1-2. Long wanem rot wanpela Kristen i olsem wanpela longpela bilding i gat planti storis long en? (1 Korin 15:58)

 LONG 1978, ol i wokim wanpela longpela bilding tru i gat 60 storis long en long biktaun Tokyo long Japan. Ol man i lukim dispela bilding i tingting olsem, hau na dispela bilding i ken sanap strong bikos planti taim graun guria i save kamap long dispela taun. Wanem samting i mekim bilding i sanap strong? Ol ensinia i disainim dispela bilding long sanap strong, tasol long wankain taim, ol i disainim long wei we em i ken seksek i go i kam long taim bilong graun guria. Ol Kristen i olsem dispela bilding i gat planti storis long en. Long wanem rot ol i olsem dispela bilding?

² Wanpela Kristen i mas holim stretpela tingting long pasin bilong sanap strong o strong long bihainim pasin i stret, na long wankain taim, redi long mekim ol senis. Em i mas i gat strongpela bel na em i no ken surik long pasin bilong bihainim ol lo bilong Jehova. (Ritim 1 Korin 15:58.) Em i “redi long bihainim tok” na em i no save kalapim ol lo bilong God. Tasol sampela taim, em i mas “redi long bihainim tingting bilong narapela” o redi long mekim ol senis taim i gat wok long mekim olsem. (Jems 3:17) Wanpela Kristen husat i lain long holim stretpela tingting bai sakim pasin bilong strong strong tumas long bihainim wanpela lo o orait tasol long mekim olgeta kain samting. Long dispela atikol, yumi bai stori long olsem wanem yumi ken sanap strong na i no surik liklik. Na tu, yumi bai stori long 5-pela rot em Satan i yusim bilong traim long daunim laik bilong yumi long bihainim pasin i stret na hau yumi ken sakim ol traim bilong em.

3. Nambawan Man Bilong Givim Lo i givim wanem ol lo i stap long Aposel 15:28, 29?

³ Jehova em i Nambawan Man Bilong Givim Lo, olsem na oltaim em i save givim ol lo i klia tru long ol manmeri bilong em. (Ais. 33:22) Olsem, gavening bodi long taim bilong ol aposel i tok long 3-pela rot em ol Kristen i mas sanap strong: (1) sakim pasin bilong lotuim ol imis, lotuim Jehova wanpela tasol, (2) rispektim blut olsem samting i holi, na (3) bihainim ol stretpela lo bilong Baibel long sakim pasin pamuk. (Ritim Aposel 15:28, 29.) Olsem wanem ol Kristen long nau i ken strong yet long bihainim dispela 3-pela rot?

4. Yumi mekim wanem bilong lotuim Jehova wanpela tasol? (Revelesen 4:11)

⁴ Yumi sakim pasin bilong lotuim ol imis, yumi lotuim Jehova wanpela tasol. Em i tokim lain Israel long ol i mas lotuim em wanpela tasol. (Lo 5:6-10) Na taim Satan i traim Jisas, em i tokaut klia olsem yumi mas lotuim Jehova wanpela tasol. (Mat. 4:8-10) Olsem na yumi no save lotuim ol imis em ol lotu giaman i save lotuim. Na tu, yumi no save litimapim ol manmeri olsem ol i god bilong yumi, maski ol i hetman bilong lotu, ol bikman bilong wok politik, ol spots man na meri, o ol muvi ekta. Yumi stap long sait bilong Jehova na yumi lotuim em wanpela tasol, em Man i “wokim olgeta samting.”​—Ritim Revelesen 4:11.

5. Wai na yumi strong long bihainim lo bilong Jehova olsem laip na blut em samting holi?

⁵ Yumi strong long bihainim lo bilong Jehova olsem laip na blut em samting i holi. Wai na yumi mekim olsem? Bikos Jehova i tok olsem blut em i as bilong laip, em wanpela gutpela presen tru i kam long em. (Wkp. 17:14) Long fes taim Jehova i bin tokim ol manmeri long kaikai mit bilong animal, em i tokim ol long ol i no ken kaikai blut. (Stt. 9:4) Em i kolim gen dispela lo taim em i givim Lo Bilong Moses long lain Israel. (Wkp. 17:10) Na em i stiaim gavening bodi long taim bilong ol aposel long tokim olgeta Kristen long ol i mas wok yet long “sakim blut.” (Apo. 15:28, 29) Yumi strong long bihainim dispela lo taim yumi mekim ol disisen long sait bilong medikal tritmen. b

6. Yumi mas mekim wanem bilong bihainim ol stretpela lo bilong Jehova long sakim pasin pamuk?

⁶ Yumi strong long bihainim ol stretpela lo bilong Jehova long sakim pasin pamuk. (Hib. 13:4) Long rot bilong wanpela tok piksa, aposel Pol i tokim yumi long “kilim i dai” ol laik i stap long ol hap bilong bodi bilong yumi, dispela i makim olsem yumi mas strong tru long rausim ol laik nogut i stap long bel bilong yumi. Yumi sakim pasin bilong lukim o mekim ol samting we inap pulim yumi long mekim pasin pamuk. (Kol. 3:5; Jop 31:1) Taim traim i painim yumi, wantu tasol yumi sakim ol tingting o ol pasin we inap bagarapim pasin pren bilong yumi wantaim God.

