1. Wai na i gutpela long redi paslain long ol disasta i kamap?

 PASIN bilong redi gut i save seivim laip bilong man. Olsem, taim wanpela disasta i kamap, ol lain em ol i redi paslain long dispela disasta, ol i gat rot long abrusim bagarap na ol inap helpim tu ol narapela. Wanpela oganaisesen long Yurop i save traim long helpim ol man long taim bilong disasta i tok: “Pasin bilong redi gut i save lukautim laip bilong man.”

2. Wai na yumi mas redi long taim bilong traipela hevi tru? (Matyu 24:44)

² “Traipela hevi tru” bai kamap wantu tasol. (Mat. 24:21) Dispela traipela hevi tru bai i no wankain long ol narapela disasta bikos yumi save dispela taim bai kamap. Inap olsem 2,000 yia i go pinis, Jisas i givim tok lukaut long ol disaipel bilong em long redi i stap long dispela de. (Ritim Matyu 24:44.) Sapos yumi redi i stap, orait em bai isi moa long yumi sanap strong long dispela taim nogut tru na helpim ol narapela tu long mekim olsem.​—Luk 21:36.

3. Olsem wanem pasin bilong sanap strong na karim hevi, pasin sori, na pasin laikim bai helpim yumi long redi long taim bilong traipela hevi tru?

³ Skelim 3-pela pasin we inap helpim yumi long redi long taim bilong traipela hevi tru. Yumi bai mekim wanem sapos yumi autim strongpela tok long kot bilong God na ol man i birua long yumi? (Rev. 16:21) Yumi mas i gat pasin bilong sanap strong na karim hevi bambai yumi ken bihainim tok bilong Jehova, na trastim em olsem em bai lukautim yumi. Yumi bai mekim wanem sapos ol bratasista bilong yumi i no gat moa ol samting bilong skin? (Hab. 3:17, 18) Yumi mas i gat pasin sori na bai dispela i kirapim yumi long givim ol samting ol i nidim. Yumi bai mekim wanem sapos yumi mas stap insait long wanpela liklik haus wantaim ol bratasista bilong yumi inap sampela haptaim bikos long ol kantri i bung wantaim na i kam pait long yumi? (Ese. 38:10-12) Yumi mas i gat pasin laikim na bai yumi laikim ol bratasista bilong yumi na sanap strong long dispela taim nogut.

4. Olsem wanem Baibel i kirapim yumi long wok yet long kisim pasin bilong sanap strong na karim hevi, pasin sori, na pasin laikim?

 ⁴ Tok Bilong God i kirapim yumi long wok yet long kisim pasin bilong sanap strong na karim hevi, pasin sori, na pasin laikim. Luk 21:19 i tok: “Pasin bilong yupela long sanap strong bai mekim na yupela i holimpas laip bilong yupela.” Kolosi 3:12 i tok: “Yupela i mas kisim . . . pasin sori.” Na 1 Tesalonaika 4:9, 10 i tok: “God i skulim yupela long laikim narapela narapela. . . . Tasol ol brata, mipela i laik strongim yupela long mekim dispela pasin moa moa yet.” Tok bilong ol dispela ves i go long ol disaipel em ol i bin sanap strong na karim hevi, mekim pasin sori, na mekim pasin laikim. Maski i olsem, ol i mas wok yet long lain long mekim ol dispela pasin. Yumi tu i mas mekim olsem. Bilong helpim yumi, yumi bai stori long hau ol Kristen long taim bilong ol aposel i bihainim ol dispela pasin. Bihain yumi bai stori long hau yumi ken bihainim pasin bilong ol dispela disaipel, na long dispela rot yumi soim klia olsem yumi redi i stap long taim bilong traipela hevi tru.

