1. Jehova i mekim wanem bihain long Adam na Iv i mekim sin? (Stat 3:15)

 BIHAIN long Adam na Iv i mekim sin, Jehova i mekim wanpela bikpela tok profet we i mekim na ol tumbuna pikinini bilong tupela i ken bilip na wet long gutpela samting bai kamap bihain. Tok em Jehova i mekim i stap long Stat 3:15.​—Ritim.

2. Wai na dispela tok profet em i bikpela samting?

² Dispela tok profet i stap long namba 1 buk bilong Baibel. Tasol olgeta narapela buk bilong Baibel i konek wantaim dispela tok profet. Wankain olsem bun bilong wanpela buk i bungim olgeta pes wantaim, ol tok bilong Stat 3:15 i bungim ol tok bilong olgeta narapela buk bilong Baibel na i kamapim wanpela bikpela tok olsem, God bai salim wanpela Man Bilong Kisim Bek Yumi na em bai bagarapim Satan na lain nogut bilong em. * Ol manmeri i laikim tru Jehova bai amamas tru long lukim dispela samting i kamap!

3. Yumi bai kisim bekim bilong wanem ol askim long dispela atikol?

³ Long dispela atikol, yumi bai kisim bekim bilong ol askim yumi gat long tok profet bilong Stat 3:15: Husat lain i insait long dispela tok profet? Olsem wanem dispela tok profet i kamap tru? Na olsem wanem dispela tok profet i helpim yumi?

4. Husat dispela “snek,” na hau yumi save long dispela?

⁴ Ol lain i insait long tok profet i stap long Stat 3:14, 15 em wanpela “snek,” “lain pikinini” bilong dispela snek, wanpela “meri,” na “lain pikinini” bilong dispela meri. Baibel i helpim yumi long save long ol i makim husat. * Yumi ken stori nau long dispela “snek.” Wanpela snek tru tru i no inap kliagut  long tok Jehova i mekim long gaden Iden. So dispela strongpela tok long kot bilong Jehova i go long wanpela man husat i gat bikpela save. Em husat? Revelesen 12:9 i tokim yumi long dispela snek em husat. “Em dispela snek bilong bipo yet,” em Satan dispela Devil. Tasol husat em lain pikinini bilong dispela snek?   

5. Husat em lain pikinini bilong dispela snek?

⁵ Sampela taim Baibel i yusim dispela tok lain pikinini bilong makim ol lain i bihainim tingting na pasin bilong wanpela man, na i kain olsem ol i kamap ol pikinini bilong em. So lain pikinini bilong dispela snek em ol bikhet ensel na ol manmeri husat i sakim God Jehova na birua long ol manmeri bilong Em wankain olsem Satan i bin mekim. Dispela i makim tu ol ensel em ol i bin lusim wok bilong ol long heven long taim bilong Noa, na tu, ol manmeri nogut em ol i bihainim pasin bilong papa bilong ol em Satan.​—Stt. 6:1, 2; Jon 8:44; 1 Jon 5:19; Jut 6.

6. Wai na yumi ken tok dispela “meri” em i no Iv?

⁶ Orait nau yumi laik painimaut dispela “meri” em i husat. Dispela meri em i no Iv. Wai na yumi tok olsem? Tingim wanpela risen. Dispela tok profet i tokaut olsem lain pikinini bilong dispela meri bai “krungutim” het bilong dispela snek. Olsem yumi stori pinis, dispela snek i makim dispela ensel nogut em Satan, na i no gat wanpela tumbuna pikinini bilong Iv em ol i gat sin inap krungutim em. So husat bai bagarapim na pinisim Satan olgeta?

7. Olsem Revelesen 12:1, 2, 5, 10 i kamapim, husat dispela meri em Stat 3:15 i stori long en?

⁷ Laspela buk bilong Baibel i kamapim klia husat dispela meri em Stat 3:15 i stori long en. (Ritim Revelesen 12:1, 2, 5, 10.) Dispela em i no wanpela meri long graun! Mun i stap  aninit long lek bilong em na 12-pela sta i stap olsem kraun long het bilong em. Em i karim narakain pikinini—em Kingdom Bilong God. Dispela Kingdom i stap long heven, so dispela meri tu i stap long heven. Em i makim oganaisesen bilong Jehova long heven em ol gutpela ensel bilong Em i insait long en.​—Gal. 4:26.   

