1, 2. (a) Bilong wanem planti man i save long tok bilong Lo 6:4? (b) Bilong wanem Moses i kolim ol dispela tok?

INAP planti handret yia, ol manmeri bilong lotu Juda i save kolim ol tok bilong Lo 6:4 taim ol i beten—ol i raitim ol dispela tok long tok Hibru. Ol i save beten long olgeta de, long moning na long apinun. Ol i kolim dispela beten olsem Sema—em tok Hibru na em fes wed bilong dispela ves. Taim ol Juda i mekim dispela beten, ol i soim klia olsem ol i givim bel tru long lotuim God.

² Moses i kolim ol dispela tok taim em i mekim laspela tok bilong em long lain Israel, long veli bilong Moap long yia 1473 B.C.E. Ol Israel i redi long brukim wara Jordan na kisim Graun Bilong Promis. (Lo 6:1) Moses i stap lida bilong ol inap 40 yia, na em i laik bai ol manmeri i mas strongim bel na karim ol hevi. Moses i laik bai ol i trastim Jehova na stap gut long Em olsem God bilong ol. Yumi ken ting olsem laspela tok bilong Moses i strongim tru lain Israel. Bihain long Moses i kolim Tenpela Lo na ol narapela lo em Jehova i givim long lain Israel, em i kolim tok i stap long Lo 6:4, 5. (Ritim.)

3. Yumi bai skelim wanem ol askim long dispela stadi?

 ³ Yu ting ol Israel i no save olsem Jehova “em wanpela tasol em i God”? Nogat, ol i save long dispela. Ol i save long wanpela God tasol na ol i lotuim em—em God bilong ol tumbuna bilong ol, Abraham, Aisak, na Jekop. Sapos olsem, orait bilong wanem Moses i tokim ol Israel olsem Jehova “em wanpela tasol em i God”? Yu ting tok bilong em i poroman wantaim ol tok bilong ves 5 olsem ol manmeri i mas laikim God long bel olgeta, tingting olgeta, na strong olgeta bilong ol? Olsem wanem ol tok bilong Lo 6:4, 5 inap helpim yumi long nau?

4, 5. (a) Wanem wanpela mining bilong dispela hap tok, “em wanpela tasol em i God”? (b) Olsem wanem Jehova i narapela kain long ol giaman god bilong ol narapela lain?

⁴ Narapela Kain. Long tok Hibru na ol narapela tokples, dispela tok “wanpela” i makim namba, na em i makim tu ol narapela samting. Em inap makim olsem wanpela samting i narapela kain tru long olgeta narapela samting, na i no gat narapela samting i wankain liklik long en, nogat tru. Long dispela skripsa, Moses i no toktok long bilip bilong god triwan, nogat. Jehova em Man i wokim heven na graun, na em i stap King bilong yunives. Em wanpela tasol i God tru, na i no gat narapela god i wankain olsem em, nogat tru. (2 Sml. 7:22) Olsem na Moses i mekim dispela tok bilong kirapim ol Israel long tingim gen olsem ol i mas lotuim Jehova wanpela tasol. Ol i no ken bihainim pasin bilong ol manmeri bilong ol narapela kantri, em ol i save lotuim kain kain god man na ol god meri. Ol haiden i bilip olsem sampela giaman god bilong ol i mekim wok bos na kontrolim ol samting olsem, win, ren, diwai, na animal. Ol i gat planti kain kain giaman god.

⁵ Ol Isip i save lotuim Ra, em god bilong san, Nut, god meri bilong skai, Geb, god bilong graun, Hapi, god bilong Nail, na planti arapela animal. Long rot bilong Tenpela Bikpela Hevi, Jehova i bagarapim planti bilong ol dispela giaman god. Giaman god bilong ol Kenan em planti man i save long en, em Bal, em god bilong kamapim planti pikinini, na tu, em i stap olsem god bilong skai, ren, na win. Long planti hap, ol man i mekim Bal i stap olsem god bilong lukautim ol. (Nam. 25:3) Ol Israel i mas tingim olsem Jehova wanpela tasol em i God tru, na “em wanpela tasol em i God.”—Lo 4:35, 39.

6, 7. (a) Wanem narapela mining bilong dispela tok “wanpela”? (b) Olsem wanem Jehova em “wanpela” tasol em i Jehova?

