1-2. (a) Olsem Matyu 28:18-20 i kamapim, wanem nambawan wok bilong kongrigesen Kristen? (b) Long dispela stadi, yumi bai kisim bekim bilong wanem ol askim?

ATING ol disaipel i amamas tru taim ol i bung arere long maunten. Bihain long Jisas i kirap bek, em i tokim ol long kam bungim em long dispela hap. (Mat. 28:16) Ating long dispela taim “em i kamap long winim 500 brata wantaim.” (1 Kor. 15:6) Wai na Jisas i tokim ol disaipel long kam long dispela miting? Em i laik givim wanpela gutpela wok long ol: “Yupela i mas i go na kamapim ol disaipel long olgeta lain man.”—Ritim Matyu 28:18-20.

² Ol disaipel husat i harim tok bilong Jisas long dispela taim, ol i insait long fes kongrigesen bilong ol Kristen long dispela taim bipo. Nambawan wok bilong dispela kongrigesen em long kamapim planti moa disaipel bilong Krais. * Long nau, i gat planti tausen kongrigesen long olgeta hap bilong graun, na nambawan wok bilong ol em long kamapim planti moa disaipel. Long dispela stadi, yumi bai kisim bekim bilong 4-pela askim: Wai na em i bikpela samting long kamapim ol disaipel? Hau bai yumi inap kamapim ol disaipel? Olgeta Kristen i gat wok long kamapim ol disaipel? Wai na yumi mas kisim pasin bilong no ken les kwik?

3. Olsem Jon 14:6 na 17:3 i kamapim, wai na em i bikpela samting long kamapim disaipel?

³ Wai na em i bikpela samting long kamapim disaipel? Ol disaipel bilong Krais tasol inap kamap pren bilong God. Na tu, ol inap stap gut long nau na bilip na wet long kisim laip oltaim long bihain. (Ritim Jon 14:6; 17:3.) Jisas i givim bikpela wok long yumi, tasol yumi no mekim dispela wok long strong bilong yumi yet. Aposel Pol i tok long em yet na ol narapela Kristen olsem ol i “wanwok bilong God.” (1 Kor. 3:9) Dispela em gutpela blesing tru Jehova na Krais i givim long yumi ol sinman!

4. Yumi inap kisim wanem skul long ekspiriens bilong Ivan na Matilde?

⁴ Wok bilong kamapim disaipel inap givim bikpela amamas long yumi. Skelim eksampel bilong Ivan na meri bilong em Matilde; ol i stap long Kolambia. Ol i stadi wantaim wanpela yangpela man, nem bilong em Davier, na em i tok: “Mi laik senisim sampela pasin, tasol mi hatwok long senisim.” Davier em hapman bilong boksen na em i save kisim drak, dring planti alkohol, na em i stap wantaim gelpren bilong em, Erika. Ivan i tok: “Ples bilong em i stap longwe na taim mipela i laik go visitim em, mipela i save ron long baisikol inap planti aua long rot i pulap tru long graun malumalum. Taim Erika i lukim olsem Davier i senisim pasin na tingting bilong em, Erika tu i kirap stadi long Baibel.” Davier i lusim pasin bilong kisim drak, dring spak, na boksen. Na tu, em i maritim Erika. Matilde i tok: “Taim Davier na Erika i kisim baptais long 2016, mipela i tingim tok bilong Davier olsem, ‘Mi laik senisim sampela pasin, tasol mi hatwok long senisim.’ Mipela i aiwara.” Tru tumas, yumi save kisim bikpela amamas taim yumi helpim ol manmeri long kamap disaipel bilong Krais.

5. Wanem samting em fes samting yumi mas mekim bilong kamapim disaipel?

⁵ Fes samting yumi mas mekim bilong kamapim disaipel em olsem: Yumi mas “painimaut gut” long ol manmeri husat i laik kisim save long God. (Mat. 10:11) Taim yumi autim tok long olgeta manmeri yumi bungim, yumi soim klia olsem yumi ol Witnes Bilong Jehova. Na tu, taim yumi bihainim tok bilong Jisas na autim tok, yumi soim klia olsem yumi ol disaipel bilong Krais.

6. Wanem samting inap helpim yumi long mekim gut wok autim tok?

⁶ Taim yumi bungim ol manmeri long namba 1 taim, sampela bai laik tru long kisim save long tok bilong Baibel, tasol planti bai i no pilim olsem. Ating yumi mas kirapim laik bilong ol. Yumi mas redi gut bambai yumi inap helpim ol. Yu ken makim stret sampela tok we inap kirapim tingting bilong ol manmeri yu bungim. Plenim hau yu bai kirapim tok.

