LAIP STORI
Mi Mekim Wok Bilong Mi na i Stret Mi Mekim
WINIM 30 yia olgeta, Donald Ridley i mekim wok loya na sambai long ol Witnes Bilong Jehova. Em i givim bikpela helpim long kamapim klia olsem ol sikman i gat rait long sakim ol marasin ol i wokim long blut. Wok bilong em i helpim yumi long winim sampela keis long suprim kot. Ol pren i save kolim em Don; em man bilong wok, em i gat pasin daun, na em i save tingim tru ol narapela.
Long 2019, Don i kisim wanpela sik insait long ol rop bilong karim blut, na i no gat marasin bilong oraitim dispela sik. Dispela sik i kamap bikpela hariap tru, na em i dai long Ogas 16, 2019. Dispela em stori bilong em.
Mi bon long Saint Paul, Minnesota, Amerika, long 1954, insait long nomol famili, na mipela i bilong lotu Katolik. Mipela 5-pela pikinini long famili, na mi namba 2 pikinini. Mi go long elementeri skul bilong Katolik, na mi save helpim pris taim em i mekim misa. Tasol mi no gat save long tok bilong Baibel. Mi bilip olsem God i bin wokim olgeta samting, tasol mi no bilip moa long lotu.
KISIM SAVE LONG TOK I TRU
Long fes yia bilong mi long William Mitchell Kolis Bilong Lo, ol Witnes Bilong Jehova i kam long haus bilong mi. Mi bisi long mekim londri, na ol dispela Witnes, em 2-pela marit, ol i tok orait long kam bek gen. Taim ol i kam bek, mi givim 2-pela askim long ol: “Wai na ol gutpela manmeri i no gat gutpela sindaun?” na “Hau bai ol manmeri inap i stap amamas?” Mi kisim buk The Truth That Leads to Eternal Life na Nupela Taim Trenslesen Bilong Ol Skripsa Holi; em i gat grinpela karamap bilong en. Na tu, mi tok orait long mekim Baibel stadi. Dispela i opim rot na mi inap kisim planti nupela save. Mi amamas tru long kisim save olsem Kingdom Bilong God tasol bai mekim wok bos long dispela graun. Mi inap lukim olsem wok bos bilong ol man yet i kamapim planti pen na hevi, na pasin nogut tasol i pulap.
Long kirap bilong 1982, mi dediket long Jehova, na sampela mun bihain mi kisim baptais long “Kingdom Truth” Kibung long Saint Paul Civic Senta. Long wik bihain, mi go bek long wankain senta long mekim eksem na bai mi inap kamap loya. Long kirap bilong mun Oktoba, mi kisim toksave olsem mi winim dispela eksem, olsem na mi inap mekim wok loya.
Long “Kingdom Truth” Kibung, mi bungim Mike Richardson, em brata i wok long Betel long Brooklyn, na em i tokim mi olsem i gat ligol ofis long hetkota. Mi tingim gen tok bilong man Itiopia long Aposel 8:36 na mi askim mi yet, ‘Wanem samting i pasim mi long askim sapos mi inap wok long Ligol Ofis?’ So mi aplai long Betel.
Papamama i no amamas olsem mi kamap wanpela Witnes Bilong Jehova. Papa i askim sapos wok mi mekim wantaim Watchtower Sosaiti bai helpim wok bilong mi olsem loya. Mi eksplenim long em olsem mi bai mekim wok volantia. Mi tokim em olsem mi bai kisim 75 dola long olgeta mun, em alauens bilong ol Betelait long dispela taim.
Mi inapim wok mi mas mekim long kot haus, na bihain, long 1984, mi stat wok long Brooklyn Betel, New York. Mi kisim asainmen bilong wok long Ligol Ofis. Ekspiriens bilong mi long wok long kot haus i redim mi long asainmen bilong mi.
WOK BILONG STRETIM GEN STANLEY TIETA
Stanley Tieta i luk olsem long fes taim oganaisesen i baim
Long Novemba 1983, oganaisesen i baim Stanley Tieta long Jersey City, New Jersey. Ol brata i aplai long kisim tok orait bilong stretim gen ol samting long sait bilong pawa na ol paip wara insait long dispela haus piksa. Taim ol i bung wantaim ol gavman ofisa, ol brata i eksplenim olsem ol i laik yusim Stanley Tieta olsem haus kibung bilong ol Witnes Bilong Jehova. Dispela i kamapim hevi. Lo bilong siti i makim olsem ol ples bung bilong lotu i mas stap long ol hap we haus slip bilong ol manmeri i stap long en. Stanley Tieta i stap long biktaun, olsem na ol bikman i no redi long givim tok orait. Ol brata i apil gen long dispela disisen, tasol ol i lus long kot.
