1. Wanem laik bilong God long nau?

 LONG nau, em laik bilong God olsem yumi mas autim tok bilong Kingdom long olgeta hap bilong graun. (Mak 13:10; 1 Tim. 2:3, 4) Em wok bilong Jehova, na em i bikpela samting long Em i putim dispela wok long han bilong Pikinini bilong em Jisas long bosim. Yumi ken save tru olsem Jisas i stap ovasia bilong wok autim tok, olsem na yumi bai pinisim gut dispela wok inap tru long mak em Jehova i laikim paslain long pinis i kamap.​—Mat. 24:14.

2. Yumi bai stori long wanem samting long dispela atikol?

² Long dispela atikol, yumi bai stori long hau Jisas i yusim “gutpela wokboi i gat savetingting” long givim ol tok bilong Baibel bilong strongim bilip na long oganaisim ol disaipel bilong em long mekim dispela bikpela wok bilong autim tok long nau. (Mat. 24:45) Yumi bai stori tu long samting yumi olgeta wan wan i mas mekim bilong sapotim Jisas na gutpela wokboi.

3. God i givim wanem namba long Jisas?

³ Jisas i stiaim wok autim. Hau yumi save long dispela? Paslain long Jisas i go antap long heven, em i bung wantaim sampela gutpela disaipel bilong em long wanpela maunten long Galili. Em i tokim ol: “God i givim mi namba long bosim olgeta samting long heven na long graun.” Lukim tok em i mekim bihain stret long en: “Olsem na yupela i mas i go na kamapim ol disaipel long olgeta lain man.” (Mat. 28:18, 19) Long ol narapela wok Jisas i bosim, em i kisim tu namba bilong stiaim wok autim tok.

4. Hau yumi ken save olsem Jisas i wok yet long stiaim wok autim tok long nau?

⁴ Jisas i tok olsem wok bilong autim tok na kamapim disaipel  bai go kamap long “olgeta lain man” na em bai stap wantaim ol disaipel bilong em long “olgeta de i go inap long pinis bilong dispela taim.” (Mat. 28:20) Ol dispela tok i kamapim klia olsem Jisas bai stiaim yet wok autim tok na dispela wok bai go het yet i kam inap long taim bilong yumi.

5. Yumi mekim wanem bilong truim tok bilong Buk Song 110:3?

⁵ Jisas i no wari na tingting planti olsem bai i no gat planti wokman long taim bilong pinis. Em i save olsem tok profet bilong man bilong raitim song bai kamap tru, em i tok: “Taim yu kisim ol ami bilong yu i go long pait, ol manmeri bilong yu bai amamas long go wantaim yu na helpim yu.” (Sng. 110:3) Taim yu mekim wok autim tok, yu sapotim Jisas na gutpela wokboi na yu helpim long truim dispela tok profet. Wok i go het gut, tasol i gat sampela hevi na ol hatwok.

6. Ol pablisa bilong Kingdom i bungim wanem hevi long nau?

⁶ Wanpela hevi ol pablisa bilong Kingdom i bungim em pasin birua. Ol apostet, ol lida bilong lotu, na ol memba bilong wok politik i kamapim ol tok giaman long wok bilong yumi. Sapos ol wanblut, ol pren, na ol wanwok i bilipim ol dispela tok giaman, ol inap putim presa long yumi na pasim yumi long lotuim Jehova na long lusim wok autim tok. Long sampela kantri, ol birua i traim long pretim yumi, tok long kilim yumi i dai, arestim yumi, na kalabusim yumi tu. Yumi no kirap nogut long ol dispela samting. Jisas i tok profet olsem: “Ol man bilong olgeta lain bai heitim yupela, long wanem, nem bilong mi i stap long yupela.” (Mat. 24:9) Ol kain pasin birua i painim yumi i soim klia olsem Jehova i orait long yumi. (Mat. 5:11, 12) Satan em i as bilong ol dispela pasin birua. Tasol Jisas i gat bikpela strong moa winim em! Jisas i sapotim yumi, olsem na yumi inap autim gutnius long ol man bilong olgeta lain man. Lukim ol samting i soim klia dispela.

7. Wanem ol samting i kamap na i truim tok profet bilong Revelesen 14:6, 7?

⁷ Narapela hatwok yumi ol pablisa bilong Kingdom i bungim em long autim tok long ol man bilong ol narapela tokples. Long visen em Jisas i bin kamapim long aposel Jon, Jisas i tokaut olsem wok bilong autim gutnius bai winim dispela hatwok. (Ritim Revelesen 14:6, 7.) Long wanem rot wok autim tok i winim dispela hatwok? Taim yumi autim tok, yumi givim rot long planti manmeri moa long kisim save long gutnius bilong Kingdom. Long nau, ol manmeri long olgeta hap bilong graun inap ritim ol tok bilong Baibel long websait bilong yumi jw.org, long wanem, dispela websait i stap long winim 1,000 tokples! Yumi bin kisim tok orait long tanim tok bilong buk Stap Amamas Oltaim! long winim 700 tokples, em nambawan tul bilong kamapim ol disaipel long nau! Ol tok bilong Baibel i stap tu long ol vidio bilong ol yaupas na long ol buk brel bilong ol aipas. Yumi lukim truim bilong ol tok profet bilong Baibel. Ol manmeri bilong “olgeta tokples bilong ol kantri” i wok long mekim “gutpela tokples tru” bilong tok i tru bilong Baibel. (Sek. 8:23; Sef. 3:9) Olgeta dispela samting i kamap aninit long lukaut bilong gutpela ovasia bilong yumi Jisas Krais.

