Papa bilong mi em i wanpela elda long Yunaitet Sios Bilong Kanada long hap bilong mipela, so olgeta wik em i save salim mi na sista bilong mi i go long Sande skul, na bihain long 11 klok mipela i save go long lotu wantaim em. Na long apinun, mipela i save go wantaim Mama long Haus Kingdom. Em isi long mipela inap luksave olsem dispela tupela lotu i no wankain.

Mama i stori long ol nupela bilip bilong em long tupela gutpela pren bilong em, Bob na Marion Hutcheson, na bihain tupela tu i kamap ol Witnes Bilong Jehova. Long 1958, brata na sista Hutcheson i kisim mi wantaim 3-pela pikinini man bilong ol i go long Laik Bilong God Kibung Intenesenel long New York siti, na dispela kibung em inap 8-pela de olgeta. Nau taim mi tingim bek, mi luksave olsem em i bikpela hatwok tru long ol i bin kisim mi i go wantaim ol, tasol dispela kibung em wanpela bung we mi no inap tru long lusim tingting long en.

Taim mi tineja, mipela i stap long wanpela fam na mi save amamas long lukautim ol animal. Mi tingting strong long i go long bikpela skul na kamap dokta bilong ol animal. Mama bilong mi i stori long wanpela elda long kongrigesen long dispela samting. Long gutpela pasin em i kirapim mi long tingim olsem yumi stap long “taim bilong las de” na em i askim mi olsem taim mi go long yunivesiti na skul inap sampela yia, dispela inap mekim wanem long pasin pren bilong mi wantaim Jehova. (2 Tim. 3:1) Dispela i mekim na mi mekim disisen olsem mi no ken i go long yunivesiti.

Mi wok long tingting yet long wanem samting mi bai mekim bihain long mi grediuet long haiskul. Maski mi insait long wok autim tok long olgeta wiken, mi no enjoim wok autim tok, na mi no ting mi inap kamap wanpela painia. Long wankain taim, papa bilong mi husat i no wanpela Witnes na ankol bilong mi ol i kirapim mi long wok fultaim long wanpela bikpela insurens  kampani long Toronto. Ankol bilong mi em i holim wok i gat namba long dispela kampani, so mi orait long wok long hap.

Long Toronto, planti taim mi save wok ovataim na bung wantaim ol manmeri em ol i no Witnes, na dispela i pasim mi long go long ol miting na autim tok. Mi save stap wantaim bubu man bilong mi husat i no wanpela Witnes, tasol bihain long em i dai, mi mas painim narapela ples bilong i stap long en.

Brata na sista Hutcheson, em ol i bin kisim mi i go long kibung i kamap long 1958, ol i olsem papamama bilong mi. Ol i invaitim mi long i go stap wantaim ol long haus bilong ol na ol i helpim mi long kamap strong long bilip. Long 1960, mi na pikinini man bilong ol John i kisim baptais. John i stat long mekim wok painia na dispela i kirapim mi long mekim bikpela wok moa bilong autim tok. Ol brata long kongrigesen i luksave olsem mi wok long kamap strong long bilip, olsem na ol i makim mi long kamap wasman bilong Skul Tiokratik Bilong Autim Tok. a

Long 1966, mi maritim Randi Berge em wanpela painia i save givim bel tru long mekim wok na em i redi long autim tok long ol hap i gat bikpela nid. Wasman sekit bilong mipela i tingim tru mipela, na em i kirapim mipela long helpim kongrigesen long Orillia, Ontario. So mipela i pekim ol kago bilong mipela na muv i go long dispela hap.

Taim mipela i kamap long Orillia, mi joinim Randi na mekim wok painia. Pasin bilong em long amamas i mekim na mi tu i amamas! Taim mi givim bel olgeta long mekim wok painia, mi kisim amamas long yusim Baibel long skulim ol man na lukim ol i kliagut long tok i tru. Em naispela blesing tru long mipela inap helpim tupela marit long Orillia long mekim ol senis long laip bilong ol na kamap ol wokman bilong Jehova.