⁶ Stap Wankain na Stap Gut Long Narapela. Dispela tok “wanpela” inap makim tu pasin bilong i stap wanbel na holim wanpela tingting tasol long mekim wankain wok. Taim God Jehova i tingting pinis long mekim wanpela samting, em i save holim wanpela tingting tasol, na tu, em i save tokim yumi paslain long em i mekim wanpela samting. Oltaim em i save stap gut long ol narapela, em i save stap wankain, na em i save bihainim pasin i tru. Jehova i tok promis long Abraham olsem lain tumbuna pikinini bilong Abraham bai kisim Graun Bilong Promis, na em i wokim ol bikpela mirakel bilong truim dispela tok promis. Maski 430 yia i lus, Jehova i no senisim tingting bilong em long inapim dispela promis.—Stt. 12:1, 2, 7; Kis. 12:40, 41.

⁷ Planti handret yia bihain, taim Jehova i makim lain Israel long stap olsem ol witnes bilong em, em i tok olsem: “Mi wanpela tasol mi God tru. Bipo i no gat wanpela god i bin kamap na i stap pastaim long mi. Na bihain tu bai i no gat wanpela god i kisim ples bilong mi.” Jehova i tok moa olsem: “Nau na long olgeta taim bai mi stap God tru.” (Ais. 43:10, 13; 44:6; 48:12) Lain Israel, na yumi tu, i kisim gutpela blesing tru—yumi inap stap olsem ol wokman bilong Jehova, em God i  save stap wankain na oltaim em i save stap gut long ol arapela!—Mal. 3:6; Jems 1:17.

8, 9. (a) Jehova i laik bai ol manmeri bilong em i mekim wanem? (b) Olsem wanem Jisas i strongim tok bilong Moses?

⁸ Moses i kirapim ol Israel long tingim gen olsem Jehova i stap wankain na em i no save senisim pasin bilong em long laikim ol na lukautim ol. Olsem na i stret long ol i lotuim em wanpela tasol, na ol i mas laikim em tru long bel olgeta, tingting olgeta, na strong olgeta bilong ol. Ol papamama i mas skulim ol pikinini long olgeta taim, olsem na ol pikinini tu i mas kisim pasin bilong lotuim God.—Lo 6:6-9.

⁹ Jehova i no save senisim tingting long ol samting em i laik mekim na ol samting em i tingting pinis long kamapim. Olsem na ol lain i lotuim em long nau i mas mekim ol wankain samting em lain Israel i mekim long bipo. Sapos yumi laik bai God i amamas long pasin bilong yumi long lotuim em, orait yumi mas lotuim em wanpela tasol na yumi mas laikim em tru long bel olgeta, tingting olgeta, na strong olgeta bilong yumi. Jisas Krais i kolim stret dispela tok taim em i bekim askim bilong wanpela saveman. (Ritim Mak 12:28-31.) Olsem na yumi ken stori long ol pasin yumi ken bihainim bilong soim olsem yumi kliagut olsem Jehova “em wanpela tasol em i God.”

10, 11. (a) Olsem wanem yumi inap soim olsem yumi lotuim Jehova wanpela tasol? (b) Olsem wanem ol yangpela Hibru long Babilon i kamapim klia olsem ol i lotuim Jehova wanpela tasol?

¹⁰ Sapos yumi laik bai Jehova tasol i stap olsem God bilong yumi, orait yumi mas lotuim em wanpela tasol. Yumi no ken larim ol narapela samting tu i stap olsem god bilong yumi, na tu, yumi no ken holim yet sampela tingting o pasin bilong ol narapela lotu. Yumi mas holim stretpela tingting olsem maski i gat planti god i stap, Jehova tasol em i God tru, na em i winim olgeta narapela god, na yumi mas lotuim em wanpela tasol.—Ritim Revelesen 4:11.

¹¹ Buk Daniel i stori long ol yangpela Hibru, em Daniel, Hanania, Misael, na Asaria. Ol i sakim ol kaikai i no klin long ai bilong God, na tu, ol i no brukim skru long gol imis em Nebukatnesar i bin wokim, na long dispela rot ol i kamapim klia olsem ol i lotuim Jehova wanpela tasol. Ol i kamapim klia namba 1 bikpela laik bilong ol—ol i laik lotuim God wanpela tasol, na ol i no laik lotuim ol narapela samting.—Dan. 1:1–3:30.

