Jehova i tokim Esekiel olsem taim lain Israel i lusim kalabus na go bek long Graun Bilong Promis, ol bai bung gen na stap wanpela lain manmeri. Dispela tok profet i makim tu olsem ol manmeri bilong God bai bung na stap olsem wanpela lain tasol long haptaim bilong las de.

Jehova i tokim profet Esekiel long raitim tok antap long 2-pela stik. Long wanpela stik, em i mas raitim dispela tok: “Stik bilong lain Juda wantaim ol arapela manmeri bilong Israel i bin i stap wantaim ol.” Long narapela stik, em i mas raitim dispela tok: “Stik bilong lain Josep, em ol Efraim wantaim ol arapela lain bilong Israel i bin i stap wantaim ol.” Bihain, Esekiel i mas “holim dispela tupela stik na bungim tupela arere wantaim bai tupela stik i kamap olsem wanpela stik tasol.”—Ese. 37:15-17.

 Nem “Efraim” i makim wanem samting? Fes king bilong 10-pela lain bilong Israel long hap not em Jeroboam bilong lain Efraim. Populesen bilong lain Efraim i bikpela moa winim ol narapela. (Lo 33:13, 17; 1 Kin. 11:26) Dispela lain em ol tumbuna pikinini bilong Efraim, em pikinini man bilong Josep. (Nam. 1:32, 33, NW) Josep i kisim spesel blesing long papa bilong em Jekop. Olsem na i stret long stik i makim 10-pela lain bilong Israel i kisim nem olsem “stik bilong . . . Efraim.” Long 740 B.C.E., ol Asiria i kisim 10-pela lain Israel i go kalabus, na taim ol i stap kalabus yet, Esekiel i mekim tok profet long 2-pela stik. (2 Kin. 17:6) Long dispela taim, planti manmeri bilong Israel i stap long olgeta hap em Babilon i bosim—kantri Babilon i bin daunim kantri Asiria.

Long yia 607 B.C.E., 2-pela hap lain Israel bilong hap saut na ol arapela liklik hap lain Israel i stap yet long hap not i go kalabus long Babilon. Ol king i kamap long lain Juda i bosim lain Israel long hap saut. Ol man long lain Juda i mekim wok pris bikos ol pris i mekim wok long tempel i stap long Jerusalem. (2 Sto. 11:13, 14; 34:30) Olsem na i stret long “stik bilong lain Juda” i makim 2-pela hap lain Israel long hap saut.

Wanem taim dispela 2-pela stik i bung wantaim? Truim bilong en i kamap long 537 B.C.E. taim lain Israel i go bek long Jerusalem long wokim gen tempel. Sampela manmeri bilong lain Israel long hap saut na sampela manmeri bilong Israel long hap not i bung wantaim na go bek long kantri bilong ol. Ol i go bek long Jerusalem olsem wanpela lain tasol, na ol i no brukim lain. (Ese. 37:21, 22) Rot i op na ol manmeri bilong Israel inap bung wantaim long lotuim Jehova. Profet Aisaia na profet Jeremaia i tok profet tu long dispela samting.—Ais. 11:12, 13; Jer. 31:1, 6, 31.

Yumi kisim wanem bikpela skul long dispela tok profet? Yumi kisim skul olsem: Jehova bai stiaim ol manmeri i lotuim em na ol bai “kamap olsem wanpela” lain tasol. (Ese. 37:18, 19) Yu lukim dispela pasin wanbel long taim bilong yumi? Yes. Truim bilong en i kamap long 1919 taim isi isi God i stretim oganaisesen bilong em na bungim gen ol manmeri bilong em. Satan i laik pinisim tru pasin wanbel namel long ol manmeri bilong God, tasol hatwok bilong em i lus nating.

Long dispela taim bipo, planti manmeri long lain bilong God i gat hop long mekim wok king na wok pris wantaim Jisas long heven. (Rev. 20:6) Stik bilong lain Juda i olsem piksa bilong makim dispela lain. Bihain, planti manmeri moa i kam joinim dispela lain, em ol manmeri husat bai kisim laip long graun. (Sek. 8:23) Stik bilong lain Josep i olsem piksa bilong makim ol manmeri husat bai kisim laip long graun.

Long nau, dispela 2-pela lain—ol Kristen husat bai kisim laip long heven na ol Kristen husat bai kisim laip long graun—ol i bung wantaim olsem ol manmeri bilong Jehova na ol i stap aninit long wanpela King tasol, em Jisas Krais. God i tok profet olsem dispela king bai kamap long “lain bilong wokman bilong mi, Devit.” (Ese. 37:24, 25) Jisas i beten askim God long helpim ol disaipel bambai ‘olgeta i ken i stap wanpela, olsem Papa i pas wantaim em na em i pas wantaim Papa.’ * (Jon 17:20, 21) Jisas i tok profet tu olsem liklik lain sipsip, em ol disaipel God i anointim long holi spirit, ol bai bung wantaim “ol arapela sipsip” na “olgeta bai kamap olsem wanpela lain sipsip.” Olgeta bai stap aninit long “wanpela wasman” tasol. (Jon 10:16) Tok bilong Jisas i makim pasin wanbel i stap namel long ol manmeri bilong Jehova long nau, maski ol i bilip na wet long kisim laip long heven o long graun!