1. Bilong wanem olgeta samting i stap long heven na graun i bilong Jehova? (Lukim piksa long kirap bilong stadi.)

JEHOVA yet i wokim olgeta samting! “Heven i stap antap tru, em i bilong Bikpela. Na graun wantaim olgeta samting i stap long en, em i bilong Bikpela tu.” (Lo 10:14; Rev. 4:11) Jehova i wokim yumi ol man, olsem na yumi bilong em. (Sng. 100:3) Tasol kirap long bipo yet na i kam inap long nau, God i makim sampela manmeri olsem lain bilong em stret.

2. Jehova i makim wanem ol lain olsem lain bilong em stret?

² Buk Song 135 i stori long lain Israel bilong bipo olsem ol i “lain bilong God stret.” (Sng. 135:4) Na tu, Hosea i tok profet olsem sampela manmeri husat i no bilong lain Israel bai kamap lain bilong Jehova. (Hos. 2:23) Tok profet bilong Hosea i kamap tru taim Jehova i makim ol man husat i no bilong lain Juda long mekim wok king wantaim Krais. (Apo. 10:45; Rom 9:23-26) Dispela “lain holi” em “ol manmeri bilong God stret,” long wanem, Jehova i makim ol long holi spirit na ol bai kisim laip long heven. (1 Pita 2:9, 10) Olsem wanem long ol Kristen husat i bilip na wet long kisim laip long graun? Jehova i makim ol tu olsem “ol manmeri bilong [em].”—Ais. 65:22.

3. (a) Husat i stap olsem lain bilong Jehova long nau? (b) Long dispela stadi, bai yumi stori long wanem samting?

 ³ Long nau, “liklik lain sipsip” em ol bai kisim laip long heven na “ol arapela sipsip” em ol bai kisim laip long graun, ol i stap olsem “wanpela lain sipsip” na Jehova i tingim ol olsem ol manmeri bilong em. (Luk 12:32; Jon 10:16) Jehova i opim rot long yumi inap stap lain bilong em, olsem na yumi mas soim bikpela tenkyu bilong yumi long em. Long dispela stadi, yumi bai stori long sampela rot we yumi inap soim tenkyu bilong yumi long Jehova.

4. (a) Wanem wanpela rot yumi inap soim tenkyu bilong yumi long stap lain bilong Jehova? (b) Olsem wanem Jisas i mekim wankain samting?

⁴ Yumi soim tenkyu bilong yumi long Jehova taim yumi dediketim laip bilong yumi long em. Long rot bilong baptais, yumi tokaut long ai bilong ol manmeri olsem yumi bilong Jehova na yumi redi long stap daun long em. (Hib. 12:9) Jisas i mekim wankain samting taim em i kisim baptais. I olsem em i tokim Jehova: “God bilong mi, mi laikim tumas long bihainim laik bilong yu.” (Sng. 40:7, 8) Jisas i givim em yet long mekim laik bilong Jehova, maski em i kamap long wanpela lain em ol i stap pinis olsem lain manmeri bilong God.

5, 6. (a) Jehova i mekim wanem taim Jisas i baptais? (b) Stori long olsem wanem Jehova i amamas taim yumi dediket long em.

⁵ Jehova i mekim wanem taim Jisas i kisim baptais? Baibel i tok: “Jisas i baptais pinis na kwiktaim em i kam antap, na skai i op na em i lukim spirit bilong God i kam daun long em olsem wanpela pisin balus. Na tu, wanpela nek long skai i tok: ‘Dispela em i Pikinini bilong mi, mi laikim em tumas na mi amamas long em.’” (Mat. 3:16, 17) Jisas i bilong Papa bilong em long heven. Maski i olsem, Jehova i amamas long lukim Pikinini bilong em i redi long mekim laik bilong Em wanpela tasol. Olsem tasol, Jehova bai amamas na blesim yumi taim yumi dediket long em.—Sng. 149:4.

⁶ Tingim olsem wanpela papa i planim planti naispela plaua long gaden bilong em. Wanpela taim, liklik gel i brukim plaua na i givim long Papa olsem presen. Papa yet i planim dispela plaua. Bilong wanem pikinini gel i givim plaua em Papa yet i planim? Gutpela papa i no inap kisim kain tingting olsem. Em bai amamas long kisim presen pikinini i givim long em bikos dispela i soim olsem em i laikim Papa. Em bai amamas tru long dispela plaua pikinini i givim long em winim olgeta narapela plaua long gaden. Olsem tasol, Jehova i amamas tru taim yumi redi long givim yumi yet long mekim laik bilong em wanpela tasol.—Kis. 34:14.

7. Olsem wanem Malakai i kamapim klia tingting Jehova i gat long ol manmeri i mekim wok bilong God?

⁷ Ritim Malakai 3:16. Sapos yu no dediket na baptais yet, yu mas skelim risen na em i bikpela samting long yu dediket na baptais. Kirap long taim yumi kamap long bel bilong mama, yumi olgeta i bilong Jehova. Tasol Jehova bai amamas tru taim yu tingim em olsem nambawan bos na yu dediket long em na mekim laik bilong em. (Snd. 23:15) Jehova i save long ol manmeri husat i mekim wok bilong em, na em i raitim nem bilong ol long “buk i gat nem bilong ol manmeri.”