7. Yumi mas tingting strong long mekim wanem, na bilong wanem?

⁷ Jehova i laik olsem ‘long bel bilong yumi, yumi bihainim tok’ bilong em. (Rom 6:17) Oltaim ol stiatok bilong em i bilong helpim yumi, na yumi no inap senisim ol lo bilong em. (Ais. 48:17, 18; 1 Kor. 6:9, 10) Yumi wok strong long amamasim Jehova, na yumi holim wankain tingting olsem man bilong raitim song, em i tok: “Mi pasim tok long bihainim ol lo bilong yu long olgeta taim i go inap long mi dai.” (Sng. 119:112) Tasol Satan i traim long daunim pasin bilong yumi long sanap strong. Em i mekim olsem long wanem ol rot?

8. Olsem wanem Satan i yusim pasin birua long daunim pasin bilong yumi long sanap strong?

⁸ Pasin birua. Satan i kirapim ol man long paitim yumi na mekim ol tok bilong bagarapim bel  bilong yumi bambai em i ken daunim pasin bilong yumi long sanap strong. Em i laik “kaikai” yumi, olsem bagarapim pasin pren bilong yumi wantaim Jehova. (1 Pita 5:8) Ol man i bin pretim ol Kristen long taim bilong ol aposel, paitim ol, na kilim ol i dai bikos ol i gat pasin bilong sanap strong. (Apo. 5:27, 28, 40; 7:54-60) Satan i wok yet long yusim pasin birua long mekim nogut long ol wokman bilong God long nau. Dispela samting i stap ples klia long pasin birua em ol man i mekim long ol bratasista bilong yumi long Rasia na ol narapela kantri.

9. Wai na yumi mas was gut long ol pasin trik bilong Satan i stap hait? Stori long wanpela eksampel.

⁹ Ol pasin trik i stap hait. Satan i save kirapim ol man long birua long yumi, na tu, em i save yusim “ol pasin trik” bilong em. (Efe. 6:11) Tingim stori bilong wanpela brata nem bilong em Bob, em i slip long haus sik bilong kisim wanpela bikpela operesen. Em i tokim ol dokta olsem em bai i no inap tru long kisim blut. Dokta bilong katim em i rispektim dispela disisen bilong em. Tasol long nait paslain long operesen, dokta bilong kilim i dai tingting i kam lukim Bob bihain long famili bilong Bob i go pinis long haus. Em i tokim Bob olsem ol i no inap givim blut long em long taim bilong operesen, tasol ol bai holim sampela blut i stap nogut em i nidim. Ating dokta i ting olsem Bob bai senisim tingting bilong em taim famili i no stap wantaim em. Tasol Bob i sanap strong tru na em i tokaut klia olsem em i no inap kisim blut, maski wanem samting i kamap.

10. Wai na tingting bilong ol man i olsem wanpela trap? (1 Korin 3:19, 20)

¹⁰ Tingting bilong ol man. Sapos yumi holim wankain tingting olsem bilong ol man i save sakim ol lo bilong Jehova, yumi inap kirap long sakim ol lo bilong Jehova. (Ritim 1 Korin 3:19, 20.) “Savetingting bilong dispela graun” i save kirapim ol man long inapim ol laik bilong ol yet tasol. Sampela Kristen long Pergamum na Taiataira i bihainim pasin bilong ol man long ol dispela taun long lotuim ol imis na mekim ol pasin pamuk. Jisas i givim strongpela tok kaunsel long dispela tupela kongrigesen long ol i larim tasol ol manmeri i mekim ol pasin pamuk. (Rev. 2:14, 20) Long nau, yumi bungim wankain presa bilong bihainim ol tingting kranki bilong ol man bilong dispela graun. Ol narapela insait long famili na ol pren inap tokim yumi olsem yumi strong tumas long bihainim ol lo bilong God na ol inap kirapim yumi long brukim sampela lo bilong God. Olsem, ol inap tok i no gat rong long yumi bihainim sampela laik bilong yumi yet, na ol inap tok tu olsem ol lo bilong Baibel long stretpela pasin em ol lo bilong bipo.

