1. Olsem 3 Jon 3, 4 i kamapim, wanem samting i save mekim yumi amamas?

PIKSAIM bikpela amamas bilong aposel Jon taim em i harim olsem ol lain em i bin helpim long kisim save long tok i tru, ol i stap gut yet long mekim wok bilong Jehova. Ol i bungim planti hevi, na Jon i wok hat long strongim bilip bilong ol bikos em i tingim ol olsem ol pikinini bilong em long sait bilong bilip. Olsem tasol, yumi save amamas taim ol pikinini bilong yumi o ol lain yumi helpim long kisim save long tok i tru, ol i dediket long Jehova na wok yet long stap gut long em.—Ritim 3 Jon 3, 4.

2. Wanem wok bilong ol pas em Jon i raitim?

² Long 98 C.E., Jon i stap long Efesus o klostu long en. Ating em i go sindaun long hap bihain long em i lusim kalabus long ailan Patmos. Long dispela taim, holi spirit bilong Jehova i kirapim em long raitim 3-pela pas. Em i laik kirapim ol Kristen long holim yet bilip bilong ol long Jisas na wokabaut yet long tok i tru.

3. Yumi bai kisim bekim bilong wanem ol askim?

³ Jon em laspela aposel i stap laip long dispela taim, na em i tingting planti long hevi em ol giaman tisa inap putim long ol kongrigesen. * (1 Jon 2:18, 19, 26) Ol dispela apostet i tok ol i save long God, tasol ol i no bihainim ol lo bilong Jehova. Yumi ken skelim ol tok em holi spirit i kirapim Jon long raitim. Yumi bai kisim bekim bilong 3-pela askim: Olsem wanem yumi inap wokabaut long tok i tru? Wanem ol samting inap pasim yumi long wokabaut long tok i tru? Olsem wanem yumi inap helpim narapela narapela long stap yet long tok i tru?

4. Olsem 1 Jon 2:3-6 na 2 Jon 4, 6 i kamapim, olsem wanem yumi inap wokabaut long tok i tru?

⁴ Sapos yumi laik wokabaut long tok i tru, yumi mas save long tok i tru i stap long Baibel. Na tu, yumi mas “bihainim ol lo bilong  [Jehova].” (Ritim 1 Jon 2:3-6; 2 Jon 4, 6.) Jisas i stap gutpela eksampel long pasin bilong bihainim tok bilong Jehova. So nambawan rot bilong bihainim tok bilong Jehova em long bihainim gut lek mak bilong Jisas.—Jon 8:29; 1 Pita 2:21.

5. Yumi mas bilip long wanem samting?

⁵ Sapos yumi laik wokabaut long tok i tru, yumi mas bilip olsem Jehova em God bilong tok i tru na olgeta samting em i tokim yumi long rot bilong Baibel, em i tru. Na tu, yumi mas bilip olsem Jisas em Mesaia we God i bin tok promis long salim em i kam. God i anointim Jisas na em i stap King long Kingdom Bilong God, tasol planti man long nau i holim 2-pela tingting long dispela samting. Jon i givim tok lukaut olsem “planti man bilong giaman” inap paulim ol lain em ol i no redi long sambai long tok i tru i stori long Jehova na Jisas. (2 Jon 7-11) Jon i tok: “Husat i man bilong giaman? Ating em dispela man i tok olsem Jisas em i no Krais, a?” (1 Jon 2:22) Wanpela rot tasol bilong abrusim tok giaman em long stadi long Tok Bilong God. Long dispela rot tasol, yumi bai kisim save long Jehova na Jisas. (Jon 17:3) Na long dispela rot tasol, yumi bai bilip olsem yumi holim tok i tru.