8, 9. Ol man em nem bilong ol i stap long “buk i gat nem bilong ol manmeri,” Jehova i laik bai ol i mas mekim wanem?

⁸ Taim Jehova i raitim nem bilong yumi long “buk i gat nem bilong ol manmeri,” orait yumi mas mekim sampela samting. Malakai i tok yumi mas ‘aninit long Bikpela na tingting long em oltaim.’ Sapos yumi  lusim bikpela haptaim long mekim ol narapela wok na yumi no mekim ol wok lotu, Jehova bai rausim nem bilong yumi long buk bilong laip.—Kis. 32:33; Sng. 69:28.

⁹ Taim yumi dediket long Jehova, yumi tok promis long mekim laik bilong em na yumi kisim baptais bilong kamapim klia dediket bilong yumi. Yumi dediket na baptais wanpela taim tasol. Maski i olsem, yumi stap lain manmeri bilong Jehova, olsem na yumi mas daun long Em long laip olgeta bilong yumi.—1 Pita 4:1, 2.

10. Ol wokman bilong Jehova i mas bihainim wanem kain pasin?

¹⁰ Stadi i kamap paslain i stori long Kein, Solomon, na lain Israel. Ol dispela lain i tok ol i lotuim Jehova, tasol ol i no givim bel olgeta long mekim olsem. Ol dispela stori i kamapim klia olsem lain bilong Jehova i mas bihainim stretpela pasin na heitim pasin nogut. (Rom 12:9) Malakai i stori long “buk i gat nem bilong ol manmeri,” na bihain em i stori long tok Jehova i mekim olsem, “stretpela man i narapela kain long man nogut, na man i mekim wok bilong God i narapela kain long man i no bin mekim wok bilong God.”—Mal. 3:18, NW.

11. Bilong wanem yumi mas soim olsem yumi lotuim Jehova wanpela tasol?

¹¹ I gat narapela rot em yumi ken soim tenkyu bilong yumi long Jehova i makim yumi olsem lain bilong em. Yumi mas mekim ol wok lotu bambai “olgeta manmeri i ken lukim klia olsem [yumi] wok long kamap strong moa.” (1 Tim. 4:15; Mat. 5:16) Askim yu yet: ‘Ol narapela i luksave long pasin bilong mi long stap gut long Jehova? Mi save mekim ol samting bilong soim olsem mi wanpela Witnes Bilong Jehova?’ Yumi stap olsem ol manmeri bilong Jehova, olsem na em bai bel hevi sapos yumi surik long tokim ol narapela olsem yumi lotuim em.—Sng. 119:46; ritim Mak 8:38.

12, 13. Olsem wanem sampela i soim olsem ol i no Witnes Bilong Jehova?

¹² Sori tru, sampela Kristen i bihainim “tingting bilong dispela graun,” olsem na i hatwok long ol narapela i luksave long ‘man i mekim wok bilong God na man i no mekim wok bilong God.’ (1 Kor. 2:12) Tingting bilong  dispela graun i kirapim ol man long “bihainim ol laik nogut bilong bodi.” (Efe. 2:3) Olsem, maski planti taim yumi kisim ol skultok long pasin bilong bilas, sampela Kristen i bihainim yet pasin bilong ol manmeri bilong graun long sait bilong klos na bilas. Ol i save werim ol klos i pas tumas na i no haitim gut bodi, na ol i mekim olsem tu long taim ol i go long ol miting Kristen. Na tu, ol i bihainim stail bilong ol manmeri bilong graun long katim gras na mekim kain kain stail. (1 Tim. 2:9, 10) Taim ol i bung wantaim ol narapela, ating em bai hatwok long luksave long husat i bilong Jehova na husat i stap “pren bilong ol manmeri i stap longwe long God.”—Jems 4:4.

¹³ Sampela Witnes i bihainim pasin bilong dispela graun. Pasin bilong danis na ol pasin ol i mekim long taim bilong ol pati i no stret wantaim pasin ol Kristen i mas bihainim. Ol i putim ol poto na raitim ol tok long ol sosel netwok we i no stret long ol Kristen i mas mekim. Ating ol i no mekim rong na ol elda i mas stretim ol, tasol ol pasin ol i bihainim inap bagarapim bilip bilong ol narapela long kongrigesen husat i wok strong long bihainim stretpela pasin.—Ritim 1 Pita 2:11, 12.