7. (a) Olsem wanem yu inap kirapim tok taim yu bungim man? (b) Wai na em i bikpela samting long putim gut yau na soim rispek?

⁷ Eksampel: Yu ken askim man bilong haus olsem: “Em orait mi kisim tingting bilong yu long wanpela samting? Ol manmeri long olgeta hap bilong graun i karim ol wankain hevi i painim yumi long nau. Yu ting wanpela gavman bilong graun inap stretim ol dispela hevi?” Yu ken stori long Daniel 2:44. O yu ken askim man olsem: “Yu ting wanem samting bai helpim yu long skulim ol pikinini long kisim ol  gutpela pasin? Mi laik harim tingting bilong yu.” Stori long Lo 6:6, 7. Taim yu makim wanpela tok yu laik stori long en, tingim ol manmeri yu bai bungim. Tingim helpim ol bai kisim taim ol i kisim save long tok bilong Baibel. Taim yu toktok wantaim ol, yu mas putim gut yau na rispektim tingting bilong ol. Long dispela rot, yu bai kliagut long tingting bilong ol na ol bai putim yau long yu.

8. Wai na yumi mas go oltaim long mekim gobek?

⁸ Paslain long man i mekim disisen long stadi long Baibel, ating yu mas lusim sampela haptaim long mekim gobek. Bilong wanem? Ating ol manmeri i no inap stap taim yumi go bek long lukim ol. Na tu, ating yu mas mekim gobek planti taim liklik paslain long man i redi long mekim Baibel stadi. Tingim, plaua bai gro sapos oltaim yu givim wara long en. Olsem tasol, man bai kisim pasin bilong laikim Jehova na Krais taim yumi go oltaim long lukim em na stori long Tok Bilong God.

9-10. Wai na yumi inap tok olsem olgeta wan wan Kristen i insait long wok bilong painim ol man i gat gutpela bel?

⁹ Olgeta Kristen i helpim wok bilong painim ol man i gat gutpela bel. Dispela wok i wankain long wok bilong painim wanpela pikinini i lus. Wai na yumi tok olsem? Wanpela liklik boi i gat 3-pela krismas na em i bin lus. Inap 500 manmeri i traim long painim em. Ol i lusim inap 20 aua olgeta long painim em—wanpela volantia i painim em namel long traipela gaden kon. Dispela volantia i no laik bai ol manmeri i givim biknem long em. Em i tok: “Planti handret manmeri i wok bung wantaim long painim em.”

 ¹⁰ Planti manmeri i olsem dispela pikinini. Ol i pilim olsem ol i lus. Ol i no save long wanpela samting ol inap bilip na wet long en, olsem na ol i laik kisim helpim. (Efe. 2:12) Yumi stap olsem ol volantia bilong painim ol dispela manmeri, na namba bilong yumi ol volantia i winim 8 milion. Ating yu yet i no inap bungim wanpela husat i laik stadi long Baibel. Tasol ol narapela pablisa husat i autim tok long wankain teritori inap bungim man husat i laik kisim save long tok i tru bilong Baibel. Taim wanpela pablisa i bungim man husat i kamap disaipel bilong Krais, olgeta insait long dispela wok i save kisim amamas.

11. Maski sapos yu no mekim wanpela Baibel stadi, olsem wanem yu inap helpim wok bilong kamapim disaipel?

¹¹ Maski sapos yu no mekim wanpela Baibel stadi, yu inap mekim ol narapela samting long helpim wok bilong kamapim disaipel. Yu ken welkamim ol nupela lain na kamap pren bilong ol taim ol i kam long Haus Kingdom. Long dispela rot, yu inap helpim ol long bilip tru olsem pasin laikim em mak bilong yumi olsem ol Kristen tru. (Jon 13:34, 35) Taim yu bekim tok long miting, maski em sotpela tok, dispela inap skulim ol nupela lain long bihainim pasin rispek taim ol i autim bilip bilong ol. Yu inap autim tok wantaim nupela pablisa na helpim em long yusim Baibel long toktok wantaim ol manmeri. Long dispela rot, yu skulim em long bihainim pasin bilong Krais.—Luk 10:25-28.

12. Yu ting yumi nidim sampela spesel save bilong skulim ol man long kamap disaipel? Eksplenim.

¹² Yumi no ken ting yumi nidim sampela spesel save bilong skulim ol man long kamap disaipel bilong Jisas. Skelim eksampel bilong Faustina, em wanpela sista bilong yumi long Bolivia. Taim ol Witnes Bilong Jehova i bungim em, em i no save long rit. Long nau em i save liklik long rit. Em i kisim baptais pinis na em i save amamas long skulim ol narapela. Em i save mekim 5-pela Baibel stadi insait long wik. Save bilong Faustina long rit i no gutpela tumas olsem bilong ol sumatin bilong em, tasol em i bin helpim 6-pela manmeri long kisim baptais.—Luk 10:21.

