STADI ATIKOL 30
Wok Yet Long Strongim Pasin Laikim Bilong Yu
“Long rot bilong pasin laikim yumi mas kamap olsem man i bikpela pinis long olgeta samting.”—EFE. 4:15.
SINGSING 2 [1] Jehova Em Nem Bilong Yu
PRIVIU a
1. Yu bin lainim wanem ol tok i tru taim yu kirap stadi long Baibel?
YU INAP tingim festaim yu bin kirap stadi long Baibel? Ating yu kirap nogut long save olsem God i gat nem. Na ating bel bilong yu i stap isi taim yu kisim save olsem God i no save panisim ol man long helpaia. Na ating yu amamas tru long save olsem yu bai lukim gen ol famili bilong yu i dai pinis em ol i kirap bek na yu bai stap wantaim ol long Paradais long graun.
2. Yu bin lainim ol tok i tru bilong Baibel na yu mekim wanem ol senis? (Efesus 5:1, 2)
2 Taim yu lusim bikpela haptaim moa long stadi long Tok Bilong God, yu strongim pasin bilong yu long laikim tru Jehova. Na dispela pasin laikim i kirapim yu long bihainim ol tok yu lainim. Yu larim ol stiatok bilong Baibel i helpim yu long mekim ol gutpela disisen. Yu mekim senis long tingting na pasin bilong yu bikos yu laik amamasim God. Wankain olsem wanpela pikinini i bihainim pasin bilong papa o mama bilong em, yu bihainim pasin bilong Papa bilong yu long heven.—Ritim Efesus 5:1, 2.
3. Yumi inap givim wanem ol askim long yumi yet?
3 Yumi ken askim yumi yet olsem: ‘Pasin bilong mi long laikim Jehova i strong moa winim pasin bilong mi long laikim em long festaim mi bin kamap wanpela Kristen? Kirap long taim mi kisim baptais, ol tingting na pasin bilong mi i wankain olsem bilong Jehova, moa yet long mekim pasin laikim long ol bratasista bilong mi?’ Sapos “pasin laikim em yu bin gat long pastaim” em i no strong moa, orait no ken bel hevi. Wankain samting i bin kamap long ol Kristen long taim bilong ol aposel. Tasol Jisas i no bin givap long ol, na em i no givap long yumi tu. (Rev. 2:4, 7) Em i save olsem yumi ken strongim gen dispela pasin laikim em yumi bin gat long festaim yumi lainim tok i tru.
4. Yumi bai stori long wanem samting long dispela atikol?
4 Dispela atikol bai stori long hau yumi ken wok yet long strongim pasin bilong yumi long laikim tru Jehova na laikim ol narapela. Bihain bai yumi stori long sampela blesing em yumi yet i kisim na ol blesing ol narapela i kisim taim yumi laikim moa yet Jehova na ol bratasista bilong yumi.
STRONGIM PASIN BILONG YU LONG LAIKIM TRU JEHOVA
5-6. (a) Aposel Pol i bungim wanem ol hevi long wok autim tok bilong em? (b) Wanem samting i kirapim em long mekim yet wok bilong Jehova?
5 Aposel Pol i bin amamas tru long mekim wok bilong Jehova, tasol em i bungim planti hevi. Planti taim Pol i mas raun i go long ol longwe ples, na long dispela taim em i no isi long mekim ol dispela raun. Sampela taim long ol dispela raun bilong Pol, klostu laip bilong em i “lus long ol wara” na em inap “kisim bagarap long han bilong ol raskol.” Na sampela taim ol birua i mekim nogut long em na paitim em. (2 Kor. 11:23-27) Na tu, sampela taim ol wanbilip Kristen bilong Pol i no soim tenkyu bilong ol long ol gutpela wok em i mekim bilong helpim ol.—2 Kor. 10:10; Fili. 4:15.
6 Wanem samting i helpim Pol long mekim yet wok bilong Jehova? Pol i lainim planti samting long pasin bilong Jehova long rot bilong Ol Skripsa na long ol ekspiriens bilong em yet. Pol i bilip tru olsem God Jehova i laikim em. (Rom 8:38, 39; Efe. 2:4, 5) Na em i laikim tru Jehova. Pol i soim olsem em i laikim tru Jehova long rot bilong “helpim ol manmeri holi, na [em] i wok yet long mekim olsem.”—Hib. 6:10.
