1. Yumi pilim olsem wanem long Jehova i larim yumi beten long em?

 YUMI kisim wanpela naispela presen tru—yumi ken toktok wantaim Man Bilong Wokim heven na graun long rot bilong beten. Tingim dispela: Yumi ken kamapim bel na tingting bilong yumi long Jehova long olgeta kain taim na long olgeta kain tokples, na i no gat wok long mekim apoinmen bilong mekim olsem. Yumi ken beten long em taim yumi stap long sik bet long haus sik o taim yumi stap long haus kalabus, na yumi ken save tru olsem gutpela Papa bilong yumi bai putim yau long yumi. Tru tumas, yumi amamas tru long presen bilong beten.

2. Long wanem rot King Devit i soim olsem em i amamas tru long presen bilong beten?

² King Devit i amamas tru long presen bilong beten. Em i singsing long Jehova olsem: “Mi laik bai yu kisim beten bilong mi olsem smok i gat gutpela smel i go long yu.” (Sng. 141:1, 2) Long taim bilong Devit, ol i save redim gut paura bilong kamapim smok i gat gutpela smel em ol pris i save yusim bilong mekim lotu i tru. (Kis. 30:34, 35) Devit i stori long pasin bilong redim gut paura bilong kamapim smok i gat gutpela smel na dispela i soim olsem em i laik tingim gut ol tok em bai mekim long Papa bilong em long heven. Yumi tu i laik mekim olsem. Yumi laik bai ol beten bilong yumi i amamasim Jehova.

3. Yumi mas mekim wanem pasin taim yumi toktok wantaim Jehova long rot bilong beten, na bilong wanem?

³ Taim yumi beten long Jehova, yumi no ken kolim nabaut ol tok nating, nogat. Yumi mas beten long pasin i soim bikpela rispek tru. Tingim ol narakain visen em Aisaia, Esekiel, Daniel, na Jon i bin lukim. Ol dispela visen i narapela narapela, tasol wanpela samting i wankain long ol. Ol i kamapim klia olsem Jehova em i nambawan bikpela King. Aisaia i “lukim Jehova i sindaun long sia king i antap tru.” (Ais. 6:1-3) Esekiel i lukim Jehova i sindaun long bikpela karis bilong em long heven, na “bikpela lait i  raunim em . . . olsem lait bilong renbo.” (Ese. 1:26-28) Daniel i lukim “Man Bilong Bipo Bipo Yet” i werim klos i waitpela na paia i lait long sia king bilong Em. (Dan. 7:9, 10) Na Jon i lukim Jehova i sindaun long wanpela sia king na renbo i lait olsem grinpela ston emeral i raunim dispela sia king. (Rev. 4:2-4) Taim yumi tingim tingim narakain bikpela glori bilong Jehova, dispela i kirapim yumi long pilim tru presen yumi gat long toktok wantaim em long rot bilong beten na em i bikpela samting long yumi mekim long pasin rispek. Tasol yumi mas kolim wanem ol samting long beten bilong yumi?

4. Ol tok Jisas i mekim long Matyu 6:9, 10 i givim wanem skul long yumi long pasin bilong beten?

⁴ Ritim Matyu 6:9, 10. Long Bikpela Tok Long Maunten, Jisas i skulim ol disaipel bilong em long hau ol i ken beten long pasin we i amamasim God. Jisas i tok “yupela i mas beten olsem,” na bihain em i kolim sampela bikpela samting em Jehova i tingting pinis long mekim: em long mekim holi nem bilong Em; Kingdom i mas i kam, na dispela Kingdom bai bagarapim olgeta birua bilong God; na ol blesing Em bai kamapim long graun na long ol manmeri. Taim yumi tingim ol dispela samting long ol beten bilong yumi, yumi soim olsem laik bilong God em i bikpela samting long yumi.

5. Yu ting i stret long beten long ol samting yumi nidim?

⁵ Bihain long Jisas i kolim ol dispela tok, em i soim olsem i stret long yumi beten tu long ol samting yumi nidim. Yumi ken askim Jehova long givim yumi kaikai inap long dispela de, long fogivim ol sin bilong yumi, long lukautim yumi long ol traim, na long kisim bek yumi long han bilong Satan. (Mat. 6:11-13) Taim yumi askim Jehova long ol dispela samting, yumi soim em olsem yumi nidim helpim bilong em na yumi laik amamasim em.