Long fes wik bilong mi long Betel, oganaisesen i bringim dispela disisen i go long distrik kot, bilong askim long wai na gavman i no laik givim tok orait long mipela. Mi bin wok olsem sekreteri long distrik kot long Saint Paul, Minnesota, inap 2-pela yia, olsem na mi save gut long ol kain kot keis olsem. Wanpela atoni bilong mipela i tokim kot olsem, paslain long mipela i baim Stanley Tieta, kain kain bung bilong pablik i bin kamap long dispela tieta, olsem bung bilong lukim ol muvi na ol musik konset. So, wai na i tambu long mekim ol bung bilong lotu? Distrik kot i skelim na tokaut olsem gavman ofis bilong Jersey City i no rispektim fridom bilong mipela long mekim wok lotu. Kot i tokim ol long givim tok orait long mipela. Stat long dispela taim, mi lukim hau Jehova i blesim oganaisesen bilong em taim yumi laik kisim tok orait bilong gavman long mekim wok bilong Kingdom i kamap bikpela moa. Mi amamas tru olsem mi tu inap mekim sampela samting na mipela i winim kot.
Ol brata i kirapim bikpela wok bilong stretim dispela tieta, na gretiuesen bilong namba 79 klas bilong Gileat i kamap long Jersey City Haus Kibung long Septemba 8, 1985, klostu wanpela yia bihain long ol brata i stretim gen tieta. Mi amamas tru olsem mi inap stap insait long ligol tim na helpim wok bilong Kingdom, na dispela amamas i winim tru olgeta amamas mi kisim long wok loya paslain long mi kam long Betel. Mi no save olsem Jehova bai yusim mi long planti moa kot keis.
RAIT BILONG KISIM MARASIN OL I NO WOKIM LONG BLUT
Long ol yia bihain long 1980, ol dokta na ol haus sik i no save rispektim laik bilong ol Witnes em ol i bikpela pinis, taim ol i askim long kisim marasin em ol i no wokim long blut. Bikpela hevi tru i painim ol meri i gat bel bikos ol jas i pilim olsem meri i no gat rait long tok nogat taim haus sik i laik givim blut long em. Ol jas i tok sapos meri i no kisim blut, em bai dai na pikinini bai i no gat mama.
Long Disemba 29, 1988, Sista Denise Nicoleau i lusim planti blut bihain long em i karim bebi. Hemoglobin bilong em i go daun aninit long 5.0, na dokta i askim long givim blut long em. Sista Nicoleau i tok nogat. Long neks moning, haus sik i laik kisim tok orait bilong kot na bai ol i ken givim blut long Sista Nicoleau. Jas i no mekim kot o toksave long Sista Nicoleau o man bilong em, nogat, em i go het na tok orait long haus sik long givim blut long sista.
Long Fraide, Disemba 30, ol wokman bilong haus sik i givim blut long Sista Nicoleau maski man bilong em na ol wanfamili husat i stap long haus sik i tok nogat. Long neks de long apinun, polis i arestim sampela wanfamili na ating wanpela o 2-pela elda em ol i laik pasim rot bilong ol haus sik lain long givim blut long Sista Nicoleau. Long Sarere moning, Disemba 31, ol niuspepa na ol TV na redio stesin long New York City na Long Ailan i stori long dispela arest.
Wantaim Philip Brumley long bipo
Long Mande moning, mi toktok wantaim jas bilong bikpela kot, Milton Mollen. Mi stori gut long ol samting i kamap, na tokaut klia olsem narapela jas i bin sainim tok orait bilong givim blut, tasol em i no bin mekim kot keis. Jas Mollen i tokim mi long go long ofis bilong em long apinun long seim de na bai mipela i ken stori long ol samting tru i bin kamap na skelim wantaim lo. Long apinun, ovasia bilong mi, Philip Brumley, i go wantaim mi long ofis bilong Jas Mollen. Jas i invaitim tu atoni bilong haus sik long kam bung wantaim mipela. Toktok bilong mipela i kamap strong. Long namel bilong toktok, Brata Brumley i raitim wanpela hap tok namel long ol tok em i raitim na em i tokim mi olsem, “no ken apim nek tumas.” Em gutpela tok kaunsel bikos mi stat long belhat taim mi wok long daunim ol tok bilong atoni.
Stat long left i go long rait: Richard Moake, Gregory Olds, Paul Polidoro, Philip Brumley, mi, na Mario Moreno—ol atoni bilong yumi long dispela de we mipela i paitim toktok i go i kam long Suprim Kot bilong Amerika long kot keis namel long Watchtower veses Ples Stratton.—Lukim Awake! bilong Janueri 8, 2003
Bihain long wanpela aua, Jas Mollen i tok kot keis bilong mipela bai kamap fes long neks moning. Taim mipela i laik lusim ofis bilong em, Jas Mollen i tok atoni bilong haus sik i gat “bikpela wok tru long tumora.” Dispela i makim olsem atoni bai painim hat long sambai long haus sik na tok olsem ol i gat rait long givim blut. Mi pilim olsem Jehova i strongim mi long tingim olsem mipela inap winim dispela kot keis. Mi amamas tru long lukim olsem Jehova i yusim mipela long kamapim laik bilong em.