11. Yumi mas sanap strong na sakim wanem samting?

¹¹ Sampela taim yumi inap kisim tingting olsem ol daireksen i kam long Jehova ol i no klia tumas. Ating yumi inap tingting long “kalapim ol tok i stap long Rait Holi.” (1 Kor. 4:6) Ol hetman bilong lotu long taim bilong Jisas i bin mekim dispela sin na ol i gat asua long en. Ol i kamapim ol lo bilong ol yet na surikim i go antap long Lo Bilong Moses, na long dispela rot ol i putim planti hevi long ol man nating. (Mat. 23:4) Jehova i givim yumi ol klia daireksen long rot bilong Baibel na long rot bilong oganaisesen bilong em. I no gat as long surikim sampela tok moa i go antap long ol instraksen em i givim pinis. (Prov. 3:5-7) Long dispela as, yumi no save kalapim ol tok i stap long Baibel o kamapim ol lo bilong yumi yet na tok long ol wanbilip i mas bihainim.

12. Long wanem rot Satan i yusim ol “tok giaman”?

¹² Ol tok giaman. Satan i yusim ol “tok giaman” na “ol bikpela tingting bilong graun” long giamanim ol manmeri na brukim lain. (Kol. 2:8) Long taim bilong ol aposel, ol dispela tok giaman i makim savetingting em tingting bilong ol man i as bilong en, ol bilip giaman bilong lotu Juda, na tok em ol i skulim ol man long en olsem ol Kristen i mas bihainim Lo Bilong Moses. Em ol tok giaman, long wanem, ol i pulim tingting bilong ol man i go longwe long Man em i As tru  bilong savetingting, em Jehova. Long nau, Satan i yusim nius na sosel midia long spredim ol nius giaman na ol nius i no tru em ol bikman bilong politik i as bilong en. Yumi lukim planti kain stori giaman olsem i raun long taim bilong COVID-19 pendemik. c Ol man i harim ol dispela stori giaman, ol i wari long kain kain samting, tasol ol Witnes Bilong Jehova i putim yau long stiatok i kam long oganaisesen, na long dispela rot, ol i abrusim ol kain wari olsem.​—Mat. 24:45.

13. Wai na yumi mas sakim ol samting i save pulim nabaut tingting?

¹³ Ol samting i save pulim nabaut tingting. Yumi mas putim tingting long “ol samting i bikpela samting moa.” (Fili. 1:9, 10) Taim ol samting i pulim nabaut tingting bilong yumi, dispela inap kisim bikpela taim na strong bilong yumi na yumi no tingim ol bikpela samting. Ol nomol samting yumi save mekim long laip olsem kaikai, dring, amamas, na wok mani, inap kamap olsem ol samting bilong pulim nabaut tingting sapos yumi putim ol i stap olsem nambawan samting long laip bilong yumi. (Luk 21:34, 35) Na tu, long olgeta de yumi save harim ripot i stori long ol protes na ol tok pait bilong politik. Yumi no ken larim ol kain tok pait i pulim nabaut tingting bilong yumi. Sapos yumi no was gut, long bel na tingting yumi inap sapotim wanpela sait o narapela sait long ol dispela tok pait. Satan i yusim olgeta dispela rot yumi stori long en long daunim pasin bilong yumi long tingting strong long mekim pasin i stret. Nau yumi ken stori long hau yumi ken sakim ol samting Satan i mekim na sanap strong yet.

14. Wanem samting i ken helpim yumi long sanap strong yet long sait bilong Jehova?

¹⁴ Tingim dediket na baptais bilong yu. Yu mekim dispela tupela samting bikos yu laik stap long sait bilong Jehova. Tingim bek samting i bin helpim yu long bilip tru olsem yu painim pinis tok i tru. Yu kisim stretpela save long Jehova, na yu kisim pasin bilong laikim tru na rispektim em olsem Papa bilong yu long heven. Yu kisim pasin bilong bilip na dispela i kirapim yu long tanim bel. Bel bilong yu i kirapim yu long lusim ol pasin nogut na yu kirap long mekim ol  samting i stret wantaim laik bilong God. Yu stap bel isi tru taim yu save olsem God i fogivim yu. (Sng. 32:1, 2) Yu go long ol miting Kristen na yu kirap long tokim ol narapela long ol gutpela samting yu lainim. Nau yu stap olsem wanpela Kristen i dediket na baptais pinis na yu wok long wokabaut long rot i go long laip, na yu tingting strong olsem yu no inap tru long lusim dispela rot.​—Mat. 7:13, 14.