5. Olsem wanem ol Kristen long taim bilong ol aposel i bin sanap strong na karim ol hevi?

⁵ Ol Kristen long taim bilong ol aposel i mas i gat pasin bilong sanap strong na karim hevi. (Hib. 10:36) Ol i karim ol hevi em planti man long dispela taim i karim, na ol i karim ol narapela hevi tu. Planti bilong ol i karim hevi long han bilong ol hetman bilong lotu Juda na ol bikman bilong Rom, na tu, ol i karim hevi long han bilong ol wanfamili bilong ol. (Mat. 10:21) Na insait long kongrigesen yet, sampela taim ol i mas wok strong long sakim ol tingting bilong ol apostet na ol bilip giaman em ol i skulim ol man long en bilong brukim lain. (Apo. 20:29, 30) Tasol ol dispela Kristen i sanap strong na karim hevi. (Rev. 2:3) Hau ol i mekim olsem? Ol i tingim ol eksampel bilong ol bilipman long Baibel em ol i sanap strong na karim hevi, olsem Jop. (Jems 5:10, 11) Ol i beten long God i ken strongim ol. (Apo. 4:29-31) Na ol i putim tingting long ol gutpela samting i kamap long pasin bilong ol long sanap strong na karim hevi.​—Apo. 5:41.

6. Yu kisim wanem skul long Merita long pasin bilong sanap strong na karim hevi taim famili i birua long em?

⁶ Yumi tu i ken sanap strong na karim hevi sapos oltaim yumi stadi na tingim tingim long bel ol eksampel bilong ol bilipman na meri long Baibel na long ol pablikesen bilong yumi. Merita em wanpela sista long Albenia, em i bin mekim olsem, na dispela i helpim em long sanap strong na karim hevi taim famili bilong em i birua nogut tru long em. Em i tok: “Taim mi stadi long stori bilong Jop long Baibel, dispela i bin strongim mi tru. Em i karim bikpela hevi tru, tasol em i no save husat i kamapim ol dispela hevi. Maski i olsem em i tok: ‘I go inap long taim mi dai, mi no inap lusim pasin bilong mi long i stap gut long God!’ (Jop 27:5) Ol hevi bilong mi ol i no bikpela tumas taim mi skelim wantaim ol hevi Jop i bin karim. Jop i no save long husat i as bilong ol dispela hevi, tasol mi save husat i as bilong ol hevi mi karim.”

7. Maski yumi no karim wanpela bikpela hevi long nau, yumi mas lain long mekim wanem?

⁷ Yumi tu i ken strongim pasin bilong yumi long sanap strong na karim hevi long rot bilong beten oltaim long Jehova na tokim em long olgeta wari bilong yumi. (Fili. 4:6; 1 Tes. 5:17) Ating yu no wok long karim wanpela bikpela hevi long nau. Tasol olsem wanem? Yu save askim Jehova long stiaim yu taim yu bel hevi, tingting planti, o presa i daunim yu? Sapos long nau oltaim yu save askim God long helpim yu long karim ol hevi bilong wan wan de, orait yu no inap surik long mekim olsem taim yu bungim ol bikpela hevi long bihain. Long dispela taim bai yu bilip tru olsem God i save long taim stret bilong helpim yu na hau long mekim olsem.​—Sng. 27:1, 3.

8. Stori bilong Mira i soim olsem taim yumi sanap strong na karim ol hevi long nau, olsem wanem dispela bai helpim yumi long karim ol hevi long bihain? (Jems 1:2-4) (Lukim tu piksa.)

