1. Jehova i mekim wanem bilong helpim yu?

HAU yu kamap wanpela Witnes Bilong Jehova? Pastaim, ating yu harim gutnius long papamama bilong yu, o wanpela wanwok, o wanskul, o wanpela i kam autim tok long haus bilong yu. (Mak 13:10) Bihain, wanpela i lusim bikpela haptaim na strong long stadi wantaim yu long Baibel. Taim yu stadi, yu kisim pasin bilong laikim Jehova, na yu lain olsem em i laikim yu tu. Jehova i bringim yu kam long tok i tru, na nau yu stap olsem wanpela disaipel bilong Jisas Krais, na yu bilip olsem yu inap stap laip oltaim. (Jon 6:44) Em as na yu ken amamas tru long Jehova long Em i kirapim wanpela long skulim yu long tok i tru na em i orait long yu stap olsem wanpela wokman bilong em.

2. Yumi bai stori long wanem samting long dispela atikol?

² Nau yumi save long tok i tru, olsem na yumi gat gutpela wok long helpim ol narapela long wokabaut wantaim yumi long rot i go long laip. Ating yumi no pret long autim tok long haus bilong ol man, tasol ating yumi inap pilim hatwok long tokim ol olsem yumi laik stadi long Baibel wantaim ol. Yu save pilim olsem? Sapos yu pilim olsem, orait ol tok bilong dispela atikol i ken helpim yu. Yumi bai stori long wanem samting i kirapim yumi long kamapim ol disaipel. Yumi bai stori tu long hau yumi inap daunim ol hevi we inap pasim yumi long mekim ol Baibel stadi. Pastaim, yumi ken stori long as na yumi mas stap olsem ol man bilong autim gutnius, na tu, stap olsem ol tisa bilong gutnius.

3. Wai na yumi save autim tok?

³ Taim Jisas i stap long graun, em i tokim ol disaipel bilong em long mekim tupela wok. Namba 1 wok, em i tokim ol long autim  gutnius bilong Kingdom na em i soim ol hau long mekim olsem. (Mat. 10:7; Luk 8:1) Jisas i tokim ol disaipel bilong em long samting ol i ken mekim taim ol man i harim dispela gutnius bilong Kingdom ol i autim na samting ol i ken mekim taim ol man i sakim dispela gutnius. (Luk 9:2-5) Na em i tok profet tu olsem dispela wok autim tok bai go long olgeta hap, na em i tokim ol disaipel bilong em olsem ol bai autim dispela gutnius “na bai olgeta lain man i ken harim.” (Mat. 24:14; Apo. 1:8) Maski ol man i harim o nogat, ol disaipel i gat wok long tokim ol manmeri long dispela Kingdom Bilong God na samting dispela Kingdom bai mekim.

4. Olsem Matyu 28:18-20 i kamapim, yumi mas autim gutnius bilong Kingdom na mekim wanem narapela wok?

⁴ Wanem namba 2 wok Jisas i givim long ol disaipel bilong em? Em i tokim ol long skulim ol manmeri long bihainim olgeta tok em i mekim. Tasol yu ting ol bai mekim dispela wok autim tok na skulim ol manmeri long taim bilong ol aposel tasol, olsem sampela i ting? Nogat. Jisas i tok ol bai mekim dispela wok i kam inap long taim bilong yumi long nau na bai i go inap long “pinis bilong dispela taim.” (Ritim Matyu 28:18-20.) Jisas i tokim ol long mekim dispela wok taim em i kamap long winim 500 disaipel bilong em. (1 Kor. 15:6) Na long revelesen em i kamapim long Jon, Jisas i tok olsem olgeta disaipel bilong em i gat wok long helpim ol narapela long kisim save long Jehova.—Rev. 22:17.

5. Olsem 1 Korin 3:6-9 i kamapim, Pol i yusim wanem tok piksa long wok bilong autim tok na skulim man?

⁵ Aposel Pol i tok wok bilong kamapim disaipel i olsem wok bilong planim gaden, so yumi mas planim ol sid na mekim sampela wok moa. Em i tokim ol Kristen long Korin olsem: “Mi planim, na Apolos i givim wara, . . . Yupela i stap olsem gaden bilong God em God yet i wok long en.” (Ritim 1 Korin 3:6-9.) Yumi ol wokman long gaden bilong God, so yumi save planim sid, givim wara long en, na sekim sapos em i gro o nogat. (Jon 4:35) Tasol yumi save olsem God yet i save mekim sid i gro.

