Yu bin ritim gut ol nupela Wastaua? Yu ken traim bekim ol dispela askim:

Wai na Jehova i orait long ol woa long taim bilong ol Israel long bipo?

Jehova i gat pasin laikim. Tasol taim ol narapela lain i mekim hatpela pasin na daunim lain Israel, God i save tokim ol long i go pait long ol birua. God wanpela tasol i makim husat lain bai insait long pait na wanem taim pait bai kamap.—w15 11/1, p. 4-5.

Papamama i mas mekim wanem long trenim tineja long mekim wok bilong Jehova?

Em i bikpela samting long papamama i mas laikim tru tineja pikinini na bihainim pasin daun. Na tu, papamama i mas bihainim savetingting na wok strong long pilim tingting bilong tineja.—w15 11/15, p. 9-11.

Wai na yumi no ken ting pop em i senis bilong Pita?

Matyu 16:17, 18 i no tok olsem aposel Pita bai stap het bilong kongrigesen Kristen, nogat. Baibel i tok Jisas em i dispela ston bilong strongim kongrigesen. (1 Pita 2:4-8)—w15 12/1, p. 12-14.

Yumi mas tingim wanem ol samting paslain long yumi toktok?

Sapos yumi laik mekim gutpela wok long maus, orait yumi mas tingim (1) taim bilong toktok (Sav. 3:7), (2) wanem tok yumi bai mekim (Snd. 12:18), na (3) wei bilong toktok (Snd. 25:15).—w15 12/15, p. 19-22.

Wanem sampela pasin giaman em ol Kristen i mas abrusim?

Ol Kristen tru i mas abrusim pasin giaman na pasin bilong bagarapim gutnem bilong ol narapela. Ol i no ken mekim ol tok giaman we inap bagarapim bel bilong ol narapela. Na tu, ol i no ken paulim mani o stilim mani bilong ol narapela.—wp16.1, p. 5.

Husat em “ol bikpris” em Baibel i kolim?

Dispela tok, “ol bikpris,” i makim ol man i mekim wok pris na ol man em ol i rausim ol long wok hetpris.—wp16.1, p. 10.

Yumi mas soim wanem kain pasin long Kristen husat i kisim bret na wain long Memorial?

Ol Kristen i no save preisim ol arapela husat i kisim bret na wain. Ol Kristen em God i makim ol long holi spirit, ol i no laik bai ol narapela i preisim ol, na tu, ol i no laik bai ol narapela i save olsem God i makim ol. (Mat. 23:8-12)—w16.01, p. 23-24.

Hau na Abraham i kamap pren bilong God?

Ating Abraham i kisim save long God long rot bilong Siem. Abraham i kisim sampela save moa taim em i skelim pasin God i mekim long em na famili bilong em. Yumi tu i ken bihainim pasin bilong Abraham.—w16.02, p. 9-10.

Hau na ol i kamapim pasin bilong tilim ol tok bilong Baibel long ol sapta na ves?

Long yia 1200 C.E., pris Stephen Langton i tilim ol tok bilong Baibel i go long ol sapta. Pastaim, ol saveman bilong lain Juda i tilim ol tok bilong Ol Skripsa Hibru i go long ol ves, na bihain long yia 1500 C.E., saveman Robert Estienne i mekim wankain samting long ol tok bilong Ol Skripsa Grik.—wp16.2, p. 14-15.

Yu ting Satan i kisim Jisas na bringim em i go long tempel long traim em?

Yumi no save. Matyu 4:5 na Luk 4:9 inap makim olsem Jisas i stap long banis bilong tempel long rot bilong visen, o em i stap long sampela hap bilong tempel.—w16.03, p. 31-32.

Hau na wok autim tok i olsem wara bilong nait i pundaun long graun?

Wara bilong nait i save kamap isi isi na i givim strong na laip long ol samting. Wara i kamap long graun em blesing i kam long God. (Lo 33:13) Olsem tasol, taim lain bilong God i wok bung wantaim long autim tok, dispela i olsem blesing.—w16.04, p. 4.