsem na em i save mekim gutpela pasin na rispektim meri bilong em, na em i mekim olsem tu long taim tupela yet i stap, olsem long taim ol i mekim maritpasin. Em i no inap fosim meri bilong em long mekim olkain maritpasin we i mekim na meri i no pilim gut, i daunim em, o i mekim na maus bilong bel bilong em i gat tok. f Maritman tu bai wok strong yet long larim maus bilong bel bilong em i stap klin long ai bilong Jehova.—Apo. 24:16.

18. Ol maritman i mas tingting strong long mekim wanem? (Lukim tu blok “ Fopela Rot Ol Maritman i Ken Soim Pasin Rispek.”)

¹⁸ Ol maritman, yupela i ken save tru olsem Jehova i lukim na em i amamas long olgeta samting yupela i mekim bilong givim ona long meri bilong yupela. Yupela i mas tingting strong long givim ona long meri bilong yupela long rot bilong sakim ol pasin we i no onarim ol na mekim gutpela pasin long ol, rispektim ol, na soim pasin laikim long ol. Taim yupela i mekim olsem, yupela i soim meri bilong yupela olsem yupela i laikim ol na tingim tru ol. Givim ona long meri bilong yupela, na long dispela rot yupela bai lukautim gut nambawan pasin pren yupela i gat—em pasin pren bilong yupela wantaim Jehova.—Sng. 25:14.