6. Taim yumi skulim ol man, yumi mas helpim ol long mekim wanem?

⁶ Yumi painim ol manmeri “em bel bilong ol i gutpela long kisim laip oltaim.” (Apo. 13:48) Bilong helpim ol dispela manmeri long kamap disaipel, yumi mas helpim ol long (1) kliagut, (2) bilip, na (3) bihainim ol tok ol i lainim long Baibel. (Jon 17:3; Kol. 2:6, 7; 1 Tes. 2:13) Olgeta long kongrigesen i ken helpim ol Baibel sumatin taim ol i stap olsem ol gutpela eksampel long soim pasin laikim long ol nupela manmeri na long welkamim ol taim ol i kam long ol miting. (Jon 13:35) Pablisa husat i mekim Baibel stadi, em i mas lusim bikpela taim na strong long helpim sumatin bilong em long lusim “ol samting i gat strong” olsem ol bilip bilong em na sampela pasin bilong em. (2 Kor. 10:4, 5) Ating planti mun inap lus na bai tisa i stiaim sumatin long mekim sampela senis long laip bilong em na bai em i ken winim mak bilong kisim baptais. Tasol gutpela samting bai kamap long dispela.

7. Wanem samting i kirapim yumi long mekim wok bilong autim tok na kamapim disaipel?

⁷ Wai na yumi save mekim wok bilong autim tok na kamapim disaipel? Namba 1 risen: Em bikos yumi laikim Jehova. Taim yu givim bel olgeta long bihainim dispela tok bilong autim tok na kamapim ol disaipel, yu soim olsem yu laikim God. (1 Jon 5:3) Tingim dispela: Pasin bilong yu long laikim Jehova i kirapim yu long autim tok long haus bilong ol man. Yu ting em isi long bihainim dispela tok? Ating nogat. Long fes taim yu go long wanpela haus bilong  autim tok, yu bin tingting planti? Ating yu bin tingting planti! Tasol yu save olsem dispela em wok Jisas i laik bai yu mekim na yu bihainim dispela tok. Na isi isi, bihain long sampela haptaim i lus, yu no pret moa long autim tok. Na olsem wanem long wok bilong mekim Baibel stadi? Yu tingting planti long mekim dispela wok? Ating yu pilim olsem. Tasol taim yu askim Jehova long helpim yu long daunim pasin bilong pret, na yu strongim bel na askim wanpela olsem yu laik stadi wantaim em, Jehova bai helpim yu long strongim laik bilong yu long kamapim disaipel.

8. Olsem Mak 6:34 i kamapim, wanem narapela risen i kirapim yumi long skulim ol narapela?

⁸ Namba 2 risen: Yumi laikim ol narapela na dispela i kirapim yumi long skulim ol long tok i tru. Wanpela taim Jisas na ol disaipel bilong em i bin taiet tru bikos ol i bin mekim bikpela wok bilong autim tok. Ol i go long wanpela ples bambai ol i ken malolo, tasol bikpela lain manmeri i kam painim ol. Jisas i sori tru long ol, olsem na em i kirap long skulim ol long “planti samting.” (Ritim Mak 6:34.) Em i givim bel long mekim olsem, maski em i taiet tru. Wai? Jisas i pilim hevi bilong dispela bikpela lain manmeri. Em i lukim olsem ol i karim planti hevi na em i laik tru long helpim ol long wetim gutpela samting i kamap bihain. Ol manmeri long nau i karim tu ol wankain hevi olsem ol. Ating i luk olsem ol i stap amamas, tasol tru tru, nogat. Ol i olsem ol sipsip i lus nabaut, na i no gat wasman bilong lukautim ol. Aposel Pol i tok ol kain lain olsem i no save long God na ol i no gat gutpela samting bilong wetim i kamap bihain. (Efe. 2:12) Ol i wokabaut long “rot i go long bagarap”! (Mat. 7:13) Taim yumi lukim olsem ol manmeri long teritori ol i no save long God, pasin sori na pasin laikim bai kirapim yumi long helpim ol. Nambawan rot yumi ken helpim ol em long tokim ol olsem yumi laik stadi long Baibel wantaim ol.

