1. Wai na yumi mas go long bung bilong Memorial bilong tingim dai bilong Krais long olgeta yia?

 TRU TUMAS, yu bai wanbel long tok olsem pe bilong baim bek man em nambawan gutpela presen tru! (2 Kor. 9:15) Taim Jisas i stap long graun, em i givim laip bilong em olsem ofa na dispela i opim rot long yu inap kamap pren bilong God Jehova. Na tu, yu ken wet long kisim laip oltaim long bihain. So i stret long yumi tenkyu long pe bilong baim bek man na tenkyu long Jehova olsem pasin laikim i kirapim em long givim dispela ofa! (Rom 5:8) Jisas i kamapim bung bilong Memorial bilong tingim dai bilong em long olgeta yia bilong helpim yumi long soim yet tenkyu bilong yumi na yumi no tingim dispela ofa olsem wanpela samting nating.—Luk 22:​19, 20.

2. Dispela atikol bai stori long wanem samting?

² Long dispela yia, yumi bai mekim Memorial long Sarere Epril 12, 2025. Yumi olgeta i luk fowed long go long dispela bung. Yumi bai kisim gutpela helpim sapos yumi yusim dispela haptaim bilong Memorial long tingim tingim long bel a samting Jehova na Pikinini bilong em i mekim bilong helpim yumi. Long dispela atikol, yumi bai stori long pe bilong baim bek man i givim wanem skul long yumi long Jehova na Pikinini bilong em. Long atikol i kamap bihain, yumi bai kisim helpim bilong kliagut long hau pe bilong baim bek man i helpim yumi na ol samting yumi ken mekim bilong soim tenkyu bilong yumi.

 PE BILONG BAIM BEK MAN I GIVIM WANEM SKUL LONG YUMI LONG JEHOVA?

3. Olsem wanem dai bilong wanpela man inap baim bek planti milion manmeri? (Lukim tu piksa.)

³ Pe bilong baim bek man i skulim yumi olsem olgeta pasin bilong Jehova i stret olgeta. (Lo 32:4) Hau? Tingim, Adam i bin sakim tok bilong God na long dispela rot yumi olgeta i kisim sin long em we i bringim dai long yumi olgeta. (Rom 5:12) Bilong helpim yumi long lusim kalabus bilong sin na dai, Jehova i stretim rot bilong Jisas i ken givim pe bilong baim bek man. Tasol olsem wanem dai bilong wanpela stretpela man inap baim bek laip bilong planti milion manmeri? Aposel Pol i tok: “Wanpela man [Adam] i bin sakim tok na long dispela pasin planti manmeri i kamap sinman. Olsem tasol, wanpela man [Jisas] i bin bihainim tok, na long dispela pasin planti manmeri i kamap stretpela manmeri.” (Rom 5:19; 1 Tim. 2:6) So wanpela man i gutpela olgeta i sakim tok bilong God na mekim sin na nau yumi olgeta i kalabus long sin na dai. Olsem tasol, wanpela man i gutpela olgeta husat i save bihainim tok bilong God, em i mas dai bilong baim bek yumi olgeta na mekim yumi kamap fri.

4. Wai na Jehova i no larim ol pikinini bilong Adam em ol i gat gutpela bel long stap laip oltaim?

⁴ Tru tru Jisas i mas dai bilong seivim yumi? Yu ting i stret long Jehova bai larim tasol ol pikinini bilong Adam em ol i gat gutpela bel long stap laip oltaim? Yumi ol sinman, olsem na yumi bai ting dispela em gutpela na stretpela samting long mekim. Tasol taim yumi gat kain tingting olsem, yumi lusim tingting long stretpela pasin bilong Jehova i gutpela olgeta. Olgeta pasin bilong Jehova i stret olgeta, olsem na sapos em i larim ol pikinini bilong Adam i stap laip oltaim, dispela bai i olsem Adam i no bin sakim tok bilong God na mekim sin.

5. Wai na yumi ken save tru olsem oltaim Jehova bai mekim pasin i stret?

⁵ Olsem wanem sapos Jehova i no givim pe bilong baim bek man na em i larim ol pikinini bilong Adam em ol i no gutpela olgeta long stap laip oltaim, yu ting dispela bai kamapim stretpela pasin bilong Jehova? Ating ol manmeri bai ting olsem God bai mekim pasin i no stret long ol narapela samting tu. Olsem, ol inap ting olsem em bai i no truim olgeta tok promis bilong em. Tasol yumi no gat wok long wari long ol kain samting olsem. Jehova i mekim pasin i stret taim em i givim samting i dia tumas long em yet, em laip bilong Pikinini bilong em olsem ofa na dispela i ken strongim yumi olsem oltaim em bai mekim pasin i stret.