⁸ Yumi inap sanap strong na karim hevi long  taim bilong traipela hevi tru sapos yumi sanap strong na karim ol hevi long nau. (Rom 5:3) Wai na yumi ken tok olsem? Planti bratasista i luksave olsem taim ol i sanap strong na karim wanpela hevi, dispela i helpim ol long sanap strong na karim narapela hevi i kamap bihain. Taim ol i sanap strong na karim hevi wantaim helpim bilong Jehova, dispela i strongim bilip bilong ol olsem Jehova i redi na em i laik helpim ol. Long dispela rot, bilip i helpim ol long sanap strong na karim hevi i kamap bihain. (Ritim Jems 1:2-4.) Mira, em wanpela painia long Albenia, em i luksave olsem pasin bilong em long sanap strong na karim ol hevi long bipo i helpim em long sanap strong na karim yet ol hevi. Em i tok sampela taim em i save pilim olsem em tasol i wok long karim planti hevi. Tasol em i tingim planti samting Jehova i bin mekim insait long 20 yia i go pinis bilong helpim em, na em i tokim em yet olsem: ‘Stap strong long bilip. No ken larim olgeta dispela yia na olgeta dispela hevi em yu bin winim wantaim helpim bilong Jehova i lus nating.’ Yu tu i ken tingim hau Jehova i bin helpim yu long sanap strong na karim wanpela hevi i bin painim yu. Yu ken save tru olsem taim yu sanap strong na karim wanpela hevi, em i luksave long dispela na em bai givim gutpela pe long yu. (Mat. 5:10-12) Na taim traipela hevi tru i kamap, yu lain pinis long sanap strong na karim hevi, olsem na yu bai tingting strong long sanap strong yet na karim wanem ol hevi i painim yu.

9. Olsem wanem kongrigesen long Antiok bilong Siria i mekim pasin sori?

⁹ Skelim wanem samting i kamap taim ol Kristen long Judia i karim hevi long bikpela hangre tru i bin kamap. Taim kongrigesen long Antiok bilong Siria i harim olsem bikpela hangre tru i kamap, ol i pilim sori tru long ol bratasista bilong ol long Judia. Tasol ol i larim pasin sori bilong ol i kirapim ol long mekim samting. Ol i “pasim tok long salim ol samting bilong helpim ol brata i stap long Judia. Na olgeta i givim ol samting inap long skel bilong ol.” (Apo. 11:27-30) Maski ol bratasista i stap longwe tru i bin karim hevi bilong bikpela hangre, ol Kristen long Antiok i tingting strong long helpim ol.​—1 Jon 3:17, 18.

10. Long wanem ol rot yumi ken mekim pasin sori taim ol wanbilip i karim hevi long wanpela disasta? (Lukim tu piksa.)

¹⁰ Yumi tu i ken mekim pasin sori long nau taim yumi kisim save olsem ol wanbilip i karim hevi long wanpela disasta. Yumi redi long helpim ol taim yumi askim ol elda sapos yumi ken helpim long wanpela projek, o givim mani bilong helpim wok i kamap long olgeta hap bilong graun, na tu, yumi ken beten long ol bratasista bilong yumi em ol i karim hevi long dispela disasta. b (Prov. 17:17) Olsem, long 2020 ol i bin makim winim 950 Disasta Rilif Komiti long olgeta hap bilong graun bilong helpim ol bratasista em ol i karim hevi long COVID-19 pendemik. Yumi tenkyu tru long ol bratasista em ol i wok wantaim ol rilif komiti. Ol i sori tru long ol bratasista bilong ol na dispela i kirapim ol long givim ol rilif saplai, strongim ol long sait bilong bilip, na sampela taim ol i stretim o wokim gen ol haus bilong ol na ol ples bilong mekim lotu.​—Skelim 2 Korin 8:1-4.

11. Taim yumi mekim pasin sori, olsem wanem dispela i onarim Papa bilong yumi long heven?

¹¹ Taim yumi mekim pasin sori long ol bratasista bilong yumi bihain long wanpela disasta i kamap, ol narapela i save luksave long ol samting yumi mekim bilong helpim ol. Olsem, long 2019, Hariken Dorian i bagarapim wanpela Haus Kingdom long ol ailan Bahamas. Taim ol brata i wokim gen dispela Haus Kingdom, ol i askim wanpela kontrakta em i no wanpela Witnes long hamas em bai sasim ol long mekim sampela wok. Em i tokim ol: “Mi laik givim . . . ol masin, ol wokman bilong mi yet, na ol samting bilong helpim long mekim  dispela wok. . . . Mi laik mekim olsem long helpim oganaisesen bilong yupela. Mi pilim tru gutpela pasin yupela i mekim long ol pren bilong yupela.” Planti manmeri long graun ol i no save long Jehova. Tasol planti bilong ol i save lukim pasin ol Witnes Bilong Jehova i mekim. Em gutpela tru long save olsem taim yumi mekim pasin sori long ol narapela, dispela inap kirapim ol man long kisim save long Man em pasin “marimari i pulap” long em!​—Efe. 2:4.

