BAIBEL i kamapim planti tok we i kam long ol man em ol i “wankain olsem yumi.” (Jems 5:17) Yumi pilim tru tok bilong Pol long Rom 7:21-24: “Taim mi gat laik long mekim pasin i stret, pasin nogut i stap wantaim mi. . . . Mi pilim nogut tru!” Yumi kisim bel isi long save olsem Pol i bin pilim wankain olsem yumi.

Ol narapela tok bilong Pol i soim olsem em i bin amamas tu. Long Galesia 2:20, em i autim bilip bilong em olsem Jisas i “laikim [em] tumas na givim em yet bilong helpim [em]”! Ating yumi tu i pilim olsem. Tasol ating sampela taim nogat.

Sapos bel i kotim yumi long ol rong yumi mekim long bipo, yumi inap pilim hatwok long tingim olsem Jehova i laikim na fogivim yumi, na yumi inap pilim hatwok tu long tingim ofa bilong Jisas olsem wanpela presen. Yu ting Jisas i laik bai yumi tingim ofa bilong em olsem presen God i givim stret long yumi? Sapos olsem, wanem samting inap helpim yumi long holim dispela tingting? Yumi ken skelim dispela 2-pela askim.

Jisas i laik bai yumi tingim ofa bilong em olsem presen em i givim long yumi. Bilong wanem yumi tok olsem? Piksaim stori i stap long Luk 23:39-43. Wanpela man i hangamap long diwai pos klostu long Jisas. Em i tokaut olsem em i bin mekim rong. Ating em i mekim bikpela rong tru bikos long bipo, ol i save hangamapim kain man olsem long pos. Em i pilim nogut tru long rong em i mekim, olsem na em i tokim Jisas: “Tingim mi taim yu kamap King.”

Jisas i tok wanem? Piksaim olsem Jisas i pilim pen wantaim na tanim het bilong em long lukluk long dispela raskol man. Maski em i pilim bikpela pen, em i smail long dispela man na tokim em: “Mi tok tru long yu tude, yu bai stap wantaim mi long Paradais.” Jisas inap tokim em olsem “Pikinini bilong man . . . i kam bilong helpim ol man na givim laip bilong em olsem pe bilong baim bek planti manmeri.” (Mat. 20:28) Tasol long gutpela pasin, Jisas i kamapim klia olsem ofa bilong em inap baim bek tu dispela man. Jisas i mekim olsem em i toktok long wanpela pren na em i yusim ol dispela tok “yu” na “mi.” Em i tok dispela man bai kisim laip long paradais long graun.

Jisas i laik bai dispela man i tingim ofa bilong Jisas olsem presen bilong helpim em tu. Jisas i redi long helpim raskol man husat i no gat rot long mekim wok bilong God. Dispela i soim klia olsem Jisas bai redi moa yet long helpim Kristen husat i mekim wok bilong God. Orait wanem samting inap helpim yumi long kisim stretpela tingting long yumi yet maski yumi bin mekim ol rong long pastaim?

Wok autim tok bilong Pol i stiaim tingting em i holim long ofa bilong Jisas. Em i tok: “Mi tenkyu long Krais Jisas, Bikpela bilong yumi, em i givim strong long mi, long wanem, em i tingim mi olsem man em inap bilip long en na em i givim wanpela wok holi long mi. Em i mekim olsem maski bipo mi bin tok nogut long God na mekim nogut long ol lain bilong em na mi man bilong mekim pasin bikhet.” (1 Tim. 1:12-14) Wok autim tok i strongim bilip bilong Pol olsem Jisas i marimari, laikim, na trastim em. Jisas i givim wok long yumi olgeta wan wan. (Mat. 28:19, 20) Yu ting dispela wok inap stiaim tingting yumi tu i holim long ofa bilong Jisas?

Albert i bin raus inap olsem 34 yia, na taim em i kam bek long Jehova, em i tok: “Oltaim mi save tingim ol rong mi bin mekim. Tasol taim mi autim tok, mi pilim wankain olsem aposel Pol—mi tingim olsem Jisas i givim dispela wok long mi. Dispela wok i strongim bilip bilong mi na mi pilim amamas long mi yet, laip bilong mi long nau, na laip bilong mi long bihain.”—Sng. 51:3.

Allan i bin insait long pasin raskol na pait, tasol bihain em i kisim save long tok i tru. Em i tok: “Mi tingim yet olgeta hevi mi kamapim long ol manmeri. Sampela taim dispela i mekim mi bel hevi tru. Tasol mi tenkyu tru long Jehova long em i larim sinman olsem mi long bringim gutnius i go long ol narapela. Taim mi lukim olsem ol manmeri i amamas long kisim gutnius, mi pilim tru gutpela pasin na pasin laikim bilong Jehova. Mi pilim olsem em i yusim mi long helpim ol narapela em laip bilong ol i wankain long laip bilong mi long pastaim.”

Wok autim tok i opim rot long yumi inap yusim strong bilong yumi long mekim gutpela wok na tingim ol stretpela samting. Yumi pilim tru pasin marimari na pasin laikim bilong Jisas, na pasin bilong em long trastim yumi.

Long nau, yumi stap yet long graun nogut bilong Satan, olsem na bel bilong yumi bai wok yet long kotim yumi long ol rong yumi mekim long bipo. Wanem samting bai mekim gut bel bilong yumi?

Jean i pilim nogut long pasin em i bihainim taim em i stap yangpela. Taim em i stap wantaim papamama na go long Haus Kingdom, em i bihainim stretpela pasin. Tasol taim em i stap em yet, em i mekim ol pasin i no stret. Em i tok: “Mi laikim dispela tok olsem ‘God i winim tru bel bilong yumi.’” (1 Jon 3:19, 20) Yumi tu inap stap bel isi taim yumi save olsem Jehova na Jisas i pilim tru hevi bilong yumi olsem ol sinman. Tingim, pasin laikim i kirapim ol long givim pe bilong baim bek ol sinman husat i tanim bel.—1 Tim. 1:15.

Taim yumi beten na tingim tingim pasin Jisas i soim long ol sinman na yumi wok strong long inapim wok autim tok, yumi bai pilim tru pe bilong em long baim bek yumi. Yumi inap mekim wankain tok olsem Pol i bin mekim, em i tok, Jisas “i bin laikim mi tumas na givim em yet bilong helpim mi.”