Pasin Bilong God i Dia Tumas Winim Daimon
Kirap long bipo yet na i kam inap long nau, daimon em wanpela ston we ol man i skelim olsem em i nambawan tru na em i gat bikpela pe. Pe bilong sampela daimon i winim planti milion kina. Tasol olsem wanem long tingting bilong God? Yu ting i gat sampela samting we i dia tumas na i winim daimon na ol narapela gutpela ston?
Haykanush em wanpela meri husat i kamap pablisa i no baptais yet na em i stap long Amenia. Wanpela taim em i painim wanpela paspot klostu long haus bilong em. Insait long paspot, i gat ol benk kat na bikpela mani tru. Haykanush i tokim man bilong em long dispela samting. Man bilong Haykanush tu em wanpela pablisa i no baptais yet.
Long dispela taim, Haykanush na man bilong em i sot tru long mani na tupela i gat bikpela dinau em tupela i mas bekim. Maski i olsem, tupela i bringim mani na olgeta samting i go long man em atres bilong em i stap long paspot. Papa bilong paspot na famili bilong em i kirap nogut tru long dispela samting. Haykanush na man bilong em i stori long dispela famili olsem tupela i kisim skul long Baibel na dispela i stiaim tupela long bihainim honest pasin. Tupela i yusim dispela haptaim long stori long wok bilong ol Witnes Bilong Jehova na tupela i lusim sampela litresa wantaim dispela famili.
Dispela famili i laik givim sampela mani long Haykanush olsem presen bilong em long kisim paspot i kam long ol, tasol Haykanush i tok nogat. Long neks de, meri bilong papa bilong paspot i go long haus bilong Haykanush na man bilong em na em i strong tru na i givim daimon ring bilong soim tok tenkyu bilong em na famili bilong em.
Wankain olsem dispela famili, planti manmeri bai kirap nogut long onest pasin bilong Haykanush na man bilong em. Tasol yu ting Jehova bai kirap nogut long onest pasin bilong tupela? Em bai pilim olsem wanem long pasin bilong tupela? Yu ting tupela i bihainim stretpela tingting long mekim onest pasin?
OL GUTPELA PASIN I WINIM TRU MANI KAGO
Bekim bilong ol dispela askim i no hatwok. Ol wokman bilong God i bilip olsem taim ol i bihainim ol pasin bilong Jehova, dispela i gutpela moa na i winim tru pe bilong daimon, gol, na ol narapela samting. Yes, tingting bilong Jehova i winim tru tingting bilong ol man long wanem ol samting i nambawan tru na wanem ol samting i no gutpela tumas. (Ais. 55:8, 9) Ol wokman bilong Jehova i amamas tru taim ol i bihainim gut ol pasin bilong em.
Yumi ken skelim tok bilong Baibel long pasin bilong bihainim gutpela tingting na save. Sindaun 3:13-15 i tok: “Man i kisim gutpela tingting na save, em i ken amamas tru, long wanem, gutpela na stretpela tingting i winim tru silva na gol na ol gutpela ston i dia tumas. Na tu em i winim olgeta arapela samting yu laikim tumas.” Yumi luksave stret olsem, long ai bilong Jehova, ol dispela gutpela pasin i dia tumas winim tru pe bilong ol nambawan samting bilong dispela graun.
Orait, olsem wanem long onest pasin?
Jehova yet em papa bilong mekim onest pasin; em “i no inap giaman.” (Tai. 1:2) Holi spirit i kirapim aposel Pol long raitim pas i go long ol Hibru Kristen na em i tok: “Yupela i mas wok oltaim long beten bilong helpim mipela. Mipela i bilip olsem maus bilong bel bilong mipela i stap stret, na long olgeta samting mipela i mekim, mipela i laik wokabaut stret.”—Hib. 13:18.
Jisas Krais i stap gutpela piksa long mekim onest pasin. Het Pris Kaiafas i tok strong long Jisas olsem: “Long nem bilong God i stap laip, yu mas tok tru antap na tokim mipela olsem yu dispela Krais, Pikinini bilong God, o nogat?” Jisas i bihainim onest pasin na tokaut olsem em i Mesaia, maski dispela tok i mekim na lain Sanhedrin i tok em i tok bilas long God na ol i mas kilim em i dai.—Mat. 26:63-67.
Olsem wanem? Yumi bai bihainim onest pasin sapos sans i kamap na isi tru long yumi inap mekim tok giaman na kisim planti mani kago?
ONEST PASIN—HATWOK LONG BIHAINIM
Long dispela haptaim bilong las de, i hatwok tru long mekim onest pasin bikos planti man i “laikim ol yet tasol” na ol i “laikim tumas mani.” (2 Tim. 3:2) Na tu, planti man i gat hevi bilong mani, na i hatwok tru long painim wok mani. Olsem na ol i holim tingting olsem ol i ken stil na mekim pasin giaman. Planti man i pilim olsem i no gat rong sapos ol i giaman na dispela i opim rot long ol inap kisim mani kago. Sampela Kristen i bin pundaun long dispela hevi bikos ol i tingting tasol long kisim mani kago na ‘helpim ol yet,’ olsem na ol i no pas gut moa wantaim kongrigesen.—1 Tim. 3:8; Tai. 1:7.