6. Olsem wanem pe bilong baim bek man em wanpela rot Jehova i kamapim klia pasin laikim bilong em? (1 Jon 4:​9, 10)

⁶ Pe bilong baim bek man i helpim yumi long kliagut olsem pasin bilong Jehova i stret olgeta, tasol bikpela samting moa, em i helpim yumi long pilim tru pasin laikim bilong em. (Jon 3:16;  ritim 1 Jon 4:​9, 10.) Jehova i givim pe bilong baim bek man, na bai yumi ken kisim laip oltaim na bai yumi ken insait long famili bilong em. Tingim: Taim Adam i mekim sin, Jehova i rausim em long famili bilong Em. Dispela em as na yumi olgeta i bin bon ausait long famili bilong God. Tasol long rot bilong pe bilong baim bek man, Jehova i fogivim ol sin bilong yumi na bihain em bai bringim olgeta manmeri bilong graun i go insait long famili bilong em, em ol manmeri husat i bilip long em na bihainim tok bilong em. Long nau yet, yumi ken pas gut wantaim Jehova na ol wanbilip bilong yumi. Tru tumas, yumi ken save tru olsem Jehova i laikim yumi olgeta!—Rom 5:​10, 11.

7. Olsem wanem pen na hevi Jisas i karim i ken helpim yumi long kliagut olsem Jehova i laikim yumi tru?

⁷ Yumi ken kliagut olsem Jehova i laikim yumi tru taim yumi tingim bikpela bel pen em i pilim long lukim Pikinini bilong em i karim pen na hevi bilong givim ofa bilong baim bek yumi. Satan i tok wokman bilong God bai i no stap gut long God taim em i karim wanpela hevi. Bilong pruvim olsem tok bilong Satan i giaman, Jehova i larim Pikinini bilong em i karim bikpela pen na hevi paslain long em i dai. (Jop 2:​1-5; 1 Pita 2:21) Jehova i lukluk i stap taim ol bikman bilong lotu em ol i birua long Jisas ol i tok bilas long em, na ol soldia i wipim em, na ol i nilim em long diwai pos. Na Jehova i lukluk yet i stap taim Pikinini bilong em i karim bikpela pen tru na dai. (Mat. 27:​28-31, 39) Jehova i gat strong bilong stopim dispela samting long kamap long dispela taim stret. Olsem: Taim ol birua i tok: “Sapos God i amamas long em, orait larim God i kisim bek em,” long dispela taim stret Jehova inap mekim samting bilong kisim em bek. (Mat. 27:​42, 43) Tasol sapos God i bin mekim samting bilong kisim bek Pikinini bilong em long dispela taim stret, em bai i no givim pe bilong baim bek man na yumi bai no gat gutpela samting bilong wetim i kamap bihain. So Jehova i larim Pikinini bilong em i karim bikpela pen na hevi inap long em i pulim laspela win bilong em.

8. Yu ting Jehova i pilim pen taim em i lukim Pikinini bilong em i karim bikpela pen na hevi? Stori long dispela. (Lukim tu piksa.)

⁸ Yumi no ken ting olsem God i Gat Olgeta Strong i no save pilim samting long bel, nogat! Yumi save pilim samting long bel bikos Jehova i wokim yumi olsem em yet, so i stret long yumi ken tok Jehova tu i save pilim ol samting long bel. Baibel i tok em i save “bel hevi” na “pilim pen.” (Sng. 78:​40, 41, ftn.) Skelim tu stori bilong Abraham na Aisak. Jehova i tokim Abraham long givim dispela wanpela pikinini bilong em olsem ofa. (Stt. 22:​9-12; Hib. 11:​17-19) Yumi ken pilim bikpela wari na bel pen Abraham i bin pilim taim em i kisim naip na redi long kilim i dai pikinini bilong em Aisak. So yumi ken pilim bikpela bel hevi Jehova i bin pilim taim em i lukim ol man nogut i mekim nogut tru long Pikinini bilong em na kilim em i dai!—Lukim vidio Imitate Their Faith—Abraham, Part 2, long jw.org.

9. Olsem wanem tok bilong Rom 8:​32, 38, 39 i helpim yu long kliagut olsem Jehova i laikim yu na em i laikim tu ol wanbilip bilong yu?

