Jehova i laik bai tupela man na meri i marit i stap amamas na pas gut wantaim inap oltaim. (Mat. 19:4-6) Sapos yu laik marit, hau bai yu painim wanpela gutpela poroman marit? Jehova em Krieta bilong yumi, na em i save long hau man na meri inap pren gut na marit. Olsem na sapos yu bihainim ol stiatok em i givim yumi, gutpela samting bai kamap. Tingim sampela bilong ol dispela stiatok.

Pastaim, yumi mas save long dispela samting: “Bel bilong ol man i save tingting oltaim long mekim pasin giaman, na tingting bilong man em i nogut tru.” (Jer. 17:9) Taim wanpela i traim long painim wanpela gutpela poroman marit, bel inap giamanim em na em i no mekim gutpela disisen. Taim man i larim bel na tingting bilong em i stiaim disisen bilong em long marit, bihain em bai bel hevi nogut tru. (Prov. 28:26) Olsem na em i no savetingting long man na meri i mekim ol switpela tok long narapela narapela taim ol i stat long pren o hariap long mekim ol tok promis paslain long ol i save gut long narapela narapela.

Provep 22:3 i tok: “Man i gat pasin bilong tingting gut na mekim samting, em i lukim hevi na em i haitim em yet, tasol man i sot long save, em bai wokabaut stret i go na karim hevi.” Wanem hevi inap kamap long yusim ol websait bilong painim poroman? Sori tru, sampela i karim bikpela bel hevi tru bikos ol lain em ol i no save long ol we ol i bungim long kain websait i giamanim ol. Na tu, sampela man bilong giaman i krietim ol giaman akaun na trikim ol man i no gat gutpela tingting na kisim mani bilong ol. Planti taim, ol dispela man bilong giaman ol i giaman olsem ol i Witnes.

Tingim wanpela moa hevi. Sampela websait bilong painim poroman i save yusim ol kompiuta program we i save metsim ol lain i gat wankain laik na intres. Tasol i no gat evidens olsem kain ol program i save wok gut. Yu ting em savetingting long trastim ol program em ol man i wokim long kain bikpela samting olsem painim gutpela poroman marit? Ol stiatok bilong Baibel i winim tru ol program em ol man i wokim.—Prov. 1:7; 3:5-7.

Stiatok long Provep 14:15 i tok: “Man i no gat gutpela tingting, em i save bilipim olgeta tok, tasol man i gat pasin bilong tingting  gut na mekim samting, em i save skelim gut olgeta wokabaut bilong em.” Paslain long yu prenim wanpela em yu ting i gutpela poroman marit, yu mas save gut long em. Tasol sapos yu bungim em long Intenet samting bai yu hatwok long save gut long em. Maski yupela i save lukim profail bilong narapela narapela na lusim bikpela haptaim long salim ol mesis i go i kam, yu ting dispela i makim olsem yu save gut long em? Sampela em ol i ting ol i painim tru lav bilong ol, ol i kirap nogut long samting ol i painimaut taim ol i bungim dispela man o meri.

Man bilong raitim Song i tok: “Mi no save bung wantaim ol man bilong giaman, na mi no save raun wantaim ol man i save haitim pasin tru bilong ol.” (Sng. 26:4) Long ol websait bilong painim poroman, planti i ting em nomol long giaman long profail bilong ol na bai ol narapela i ken laikim ol. Ol inap haitim ol pasin tru bilong ol o i no soim ol dispela pasin taim ol i stori long ol yet. Tru, sampela inap tok olsem ol i Witnes Bilong Jehova, tasol tru tru ol i Kristen i baptais pinis? Ol i strong long bilip? Ol i pas gut wantaim Jehova? Ol narapela long kongrigesen bilong ol i rispektim ol? O ating ol i no gutpela eksampel o ol i “poroman nogut”? (1 Kor. 15:33; 2 Tim. 2:20, 21) Na olsem ol stiatok bilong Baibel i kamapim, ol i stap fri long marit? Yu mas save long ol dispela samting, tasol em bai hatwok long yu mekim olsem sapos ol narapela Witnes husat i save gut long dispela man o meri i no stori long yu long ol dispela samting. (Prov. 15:22) Na wanpela gutpela wokman bilong Jehova i no inap tingting long “pas wantaim” wanpela i no wanbilip.—2 Kor. 6:14; 1 Kor. 7:39.

Ol hevi inap kamap long yusim ol kain websait bilong painim poroman, tasol i gat ol gutpela rot bilong painim wanpela poroman na pas gut wantaim na bihain yutupela i marit. Wanem ol rot yu inap bungim wanpela gutpela poroman? Taim gavman i tok orait long mekim ol bikpela bung, ol Witnes Bilong Jehova inap save gut long narapela narapela long rot bilong ol miting, ol kibung na ol narapela bung.

Yumi no mekim kain ol bikpela bung olsem long dispela taim bilong COVID-19 pendemik, tasol yumi yusim ol fon na teblet samting long mekim ol miting na dispela i opim rot long ol singel Witnes long save gut long narapela narapela. Yu ken lukim hau ol i mekim ol tok bilong ol long miting na harim ol komen bilong ol i kamapim bilip bilong ol. (1 Tim. 6:11, 12) Na tu, bihain long zoom miting i pinis, yutupela i ken toktok gut wantaim long brek-aut rum. Long rot bilong ol bung bilong amamas em yupela i mekim long Intenet wantaim ol narapela Witnes, yu ken lukim hau dispela man o meri yu laikim i toktok wantaim ol narapela na nau yu inap save long ol pasin tru bilong em. (1 Pita 3:4) Na bihain, taim yutupela i save gut long narapela narapela, yu ken skelim sapos ol mak na ol laik bilong yutupela i wankain na yutupela inap wok gut wantaim o nogat.

Taim ol singel lain i bihainim ol stiatok bilong Baibel long painim wanpela gutpela poroman marit, ol bai lukim truim bilong tok bilong Provep we i tok: “Man i painim pinis gutpela meri, em i kisim gutpela samting, na Jehova i belgut long em.”—Prov. 18:22.