Wanpela taim mipela i go long Toronto na mi bungim Arnold MacNamara, em wanpela brata i go pas long mekim wok long Betel. Em i askim mipela sapos mipela i laik mekim wok olsem spesel painia. Wantu tasol mi tok: “Yes, mipela i laik tru long mekim olsem! Mipela i  redi long i go long olgeta hap, tasol Quebec nogat!” Mi larim tingting kranki bilong ol manmeri i save mekim tok Inglis long Kanada i stiaim tingting mi gat long ol manmeri bilong provins bilong Quebec em ol i save mekim tokples Frans. Long dispela taim, ol manmeri i protes long gavman na ol i laik bai Quebec i bruk long Kanada na kisim indipendens.

Arnold i tok: “Quebec em wanpela ples tasol brens i wok long salim ol spesel painia i go long en long nau.” Wantu tasol mi wanbel long i go. Mi save pinis olsem Randi i laik i go helpim wok long dispela hap. Bihain, mi luksave olsem dispela em bes disisen mipela i bin mekim long laip bilong mipela!

Bihain long mipela i insait long skul bilong mekim tokples Frans inap 5-pela wik, mitupela Randi wantaim tupela narapela marit i go long Rimouski, em i stap olsem 540 kilomita long hap not-is bilong Montreal. Mipela i mas lainim yet planti samting, na dispela i stap ples klia long wanpela miting taim mi ritim sampela toksave. Mi laik tok olsem long kibung bilong yumi bai kamap, bai yumi gat planti “ol deleget bilong Ostria,” tasol nogat, mi tok bai yumi gat planti “ostris deleget.”

Long Rimouski, 4-pela singel sista i joinim mipela 4-pela, na tu, brata na sista Huberdeau na tupela pikinini meri bilong ol. Brata na sista Huberdeau i rentim wanpela bikpela haus i gat 7-pela rum na ol painia i stap long dispela haus i save helpim long peim rent. Mipela i kolim dispela haus olsem Wait Haus bikos fran bilong haus i waitpela na em i gat ol waitpela pos. Planti taim inap olsem 12 i go 14 manmeri i save stap long dispela haus. Mitupela Randi i mekim wok spesel painia so mipela i save go autim tok long ol moning, ol apinun, na long ol nait, olsem na mipela i save amamas tru taim wanpela i redi long i go autim tok wantaim mipela long ol nait taim ples i kol tru long taim bilong winta.

Mipela i pas gut tru wantaim ol dispela painia na ol i kamap olsem ol famili bilong mipela. Sampela taim mipela i save wokim paia na sindaun wantaim o mipela i save mekim “pierogi de,” we mipela olgeta i bung wantaim na kukim ol plaua i gat mit na sis samting insait long en. Wanpela brata em man bilong pilaim musik, olsem na long ol Sarere nait planti taim mipela i save singsing na danis.

Planti manmeri long Rimouski i amamas long lainim tok i tru bilong Baibel! Insait long 5-pela yia, mipela i amamas long lukim planti Baibel sumatin i winim mak bilong kisim baptais. Kongrigesen i go bikpela na i gat inap olsem 35 pablisa.

Long Quebec, mipela i kisim nambawan gutpela trening olsem ol evanjelis. Mipela i lukim hau Jehova i helpim mipela long wok autim tok bilong mipela na givim ol samting mipela i nidim. Na tu, mipela i lain long laikim ol manmeri i save mekim tokples Frans, mipela i laikim tokples bilong ol, na kalsa bilong ol, na dispela i kirapim mipela long laikim ol narapela kalsa tu.​—2 Kor. 6:13.

Mipela i kirap nogut taim brens i askim mipela long muv i go long taun bilong Tracadie, long hap is bilong New Brunswick. Dispela i mekim mipela tingting planti bikos i no longtaim i go pinis mipela i sainim wanpela kontrak bilong rentim wanpela apatmen, na tu, mi mekim kontrak wantaim wanpela skul long wok pat-taim olsem wanpela tisa. Na tu, narapela samting em sampela Baibel sumatin bilong mipela i kamap ol nupela pablisa na long dispela taim mipela i wok long sanapim wanpela Haus Kingdom.