 ⁹ Pe bilong baim bek man i helpim yumi long kliagut olsem Jehova i laikim yumi tru winim pasin bilong ol wanfamili na ol pren long laikim yumi. (Ritim Rom 8:​32, 38, 39.) Tru tumas, Jehova i laikim yumi moa winim pasin bilong yumi long laikim yumi yet. Yu laik i stap laip oltaim? Jehova i laik tru olsem yu stap laip oltaim oltaim. Yu laik bai God i fogivim ol sin bilong yu? Jehova i laik tru long fogivim olgeta sin bilong yu. Wanpela samting tasol em i askim yumi long mekim, em long soim tenkyu bilong yumi long dispela gutpela presen long rot bilong bilip na bihainim tok bilong em. Pe bilong baim bek man em nambawan rot God i soim olsem em i laikim yumi. Na long nupela taim, yumi bai kisim sampela save moa long pasin laikim bilong Jehova.—Ekl. 3:11.

PE BILONG BAIM BEK MAN I GIVIM WANEM SKUL LONG YUMI LONG JISAS?

10. (a) Wanem samting i mekim Jisas i tingting planti long dai bilong em? (b) Long wanem rot Jisas i mekim holi nem bilong Jehova? (Lukim tu blok “ Jisas i Stap Gut Long Jehova na Dispela i Mekim Holi Nem Bilong Jehova.”)

¹⁰ Jisas i tingim tru gutnem bilong Papa bilong em. (Jon 14:31) Jisas i bel hevi taim em i tingim olsem ol man i sutim tok long em olsem em i tok nogut long God na em i bikhet long gavman na dispela inap bagarapim gutnem bilong Papa bilong em. Olsem na em i beten olsem: “Papa bilong mi, sapos inap, dispela kap i ken tekewe long mi.” (Mat. 26:39) Jisas i stap gut long Jehova i go inap long em i dai, na long dispela rot em i mekim holi nem bilong Papa bilong em.

11. Olsem wanem Jisas i soim olsem em i laikim tru ol manmeri? (Jon 13:1)

¹¹ Pe bilong baim bek man i givim skul long yumi olsem Jisas i tingim tru ol manmeri, moa yet ol disaipel bilong em. (Prov. 8:31; ritim Jon 13:1.) Olsem, Jisas i save olsem sampela wok bilong em long graun bai hatwok moa long em i  mekim, moa yet em dispela bikpela pen em bai karim na dai. Maski i olsem, em i givim bel tru long mekim ol wok bilong em long graun bikos em i laikim tru ol manmeri. Jisas i givim bel olgeta long autim tok, skulim ol man, na helpim ol narapela. Na tu, long de Jisas bai dai, em i lusim haptaim long wasim lek bilong ol aposel bilong em, na em i givim ol gutpela tok bilong strongim ol na mekim gut bel bilong ol. (Jon 13:​12-15) Na long taim em i hangamap long diwai pos, em i lusim haptaim long givim hop long wanpela raskol man i hangamap klostu long em na em i stretim rot bilong wanpela i ken lukautim mama bilong em. (Luk 23:​42, 43; Jon 19:​26, 27) Jisas i kamapim ples klia pasin bilong em long laikim tru ol manmeri long rot bilong dai bilong em na ol pasin em i mekim bilong helpim ol manmeri long graun.

12. Long wanem ol rot Jisas i wok yet mekim ol samting bilong helpim yumi long nau?

¹² Krais “i dai wanpela taim tasol” bilong tekewe sin, maski i olsem em i wok yet long mekim ol samting bilong helpim yumi. (Rom 6:10) Hau em i mekim olsem? Em i wok yet long yusim taim na strong bilong em long givim yumi ol gutpela samting long rot bilong pe bilong baim bek man. Skelim ol wok em i mekim. Em i mekim wok olsem King bilong yumi, Hetpris, na het bilong kongrigesen. (1 Kor. 15:25; Efe. 5:23; Hib. 2:17) Em i lukautim wok bilong bungim ol Kristen God i makim na bikpela lain manmeri, em wok em i mas pinisim paslain long traipela hevi tru i pinis. b (Mat. 25:32; Mak 13:27) Na tu, em i lukautim wok bilong stiaim gutpela wokboi long givim ol tok bilong strongim bilip bilong yumi long dispela taim bilong las de. (Mat. 24:45) Na tu, long Taim Bilong Wan Tausen Yia Bilong Krais i Stap King, em bai wok yet long mekim ol samting bilong helpim yumi. Tru tumas, Jehova i givim dispela Pikinini bilong em long helpim yumi!