15. Wai na em i bikpela samting long stadi na tingim tingim long bel ol tok yu stadi long en?

¹⁵ Stadi long Baibel na tingim tingim long bel ol tok bilong en. Wankain olsem wanpela diwai i ken sanap strong taim ol ruts bilong en i go daun tru insait long graun, yumi tu i ken sanap strong sapos bilip bilong yumi i go daun tru insait long Tok Bilong God. Taim wanpela diwai i gro i go bikpela, ol ruts bilong en i save go daun tru na spred i go bikpela. Taim yumi stadi na tingim tingim long bel ol tok bilong Baibel, yumi strongim bilip bilong yumi na yumi strongim tingting bilong yumi olsem ol pasin bilong God ol i nambawan tru. (Kol. 2:6, 7) Tingim hau Jehova i bin givim ol instraksen, ol stiatok, na lukautim ol wokman bilong em long bipo. Olsem, Esekiel i lukluk gut i stap taim ensel i mesarim tempel long visen em i lukim. Dispela visen i strongim Esekiel na ol tok bilong em i skulim yumi long hau yumi ken holimpas ol stretpela lo bilong Jehova bilong mekim lotu i tru. d (Ese. 40:1-4; 43:10-12) Yumi tu i kisim gutpela helpim taim yumi lusim haptaim long stadi na tingim tingim long bel ol strongpela tok i tru i stap long Tok Bilong God.

16. Olsem wanem pasin bilong strong long bihainim pasin i stret i lukautim Bob? (Buk Song 112:7)

¹⁶ Kisim pasin bilong strong long bihainim pasin i stret. King Devit i tok em i no inap tru long lusim pasin bilong em long laikim Jehova, olsem: “O God, long bel bilong mi, mi bilip strong long yu.” (Sng. 57:7) Yumi tu i ken strong long bihainim pasin i stret na trastim tru Jehova. (Ritim Buk Song 112:7.) Skelim hau dispela pasin i bin helpim Bob em yumi stori pinis long em. Taim ol i tokim em olsem ol bai holim sampela blut i stap nogut em i nidim, kwiktaim em i bekim tok long ol olsem sapos ol i laik givim blut long em, wantu tasol em bai lusim haus sik. Bihain Bob i tok: “Mi no surik liklik na mi no wari long wanpela samting.”

17. Yumi inap kisim wanem skul long stori bilong Bob? (Lukim tu piksa.)

 ¹⁷ Bob i tingting strong long bihainim pasin i stret, long wanem, em i mekim disisen pinis long sanap strong paslain long em i go long haus sik. Namba 1, em i tingting strong long amamasim Jehova. Namba 2, em i stadi gut long ol tok em Baibel na ol pablikesen bilong Baibel i mekim long laip na blut em samting i holi. Namba 3, em i bilip tru olsem taim em i bihainim ol daireksen bilong Jehova, em bai kisim ol blesing inap oltaim oltaim. Yumi tu i ken tingting strong long bihainim pasin i stret, maski yumi karim wanem hevi.

18. Olsem wanem stori bilong Barak i skulim yumi long trastim Jehova? (Lukim fran pes piksa.)

¹⁸ Trastim Jehova. Skelim hau Barak i winim pait bikos em i trastim daireksen em Jehova i givim. Lain Israel i no gat wanpela spia o hap plang bilong pait, tasol Jehova i tokim em long go pait long Sisera em komanda bilong lain ami bilong Kenan na lain ami bilong em husat i gat planti samting bilong pait. (Het. 5:8) Profet meri Debora i tokim Barak long go daun long veli bilong bungim Sisera na 900 karis bilong em bilong pait. Maski ol karis inap ron gut long veli na pait strong na winim pait long lain Israel, Barak i bihainim tok tasol na i go daun. Taim ol soldia i lusim Maunten Tabor na go daun, Jehova i mekim bikpela ren tru i kam pundaun. Ol karis bilong Sisera i pas insait long graun malumalum na Jehova i helpim Barak long winim pait. (Het. 4:1-7, 10, 13-16) Olsem tasol, Jehova bai helpim yumi long winim pait sapos yumi trastim em na trastim daireksen em i givim long yumi long rot bilong ol man em i makim.​—Lo 31:6.

19. Wai na yu tingting strong long bihainim yet pasin i stret?

¹⁹ Yumi mas wok yet long mekim dispela pait bilong strong long bihainim pasin i stret taim yumi stap yet long dispela haptaim bilong nau. (1 Tim. 6:11, 12; 2 Pita 3:17) Yumi mas tingting strong long no ken larim pasin birua, ol pasin trik bilong Satan i stap hait, tingting bilong ol man, ol tok giaman, na ol samting bilong pulim nabaut tingting i seksekim yumi nabaut. (Efe. 4:14) Yumi mas sanap strong na givim bel yet long lotuim Jehova na no ken surik long pasin bilong yumi long bihainim ol tok bilong em. Long wankain taim, yumi mas redi long mekim ol senis. Long neks atikol, yumi bai stori long hau Jehova na Jisas i stap gutpela piksa tru long pasin bilong redi long mekim ol senis.