6. Ol yangpela Kristen inap bungim wanem hevi?

⁶ Olgeta Kristen i mas was gut na ol i no ken bilipim savetingting bilong ol man. (1 Jon 2:26) Ol yangpela Kristen i mas was gut na bai ol i no ken pundaun long dispela trap. Alexia * em wanpela sista long Frans na em i gat 25 krismas, na em i tok: “Taim mi stap long skul, mi kisim save long bilip bilong evolusen na savetingting bilong ol man, na dispela i mekim na mi holim 2-pela tingting long tok i tru. Sampela taim mi pilim olsem mi laikim ol dispela save. Tasol mi pilim olsem i no stret long mi bilipim tok bilong ol tisa, na sakim tok bilong Jehova.” Alexia i stadi long buk Life—How Did It Get Here? By Evolution or by Creation? Insait long sampela wik, em i no holim moa 2-pela tingting. Alexia i tok: “Mi pruvim long mi yet olsem Baibel i gat ol tok i tru. Na mi luksave olsem sapos mi bihainim ol lo bilong en, mi bai stap amamas na stap bel isi.”

7. Yumi no ken giaman long mekim wanem? Bilong wanem?

⁷ Olgeta Kristen, em ol yangpela na ol lapun, ol i no ken giaman long lotuim God na long wankain taim ol i hait na mekim ol pasin i no stret. Jon i tok i no stret long yumi wokabaut  long tok i tru na mekim pasin pamuk long seim taim. (1 Jon 1:6) Sapos yumi laik bai Jehova i amamas long yumi long nau na long bihain, orait oltaim yumi mas tingim olsem em i lukim olgeta samting yumi mekim. Maski sapos ol man i no lukim ol samting yumi mekim long pasin hait, Jehova i lukim.—Hib. 4:13.

8. Yumi mas sakim wanem samting?

⁸ Yumi mas sakim tingting bilong ol man long sait bilong sin. Aposel Jon i tok: “Sapos yumi tok, ‘Yumi no gat sin,’ orait yumi giamanim yumi yet.” (1 Jon 1:8) Long taim bilong Jon, ol apostet i tok man i ken mekim sin na pas gut yet wantaim God. Long nau, yumi stap namel long ol manmeri husat i holim wankain tingting olsem ol apostet long pastaim. Planti man i tok ol i bilip long God, tasol ol i no wanbel long lo bilong Jehova long wanem ol pasin i no stret, na moa yet long sait bilong maritpasin. Ol i tok i no gat rong long man i bihainim laik bilong em yet na mekim ol pasin em Jehova i kolim olsem sin.

9. Wanem gutpela samting inap kamap sapos ol yangpela i bihainim gut bilip bilong ol em Baibel i as bilong en?

⁹ Ol yangpela Kristen inap pilim hatwok taim ol wanklas o ol wanwok i putim presa long ol long bihainim tingting bilong ol long sait bilong pasin pamuk. Dispela samting i kamap long Aleksandar, em wanpela yangpela man. Em i tok: “Sampela gels long skul i putim presa long mi long mekim maritpasin wantaim ol. Ol i tok mi no gat gelpren, olsem na ating mi wanpela gei.” Sapos wankain traim i painim yu, tingim olsem sapos yu bihainim gut bilip bilong yu em Baibel i as bilong en, yu bai amamas long yu yet, lukautim helt bilong yu, stap amamas, na pas gut yet wantaim Jehova. Na long olgeta wan wan taim yu sakim traim, em bai isi moa long yu inap mekim pasin i stret. Tingim tu olsem Satan i kirapim ol man long holim rong tingting long sait bilong maritpasin. Olsem na taim yu sakim tingting bilong dispela graun, i olsem yu “winim pinis Satan.”—1 Jon 2:14.

