1. Bilong wanem Jehova i winim tru olgeta man long sait bilong wokim sospen graun?

LONG Novemba 2010, ol i salim wanpela olpela sospen graun em ol Saina i wokim inap 300 yia i go pinis. Ol i salim dispela sospen graun long London, Inglan, na wanpela man i baim long bikpela mani tru, winim 2 handret milion kina. Dispela i soim olsem man inap yusim graun nating long wokim wanpela naispela samting i gat bikpela pe long en. Jehova i winim tru olgeta man long sait bilong wokim sospen graun. Long namba 6 de, God i “kisim graun” na wokim wanpela man i gutpela olgeta na em inap bihainim ol pasin bilong Man i bin wokim em. (Stt. 2:7) Olsem na i stret long Baibel i kolim Adam olsem “pikinini bilong God.”—Luk 3:38.

2, 3. Olsem wanem yumi inap bihainim pasin bilong ol Israel husat i tanim bel?

² Adam i bikhet long God, olsem na em i no stap moa olsem pikinini bilong God. Maski i olsem, “bikpela lain manmeri” long lain tumbuna pikinini bilong Adam i stap daun long wok bos bilong God. (Hib. 12:1) Ol i laik bai God i stap olsem Papa na Krieta bilong ol. (Jon 8:44) Dispela i kirapim yumi long tingim tok bilong Aisaia long ol Israel husat i tainim bel, em i tok: “Bikpela, yu papa bilong mipela. Yu olsem man bilong wokim sospen graun, na mipela i olsem graun yu bin kisim na  wokim sospen long en. Long han bilong yu yet yu bin wokim mipela olgeta.”—Ais. 64:8.

³ Long nau, olgeta manmeri husat i lotuim Jehova long strong bilong holi spirit na long pasin i tru, ol i wok strong long stap daun long wok bos bilong God. Ol i amamas tru long kolim Jehova olsem Papa na stap daun long em olsem Krieta bilong ol. Olsem wanem? Yu tingim yu yet olsem graun malumalum i stap long han bilong God, na yu amamas long larim em i stretim stretim yu bambai yu inap kamap olsem sospen graun i dia tumas long ai bilong em? Yu tingim olgeta wan wan bratasista olsem sospen graun em God i wok yet long stretim stretim? Orait, yumi ken skelim 3-pela askim: Olsem wanem Jehova i save makim ol manmeri em i laik stretim stretim? Wai na em i save stretim stretim ol? Em i save stretim stretim ol long wanem rot?

4. (a) Jehova i skelim wanem samting taim em i laik kirapim ol man long i go long em? (b) Husat em sampela bilong ol lain em i bin kirapim ol long i go long em?

⁴ Jehova i no save skelim ol manmeri long lukluk bilong ol, nogat. Em i save skelim tingting tru i stap insait long bel bilong man. (Ritim 1 Samuel 16:7b.) Dispela samting i kamap klia tru taim God i kamapim kongrigesen Kristen. Em i kirapim planti manmeri long i kam long em na Pikinini bilong em—long ai bilong ol manmeri bilong graun, ol dispela manmeri i luk olsem ol i no gutpela. (Jon 6:44) Wanpela bilong ol em wanpela Farisi, nem bilong em Sol—pastaim em i “bin tok nogut long God na mekim nogut long ol lain bilong [God] na [em] man bilong mekim pasin bikhet.” (1 Tim. 1:13) God i save “traim bel” bilong man long “painimaut” tingting tru bilong man, olsem na em i no givim baksait long Sol. (Snd. 17:3) God i luksave olsem em inap stretim stretim pasin bilong Sol na mekim em i kamap olsem gutpela sospen graun—“wanpela sospen” God yet i makim bilong autim tok “long ol lain manmeri, na long ol king na long ol manmeri bilong Israel.” (Apo. 9:15) Ol narapela manmeri em God i pilim olsem ol inap kamap olsem ol “sospen bilong mekim gutpela wok,” em ol spakman, ol man i mekim pasin pamuk, na ol stilman. (Rom 9:21; 1 Kor. 6:9-11) Taim ol i kisim stretpela save long Tok Bilong God na ol i bilip long en, ol i larim Jehova long stretim stretim pasin bilong ol.

5, 6. Taim yumi trastim Jehova olsem Krieta bilong yumi, dispela i mas kirapim yumi long holim wanem tingting long (a) ol manmeri long teritori? (b) ol bratasista bilong yumi?