Mipela i wok inap long nait olgeta na redim ol tok bilong mekim long neks moning. Kot haus i stap klostu long Brooklyn Betel, so planti bratasista long Ligol Ofis i wokabaut i go long kot haus. Fopela jas i harim kot, na bihain ol i mekim disisen olsem i no stret long haus sik i givim blut. Bikpela kot i sapotim sait bilong Sista Nicoleau na tokaut olsem lo bilong gavman i tambuim pasin bilong kisim tok orait o givim tok orait sapos i no gat kot keis i bin kamap.
Bihain, nambawan bikpela kot bilong New York i tokaut klia olsem Sista Nicoleau i gat rait long kisim marasin ol i no bin wokim long blut. Dispela em fes kot mi stap insait long en we i stretim hevi long sait bilong blut, na bihain mi insait tu long 3-pela narapela kot keis long sait bilong blut. (Lukim blok “ Winim Kot Keis Long Suprim Kot.”) Na tu, mi bin wok wantaim ol narapela atoni long Betel long ol kot keis long sait bilong husat i gat rait long lukautim pikinini, divos, ol bikpela hap graun i gat ol bilding long en, na ol lo i stiaim wei bilong yusim graun na bilding.
MARIT NA FAMILI LAIP
Wantaim meri bilong mi, Dawn
Taim mi bungim meri bilong mi, Dawn, em i stap mama wanpis i lukautim 3-pela pikinini—em i bin divos. Em i wok mani na em i mekim tu wok painia. Em i bin karim bikpela hevi long laip bilong em, na mi pilim tru pasin bilong em long holim strongpela tingting long mekim wok bilong Jehova. Long 1992, mipela i go long “Ol Man i Stap Olsem Lait” Kibung Distrik long New York City, na mi askim long prenim em. Mitupela i marit wanpela yia bihain. Em i olsem presen i kam long Jehova bikos em i save tingim tru wok bilong Kingdom na em meri bilong amamas.—Prov. 31:12.
Taim mipela i marit, ol pikinini i gat 11, 13, na 16 krismas. Mi laik stap olsem gutpela papa, so mi ritim na bihainim gut olgeta tok i stap long ol pablikesen bilong yumi long wei bilong stap olsem step-papa. I gat sampela hatwok, tasol mi belgut olsem ol pikinini i amamas long tingim mi olsem gutpela pren na papa bilong ol. Mi tok orait long ol pikinini i ken bringim ol pren bilong ol i kam long haus, na mipela i amamas long lukim ol tineja i stap wantaim mipela.
Long 2013, mitupela Dawn i go long Wisconsin long lukautim ol lapun papamama bilong mipela. Mi amamas olsem mi inap mekim yet wok bilong Betel. Mi stap olsem haptaim volantia na mekim yet wok loya bilong sapotim oganaisesen bilong yumi.
SENIS I KAMAP WANTU
Long Septemba 2018, mi luksave olsem planti taim mi mas kliaim nek paslain long mi toktok. Dokta i sekim mi, tasol em i hatwok long painimaut gut long as bilong dispela hevi. Bihain, narapela dokta i tok mi mas lukim dokta bilong painimaut sik insait long ol rop bilong karim blut. Long Janueri 2019, dispela dokta i tok ating mi kisim wanpela kain sik we inap bagarapim tru bodi bilong mi.
Tripela de bihain, mi go ski antap long ais, na mi brukim rait han bilong mi. Ski em i no nupela samting long mi; em samting mi bin mekim long laip olgeta bilong mi. So mi luksave olsem mi no inap moa long kontrolim ol masol bilong mi. Sik bilong mi i kamap bikpela kwiktaim na em i bagarapim toktok bilong mi, na mi hatwok long muvim bodi na daunim kaikai.
Mi amamas tru olsem mi bin yusim ekspiriens bilong mi olsem loya long mekim liklik wok bilong sapotim wok bilong Kingdom. Mi amamas olsem mi inap raitim planti atikol long ol nius, na tu, mi inap givim tok long ol semina long narapela narapela hap bilong graun, na sambai long ol manmeri bilong Jehova, olsem ol i gat rait long makim ol marasin ol i no wokim long blut, na abrusim blut taim ol i kisim operesen. Mi bai mekim wankain tok olsem i stap long Luk 17:10: ‘Mi wokboi nating. Wok mi bin mekim, em wok bilong mi na i stret mi mekim.’