6. Yu ting yumi mas beten tasol long ol samting em Jisas i kolim long beten em i skulim ol disaipel long en? Stori long dispela.

⁶ Jisas i no ekspektim ol disaipel bilong em long bihainim stret olgeta tok em i kolim long beten em i skulim ol long en, nogat. Long ol narapela beten Jisas i mekim, em i kolim ol narapela narapela samting em i bin tingting planti long en long ol dispela taim. (Mat. 26:39, 42; Jon 17:1-26) Olsem tasol, yumi ken beten long ol samting yumi tingting planti long en. Taim  yumi gat wanpela disisen long mekim, yumi ken beten long kisim savetingting na pasin bilong kliagut long ol samting. (Sng. 119:33, 34) Taim yumi laik mekim wanpela asainmen i hatwok long mekim, yumi ken beten askim God long givim yumi save na pasin bilong skelim gut ol samting. (Prov. 2:6) Ol papamama i ken beten long helpim ol pikinini bilong ol, ol pikinini i ken beten long helpim ol papamama bilong ol, na yumi olgeta i ken beten long helpim ol Baibel sumatin bilong yumi na ol man em yumi autim tok long ol. Em tru olsem yumi mas beten askim Jehova long ol samting yumi nidim, tasol i gat sampela samting moa em yumi mas beten long en.

7. Wai na yumi mas preisim Jehova taim yumi beten?

⁷ Yumi mas tingim olsem yumi mas preisim Jehova long ol beten bilong yumi. I stret long yumi preisim God bilong yumi winim olgeta narapela samting. Em i “gutpela tru na [em i] save redi long fogivim ol sin” bilong yumi. Na tu, em ‘God i gat pasin marimari na pasin sori, na em i no save belhat kwik na em i save bihainim tok bilong em na gutpela pasin laikim i pulap tru long em.’ (Sng. 86:5, 15) Yes, i gat gutpela risen long yumi preisim Jehova long ol gutpela pasin bilong em na ol gutpela wok em i save mekim.   

8. Yumi ken tok tenkyu long Jehova long wanem ol samting? (Buk Song 104:12-15, 24)

⁸ Yumi laik preisim Jehova long ol beten yumi mekim, na tu, bel i kirapim yumi long tok tenkyu long em long ol naispela samting em i givim long yumi. Olsem, yumi ken tok tenkyu long em long ol naispela kala yumi lukim long ol plaua, ol kain kain naispela kaikai yumi kisim, na amamas yumi kisim long pas gut wantaim ol gutpela pren. Gutpela Papa bilong yumi i givim yumi ol dispela samting na planti samting moa bikos em i laik bai yumi stap amamas. (Ritim Buk Song 104:12-15, 24.) Bikpela samting moa, yumi tenkyu long Jehova long em i givim yumi planti gutpela tok bilong strongim bilip bilong yumi na em i givim yumi hop long wetim ol gutpela samting bai kamap bihain.

9. Wanem samting inap helpim yumi long tingim olsem yumi mas tok tenkyu long Jehova? (1 Tesalonaika 5:17, 18)

⁹ Em isi tru long yumi lusim tingting long tok tenkyu long Jehova long olgeta samting em i mekim bilong helpim yumi. Wanem samting inap helpim yu long tingim olsem yu mas tok  tenkyu long Em? Yu ken mekim lista bilong ol samting em yu beten askim Jehova long en, na oltaim sekim dispela lista bilong luksave long hau Jehova i bekim ol beten bilong yu. Na bihain yu ken beten na tok tenkyu long em i bin helpim yu. (Ritim 1 Tesalonaika 5:17, 18.) Tingim dispela: Yumi save amamas tru na pilim olsem ol narapela i laikim yumi taim ol i tok tenkyu long yumi. Olsem tasol, taim yumi beten na tok tenkyu long Jehova long em i harim ol beten bilong yumi, dispela i mekim Jehova i belgut tru. (Kol. 3:15) Tasol wanem narapela bikpela risen na yumi mas tok tenkyu long God bilong yumi?