⁵ Olsem wanem stori bilong Pol na ol bilipman bilong pastaim inap helpim yumi? Yumi luksave olsem Jehova inap save long tingting tru i stap long bel bilong man, na tu, em yet i save makim ol man na kirapim ol long i kam long em, olsem na yumi no ken skelim ol narapela long teritori na long kongrigesen. Tingim ekspiriens bilong Michael. Em i tok: “Taim ol Witnes Bilong Jehova i kam long mi, mi save mekim olsem mi no lukim ol, olsem na mi save lusim ol na wokabaut i go. Mi mekim pasin nogut tru! Bihain, mi bungim wanpela famili na mi laikim tru gutpela pasin bilong ol. Tasol mi kirap nogut tru taim mi kisim save olsem ol i Witnes Bilong Jehova! Gutpela pasin bilong ol i kirapim mi long skelim gen risen bilong mi long luk daun long ol. Mi luksave olsem mi harim tok giaman bilong ol narapela lain na dispela i kirapim mi long heitim ol Witnes.” Michael i laik kisim stretpela save long ol Witnes, olsem na em i tok orait long ol i ken mekim Baibel stadi wantaim em. Em i kisim baptais na kamap wanpela Witnes na em i insait long fultaim sevis.

⁶ Taim yumi tingim Jehova olsem Man bilong stretim stretim yumi, dispela bai stiaim yumi long holim stretpela tingting long ol wanbilip bilong yumi. God i no pinisim yet wok bilong stretim stretim ol bratasista, nogat, em i wok yet long stretim ol. Olsem wanem? Yu tingim ol bratasista long wankain pasin olsem Jehova i tingim ol? God inap lukim tingting tru i stap long bel bilong man, na em inap save long man bai kamap wanem kain taim em i stretim stretim dispela man. Jehova i save  holim stretpela tingting long ol manmeri na em i no save tingim ol popaia bilong ol. (Sng. 130:3) Yumi ken bihainim pasin bilong em na holim stretpela tingting long ol wokman bilong em. Yumi ken sapotim wok bilong Krieta bilong yumi na sambai long ol bratasista taim ol i mekim ol samting bilong kamap strong long bilip. (1 Tes. 5:14, 15) Ol elda i stap “olsem ol presen,” olsem na ol i mas bihainim dispela pasin bambai yumi inap lukim na bihainim pasin bilong ol.—Efe. 4:8, 11-13.

7. Bilong wanem yu amamas long pasin bilong Jehova long stretim stretim yu?

⁷ Ating yu bin harim ol narapela i mekim kain tok olsem: ‘Bipo, mi no save amamas taim papamama i stretim pasin bilong mi. Tasol nau mi gat ol pikinini bilong mi yet na mi pilim tru pasin bilong papamama.’ Taim hevi i kamap long laip bilong yumi, yumi bai kisim tingting bilong Jehova—papamama i bin stretim stretim yumi bikos ol i laikim tru yumi. (Ritim Hibru 12:5, 6, 11.) Jehova i laikim tru yumi ol pikinini bilong em, olsem na em i save stretim stretim yumi na em i no les kwik long mekim olsem. Em i laik bai yumi mas bihainim savetingting na stap amamas na laikim em. (Snd. 23:15) Em i no laik bai yumi karim hevi. Em tru olsem yumi kisim sin long Adam, tasol God i no laik bai yumi kamap “olsem ol pikinini bilong kisim belhat bilong God” na yumi dai.—Efe. 2:2, 3.

8, 9. (a) Olsem wanem Jehova i wok long skulim yumi long nau? (b) Skul bilong God bai helpim yumi olsem wanem long bihain?

⁸ Bipo yumi stap “olsem ol pikinini bilong kisim belhat bilong God,” olsem na yumi bin mekim planti pasin em God i no amamas long en, na ating yumi bin mekim ol pasin nogut olsem bilong ol animal! Tasol Jehova i stretim pasin bilong yumi na yumi kisim pasin isi olsem ol pikinini sipsip. (Ais. 11:6-8; Kol. 3:9, 10) Olsem na yumi inap tok olsem yumi stap long paradais bilong bilip. Yumi pilim olsem yumi stap gut, maski yumi stap namel long ol manmeri i mekim pasin nogut. Sampela bilong yumi i bin kamap bikpela insait long famili we i no gat pasin laikim long en na planti hevi i pulap. (Jon 13:35) Yumi kisim save olsem yumi mas soim pasin laikim long ol narapela. Bikpela samting moa em olsem, yumi bin kisim save long Jehova na nau yumi pilim pasin laikim bilong em olsem wanpela papa.—Jems 4:8.