Planti Kristen i bihainim pasin bilong Jisas. Ol i luksave olsem ol gutpela pasin bilong God i winim tru olgeta kain mani kago. Olsem na ol yangpela Kristen long skul i no save mekim pasin giaman bambai ol inap kisim ol gutpela mak. (Snd. 20:23) Taim yumi mekim onest pasin, em tru olsem sampela taim ol man i no inap givim presen bilong tok amamas long yumi olsem ol i bin mekim long Haykanush. Maski i olsem, onest pasin i stret long ai bilong God, na yumi bai holim yet klinpela maus bilong bel, na dispela em samting i dia tumas.
Tingim stori bilong Gagik. Em i tok: “Paslain long mi kamap wanpela Kristen, mi bin mekim wok mani long wanpela bikpela kampani na papa bilong kampani i no laik baim takis, olsem na em i save givim ripot olsem kampani i no kisim bikpela profit. Mi mekim wok olsem dairekta bilong kampani, olsem na bos i laik bai mi mas braibim man bilong kisim takis bambai em i haitim pasin giaman bilong kampani. Dispela i mekim na mi kisim nem olsem man bilong giaman. Mi kisim bikpela pe long dispela wok, tasol taim mi kisim save long tok i tru, mi stopim dispela pasin. Mi kirapim bisnis bilong mi yet, na mi rejistaim kampani bilong mi na baim olgeta takis.”—2 Kor. 8:21.
Gagik i tok moa: “Mani i kam insait long bisnis i go daun inap 50 pesen, olsem na dispela i givim hatwok long mi long lukautim famili. Tasol nau mi amamas moa. Maus bilong bel i stap klin long ai bilong Jehova. Mi soim gutpela pasin em 2-pela pikinini man bilong mi i ken bihainim, na mi inap mekim sampela wok insait long kongrigesen. Ol lain bilong kisim takis na ol lain mi wok bisnis wantaim ol i tingim mi nau olsem man bilong mekim onest pasin.”
JEHOVA EM MAN BILONG GIVIM HELPIM
Jehova i laikim tru ol manmeri husat i bilasim ol yet wantaim ol gutpela pasin bilong em, olsem onest pasin. (Tai. 2:10) God i kirapim King Devit long mekim dispela tok: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai, na i raun askim ol arapela man long givim kaikai long ol. Nogat tru.”—Sng. 37:25.
Stori bilong bilipmeri Rut i kamapim klia dispela samting. Taim tambu mama bilong em, Naomi, i kamap lapun, Rut i pas gut wantaim em. Rut i go stap long Israel na em inap lotuim God tru. (Rut 1:16, 17) Taim Rut i stap long Israel, em i mekim onest pasin na em i wok hat tru long raun long gaden wit na bungim ol wit i stap yet long gaden olsem Lo i makim. Jehova i lukautim gut Rut na Naomi long klos na kaikai, na bihain Devit yet i luksave long dispela samting. (Rut 2:2-18) Jehova i givim gutpela blesing tru long Rut. Em i makim Rut long kamap tumbuna bilong King Devit na Mesaia!—Rut 4:13-17; Mat. 1:5, 16.
Sampela wokman bilong Jehova i pilim olsem wok mani bilong ol i no inap tru long helpim ol long kisim ol samting ol i nidim. Tasol ol i no laik mekim pasin giaman, olsem na ol i wok hat tru na givim bel tru long bihainim stretpela rot. Ol i kamapim klia olsem ol i tingim tru ol gutpela pasin bilong God, kain olsem onest pasin, na dispela pasin i winim tru ol mani kago.—Wankain olsem Rut i bin mekim long bipo tru, ol Kristen long olgeta hap bilong graun i bilip olsem Jehova i gat strong long helpim ol. Ol i bilip tru long Man husat i bin mekim dispela tok promis i stap long Baibel: “Mi no inap tru long lusim yu o givim baksait long yu long wanpela samting.” (Hib. 13:5) Planti taim Jehova i soim olsem em inap helpim ol man husat i stap rabis, tasol ol i bihainim onest pasin long olgeta taim. Em i truim tok promis bilong em long givim ol samting ol man i nidim long i stap laip.—Mat. 6:33.
Ol man i laikim tumas daimon na ol narapela samting i gat bikpela pe long en. Tasol yumi ken bilip tru olsem Papa bilong yumi long heven i save amamas tru taim yumi bihainim onest pasin na ol narapela gutpela pasin bilong em, na olgeta dispela pasin i winim tru olgeta kain ston i dia tumas!
Taim yumi mekim onest pasin, bel bilong yumi i no kotim yumi, na yumi stap fri long autim tok