8. Husat em namba 1 pikinini bilong dispela meri, na wanem taim dispela samting i bin kamap? (Stat 22:15-18)

⁸ Tok Bilong God i helpim yumi long save long husat em namba 1 pikinini bilong dispela meri. Dispela pikinini em i wanpela tumbuna pikinini bilong bilipman Abraham. (Ritim Stat 22:15-18.) Olsem tok profet i kamapim, Jisas i kamap long lain tumbuna pikinini bilong dispela bilipman. (Luk 3:23, 34) Tasol dispela pikinini bai i gat bikpela strong moa winim strong bilong ol man bikos em bai krungutim Satan dispela Devil na pinisim em olgeta. Taim Jisas i gat 30 krismas, spirit bilong God i anointim em olsem dispela Pikinini Bilong God. Long dispela taim, Jisas i kamap namba 1 pikinini bilong dispela meri. (Gal. 3:16) Bihain long Jisas i dai na kirap bek, God i “givim em glori na ona” na “namba long bosim olgeta samting long heven na long graun,” na tu, em i gat namba long “bagarapim ol samting Devil i kamapim.”​—Hib. 2:7; Mat. 28:18; 1 Jon 3:8.

9-10. (a) Husat em namba 2 lain pikinini bilong dispela meri, na wanem taim dispela samting i bin kamap? (b) Nau yumi bai stori long wanem samting?

⁹ Dispela meri i gat namba 2 lain pikinini. Aposel Pol i kamapim klia dispela lain pikinini ol i husat taim em i tokim ol Kristen bilong lain Juda na ol Kristen bilong narapela lain em God i bin anointim ol olsem: “Sapos yupela i bilong Krais, orait yupela i pikinini bilong Abraham, yupela ol man bilong kisim ol dispela samting God i bin promis long en.” (Gal. 3:28, 29) Taim Jehova i anointim wanpela Kristen wantaim holi spirit, nau dispela Kristen i insait long lain pikinini bilong dispela meri. So lain pikinini bilong dispela meri em Jisas Krais na lain 144,000 em ol bai mekim wok king wantaim em. (Rev. 14:1) Olgeta bilong ol i traim long bihainim tingting na pasin bilong Papa bilong ol, God Jehova.

¹⁰ Nau yumi kliagut long husat lain em Stat 3:15 i stori long ol, olsem na yumi bai stori liklik long hau Jehova i wok long truim dispela tok profet na hau dispela tok profet i helpim yumi long nau.

11. Long wanem rot snek bai kaikaim “lek” bilong pikinini bilong dispela meri?

¹¹ Olsem tok profet long Stat 3:15 i kamapim, dispela snek bai kaikaim “lek” bilong pikinini bilong dispela meri. Dispela samting i kamap tru taim Satan i kirapim lain Juda na lain Rom long kilim i dai Pikinini Bilong God. (Luk 23:13, 20-24) Taim man i gat sua long lek bilong em, inap sampela haptaim em i no inap wokabaut o i hatwok long em i wokabaut. Olsem tasol, taim Jisas i dai na slip long matmat inap 3-pela de, insait long dispela haptaim em i no inap mekim wanpela samting.​—Mat. 16:21.

12. (a) Long wanem rot dispela pikinini bai krungutim het bilong dispela snek, na wanem taim bai dispela samting i kamap?

¹² Tok profet i stap long Stat 3:15 i soim olsem Jisas bai dai, tasol em bai kirap bek. Wai na yumi tok olsem? Dispela tok profet i kamapim klia olsem dispela pikinini bai krungutim het bilong dispela snek. Dispela i makim olsem Jisas bai kirap bek. Na tru tumas, dispela samting i bin kamap! Long namba 3 de bihain long em i dai, Jisas i kirap bek na kisim laip  olsem wanpela spirit husat i no inap dai na em i go long heven. Long taim stret God i makim, Jisas bai bagarapim Satan na pinisim em olgeta. (Hib. 2:14) Krais na ol lain i mekim wok king wantaim em, ol bai bagarapim na pinisim olgeta birua bilong God—em lain pikinini bilong dispela snek.​—Rev. 17:14; 20:4, 10. *

13. Olsem wanem yumi kisim helpim long truim bilong dispela tok profet?

¹³ Sapos yu wanpela wokman bilong God i dediket pinis long em, orait yu wok long kisim helpim long truim bilong dispela tok profet. Jisas i kam long graun olsem wanpela man. Em i bihainim gut tru ol pasin bilong Papa bilong em. (Jon 14:9) So long rot bilong Jisas, yumi kisim save long God Jehova na laikim em. Na tu, yumi kisim helpim long ol tok Jisas i autim na pasin em i bihainim long stiaim kongrigesen Kristen long nau. Em i skulim yumi long ol samting yumi mas mekim na bai Jehova i amamas long yumi. Na taim Jisas i dai—i olsem snek i bin kaikaim lek bilong em—yumi bin kisim helpim tu long dispela rot. Wai na yumi tok olsem? Taim Jisas i kirap bek, em i givim pe bilong blut bilong em olsem sakrifais i gutpela olgeta we “i rausim olgeta sin bilong yumi na mekim yumi i kamap klin.”​—1 Jon 1:7.

14. Hau na yumi save olsem truim bilong tok profet em Jehova i mekim long Iden i no inap kamap hariap? Stori long dispela.