9. Olsem Filipai 2:13 i kamapim, olsem wanem Jehova i ken helpim yu?

⁹ Ating yu surik long toksave long wanpela olsem yu laik stadi wantaim em bikos yu luksave olsem yu mas lusim bikpela haptaim na strong long stadi wantaim em. Sapos yu pilim olsem, orait tokim Jehova long dispela samting. Beten askim em long helpim yu long i gat laik long painim wanpela Baibel stadi. (Ritim Filipai 2:13.) Aposel Jon i tokim yumi olsem God bai bekim ol beten bilong yumi sapos dispela i stret wantaim laik bilong Em. (1 Jon 5:14, 15) So yu ken bilip tru olsem Jehova bai helpim yu long i gat laik long insait long wok bilong kamapim ol disaipel.

10-11. Wanem samting inap pasim yumi long mekim wanpela Baibel stadi?

¹⁰ Yumi tingim wok bilong kamapim disaipel olsem bikpela samting maski yumi bungim ol hevi we inap pasim yumi long mekim bikpela wok moa bilong kamapim ol disaipel. Yumi ken stori long sampela bilong ol dispela hevi na hau yumi inap winim ol.

¹¹ Yumi inap pilim olsem sindaun bilong yumi i pasim yumi. Olsem, sampela pablisa i lapun tru o helt bilong ol i no gutpela. Yu karim wankain hevi olsem? Sapos olsem, tingim wanpela lesen yumi lainim long COVID-19 pendemik. Yumi bin luksave olsem yumi ken mekim gut ol Baibel stadi long rot bilong teblet na fon samting! So yu ken stap seif long haus bilong yu yet na mekim wanpela Baibel stadi. Na i gat narapela gutpela samting long dispela. Ating sampela i amamas long stadi long Baibel, tasol ol i no fri long stadi long taim we ol bratasista i makim. Ating ol i fri long stadi long bikmoning o long biknait. Yu ting yu inap redi long  stadi long ol dispela taim? Jisas i bin skulim Nikodemus long biknait, na em taim we Nikodemus i fri na em i redi long putim gut yau.—Jon 3:1, 2.

12. Wanem samting inap helpim yumi long bilip tru olsem yumi ken kamap ol gutpela tisa?

¹² Ating yumi pilim olsem yumi no fit long mekim wanpela Baibel stadi. Ating yumi pilim olsem yumi mas kisim sampela save moa paslain long yumi stadi wantaim wanpela. Sapos yu pilim olsem, orait tingim 3-pela samting we inap helpim yu long bilip tru olsem yu inap mekim ol Baibel stadi. Namba 1, Jehova i save olsem yu inap mekim dispela wok bilong skulim ol narapela. (2 Kor. 3:5) Namba 2, Jisas husat i gat “namba long bosim olgeta samting long heven na long graun” i tokim yu long mekim dispela wok. (Mat. 28:18) Na namba 3, yu ken askim ol narapela long helpim yu. Jisas i bin mekim ol tok em Papa i bin skulim em long mekim na yu tu i ken mekim olsem. (Jon 8:28; 12:49) Na tu, yu ken askim wasman bilong grup bilong autim tok, o wanpela painia, o wanpela pablisa i gat ekspiriens long helpim yu long i gat wanpela Baibel stadi. Wanpela rot bilong lain gut long mekim Baibel stadi em long sindaun long Baibel stadi bilong wanpela bilong ol dispela pablisa.

13. Wai na yumi mas redi long mekim ol senis?

¹³ Yumi inap pilim hatwok long yusim ol nupela wei bilong mekim ol samting o ol nupela tul. Long nau, pasin bilong yumi long mekim ol Baibel stadi i senis. Stadi pablikesen Stap Amamas Oltaim! em nau yumi bai yusim i makim olsem yumi mas redim gut stadi, na mekim long pasin i narapela kain long pasin we yumi save mekim long bipo. Yumi bai ritim liklik paragraf tasol na yumi bai i gat taim bilong stori gut wantaim sumatin. Taim yumi skulim man, yumi bai yusim planti vidio na ol elektronik tul, kain olsem JW Library^®. Sapos yu pilim hatwok long yusim ol dispela tul, orait askim wanpela husat i save gut long helpim yu. Yumi ol man i save amamas long mekim ol samting long wei yumi bin lain pinis long mekim. Olsem na em i no isi long yumi lain long mekim ol samting long nupela wei. Tasol yumi ken save olsem Jehova na ol narapela inap helpim yumi na yumi inap lain long dispela nupela senis na yumi bai amamas tru long stadi wantaim ol narapela. Olsem wanpela painia i tok, dispela wei bilong stadi i “mekim tisa na sumatin wantaim i amamas.”