7. Wanem wanpela rot yumi ken strongim pasin bilong yumi long laikim Jehova?
7 Yumi ken strongim pasin bilong yumi long laikim God long rot bilong stadi gut long Tok bilong em. Taim yu ritim Baibel, traim long luksave long hau wan wan ves i skulim yu long sampela pasin bilong Jehova. Askim yu yet: ‘Olsem wanem dispela stori i soim olsem Jehova i laikim mi? Em i stori long wanem ol risen na mi mas laikim Jehova?’
8. Olsem wanem beten i ken strongim pasin bilong yumi long laikim tru God?
8 Narapela rot yumi ken strongim pasin bilong yumi long laikim tru Jehova em long beten oltaim na tokim em long ol samting i stap long bel bilong yumi. (Sng. 25:4, 5) Na Jehova bai bekim ol beten bilong yumi. (1 Jon 3:21, 22) Kayla em wanpela sista long Esia, em i tok: “Pastaim mi laikim Jehova bikos long ol save mi kisim long em, tasol dispela pasin laikim i kamap strong moa taim mi lukim hau em i bekim ol beten bilong mi. Dispela i kirapim mi long i gat laik long mekim ol samting bilong amamasim em.” b
STRONGIM PASIN BILONG YU LONG LAIKIM TRU OL NARAPELA
9. Olsem wanem Timoti i soim olsem em i strongim pasin bilong em long laikim ol bratasista bilong em?
9 Sampela yia bihain long Pol i kamap wanpela Kristen, em i bungim wanpela yangpela man nem bilong em Timoti. Timoti i laikim tru Jehova na em i laikim tru ol manmeri. Pol i tokim ol Kristen long Filipai olsem: “Mi no gat narapela man i gat wankain pasin olsem [Timoti], bai em i tingim tru yupela.” (Fili. 2:20) Long dispela ves, Pol i no stori long save bilong Timoti long oganaisim gut ol wok na mekim ol tok, nogat. Em i amamas tru long gutpela pasin bilong Timoti long laikim tru ol bratasista bilong em. Tru tumas, ol kongrigesen em Timoti i save go lukim ol, ol i luk fowed long ol visit bilong em.—1 Kor. 4:17.
10. Long wanem ol rot Anna na man bilong em i mekim pasin laikim long ol bratasista bilong ol?
10 Yumi tu i save painim ol rot bilong helpim ol bratasista Kristen bilong yumi. (Hib. 13:16) Tingim Anna em yumi stori long em long atikol i go pinis. Bihain long bikpela win na ren i kamap, em na man bilong em i visitim haus bilong wanpela Witnes famili na ol i lukim olsem rup bilong haus bilong ol i bruk i go insait. Dispela i mekim na famili i no gat ol klinpela klos. Anna i tok: “Mipela i kisim ol klos bilong ol i go wasim, ainim na foldim na mipela i givim bek long ol. Mipela i pilim olsem dispela em i liklik samting, tasol em i strongim tru pasin pren namel long mipela na mipela i stap pren i kam inap long nau.” Anna na man bilong em i laikim tru ol bratasista bilong ol na dispela i kirapim ol long mekim samting bilong helpim ol.—1 Jon 3:17, 18.
11. (a) Ol narapela inap pilim olsem wanem long pasin laikim yumi mekim long ol? (b) Olsem Provep 19:17 i kamapim, Jehova i save mekim wanem taim yumi mekim pasin laikim long ol narapela?
11 Taim yumi laikim ol narapela na mekim gutpela pasin long ol, ol i save luksave long ol hatwok yumi mekim bilong bihainim ol tingting na pasin bilong Jehova. Na ol inap pilim tru ol gutpela pasin yumi mekim long ol, maski yumi yet i no luksave long dispela. Kayla em yumi stori pinis long em, em i tingim yet ol lain husat i bin helpim em. Em i tok: “Mi tenkyu tru long olgeta sista husat i bin kisim mi go autim tok wantaim ol. Ol i save pikim mi long kar, invaitim mi long i go kaikai wantaim ol, na ol i save kam lusim mi long haus. Mi luksave nau olsem ol i lusim bikpela taim na strong bilong mekim olsem. Na ol i mekim wantaim pasin laikim.” Tasol i no olgeta man bai tok tenkyu long yumi long ol samting yumi mekim bilong helpim ol. Kayla i tok long ol sista i bin helpim em olsem: “Mi laik tru long bekim ol gutpela pasin ol i bin mekim long mi, tasol mi no save haus bilong ol i stap long wanem hap long nau. Tasol Jehova i save long dispela, na mi beten olsem em bai bekim ol gutpela pasin ol i bin mekim bilong helpim mi.” Tok bilong Kayla em i tru. Jehova i luksave long olgeta liklik samting yumi mekim bilong helpim ol narapela. Em i tingim dispela olsem gutpela ofa tru na olsem dinau em yet bai bekim.—Ritim Provep 19:17.