10. Olsem 1 Pita 2:21 i kamapim, wai na yumi mas tok tenkyu long Jehova long em i salim Jisas i kam long graun?

¹⁰ Ritim 1 Pita 2:21. Yumi mas tok tenkyu long Jehova long em i salim dispela Pikinini em i laikim tumas i kam bilong skulim yumi. Yumi kisim planti skul long ol pasin bilong Jehova na hau yumi inap amamasim Em taim yumi stadi long laip bilong Jisas. Sapos yumi soim olsem yumi bilip long ofa bilong Krais, yumi inap pas gut wantaim God Jehova na stap wanbel wantaim em.​—Rom 5:1.

11. Bilong wanem yumi save beten long Jehova long nem bilong Jisas?

¹¹ Yumi tenkyu long Jehova olsem yumi inap beten long Em long rot bilong Pikinini bilong em. Jisas em rot Jehova i yusim bilong bekim ol beten bilong yumi. Jehova i save harim na bekim ol beten em yumi mekim long nem bilong Jisas. Jisas i tok: “Olgeta samting yupela i askim long nem bilong mi, bai mi mekim. Olsem na bai Papa i ken kisim biknem long rot bilong Pikinini.”​—Jon 14:13, 14.

12. Wanem narapela risen na yumi mas tok tenkyu long Jehova long em i givim Pikinini bilong em?

¹² Jehova i save fogivim ol sin bilong yumi long rot bilong ofa bilong Jisas long baim bek ol man. Baibel i tok Jisas em i “hetpris [bilong yumi], na em i sindaun pinis long rait han bilong sia king bilong dispela King i gat biknem long heven.” (Hib. 8:1) Jisas em i “helpim [bilong yumi] i stap wantaim Papa.” (1 Jon 2:1) Yumi tenkyu tru long Jehova olsem em i givim yumi wanpela Hetpris husat i pilim tru hevi bilong yumi na em i kliagut long ol samting yumi no gat strong long mekim na em “i save askim God long helpim yumi”! (Rom 8:34; Hib. 4:15) Maski yumi ol sinman, ofa bilong Jisas i opim rot long yumi inap toktok wantaim Jehova long rot bilong beten. Yumi olgeta i wanbel olsem yumi ken mekim ol tok bilong kamapim tenkyu bilong yumi long Jehova, tasol ol dispela tok i no inap taim yumi tingim nambawan gutpela presen tru Jehova i givim, em Pikinini bilong em!

13. Long nait paslain long Jisas i dai, hau em i soim olsem em i laikim tru ol disaipel bilong em?

¹³ Long nait paslain long Jisas i dai, em i beten inap longpela taim bilong helpim ol disaipel bilong em. Em i tokim Papa bilong em olsem, “mi ting long dispela man nogut na mi askim yu long lukautim ol.” (Jon 17:15) Jisas i soim olsem em i laikim tru ol disaipel bilong em! Klostu taim em bai karim bikpela hevi tru, tasol em i wari tru long ol aposel bilong em bai stap olsem wanem.

14. Olsem wanem yumi inap soim olsem yumi laikim ol bratasista bilong yumi?

¹⁴ Yumi laik bihainim pasin bilong Jisas, olsem na yumi mas tingim gut ol samting ol narapela i nidim. Oltaim yumi mas beten long helpim ol bratasista bilong yumi. Taim yumi mekim olsem, yumi bihainim tok bilong Jisas long laikim narapela narapela na yumi soim Jehova olsem yumi laikim tru ol wanbilip bilong yumi. (Jon 13:34) Beten yumi mekim bilong helpim ol  bratasista bilong yumi i no lus nating. Baibel i tok “beten bilong stretpela man i gat bikpela pawa na i mekim gutpela wok.”​—Jems 5:16.