14. (a) Yumi mas tingim wanem samting taim yumi autim tok long ol teritori we ol man i no laik putim yau long yumi? (b) Olsem wanem tok bilong 1 Korin 3:6, 7 i ken strongim yumi?

¹⁴ Ating yumi stap long ol teritori we i hatwok long kirapim ol Baibel stadi. Ating ol man i no laik putim yau long tok yumi autim o ol i birua long yumi bikos long tok yumi autim. Wanem samting bai helpim yumi long amamas yet taim yumi autim tok long kain teritori olsem? Tingim olsem sindaun bilong ol man inap senis long dispela haptaim we i gat planti hevi, na ol lain em pastaim ol i no laik putim yau, ating nau ol i luksave olsem ol i nidim ol tok bilong Baibel long helpim ol. (Mat. 5:3) Sampela em pastaim ol i save les long kisim ol nius bilong yumi, bihain ol i redi long stadi long Baibel. Na tu, yumi save olsem Jehova em Bosman bilong bungim ol kaikai. (Mat. 9:38) Em i laik bai yumi wok yet long planim kaikai na givim wara long en, tasol Em yet bai mekim kaikai i gro. (1 Kor. 3:6, 7) Na yumi kisim strong taim yumi tingim olsem, maski yumi no gat wanpela Baibel stadi long nau, Jehova i blesim wok yumi mekim na i no long hamas Baibel stadi yumi gat! *

15. Jehova i pilim olsem wanem taim wanpela i stadi long Baibel na bihainim ol tok em i lainim?

¹⁵ Jehova i amamas taim wanpela i redi long kisim save long ol tok i tru bilong Baibel na em i serim save em i kisim wantaim ol narapela. (Prov. 23:15, 16) Jehova i amamas tru taim em i lukim ol samting i kamap long nau! Olsem, long sevis yia bilong 2020, i gat dispela pendemik i kamap long graun olgeta, tasol ol bratasista i bin mekim winim 7,705,765 Baibel stadi, na ol i helpim 241,994 manmeri long dediketim laip bilong ol long Jehova na kisim baptais. Ol dispela nupela disaipel, ol bai mekim planti Baibel stadi moa na kamapim planti disaipel moa. (Luk 6:40) Yumi ken save tru olsem yumi mekim Jehova i amamas taim yumi insait long wok bilong kamapim disaipel.

16. Wanem gutpela mak yumi ken putim?

¹⁶ Wok bilong kamapim disaipel em hatwok, tasol Jehova i ken helpim yumi long mekim dispela wok bilong skulim ol nupela manmeri long laikim Papa bilong yumi long heven. Yu ting yumi olgeta wan wan i ken putim mak bilong kirapim na lukautim wanpela Baibel stadi? Yumi bai kirap nogut long samting inap kamap sapos yumi askim olgeta wan wan man yumi bungim long stadi long Baibel. Yumi ken save olsem Jehova bai blesim wok bilong yumi.

17. Yumi bai pilim olsem wanem sapos yumi mekim wanpela Baibel stadi?

¹⁷ Yumi holim gutpela wok tru bilong autim tok na skulim ol narapela long tok i tru! Dispela wok i save givim yumi amamas. Aposel Pol i bin helpim planti manmeri long Tesalonaika long kamap ol disaipel, na em i stori long samting em i pilim, olsem: “Long taim Bikpela Jisas i kam i stap, wanem samting bai stap olsem gutpela samting mipela i bilip long en na amamas long en na i olsem prais bilong mipela? Em yupela tasol, a? Tru tumas, yupela i stap olsem glori na amamas bilong mipela.” (1 Tes. 2:19, 20; Apo. 17:1-4) Planti long nau i pilim wankain olsem. Wanpela sista nem bilong Stéphanie na man bilong em, tupela i bin helpim planti manmeri long winim mak na kisim baptais. Em i tok: “Wok bilong helpim ol narapela manmeri long dediketim laip bilong ol long Jehova, dispela wok i gat bikpela amamas tru bilong en.”