Long wiken olgeta mipela i beten olsem mipela bai muv i go long Tracadie o nogat, na mipela i visitim tu Tracadie, em i no wankain long Rimouski. Tasol mipela i tingim olsem Jehova i laik mipela i go long dispela hap, olsem na mipela bai go. Mipela i traim Jehova na mipela i lukim olsem em i rausim olgeta samting i pasim rot bilong mipela. (Mal. 3:10) Oltaim Randi i pas gut wantaim Jehova, em i no save tingim em yet, na em i gat gutpela pasin bilong lap na amamas,  olsem na em isi moa long mipela i mekim dispela senis.

Wanpela elda tasol long nupela kongrigesen bilong mipela em Robert Ross. Em na meri bilong em Linda i mekim wok painia long dispela hap, na bihain long fes pikinini bilong ol i bon, ol i mekim disisen long stap yet long dispela hap. Maski ol i lukautim liklik boi bilong ol, ol i save strongim tru mitupela Randi bikos ol i gat pasin helpim na ol i save givim bel tru long wok autim tok.

Bihain long mipela i mekim wok painia long Tracadie inap 2-pela yia, mipela i kisim gen narapela saprais, ol i singautim mipela long mekim wok sekit. Mipela i mekim wok sekit long ol kongrigesen i save mekim tok Inglis inap 7-pela yia, na bihain ol i asainim mipela long mekim wok sekit long ol kongrigesen i mekim tokples Frans long Quebec. Léonce Crépeault em distrik ovasia bilong mipela long Quebec, na em i save tok amamas long mi taim mi mekim ol tok. Tasol bihain em i save askim mi olsem: “Hau yu ken mekim ol tok we i kirapim ol man long mekim samting?” b Pasin bilong em long tingim mi tru i helpim mi long mekim ol tok we i simpol na i isi long ol man i kliagut long en.

Wanpela asainmen mi bin mekim na mi no inap lusim tingting long en, em asainmen mi mekim long 1978 long “Victorious Faith” Kibung Intenesenel long Montreal. Mi wok long Dipatmen Bilong Kaikai. Mipela i save olsem 80,000 manmeri bai kam, na i gat nupela rot mipela i mas bihainim bilong givim kaikai long ol na i no olsem long bipo. Olgeta samting i nupela: ol tul mipela bai yusim, ol kaikai, na wei bilong redim kaikai. Mipela i yusim 20 bikpela frisa, tasol sampela taim ol i no save wok. Paslain long fes de bilong kibung i kirap, mipela i no inap go insait long stediam bilong oganaisim ol samting i go inap long 12 klok long biknait bikos ol i bin wokim sediul pinis long wanpela bikpela gem bai kamap long dispela taim. Na mipela i mas onim ol aven paslain long tulait i bruk bilong redim moning kaikai! Mipela i taiet tru, tasol mi lainim planti samting long ol bratasista em mipela i volantia wantaim long mekim wok, olsem pasin bilong ol long wok hat, holim tingting olsem man o meri i bikpela pinis, na pasin bilong ol long lap na amamas. Mipela olgeta i kamap ol gutpela pren na mipela i pas gut tru i kam inap long nau. Mi amamas tru olsem mi inap insait long dispela bikpela kibung i kamap long Quebec, em dispela provins we ol i bin birua nogut tru long ol Witnes namel long yia 1940 na 1960!

 Mi lainim planti samting long ol narapela brata em ol i mekim wok olsem ol ovasia long taim mipela i save mekim ol bikpela kibung long Montreal. Long wanpela kibung, David Splane em nau em i insait long Gavening Bodi, em i bin stap olsem ovasia bilong dispela kibung. Taim ol i askim mi long mekim dispela asainmen long narapela kibung i kamap bihain long dispela, David i sapotim mi gut tru.