15. Wai na yumi mas beten long helpim ol wanbilip bilong yumi?

¹⁵ Yumi mas beten bilong helpim ol wanbilip bilong yumi bikos ol i save karim planti hevi. Yumi ken askim Jehova long helpim ol long karim hevi bilong sik, ol disasta, ol woa, pasin birua, na ol narapela hevi. Na tu, yumi ken beten long helpim ol bratasista em ol i daunim laik bilong ol yet na ol i wok hat long helpim ol lain i nidim helpim. Ating yu save long sampela em ol i karim ol hevi olsem. Yu ting yu inap kolim nem bilong ol long beten bilong yu? Yumi soim olsem yumi laikim tru ol bratasista bilong yumi taim yumi askim Jehova long helpim ol long sanap strong na karim hevi.

16. Wai na yumi mas beten long ol brata i go pas long yumi?

¹⁶ Ol brata i go pas long mekim wok long kongrigesen i pilim tru ol beten em yumi tingim ol na mekim, na ol dispela beten i save helpim ol tru. Aposel Pol i save tru long dispela samting. Em i tok: “Beten bilong helpim mi tu. Olsem taim mi opim maus bilong toktok, mi ken autim tok na i no surik long kamapim klia tok hait holi bilong gutnius.” (Efe. 6:19) Long nau tu, yumi gat planti brata em ol i save givim bel tru long mekim wok na ol i go pas long yumi. Yumi soim olsem yumi laikim ol taim yumi askim Jehova long blesim wok ol i mekim.

17-18. (a) Long wanem ol taim ol narapela inap askim yumi long makim maus bilong ol long beten? (b) Yumi mas tingim wanem samting?

¹⁷ Sampela taim ol narapela inap askim yumi long makim maus bilong ol long beten. Olsem, wanpela sista husat i mekim Baibel stadi inap askim narapela sista husat i sindaun long stadi bilong em long mekim beten. Ating dispela narapela sista i no save gut long sumatin, so em inap redi long mekim beten long pinis bilong stadi. Long dispela rot, em bai save long wanem tok em i ken mekim long beten bilong helpim sumatin.

¹⁸ Ating ol i askim wanpela brata long beten long bung bilong autim tok o long miting bilong kongrigesen. Ol brata i kisim dispela asainmen i mas tingim gut wanem wok bilong ol dispela miting. Taim brata i beten, em i no ken mekim ol tok bilong stretim kongrigesen o mekim ol toksave.  Long planti miting bilong kongrigesen, ol i makim 5-pela minit bilong mekim singsing na beten, so brata i beten i no ken kolim “planti tok,” na moa yet long kirap bilong miting.​—Mat. 6:7.

19. Wanem samting bai helpim yumi long stap redi taim de bilong Jehova long kotim ol manmeri i kamap?

¹⁹ Yumi mas tingim beten olsem bikpela samting tru long laip bilong yumi bikos de bilong Jehova long kotim ol manmeri i kam klostu pinis. Em as na Jisas i tok: “Yupela i mas was i stap, na oltaim yupela i mas beten strong bai yupela i ken abrusim ol dispela samting i mas kamap.” (Luk 21:36) Yes, pasin bilong beten oltaim bai helpim yumi long was i stap long sait bilong bilip, long dispela rot yumi no inap kirap nogut taim de bilong God long kotim ol manmeri i kamap.

20. Olsem wanem ol beten bilong yumi i ken kamap olsem smok i gat gutpela smel?

²⁰ Yumi bin stori long wanem ol samting? Yumi amamas tru long presen bilong yumi long beten. Nambawan bikpela samting yumi tingim long beten bilong yumi em ol samting Jehova i tingting pinis long mekim. Na tu, yumi mas tok tenkyu long God long Pikinini bilong em na long wok king bilong em long Kingdom, na yumi mas beten long helpim ol wanbilip bilong yumi. Na yumi mas beten tu long ol samting yumi nidim long sait bilong skin na bilip. Taim yumi tingim gut ol samting yumi kolim long ol beten bilong yumi, yumi soim klia olsem yumi tingim dispela naispela presen olsem samting i dia tumas. Ol tok yumi mekim bai kamap olsem smok i gat gutpela smel i go long Jehova—em samting i “givim amamas long Em.”​—Prov. 15:8.