12. Taim yumi mekim pasin sori long nau, olsem wanem dispela i redim yumi long taim bilong traipela hevi tru? (Revelesen 13:16, 17)

¹² Wai na yumi mas mekim pasin sori long ol narapela long taim bilong traipela hevi tru? Baibel i kamapim klia olsem ol lain em ol i no laik sapotim wok politik, ol bai karim ol hevi—long nau na long taim bilong traipela hevi tru. (Ritim Revelesen 13:16, 17.) Ol bratasista bilong yumi inap nidim helpim bilong yumi long kisim ol samting ol i nidim. Taim King bilong yumi Jisas Krais i kam bilong mekim kot, yumi laik bai em i lukim olsem yumi lain bilong mekim pasin sori na em i ken singautim yumi long “kisim dispela Kingdom.”​—Mat. 25:34-40.

13. Olsem Rom 15:7 i kamapim, hau ol Kristen long taim bilong ol aposel i strongim pasin laikim namel long ol?

¹³ Long taim bilong ol aposel, olgeta man i save olsem ol Kristen tru i save laikim narapela narapela. Tasol yu ting em isi long ol i mekim pasin laikim? Kongrigesen long Rom i gat ol lain bilong narapela narapela bekgraun long en. I gat ol Juda em ol i lain pinis long bihainim Lo Bilong Moses taim ol i liklik pikinini na ol man bilong arapela lain em bekgraun bilong ol i narapela olgeta. Ating sampela Kristen i stap olsem ol sleiv na ol narapela ol i friman—sampela narapela ol i bosman bilong ol sleiv. Olsem wanem ol dispela Kristen inap strongim pasin laikim namel long ol maski sindaun bilong ol i no wankain? Aposel Pol i kirapim ol long “welkamim ol arapela brata.” (Ritim Rom 15:7.) Tok bilong em i makim wanem samting? Dispela tok “welkamim” i makim olsem yu mekim gutpela pasin long wanpela, olsem singautim em i kam long haus bilong yu o bung wantaim ol pren bilong yu. Olsem, Pol i tokim Filemon long hau em i ken welkamim Onesimus em sleiv husat i bin ranawe olsem: “Yu mas kisim em.” (Fm. 17) Na Prisila na Akwila i “kisim” Apolos na welkamim em, em man husat i no gat bikpela save long lotu Kristen olsem tupela. (Apo. 18:26) Ol dispela Kristen i no larim ol samting long sindaun bilong ol i brukim lain namel long ol, nogat, ol i welkamim narapela narapela.

14. Anna na man bilong em i mekim wanem bilong soim pasin laikim?

¹⁴ Yumi tu i ken mekim pasin laikim long ol bratasista bilong yumi long rot bilong kamap pren bilong ol na spendim taim wantaim ol. Taim yumi mekim olsem, ol tu bai mekim pasin laikim long yumi. (2 Kor. 6:11-13) Skelim stori bilong Anna na man bilong em. Bihain tasol long ol i muv i go long Wes Afrika long mekim nupela misineri asainmen bilong ol, COVID-19 pendemik i kamap. Ol i nupela long dispela hap, olsem na ol i no gat rot long bung wantaim kongrigesen. Olsem wanem dispela tupela marit inap soim pasin laikim long ol narapela? Ol i yusim vidio konferens long stori wantaim ol bratasista long dispela hap na ol i tokim ol olsem ol i laik tru long save gut moa long ol. Ol famili i pilim tru pasin laikim bilong dispela tupela marit, olsem na ol i save ringim tupela na salim ol teks mesis long ol. Wai na dispela tupela marit i painim rot bilong save gut moa long ol bratasista? Anna i tok: “Pasin laikim em ol bratasista i mekim long mi na famili bilong mi long ol gutpela taim na taim nogut i pas strong tru long bel na tingting bilong mi na dispela i kirapim mi long mekim pasin laikim long ol narapela.”