Taim wanpela i winim ol mak bilong bilip em i putim, em bai painim ol rot bilong helpim ol narapela (Lukim paragraf 12)
12. Olsem wanem ol brata i ken soim olsem ol i laikim tru ol bratasista insait long kongrigesen? (Lukim tu ol piksa.)
12 Sapos yu wanpela brata, hau yu ken soim olsem yu laikim ol narapela na mekim ol samting bilong helpim ol? Wanpela yangpela brata, nem bilong em Jordan, em i askim wanpela elda long hau em i ken mekim sampela samting moa bilong helpim ol bratasista long kongrigesen. Dispela elda i tok amamas long em long ol gutpela wok em i bin mekim insait long kongrigesen na em i givim em sampela edvais long sampela samting moa em i ken mekim. Olsem, em i tokim Jordan olsem em i ken kam long Haus Kingdom paslain long miting i kirap na gritim ol narapela, bekim tok long ol miting, autim tok planti taim wantaim grup bilong em, na painim ol rot bilong helpim ol narapela. Taim Jordan i bihainim dispela edvais, em i lain long mekim sampela wok moa, na tu, dispela i strongim pasin bilong em long laikim tru ol bratasista bilong em. Jordan i lain olsem taim wanpela brata i kamap wanpela kongrigesen sevan, em i no kirap long helpim ol narapela, nogat, em i wok yet long helpim ol.—1 Tim. 3:8-10, 13.
13. Olsem wanem pasin laikim i kirapim wanpela brata em nem bilong em Christian long mekim gen wok elda?
13 Yu ken mekim wanem sapos yu bin mekim wok olsem wanpela kongrigesen sevan o elda long pastaim? Jehova i tingim gutpela wok yu bin mekim long bipo na pasin laikim we i bin kirapim yu long mekim olsem. (1 Kor. 15:58) Na tu, em i luksave long pasin laikim em yu wok yet long mekim long nau. Wanpela brata, nem bilong em Christian, em i bel hevi tru taim ol i pinisim em long wok elda bilong em. Maski i olsem, em i tok: “Mi wok strong long mekim wok bilong Jehova bikos mi laikim em, maski mi holim ol wok insait long kongrigesen o nogat.” Bihain ol i makim em long mekim gen wok elda. Christian i tok: “Pastaim mi pret liklik long mekim gen dispela wok. Tasol mi tingting olsem sapos long pasin marimari bilong Jehova em i larim mi long mekim gen wok elda, orait bai mi mekim dispela wok bikos mi laikim tru Jehova na mi laikim ol bratasista bilong mi.”
14. Yu kisim wanem skul long tok bilong wanpela sista long Jojia?
14 Ol wokman bilong Jehova i save mekim pasin laikim long ol narapela tu. (Mat. 22:37-39) Olsem, Elena em wanpela sista long Jojia i tok: “Pastaim, pasin bilong mi long laikim Jehova, dispela tasol i kirapim mi long autim tok. Tasol taim mi strongim pasin bilong mi long laikim Papa bilong mi long heven, pasin bilong mi long laikim ol narapela tu i kamap strong. Mi traim long piksaim long tingting ol hevi ol i karim na wanem topik mi ken stori long en we ol bai pilim tru long bel. Taim mi wok long i gat kain tingting olsem long ol, dispela i strongim laik bilong mi long helpim ol.”—Rom 10:13-15.
OL BLESING YUMI KISIM TAIM YUMI LAIKIM OL NARAPELA
Taim pasin laikim i kirapim yumi long helpim ol narapela, dispela inap mekim na planti manmeri bai kisim ol blesing (Lukim paragraf 15-16)
15-16. Olsem piksa ol i ektim i soim, yumi kisim wanem ol blesing taim yumi mekim pasin laikim long ol narapela?