10. Olsem wanem 1 Jon 1:9 i soim klia olsem bel bilong yumi inap i stap klin taim yumi mekim wok bilong Jehova?

 ¹⁰ Yumi wanbel olsem Jehova i gat rait long putim lo bilong makim wanem ol pasin i stap olsem sin. Na yumi traim bes long abrusim pasin bilong mekim sin. Tasol taim yumi mekim sin, yumi beten long Jehova na autim ol sin bilong yumi. (Ritim 1 Jon 1:9.) Na sapos yumi mekim bikpela sin, yumi go kisim helpim long ol elda, em ol man Jehova i makim bilong lukautim yumi. (Jems 5:14-16) Sapos yumi bin mekim rong long bipo, yumi no ken larim dispela i bagarapim yet bel bilong yumi. Wai? Bikos gutpela Papa bilong yumi i givim Pikinini bilong em olsem ofa bilong baim bek yumi, olsem na God inap fogivim ol sin bilong yumi. Taim Jehova i tok em bai fogivim ol man i sori tru long ol rong ol i bin mekim, tok bilong em i tru. Olsem na bel bilong yumi inap i stap klin na i no gat wanpela samting inap pasim yumi long lotuim Jehova.—1 Jon 2:1, 2, 12; 3:19, 20.

11. Olsem wanem yumi inap lukautim yumi yet na sakim ol tingting we inap bagarapim bilip bilong yumi?

¹¹ Yumi mas sakim tingting bilong ol apostet. Stat long taim kongrigesen Kristen i kirap nupela, Devil i yusim planti man long giamanim ol wokman bilong God na kirapim ol long kisim 2-pela tingting. Olsem na yumi mas kliagut long hau yumi inap luksave long wanem ol tok i tru na wanem ol tok i giaman. * Ol birua inap yusim Intenet o sosel netwok long daunim pasin bilong yumi long trastim Jehova, na daunim tu pasin bilong yumi long laikim ol wanbilip. Tingim olsem Satan i kamapim ol dispela tok giaman, olsem na yumi mas sakim ol dispela tok!—1 Jon 4:1, 6; Rev. 12:9.

12. Wai na yumi mas strongim bilip bilong yumi long ol tok i tru yumi bin lainim?

¹² Sapos yumi laik sakim ol trap bilong Satan, orait yumi mas strongim pasin bilong yumi  long trastim Jisas na wok em i mekim bilong kamapim ol samting God i tingting pinis long kamapim. Na tu, yumi mas trastim wanpela rot tasol em Jehova i yusim long stiaim oganaisesen bilong em long nau. (Mat. 24:45-47) Yumi strongim moa yet bilip bilong yumi taim yumi stadi oltaim long Tok Bilong God. Bilip bilong yumi bai kamap strong olsem diwai em ol rop bilong en i go daun insait tru long graun. Pol i mekim wankain tok taim em i raitim pas i go long kongrigesen long Kolosi. Em i tok: “Yupela i kisim pinis Bikpela Krais Jisas, olsem na yupela i mas pas wantaim em na wokabaut yet wantaim em. Yupela i mas holimpas em na wok yet long kamap strong long rot bilong em na sanap strong long bilip.” (Kol. 2:6, 7) Satan na lain bilong em i no inap tru long stopim yumi long wokabaut long tok i tru sapos yumi yet i strongim bilip bilong yumi.—2 Jon 8, 9.

13. Yumi mas ekspektim wanem samting? Bilong wanem?

¹³ Yumi mas ekspektim ol manmeri bilong dispela graun long heitim yumi. (1 Jon 3:13) Jon i kirapim yumi long tingim gen olsem “dispela graun olgeta i stap long han bilong Satan.” (1 Jon 5:19) Pinis bilong dispela taim i klostu nau, olsem na belhat bilong Satan i moa moa yet. (Rev. 12:12) Em i yusim kain kain rot long bagarapim yumi, kain olsem trap bilong mekim pasin pamuk o tok giaman bilong ol apostet. Em inap yusim tu ol man long mekim nogut long yumi. Satan i save olsem em i gat sotpela haptaim tasol bilong traim long stopim yumi long autim tok o bagarapim bilip bilong yumi. Olsem na yumi no kirap nogut olsem long sampela kantri, ol i stopim wok bilong yumi long autim tok. Maski i olsem, ol bratasista bilong yumi long ol dispela kantri i sanap strong na karim hevi. Ol i kamapim klia olsem maski Satan i mekim wanem samting long yumi, yumi inap stap gut yet long God!