WOK YET LONG LAINIM OL NUPELA SAMTING

13. Olsem wanem pasin bilong tingim tingim ol samting long bel inap helpim yu long lain long pasin bilong God na Krais long laikim yumi?

¹³ Yu ken wok yet long lain long pasin bilong God Jehova na Krais Jisas long laikim yumi sapos yu wok yet long tingim tingim long bel ol samting ol i mekim bilong helpim yu. Ating long haptaim bilong Memorial bilong dispela yia, yu ken lusim haptaim long ritim gut wanpela o sampela bilong Ol Gutnius. No ken traim long ritim planti tok tumas insait long sotpela haptaim. I gutpela long yu ritim isi isi na tingim ol risen we i ken kirapim yu long laikim moa yet Jehova na Jisas. Na tokim ol narapela long ol samting yu lainim.

14. Olsem tok bilong Buk Song 119:97 i kamapim, olsem wanem wok painimaut inap helpim yumi long kisim sampela save moa long pe bilong baim bek man na ol narapela bilip bilong yumi? (Lukim tu piksa.)

 ¹⁴ Sapos yu bin stap long tok i tru inap planti yia, ating bai yu ting olsem i no gat wok moa long yu kisim sampela save moa long ol bilip yu save pinis long en olsem stretpela pasin bilong God, pasin laikim bilong em, na pe bilong baim bek man. Tasol tru tru, yumi olgeta inap kisim sampela save moa long ol dispela topik na ol narapela topik tu. So yu ken mekim wanem? Mekim gutpela wok long planti gutpela tok i stap long ol pablikesen bilong yumi em Baibel i as bilong en. Taim yu painim wanpela tok we yu no kliagut tumas long en, orait mekim wok painimaut long dispela tok. Na long de olgeta, tingim tingim long bel ol samting yu lainim na ol skul yu kisim long Jehova, Pikinini bilong em, na pasin bilong ol long laikim yu.—Ritim Buk Song 119:97 na futnot.

15. Wai na yumi mas wok yet long painim ol gutpela tok i stap long Baibel?

¹⁵ Long olgeta taim yu sindaun long ritim Baibel o mekim wok painimaut, no ken bel hevi sapos yu no painim sampela nupela save o sampela tok yu amamas long en. Yu olsem man bilong painim gol. Dispela man bilong painim gol i no save les kwik. Em i save lusim planti aua na planti de bilong painim gol i go inap long em i painim wanpela liklik gol. Maski em i hatwok tru, em i save wok strong tru bikos ol dispela liklik gol em i painim i dia tumas long em. Olsem tasol, ol gutpela tok i tru bilong Baibel yumi kisim save long en ol i dia tumas, maski yumi lusim bikpela haptaim long painim! (Sng. 119:127; Prov. 8:10) So no ken les kwik, givim bel yet long bihainim sediul bilong yu long mekim Baibel ritim.—Sng. 1:2.

16. Hau yumi ken bihainim pasin bilong Jehova na Jisas?

¹⁶ Taim yu stadi, painim ol rot bilong bihainim ol tok yu lainim. Olsem, bihainim stretpela pasin bilong Jehova long rot bilong mekim pasin i fea long olgeta manmeri. Bihainim pasin bilong Jisas long laikim Papa bilong em na laikim ol narapela long rot bilong redi long karim hevi na sambai long gutnem bilong Jehova na oltaim redi long helpim ol narapela wanbilip Kristen. Na tu, bihainim pasin bilong Jisas long autim tok long ol narapela na bai ol tu i gat rot bilong soim tenkyu bilong ol long nambawan gutpela presen Jehova i givim.

17. Atikol i kamap bihain bai stori long wanem samting?

¹⁷ Taim yumi kliagut tru na pilim tru pe bilong baim bek man, pasin bilong yumi long laikim Jehova na Pikinini bilong em bai kamap strong moa. Taim yumi wok long laikim ol, ol bai laikim yumi moa yet. (Jon 14:21; Jems 4:8) So yumi ken yusim ol samting Jehova i givim long yumi bilong wok yet long kisim save long pe bilong baim bek man. Atikol i kamap bihain bai stori long sampela rot we pe bilong baim bek man i ken helpim yumi na olsem wanem yumi ken soim tenkyu long pasin bilong Jehova long laikim yumi.