12. Sapos yumi laik lotuim Jehova wanpela tasol, orait yumi mas abrusim wanem ol samting?

¹² Sapos yumi laik lotuim Jehova wanpela tasol, orait yumi no ken larim narapela samting i pulim bikpela haptaim, tingting, na strong bilong yumi. Wanem sampela eksampel bilong ol dispela samting? Long Tenpela Lo, Jehova i kamapim klia olsem ol manmeri bilong em i no ken lotuim ol narapela god, na ol i no ken insait long pasin bilong lotuim ol imis. (Lo 5:6-10) Long nau, ol man inap mekim planti kain kain samting we i stap olsem pasin bilong lotuim god giaman, na ol bai hatwok long luksave long dispela. Tasol lo bilong Jehova i no senis—“em wanpela tasol” em i Jehova. Orait nau, yumi ken stori long olsem wanem dispela inap helpim yumi.

13. Yumi inap laikim moa wanem ol samting winim Jehova?

¹³ Kolosi 3:5 (ritim) i givim strongpela tok long ol Kristen long ol samting we inap bagarapim pasin pren bilong ol wantaim Jehova. Pasin gridi i wankain long pasin bilong lotuim ol god giaman. Baibel i tok laik bilong man long kisim planti mani kago inap kontrolim laip bilong em olsem wanpela strongpela god. Tasol sapos yumi skelim ves olgeta, ol narapela pasin long dispela ves i poroman wantaim pasin gridi, olsem na ol tu i wankain olsem pasin bilong lotuim ol imis. Sapos yumi laikim tumas ol dispela pasin, dispela bai pasim yumi long laikim God. Sapos yumi larim ol dispela laik nogut i kontrolim yumi, yu ting yumi bai stap gut yet long lotuim Jehova olsem “em wanpela tasol em i God”? Nogat, yumi no inap stap gut long lotuim em.

14. Aposel Jon i givim wanem tok lukaut?

 ¹⁴ Aposel Jon i mekim wankain tok taim em i givim wanpela tok lukaut. Em i tok, sapos man i laikim ol samting bilong dispela graun—“laik nogut bilong bel na pasin bilong aigris na pasin bilong hambak long mani kago”—orait “pasin bilong laikim Papa i no stap long em.” (1 Jon 2:15, 16) Dispela i makim olsem oltaim yumi mas skelim gut bel bilong yumi na painimaut sapos yumi save laikim ol amamas bilong graun, ol poroman ausait, na ol stail bilong bilas em ol manmeri bilong graun i save bihainim. Na tu, sapos man i laikim ol samting bilong dispela graun, em inap go long bikpela skul bambai em inap kisim “ol gutpela samting.” (Jer. 45:2-5) Yumi stap pinis long dua bilong i go insait long nupela taim em God i bin tok promis long kamapim. Olsem na em i bikpela samting long yumi mas tingim strongpela tok bilong Moses! Sapos yumi kliagut na bilip tru olsem Jehova “em wanpela tasol em i God bilong yumi,” yumi bai mekim olgeta samting yumi inap mekim long lotuim em wanpela tasol long pasin em i laikim.—Hib. 12:28, 29.

15. Bilong wanem Pol i kirapim ol Kristen long tingim gen olsem Jehova, “em wanpela tasol em i God”?

¹⁵ Taim yumi ol wokman bilong Jehova i stap wanbel na holim wanpela tingting tasol, dispela i soim klia olsem Jehova em wanpela tasol em i Jehova. Long taim bilong ol aposel, kongrigesen Kristen i gat ol lain Juda, lain Grik, lain Rom, na ol manmeri bilong ol narapela kantri. Ol dispela manmeri i kamap bikpela long narapela narapela lotu na kastam. Olsem na sampela i hatwok long lusim olpela pasin bilong ol na bihainim nupela wei bilong mekim lotu. Aposel Pol i kirapim ol long tingim gen olsem ol Kristen i gat wanpela God tasol, em Jehova.—Ritim 1 Korin 8:5, 6.