¹⁴ Dispela tok profet Jehova i mekim long Iden i soim olsem bikpela haptaim bai lus na bai olgeta truim bilong dispela tok profet i kamap tru. Haptaim i mas lus long dispela meri i kamapim dispela promis pikinini, long Satan i bungim lain bilong em, na long pasin birua i mas kamap namel long dispela 2-pela lain. Sapos yumi kliagut long dispela tok profet, dispela bai helpim yumi bikos em i givim tok lukaut long yumi olsem ol manmeri bilong dispela graun em Satan i bosim bai heitim tru ol lain i lotuim Jehova. Bihain Jisas i givim wankain tok lukaut long ol disaipel bilong em. (Mak 13:13; Jon 17:14) Tru tumas, yumi lukim truim bilong dispela hap bilong dispela tok profet, na moa yet insait long 100 yia nau. Bilong wanem yumi tok olsem?

15. (a) Wai na ol manmeri bilong graun i heitim tru lain bilong God? (b) Wai na i no gat wok long yumi pret long Satan?

¹⁵ Bihain liklik long Jisas i kirap mekim wok olsem King Mesaia long 1914, em i rausim Satan long heven. Nau Satan i stap long graun na em i wet long em bai bagarap na pinis olgeta. (Rev. 12:9, 12) Tasol em i no stap nating. Satan i save olsem em i gat liklik haptaim tru i stap na em i belhat nogut tru, olsem na em i mekim nogut long lain manmeri bilong God. (Rev. 12:13, 17) Long dispela risen, ol manmeri bilong graun i heitim tru lain bilong God. Tasol i no gat wok long yumi pret long Satan na lain bilong em. Yumi ken holim wankain bilip olsem aposel Pol, em i tok: “Sapos God i stap long sait bilong yumi, orait husat bai birua long yumi?” (Rom 8:31) Yumi ken bilip tru long Jehova bikos yumi luksave olsem klostu olgeta hap bilong dispela tok profet long Stat 3:15 i kamap tru pinis.

16-18. Olsem wanem Curtis, Ursula, na Jessica i kisim helpim taim ol i kliagut long tok profet bilong Stat 3:15?

¹⁶ Tok promis bilong Jehova long Stat 3:15 i ken helpim yumi long karim olgeta kain hevi yumi bungim. Curtis em wanpela misineri long Guam, em i tok: “Sampela taim mi bungim ol hevi we i traim pasin bilong mi long stap gut long Jehova. Tasol taim mi tingim  tok profet bilong Stat 3:15, dispela i bin helpim mi long strongim pasin bilong mi long trastim Papa bilong mi long heven.” Curtis i luk fowed long dispela taim bai kamap we Jehova bai pinisim olgeta hevi bilong yumi.

¹⁷ Wanpela sista long Bavaria, nem bilong em Ursula, em i tok taim em i kliagut long tok profet bilong Stat 3:15, dispela i helpim em long save tru olsem God i kamapim olgeta tok i stap long Baibel. Em i lukim hau olgeta narapela tok profet i konek wantaim dispela tok profet, na em narakain samting tru long em. Em i tok: “Taim mi kisim save olsem kwiktaim Jehova i mekim ol samting na bai ol manmeri i ken bilip na wet long gutpela samting bai kamap bihain, mi pilim tru long bel dispela samting.”

¹⁸ Jessica i stap long Maikronisia i tok: “Mi ken tingim yet hau mi bin pilim long festaim mi luksave olsem mi painim tok i tru! Tok profet i stap long Stat 3:15 i bin kamap tru. Dispela i helpim mi long tingim olsem ol samting yumi ekspiriensim long laip long nau, em i no laip tru. Dispela tok profet i strongim tu bilip bilong mi olsem taim yumi mekim wok bilong Jehova, yumi bai gat gutpela laip long nau na laip bilong yumi long bihain bai gutpela moa.”

19. Wai na yumi ken bilip tru olsem laspela hap bilong dispela tok profet bai kamap tru?

¹⁹ Olsem yumi lainim pinis, tok profet bilong Stat 3:15 i wok long kamap tru long nau. Yumi kliagut long husat em lain pikinini bilong dispela meri na husat em lain pikinini bilong dispela snek. Jisas em namba 1 pikinini bilong dispela meri na em i kirap bek long dai—i olsem sua long lek bilong em i drai pinis—na nau em i stap olsem King i gat bikpela strong husat i no inap i dai. Na Jehova i makim pinis klostu olgeta manmeri husat i insait long namba 2 lain pikinini bilong dispela meri. Namba 1 hap bilong dispela tok profet i kamap tru pinis, olsem na yumi ken bilip tru olsem laspela hap bilong dispela tok profet olsem dispela pikinini bai krungutim het bilong dispela snek, em tu bai kamap tru. Ol manmeri i lotuim Jehova, ol bai amamas tru taim Satan i pinis olgeta! Olsem na yumi no ken givap. Yumi ken trastim God bilong yumi. Long rot bilong lain pikinini bilong dispela meri, Jehova bai kamapim planti blesing long “olgeta lain bilong graun.”​—Stt. 22:18.