⁹ Long nupela taim, yumi bai kisim planti blesing tru long paradais bilong bilip. Yumi bai amamas moa yet long lukim narapela paradais—graun bai kamap ples paradais taim Kingdom Bilong God i bosim graun. Jehova bai wok yet long skulim na stretim stretim pasin bilong ol manmeri, na pasin bilong ol bai kamap gutpela moa na winim tru ol gutpela pasin yumi lukim long nau. (Ais. 11:9) Na tu, God bai mekim tingting na bodi bilong yumi i kamap gutpela olgeta, na yumi bai pilim tru ol samting em i skulim yumi long en na yumi bai mekim gut olgeta samting em i laik yumi mas mekim. Olsem na yumi mas tingting strong long stap daun yet long Jehova, na taim em i stretim yumi, yumi mas tingim dispela olsem rot bilong em long soim pasin laikim long yumi.—Snd. 3:11, 12.

10. Olsem wanem Jisas i kamapim klia save bilong God na pasin bilong em long i no les kwik?

¹⁰ Wankain olsem saveman bilong wokim sospen graun, Jehova i save gut long olgeta kain graun na em i save gut long wok em bai mekim long ol dispela hap “graun.” (Ritim Song 103:10-14.) Taim God i laik stretim yumi, em i save tingim skel bilong yumi olgeta wan wan—em i save tingim ol gutpela pasin we yumi no kirap yet long bihainim, ol samting yumi hatwok long mekim, na yumi stap olsem wanem long sait bilong bilip. Jisas i bin kamapim klia tingting em God i holim long ol wokman bilong em long graun. Tingim pasin em Jisas i mekim long ol aposel taim ol i tok pait long husat bilong ol i gat bikpela namba moa winim ol arapela aposel. Sapos yu bin lukim ol aposel i kros i go i kam, yu ting yu bai tingim ol olsem ol man i gat pasin daun na ol inap larim ol narapela i stretim ol? Jisas i no holim tingting kranki long ol. Em  i save olsem ol aposel inap stretim pasin bilong ol sapos em i soim gutpela pasin long ol, na i no les kwik long givim tok kaunsel long ol, na em yet i soim gutpela eksampel long mekim pasin daun. (Mak 9:33-37; 10:37, 41-45; Luk 22:24-27) Bihain long Jisas i kirap bek na ol disaipel i kisim holi spirit, ol i no tingting moa long kisim biknem o namba, nogat. Ol i putim tingting i go long wok Jisas i bin tokim ol long mekim.—Apo. 5:42.

11. (a) Olsem wanem Devit i stap olsem graun malumalum? (b) Olsem wanem yumi inap bihainim pasin bilong Devit?

¹¹ Long nau, Jehova i yusim ol tok bilong em long Baibel, holi spirit, na kongrigesen Kristen long stretim stretim ol wokman bilong em. Tok bilong Baibel bai stretim yumi sapos yumi tingting long kisim helpim na yumi ritim, yumi tingim tingim ol tok yumi ritim, na askim Jehova long helpim yumi long bihainim ol dispela tok. Devit i tok: “Taim mi slip long bet mi save tingting long yu. Long nait mi save tingting long yu tasol.” (Sng. 63:6) Devit i tok tu olsem: “Mi litimapim nem bilong Bikpela, long wanem, em i save stiaim mi. Na long nait bel bilong mi i save skulim mi.” (Sng. 16:7) Devit i larim tok kaunsel bilong God i go daun tru long bel bilong em na stretim ol tingting na ol laik bilong em, maski em i kisim ol strongpela tok kaunsel. (2 Sml. 12:1-13) Devit i soim gutpela pasin daun em yumi inap bihainim! Olsem wanem? Yu save tingim tingim Tok Bilong God na larim dispela tok i go daun tru long bel bilong yu? Yu inap mekim moa yet dispela pasin?—Sng. 1:2, 3.

12, 13. Olsem wanem Jehova i save yusim holi spirit na kongrigesen long stretim yumi?

¹² Holi spirit inap stretim yumi long kain kain rot. Holi spirit inap helpim yumi long bihainim ol pasin bilong Krais, em ol pasin we holi spirit yet i save kamapim. (Gal. 5:22, 23) Wanpela bikpela pasin em holi spirit i save kamapim em pasin laikim. Yumi laikim God na yumi laik bihainim tok bilong em na larim em i stretim stretim yumi, na yumi luksave olsem ol lo bilong em i no inap givim hevi long yumi. Holi spirit inap strongim yumi bambai yumi no ken larim ol pasin nogut na tingting nogut bilong dispela graun i stiaim yumi. (Efe. 2:2) Taim aposel Pol i stap yangpela yet, em i kisim pasin antap olsem ol bikman bilong lotu Juda. Bihain em i tok: “God i givim pawa long mi, na long dispela rot mi gat strong long mekim olgeta samting.” (Fili. 4:13) Olsem na yumi ken  bihainim pasin bilong Pol na wok yet long askim God long givim holi spirit long yumi. Jehova bai putim yau long beten bilong ol man i stap aninit long wok bos bilong em.—Sng. 10:17.