16, 17. (a) Wanem tok profet i kamap tru long taim bilong yumi? (b) Wanem gutpela samting i kamap? (c) Wanem samting inap bagarapim pasin bilong yumi long i stap wanbel?

 ¹⁶ Olsem wanem long ol kongrigesen long nau? Aisaia i tok profet olsem “wanpela taim bai i kamap bihain” na ples bilong mekim lotu i tru long Jehova bai i stap antap tru na ol manmeri bilong olgeta kantri bai i go long dispela hap. Ol bai tok: “[God] i ken skulim yumi long ol pasin em i laik yumi mekim, na bai yumi ken wokabaut long rot em yet i makim.” (Ais. 2:2, 3) Yumi amamas tru long lukim dispela tok profet i kamap tru long nau! Olsem na planti kongrigesen i gat ol manmeri bilong kain kain skin kala, kalsa, na tokples, na ol i givim biknem long Jehova. Tasol sampela taim, hevi inap kamap.

¹⁷ Skelim: Yu save pilim olsem wanem long ol Kristen em ol i bilong narapela kalsa? Ating tokples, klos, pasin, na kaikai bilong ol i no wankain olsem bilong yu. Yu save sem long bung wantaim ol na yu bung tasol wantaim ol narapela husat i gat wankain kalsa na tokples olsem bilong yu? Yu bai pilim olsem wanem sapos wanpela brata long kongrigesen bilong yu—o sekit o brens ofis—i kisim asainmen long mekim wok wasman na em i yangpela moa long yu o em i bilong narapela kalsa o skin kala? Yu save larim ol dispela kain samting i pasim yu long i stap wanbel na holim wanpela tingting tasol olsem ol arapela husat i lotuim Jehova?

18, 19. (a) Wanem tok kaunsel i stap long Efesus 4:1-3? (b) Yumi ken mekim wanem bilong helpim kongrigesen long i stap wanbel?

¹⁸ Wanem samting inap helpim yumi na yumi no pundaun long kain traim olsem? Pol i givim tok kaunsel long ol Kristen long Efesus, em wanpela taun i gat planti wok bisnis na ol manmeri bilong kain kain kalsa i stap long en. (Ritim Efesus 4:1-3.) Pastaim, Pol i kolim ol kain pasin olsem pasin daun, pasin isi, pasin bilong i no les kwik, na pasin laikim. Ol dispela pasin bai stap olsem ol pos bilong haus we i holim haus na haus inap sanap strong. Maski haus i gat ol strongpela pos, oltaim man i mas mekim wok meintenens long en bambai haus i no ken bagarap. Pol i kirapim ol Kristen long Efesus long wok strong long “holimpas pasin wanbel bilong holi spirit.”

¹⁹ Yumi olgeta wan wan i mas tingim olsem yumi gat wok long strongim pasin wanbel insait long kongrigesen. Yumi inap mekim wanem? Yumi ken kamapim ol pasin em Pol i kolim—pasin daun, pasin isi, i no les kwik, na pasin laikim. Yumi mas wok strong long bihainim ol “pasin i save bungim yumi wantaim.” Yumi mas stretim ol liklik hevi we inap bagarapim pasin wanbel, na long dispela rot yumi inap i stap bel isi wantaim ol narapela.

20. Olsem wanem yumi inap soim olsem Jehova “em wanpela tasol em i God bilong yumi”?

²⁰ Jehova “em wanpela tasol em i God bilong yumi.” Dispela tok i strongim tru lain Israel long karim ol hevi i painim ol na ol i go kisim Graun Bilong Promis. Sapos yumi pilim tru dispela tok long bel bilong yumi, yumi bai sanap strong long taim bilong traipela hevi tru na yumi bai kisim laip long Paradais. Olsem na yumi mas wok yet long lotuim Jehova wanpela tasol, na givim bel olgeta long strongim pasin wanbel namel long lain brata bilong yumi. Sapos yumi mekim olsem, yumi inap bilip na wet long lukim truim bilong tok Jisas i mekim long lain i stap olsem ol sipsip: “Yupela husat i kisim blesing long Papa bilong mi, yupela kam. Kisim dispela Kingdom ol i redim bilong yupela kirap long taim ol manmeri i bon long graun.”—Mat. 25:34.