15 Taim yumi mekim pasin laikim long ol bratasista bilong yumi, dispela i helpim ol na i helpim yumi tu. Bihain long COVID-19 pendemik i kirap, wanpela brata nem bilong em Paolo na meri bilong em i helpim planti lapun sista long lain long yusim fon o teblet bilong ol long autim tok. Wanpela sista em pastaim em i pilim hatwok long yusim fon o teblet bilong em, nau em i lain gut long mekim olsem. Em i yusim fon o teblet bilong em long invaitim ol wanblut bilong em long kam long Memorial. Inap 60 wanblut bilong em i lukim Memorial long rot bilong vidio konferens! Dispela sista na ol wanblut bilong em, olgeta i kisim helpim long hatwok bilong Paolo na meri bilong em. Bihain dispela sista i raitim pas i go long Paolo na em i tok: “Tenkyu tru long skulim mipela ol lapun. Mi no inap tru long lusim tingting long pasin bilong Jehova long tingim mipela na gutpela wok yupela i mekim bilong helpim mipela.”
16 Ol kain ekspiriens olsem i skulim Paolo long wanpela bikpela samting. Em i luksave olsem pasin laikim em i bikpela samting moa winim save o strong bilong yumi long mekim samting. Em i tok: “Bipo mi mekim wok olsem wasman sekit. Long nau, mi luksave olsem maski ol pablisa inap lusim tingting long ol tok mi bin mekim, ol i tingim yet ol samting mi bin mekim bilong helpim ol.”
17. Taim yumi mekim pasin laikim long ol narapela, yumi bai helpim husat tu?
17 Taim yumi mekim pasin laikim long ol narapela, yumi yet i kisim helpim long ol rot em yumi no ting long en. Jonathan husat i stap long Nu Silan, em i wanbel long dispela tok. Wanpela Sarere apinun taim ples i hot nogut tru, em i lukim wanpela painia i autim tok long sait bilong rot. Olsem na Jonathan i kirap long autim tok wantaim dispela painia long ol Sarere apinun. Long dispela taim em i no luksave long hau dispela gutpela pasin em i mekim inap helpim em yet. Jonathan i tok: “Long dispela taim long laip bilong mi, mi no save laikim tumas wok autim tok. Tasol taim mi putim yau long pasin bilong dispela painia long skulim ol man na mi lukim ol gutpela samting i kamap long wok autim tok bilong em, dispela i kirapim bel bilong mi long laikim tru dispela wok. Na tu, dispela painia brata i kamap gutpela pren bilong mi na em i helpim mi long kamap strong long bilip, enjoim wok autim tok, na pas gut moa wantaim Jehova.”
18. Jehova i laik bai yumi mekim wanem?
18 Jehova i laik bai yumi olgeta i strongim pasin bilong yumi long laikim tru em na laikim ol narapela. Olsem yumi lainim pinis, yumi ken strongim pasin bilong yumi long laikim tru Jehova long rot bilong ritim Baibel na tingim tingim long bel ol tok bilong en na oltaim beten long Em. Yumi ken strongim pasin bilong yumi long laikim tru ol bratasista bilong yumi taim yumi mekim ol samting bilong helpim ol. Taim yumi strongim pasin laikim bilong yumi, yumi bai pas gut moa wantaim Jehova na pas gut moa wantaim ol wanbilip Kristen bilong yumi. Na yumi bai amamas long pas gut wantaim Jehova na pas gut wantaim ol wanbilip Kristen inap oltaim oltaim!
SINGSING 109 [25] Laikim Tru Ol Arapela Long Bel Olgeta
a Maski yumi nupela long tok i tru o yumi mekim wok bilong Jehova inap planti yia pinis, yumi olgeta i ken wok yet long putim na winim ol mak. Dispela atikol bai stori long wanpela nambawan rot yumi ken mekim olsem, em long rot bilong strongim pasin bilong yumi long laikim tru Jehova na laikim ol narapela. Taim yu tingim ol tok bilong dispela atikol, tingim ol mak yu winim pinis na hau yu ken winim ol narapela mak.
b Mipela i senisim sampela nem.