14. Bilong wanem yumi mas lukautim pasin pren bilong yumi wantaim Jehova?

¹⁴ Ol man bilong graun i amamas tru long bihainim “laik nogut bilong bel na pasin bilong aigris na pasin bilong hambak long mani kago.” (1 Jon 2:16) Yumi bilong Jehova, olsem na yumi mas “givim baksait long olgeta samting i no stret wantaim laik bilong God na long givim baksait long olgeta laik nogut bilong dispela graun. Na tu, dispela pasin i skulim yumi long bihainim gutpela tingting na stretpela pasin na pasin bilong givim bel tru long God nau long dispela taim.” (Tai. 2:12) Pasin bilong yumi long toktok, kaikai na dring, klos na bilas, na pasin bilong yumi long mekim ol wok, olgeta dispela samting i mas soim olsem yumi lotuim Jehova wanpela tasol.—Ritim 1 Korin 10:31, 32.

15. Bilong wanem yumi mas laikim ol wanbilip na mekim gutpela pasin long ol?

¹⁵ Pasin yumi mekim long ol wanbilip i  kamapim klia tingting yumi gat long pasin pren bilong yumi wantaim Jehova. Ol wanbilip bilong yumi, ol tu i bilong Jehova. Sapos yumi holim kain tingting olsem, oltaim yumi bai laikim ol bratasista na mekim gutpela pasin long ol. (1 Tes. 5:15) Jisas i tokim ol disaipel: “Sapos pasin laikim i stap namel long yupela, orait olgeta bai save olsem yupela i disaipel bilong mi.”—Jon 13:35.

16. Wanem wanpela eksampel long Lo Bilong Moses i helpim yumi long kliagut long tingting Jehova i gat long lain bilong em?

¹⁶ Yumi laik mekim ol gutpela pasin long ol narapela insait long kongrigesen. Tingim dispela: Ol samting insait long tempel bilong Jehova i bilong yusim long mekim lotu i tru long Jehova wanpela tasol. Lo Bilong Moses i stori long olsem wanem ol inap lukautim gut ol dispela samting, na sapos wanpela man i no bihainim dispela lo, ol bai kilim em i dai. (Nam. 1:50, 51) Sapos Jehova i lukautim gut ol dispela samting em ol man i yusim bilong lotuim em, orait dispela i soim olsem em i save tingim tru na lukautim ol wokman bilong em, em ol manmeri em i makim olsem lain bilong em! Jehova i tokim lain bilong em olsem: “Man i holim yupela em i holim kiau bilong ai bilong mi.”—Sek. 2:8, NW.

17. Jehova i luksave long wanem ol samting?

¹⁷ Malakai i tok, Jehova i save “harim toktok” bilong lain bilong Em na em i luksave long pasin ol i mekim long narapela narapela. (Mal. 3:16) Jehova i “save gut long ol manmeri bilong em yet.” (2 Tim. 2:19) Em i lukim olgeta samting yumi save mekim na harim olgeta toktok bilong yumi. (Hib. 4:13) Sapos yumi no mekim gutpela tok o gutpela pasin long ol wanbilip, Jehova i save long dispela. Taim yumi mekim gut long ol narapela, serim ol samting, na fogivim ol, yumi ken bilip tru olsem Jehova i lukim ol dispela pasin yumi mekim.—Hib. 13:16; 1 Pita 4:8, 9.

18. Olsem wanem yumi inap soim tenkyu long yumi stap olsem lain bilong Jehova?

¹⁸ Yumi laik soim tenkyu bilong yumi bikos Jehova i makim yumi olsem lain bilong em. Yumi save olsem yumi bilong God, olsem na yumi bihainim savetingting na dediketim laip bilong yumi long em. Maski yumi stap “namel long lain pipol i nogut na i kranki tru,” yumi laik bai ol manmeri i luksave olsem yumi ‘no gat asua na yumi i stap klin’ na ‘yumi stap olsem lait namel long ol manmeri bilong dispela graun.’ (Fili. 2:15) Yumi mas sanap strong na sakim ol pasin nogut. (Jems 4:7) Na tu, yumi mas soim pasin laikim na pasin rispek long ol wanbilip bikos ol tu i bilong Jehova.—Rom 12:10.

19. Ol manmeri bilong Jehova bai kisim wanem ol blesing?

¹⁹ Baibel i tok promis olsem: “Bikpela i no inap lusim ol manmeri bilong en.” (Sng. 94:14) Yumi ken bilip tru olsem God bai sambai long yumi maski wanem wanem hevi i painim yumi. Maski yumi dai, dispela i no inap tekewe yumi long pasin laikim bilong Jehova. (Rom 8:38, 39) “Sapos yumi stap laip, yumi stap laip bilong tingim Jehova, na sapos yumi dai, yumi dai bilong tingim Jehova. Olsem na maski yumi stap laip o yumi dai, yumi bilong Jehova.” (Rom 14:8) Yumi bilip na wet long lukim Jehova i kirapim bek ol gutpela wokman bilong em. (Mat. 22:32) Yumi kisim planti blesing long nau. Baibel i tok: “Ol dispela lain Bikpela i stap God bilong ol, ol i ken amamas. Ol dispela manmeri em i makim bilong em yet, ol i ken amamas.”—Sng. 33:12.