8. Wanem gutpela samting i kamap long wok autim tok bilong yumi?

⁸ Long nau, winim 8 milion manmeri long 240 kantri i insait long oganaisesen bilong Jehova na long olgeta yia planti tausen moa i kisim baptais! Tasol namba i no bikpela samting, bikpela samting moa em ol dispela nupela disaipel i wok long kisim na bihainim ol pasin bilong holi spirit em ol “nupela pasin.” (Kol. 3:8-10) Planti i lusim pasin pamuk, pait, pasin  bilong bel nogut long ol narapela lain, na pasin bilong litimapim kantri. Dispela i truim tok profet i stap long Aisaia 2:4 olsem “ol i no skul moa long pait.” Taim yumi wok strong long kisim nupela pasin, yumi helpim planti manmeri long kam insait long oganaisesen bilong God na yumi soim olsem yumi bihainim ovasia bilong yumi Jisas Krais. (Jon 13:35; 1 Pita 2:12) Ol dispela samting i no kamap nating, nogat. Jisas yet i helpim yumi long mekim olsem.

9. Olsem Matyu 24:45-47 i kamapim, Jisas i tok profet long wanem samting bai kamap long taim bilong pinis?

⁹ Ritim Matyu 24:45-47. Jisas i tok profet olsem long taim bilong pinis, em bai makim wanpela “gutpela wokboi i gat savetingting” long givim ol tok bilong Baibel bilong strongim bilip. So yumi ken save olsem dispela wokboi bai wok strong tru long mekim olsem long taim bilong yumi. Na tru tumas, ol i bin mekim olsem. Ovasia bilong yumi i bin yusim dispela liklik lain em God i bin makim long lukautim ol manmeri bilong God na ol pren bilong tok i tru na “givim kaikai long ol long taim stret.” Ol dispela man i no ting olsem ol i bosim bilip bilong ol narapela, nogat. (2 Kor. 1:24) Ol i luksave olsem Jisas Krais em i “lida na komanda” bilong lain manmeri bilong em.​—Ais. 55:4.

10. Wanem pablikesen long ol dispela piksa i bin helpim yu long kirap mekim wok bilong Jehova?

¹⁰ Kirap long 1919 na i kam, gutpela wokboi i bin kamapim ol narapela narapela buk na ol dispela buk i opim rot long ol nupela man inap kisim save long Tok Bilong God. Long 1921, wokboi i wokim buk The Harp of God long helpim ol nupela man long kisim save long ol tok Baibel i skulim ol man long en. Long ol yia i kam na i go, ol samting i wok long senis, olsem na ol i kamapim sampela moa pablikesen. Wanem pablikesen i bin helpim yu long kisim save na laikim Papa bilong yumi long heven? Em  buk “Let God Be True,” The Truth That Leads to Eternal Life, Yu Inap i Stap Oltaim Long Paradais Long Graun, Save i Bringim Man Long Laip Oltaim, Tru Tru Baibel i Tok Wanem?, Tok Baibel i Skulim Yumi Long En, o Stap Amamas Oltaim! em nupela pablikesen bilong yumi? Ol i bin kamapim ol dispela pablikesen na bai i stret long ol manmeri long haptaim we ol i bin rilisim ol dispela buk.

11. Bilong wanem em i bikpela samting long yumi olgeta i mas kisim ol kaikai bilong strongim bilip?

¹¹ I no ol nupela man tasol i mas kisim save long ol strongpela tok i tru bilong Baibel, nogat. Yumi olgeta i mas mekim olsem. Aposel Pol i tok: “Strongpela kaikai em bilong ol man i bikpela pinis.” Na Pol i tok moa olsem, taim yumi bihainim ol dispela tok bilong Baibel, dispela bai helpim yumi long “kliagut long wanem samting i stret na wanem samting i no stret.” (Hib. 5:14) Em i hatwok tru long bihainim ol stretpela lo bilong Jehova long nau, long wanem, planti manmeri moa i insait long mekim ol pasin nogut. Tasol Jisas i stiaim ol samting na bai yumi ken kisim strong yumi nidim long rot bilong ol gutpela kaikai bilong bilip. Ol dispela gutpela kaikai bilong bilip i kam long tok bilong God em Baibel. Jisas i stiaim ol samting na bai gutpela wokboi i ken redim na tilim ol dispela kaikai yumi nidim.