15. Yu kisim wanem skul long stori bilong Vanessa long pasin bilong laikim olgeta bratasista bilong yumi? (Lukim tu piksa.)

¹⁵ Planti bilong yumi i stap long ol kongrigesen i gat ol bratasista bilong narapela narapela bekgraun  na pasin bilong ol i no wankain. Yumi ken strongim pasin bilong yumi long laikim ol taim yumi tingim ol gutpela pasin bilong ol. Wanpela sista long Nu Silan nem bilong em Vanessa, em i save pilim hatwok long poroman gut wantaim sampela long kongrigesen bilong em. Tasol bihain em i tingting olsem i no gutpela long abrusim ol lain em pasin bilong ol i save sikirapim bel bilong em, olsem na em i lusim sampela haptaim moa long stap wantaim ol. Dispela i helpim em long lukim ol pasin bilong ol em Jehova i laikim. Em i tok: “Kirap long taim man bilong mi i kamap wasman sekit, mipela i save wok wantaim planti bratasista em ol i gat narapela narapela pasin, na mi pilim isi moa long wok gut wantaim ol. Nau mi laikim olgeta kain bratasista. I klia tru olsem Jehova tu i laikim olgeta kain bratasista bikos em i bringim yumi ol manmeri bilong kain kain bekgraun i kam lotuim em.” Taim yumi lain long holim wankain tingting olsem Jehova i gat long ol, yumi soim klia olsem yumi laikim ol.​—2 Kor. 8:24.

16. Wai na em i bikpela samting long yumi mas laikim ol bratasista bilong yumi long taim bilong traipela hevi tru? (Lukim tu piksa.)

¹⁶ Em i bikpela samting long yumi mas laikim ol bratasista bilong yumi long taim bilong traipela hevi tru. Taim traipela hevi tru i kirap, Jehova bai lukautim yumi long wanem rot? Tingim ol tok Jehova i bin mekim long lain bilong em taim ol birua i kam pait long Babilon bilong bipo, em i tok: “Ol manmeri bilong mi, go insait long ol rum bilong yupela i stap insait tru, na pasim ol dua bilong yupela. Haitim yupela yet inap sotpela taim tasol inap long belhat bilong God i pinis.” (Ais. 26:20) Ating yumi tu bai bihainim ol dispela tok taim traipela hevi tru i kamap. “Ol rum . . . i stap insait tru” inap makim ol kongrigesen bilong yumi. Long taim bilong traipela hevi tru, Jehova i tok promis olsem em bai lukautim yumi taim yumi wok yet long stap wanbel wantaim ol bratasista bilong yumi. Olsem na long nau yumi mas wok strong long tingim tru ol bratasista bilong yumi na laikim tru ol. Dispela inap lukautim laip bilong yumi!

17. Sapos yumi redi long nau yet, yumi inap mekim wanem long taim bilong traipela hevi tru?

¹⁷ “Bikpela de bilong Jehova” bai wanpela taim nogut tru bilong olgeta man. (Sef. 1:14, 15) Ol lain bilong Jehova tu bai bungim ol bikpela hevi. Tasol sapos yumi redi long nau yet, dispela bai helpim yumi long stap isi na helpim ol narapela. Yumi bai sanap strong na karim hevi i painim yumi, maski em wanem kain hevi. Taim ol wanbilip bilong yumi i karim hevi, yumi bai givim bes bilong yumi long helpim ol long rot bilong mekim pasin sori long ol na givim ol samting ol i nidim. Na yumi bai pas gut tru wantaim ol bratasista bilong yumi, em ol manmeri yumi lain pinis long laikim ol. Na long nupela taim, Jehova bai givim gutpela pe long yumi em laip oltaim, long dispela taim yumi no inap tingim moa ol disasta na ol pen na hevi.​—Ais. 65:17.