¹³ Jehova i yusim kongrigesen Kristen na ol elda long stretim stretim yumi olgeta wan wan inap long skel bilong yumi. Kain olsem, sapos ol elda i luksave olsem yumi gat hevi long sait bilong bilip, ol i no inap yusim save bilong ol yet long stretim yumi, nogat. (Gal. 6:1) Ol i save beten askim God long stiaim ol long bihainim savetingting taim ol i stretim yumi. Ol elda i save tingim ol samting ol i beten long en na skelim ol tok bilong Baibel na ol pablikesen bilong yumi. Taim ol i mekim olsem, dispela i redim ol long helpim yumi. Sapos ol elda i tingim yu na ol i kam long givim sampela stiatok long yu, kain olsem long sait bilong bilas, bai yu kisim tok kaunsel bilong ol na tingim dispela olsem pasin laikim bilong God? Taim yu kisim helpim, yu stap olsem graun malumalum long han bilong Jehova, na em bai stretim yu na mekim yu i kamap gutpela moa.

14. Jehova i gat rait long bosim yumi, tasol olsem wanem em i soim rispek long yumi na larim yumi yet long mekim disisen?

¹⁴ Taim yumi kliagut long ol rot bilong God long stretim stretim yumi, dispela inap helpim yumi long pas gut wantaim ol wanbilip, na holim stretpela tingting long ol manmeri long teritori na ol Baibel sumatin bilong yumi. Long taim bilong ol man i raitim Baibel, man i save digim hap graun em i laik yusim long wokim sospen graun, tasol em i no save kirap kwik long wok long en, nogat. Pastaim em i save redim dispela hap graun—em i save rausim ol ston na ol narapela pipia i stap insait long en. Olsem tasol, God i save redim tingting na bel bilong man bambai em inap stretim stretim pasin bilong em. God i no save fosim man long mekim ol senis, nogat. Em i save kamapim klia ol stretpela lo bilong em bambai man yet i ken luksave na stretim ol pasin bilong em.

15, 16. Olsem wanem ol Baibel sumatin i soim olsem ol i laik bai Jehova i stretim stretim ol?

¹⁵ Tingim stori bilong Tessie, em wanpela sista long Australia. Sista i stadi wantaim Tessie i tok: “Tessie i lain gut long tok i tru bilong Baibel. Tasol em i no mekim ol senis long laip bilong em, na em i no kam long ol miting Kristen! Mi skelim dispela samting na planti taim mi beten, na bihain mi mekim disisen olsem mi no inap stadi moa wantaim em. Tasol mi kirap nogut long samting i kamap. Mi go long mekim laspela stadi wantaim Tessie, na em i tokim mi long hevi bilong em. Em i tokim mi olsem em i pilim olsem em meri bilong 2-pela maus bikos em i save pilai laki. Tasol em i mekim disisen olsem nau em bai lusim dispela pasin.”

¹⁶ Bihain liklik, Tessie i go long ol miting Kristen na bihainim ol pasin Kristen, maski ol pren bilong em i tok bilas long em. Sista i stadi wantaim Tessie i tok moa olsem: ‘Tessie i kisim baptais, na bihain em i mekim wok painia oltaim, na em i mekim dispela wok maski em i gat 4-pela liklik pikinini.’ Yes, taim ol Baibel sumatin i bihainim laik bilong God na stretim pasin bilong ol, God bai i go klostu long ol na stretim stretim ol i go inap long ol i kamap olsem ol gutpela sospen graun.

17. (a) Wanem samting i mekim na yu amamas olsem Jehova i stap olsem Man bilong stretim stretim yu? (b) Yumi bai kisim bekim bilong wanem ol askim long neks stadi?

¹⁷ Long nau, sampela man i save yusim han bilong ol yet long holim na stretim gut ol sospen graun. Olsem tasol, God i save isi long yumi na yusim ol skultok bilong em long stretim yumi, na em i save skelim pasin bilong yumi long bihainim ol dispela skultok. (Ritim Song 32:8.) Olsem wanem? Yu luksave olsem Jehova i tingim yu? Yu luksave long ol samting em i mekim bilong stretim yu? Sapos yu luksave long ol dispela samting, orait wanem ol pasin bai helpim yu long stap yet olsem graun malumalum na larim Jehova i stretim yu? Yu mas abrusim wanem ol pasin we inap mekim yu i stap olsem graun i strong na i hatwok long God i stretim? Olsem wanem papamama inap wok bung wantaim Jehova na stretim stretim ol pikinini? Yumi bai kisim bekim bilong ol dispela askim long neks stadi.