Long 2011, bihain long mitupela Randi i bin mekim wok sekit inap 36 yia, ol i singautim mi long mekim wok olsem instrakta long Skul Bilong Ol Elda Bilong Kongrigesen. Mitupela Randi i slip long 75 narapela narapela bet insait long 2-pela yia, tasol mipela i amamas long lusim planti samting bilong mekim olsem. Long pinis bilong olgeta wan wan wik, ol elda i pilim tru pasin bilong Gavening Bodi long tingim tru pasin bilong ol long pas gut wantaim Jehova.   

Bihain, mi kamap instrakta long Skul Bilong Ol Kingdom Evanselis. Planti taim ol sumatin i save pilim taiet tru na ol i tingting planti bikos ol i gat bisi sediul, olsem ol i mas sindaun long klasrum inap 7-pela aua long olgeta de, mekim homwok inap 3-pela aua long olgeta nait, na mekim 4-pela o 5-pela asainmen long olgeta wan wan wik. Mi na narapela instrakta i tokim ol olsem ol i no inap mekim ol dispela samting ol yet, Jehova tasol i helpim ol long mekim olsem. Oltaim mi bai tingim yet pasin bilong ol sumatin long kirap nogut long luksave olsem taim ol i larim Jehova i helpim ol, ol i save mekim planti samting moa winim ol samting ol i bin ting ol inap mekim.

Pasin bilong mama bilong mi long tingim tru ol narapela i helpim ol Baibel sumatin bilong em long winim mak bilong kisim baptais na em i helpim tu papa bilong mi long senisim tingting em i gat long tok i tru. Tripela de bihain long mama i dai, papa i sapraisim mipela taim em i kam long wanpela pablik tok long Haus Kingdom, na em i wok yet long kam long ol miting long 26 yia olgeta. Maski Papa i no kisim baptais, ol elda i tokim mi olsem oltaim em fes man long kam long ol miting long olgeta wan wan wik.

Mama bilong mi i stap gutpela eksampel tu long mi na ol susa bilong mi. Long nau, tripela susa bilong mi wantaim ol man bilong ol i stap gut long mekim wok bilong Jehova. Tupela susa bilong mi i mekim wok long ol brens ofis, wanpela i stap long Potugal na narapela i stap long Haiti.

Nau mitupela Randi i mekim wok olsem spesel painia long Hamilton, Ontario. Taim mipela i mekim wok sekit, mipela i save amamas long raun wantaim ol narapela i go lukim ol gobek na ol Baibel stadi bilong ol. Tasol nau mipela i amamas long lukim ol sumatin bilong mipela yet i kamap strong long bilip. Na taim mipela i pas gut wantaim ol bratasista long nupela kongrigesen bilong mipela, mipela i kisim strong long lukim hau Jehova i sapotim ol long ol gutpela taim na long ol taim nogut.

Taim mipela i tingim i go bek, mipela i pilim tru ol gutpela pasin bilong ol narapela long tingim tru mipela. Na mipela tu i traim long mekim pasin bilong “tingim . . . tru” ol narapela, na kirapim ol long mekim ol samting ol i ken mekim long wok bilong Jehova. (2 Kor. 7:6, 7) Olsem, insait long wanpela famili, mama, pikinini man, na pikinini meri, olgeta i mekim wok painia. So mi askim papa bilong dispela famili sapos em i bin tingting long mekim wok painia. Em i tok olsem em i wok long sapotim 3-pela painia. Na mi askim em: “Yu ting yu inap givim gutpela sapot moa long ol winim Jehova?” Mi kirapim em long kisim amamas long samting ol i amamas long en. Na 6-pela mun bihain, em i kamap wanpela painia.

Mitupela Randi bai wok yet long “tokaut long ol lain i kamap bihain” long “ol gutpela wok” bilong Jehova, na mipela i laik bai ol tu i amamas long mekim wok bilong em olsem mipela i mekim.​—Sng. 71:17, 18.