13. Maski yumi bisi tru, yumi inap kisim wanem ol blesing long wok bilong kamapim disaipel?

¹³ Planti Kristen i bisi tru long mekim ol bikpela wok. Maski i olsem, ol i lusim sampela haptaim long mekim ol Baibel stadi, na ol i kisim bikpela amamas. Skelim eksampel bilong Melanie. Em i mama wanpis long Alaska na em i gat pikinini meri husat i gat 8-pela krismas. Em i mekim wok mani fultaim, na em i  lukautim papa bilong em husat i gat sik kensa. I no gat ol narapela Witnes long taun Melanie i stap long en. Em i save beten askim God long strongim em na bai em inap i go autim tok maski ples i kol tru bikos em i laik tru long painim wanpela husat i laik stadi long Baibel. Bihain em i bungim Sara, na Sara i amamas tru long kisim save olsem God i gat nem tru bilong em. Sampela haptaim i lus na bihain Sara i tok orait long stadi long Baibel. Melanie i tok: “Long Fraide apinun, mi save pilim taiet, tasol mi na pikinini meri bilong mi i save go mekim stadi na dispela i helpim mitupela wantaim. Mitupela i save mekim wok painimaut long ol askim bilong Sara, na mitupela i amamas tru long em i kamap pren bilong Jehova.” Ol wanfamili na ol wanlotu i birua long Sara, tasol em i strongim bel, lusim lotu bilong em, na kisim baptais.

14. (a) Olsem wanem wok bilong kamapim disaipel i wankain long wok bilong painim pis? (b) Yu pilim olsem wanem long tok bilong Pol long 2 Timoti 4:1, 2?

¹⁴ Maski i luk olsem yu no painim ol man husat inap kamap disaipel, no ken givap kwik. Jisas i tok wok bilong kamapim disaipel i olsem wok bilong painim pis. Planti aua inap lus paslain long man i kisim pis. Planti taim ol i save painim pis long biknait o bikmoning tru, na sampela taim ol i save seil i go longwe tru. (Luk 5:5) Olsem tasol, sampela pablisa i no save les kwik long lusim planti aua long autim tok long kain kain taim na ples. Bilong  wanem? Ol i laik bungim planti manmeri moa. Ol i save kisim bikpela amamas taim ol i bungim ol manmeri husat i laikim tok yumi autim. Yu ting yu inap autim tok long wanpela taim stret o stap long wanpela hap we yu inap bungim planti manmeri moa?—Ritim 2 Timoti 4:1, 2.

15. Taim yumi mekim Baibel stadi, bilong wanem yumi no ken les kwik?

¹⁵ Taim yumi mekim Baibel stadi, bilong wanem yumi no ken les kwik? Wanpela risen em olsem: Yumi mas helpim sumatin long kisim save na laikim ol tok i tru i stap long Baibel. Na tu, yumi mas helpim sumatin long kisim save na laikim Jehova, em Man i kamapim ol tok bilong Baibel. Yumi skulim sumatin long ol samting Jisas i laik bai ol disaipel i mekim, na tu, yumi skulim sumatin long ol pasin em i mas bihainim long i stap olsem Kristen. Yumi no ken les kwik long helpim em taim em i traim bes long bihainim ol stiatok bilong Baibel. Sampela inap senisim tingting na pasin bilong ol insait long sampela mun. Tasol long sampela narapela, bikpela haptaim moa i save lus.

16. Yu kisim wanem skul long ekspiriens bilong Raúl?

¹⁶ Ekspiriens bilong wanpela misineri long Peru i soim olsem i gutpela long bihainim pasin bilong i no les kwik. Em i tok: “Mi yusim 2-pela buk long stadi wantaim sumatin, nem bilong em Raúl. Tasol em i gat ol bikpela hevi long laip bilong em. Marit bilong em i bagarap, em i save tok nogut, na ol pikinini i no rispektim em. Em i save kam oltaim long ol miting, olsem na mi save go bilong helpim em na famili bilong em. Bihain long 3-pela yia, em i winim mak bilong kisim baptais.”

17. Neks atikol bai stori long wanem samting?

¹⁷ Jisas i tokim yumi long “go na kamapim ol disaipel long olgeta lain man.” Olsem na yumi bai toktok wantaim ol manmeri em tingting bilong ol i no wankain long yumi, na sampela i no insait long wanpela lotu na ol i no bilip long God. Neks atikol bai stori long hau yumi inap autim gutnius long ol manmeri bilong kain kain ples na sindaun.