12. Yumi mekim wanem samting long nem bilong God olsem Jisas i bin mekim?

¹² Yumi givim glori long nem bilong God wankain olsem Jisas i bin mekim. (Jon 17:6, 26) Olsem, long 1931 yumi kisim dispela nem em Baibel i as bilong en olsem ol Witnes Bilong Jehova, na long dispela rot yumi soim klia olsem dispela nem em i bikpela samting long yumi na yumi laik bai ol man i save olsem yumi lain bilong Jehova. (Ais. 43:10-12) Na kirap long Oktoba 1931, nem bilong Jehova i stap long fran pes bilong nius Wastaua i kam inap long nau. Na tu, Baibel Nupela Taim  Trenslesen Bilong Ol Skripsa Holi i bin putim bek nem bilong God i go long ol ples we em i bin stap long en long bipo. Dispela samting yumi mekim i narapela kain long ol lotu i holim nating nem Kristen em ol i bin rausim nem bilong Jehova long ol Baibel bilong ol!

13. Wanem samting i helpim yu long bilip tru olsem Jisas i yusim “gutpela wokboi i gat savetingting” long nau? (Jon 6:68)

¹³ Long rot bilong “gutpela wokboi i gat savetingting,” Jisas i oganaisim ol disaipel bilong em na ol i insait long wanpela narakain oganaisesen long graun bilong strongim lotu i tru. Yu pilim olsem wanem long dispela oganaisesen? Ating yu pilim wankain olsem tok aposel Pita i bin mekim long Jisas olsem: “Bai mipela i go long husat? Ol tok bilong yu i bringim man i go long laip oltaim.” (Jon 6:68) Tingim, yumi wan wan bai stap we long nau sapos yumi no bin kisim save na bung wantaim oganaisesen bilong Jehova? Long rot bilong oganaisesen, Krais i stiaim gut wok bambai yumi kisim planti gutpela tok bilong strongim bilip. Na em i skulim yumi tu long mekim gut wok autim tok. Na tu, em i helpim yumi long kisim ol “nupela pasin” bambai yumi ken amamasim Jehova.​—Efe. 4:24.

14. Yu bin kisim wanem helpim long stap insait long oganaisesen bilong Jehova long taim bilong COVID-19 pandemik?

¹⁴ Jisas i save givim ol gutpela daireksen long taim bilong hevi. Ol dispela daireksen i bin kamapim gutpela samting taim COVID-19 i bin kirap na spred i go long olgeta hap. Taim ol man long graun i no kliagut long wanem samting ol bai mekim, Jisas i mekim samting na bai yumi kisim ol tok bilong stiaim yumi long helpim yumi long stap seif. Yumi bin kisim tok long werim mask taim yumi stap long ol pablik ples, na tu, long stap longwe long narapela  narapela. Ol elda tu i bin kisim ol gutpela tok bilong kirapim ol long sekim ol wan wan pablisa insait long ol kongrigesen na save long wanem samting ol i nidim bilong stap seif, stap helti, na pas gut yet wantaim Jehova. (Ais. 32:1, 2) Na tu, yumi bin kisim ol narapela daireksen na ol gutpela tok bilong strongim yumi long rot bilong ol Gavening Bodi apdeit.   

15. Yumi kisim wanem daireksen long mekim ol miting na mekim wok autim tok long taim bilong pandemik? Na wanem gutpela samting i kamap?

¹⁵ Long taim bilong pandemik, yumi kisim klia daireksen long hau long mekim ol miting bilong kongrigesen na hau long autim tok. Wantu tasol yumi kirap long mekim ol miting, ol liklik na ol bikpela kibung long rot bilong ol vidio konferens tul. Na tu, yumi kirap autim tok long rot bilong raitim pas na ring long telefon, yumi no go moa long ol haus. Jehova i blesim ol wok yumi mekim. Planti brens i bin givim ripot olsem namba bilong ol pablisa long hap bilong ol i wok long go bikpela. Na tru tumas, planti i bin kisim ol gutpela ekspiriens long dispela taim.​—Lukim blok “ Jehova i Blesim Wok Autim Tok Bilong Yumi.”

16. Yumi ken save tru long wanem samting?

¹⁶ Sampela manmeri inap pilim olsem oganaisesen i wari na pret nating long dispela pandemik. Tasol inap planti taim nau, ol samting i soim klia olsem ol daireksen yumi kisim i gat savetingting long en. (Mat. 11:19) Na taim yumi tingim tingim long bel gutpela pasin laikim em Jisas i mekim bilong lidim ol manmeri bilong em long nau, yumi ken save tru olsem maski wanem samting i kamap long bihain, Jehova na Jisas bai stap wantaim yumi.​—Ritim Hibru 13:5, 6.

17. Yu pilim olsem wanem taim yu wok aninit long wok ovasia bilong Jisas?

¹⁷ Yumi amamas tru long wok aninit long wok ovasia bilong Jisas! Yumi stap long wanpela oganaisesen we maski yumi bilong narapela narapela kalsa, kantri, na tokples, yumi stap wanbel wantaim. Yumi kisim planti gutpela tok bilong strongim bilip bilong yumi na inapim yumi long mekim wok autim tok. Yumi olgeta wan wan i luksave olsem yumi bin lain long kisim ol nupela pasin, na yumi wok long lain long laikim narapela narapela. Olsem na yumi ken tok i gat as tru na yumi ken amamas long ovasia bilong yumi Jisas!