14. Wanem wanpela rot bilong helpim ol bratasista long stap yet long tok i tru?

¹⁴ Sapos yumi laik helpim ol bratasista long stap yet long tok i tru, orait yumi mas soim pasin sori. (1 Jon 3:10, 11, 16-18) Yumi mas laikim narapela narapela long gutpela taim na long taim bilong hevi. Eksampel, yu save long wanpela brata o sista em wanblut o pren bilong em i dai na em i nidim narapela long helpim o mekim isi bel bilong em? O yu harim olsem ol wanbilip i karim hevi long disasta na ol i nidim helpim long wokim gen Haus Kingdom o wokim gen haus bilong ol? Yumi soim olsem yumi laikim tru na sori long ol bratasista long rot bilong ol tok yumi mekim, na bikpela samting moa, long rot bilong ol samting yumi mekim bilong helpim ol.

15. Olsem 1 Jon 4:7, 8 i kamapim, yumi mas mekim wanem?

¹⁵ Yumi bihainim pasin bilong gutpela Papa long heven taim yumi soim pasin laikim long narapela narapela. (Ritim 1 Jon 4:7, 8.) Wanpela bikpela rot bilong soim pasin laikim em long fogivim narapela narapela. Eksampel, ating wanpela brata o sista i mekim yumi bel hevi, na bihain em i tok sori. Yumi soim pasin laikim taim yumi fogivim em na yumi no tingim rong em i mekim. (Kol. 3:13) Dispela hevi i painim wanpela brata nem bilong em Aldo; em i save rispektim wanpela brata, tasol dispela brata i mekim tok i daunim lain bilong Aldo. Aldo i tok, “Oltaim mi beten askim Jehova long helpim mi na bai mi no ken holim tingting nogut long dispela brata.” Aldo i mekim narapela samting. Em i askim dispela brata long i go autim tok wantaim em. Taim ol i wok wantaim, Aldo i kamapim klia olsem em i bel hevi long tok dispela brata i bin mekim. Aldo i tok: “Taim brata i harim olsem tok bilong em i mekim mi  bel hevi, em i tok sori. Taim em i toktok, krai bilong nek i soim olsem em i bel hevi tru long tok em i bin mekim. Bihain long dispela, mipela i stap yet olsem ol gutpela pren.”

16-17. Yumi mas strongim tingting long mekim wanem?

¹⁶ Aposel Jon i laikim tru ol bratasista na em i tingim tru bilip bilong ol, na dispela i stap ples klia long tok em i raitim long 3-pela pas bilong em. Yumi amamas tru long save olsem God i anointim ol manmeri em ol i gat wankain pasin olsem Jon, na ol inap mekim wok king wantaim Krais!—1 Jon 2:27.

¹⁷ Yumi mas tingim gut ol samting yumi stori long en. Yumi mas strongim tingting bilong yumi long wokabaut yet long tok i tru, na bihainim tok bilong Jehova long olgeta samting yumi mekim. Stadi long Tok Bilong God, na trastim dispela tok. Strongim bilip bilong yu long Jisas. Sakim savetingting bilong ol man na tok bilong ol apostet. Sakim pasin bilong hait na bihainim ol pasin i no stret na mekim sin. Bihainim ol stretpela lo bilong Jehova. Na yumi mas fogivim ol lain i mekim yumi bel hevi, na sambai long ol lain i nidim helpim, na long dispela rot yumi helpim ol wanbilip long stap strong yet long bilip. Taim yumi mekim olsem, yumi bai wokabaut yet long tok i tru maski wanem wanem ol hevi i painim yumi.